ಧಾರವಾಡ ಎಸಿ ಕಚೇರಿಯಲ್ಲಿ ಪುನುಗು ಬೆಕ್ಕು ಪ್ರತ್ಯಕ್ಷ

ಧಾರವಾಡ: ನಗರದ ಉಪವಿಭಾಗಾಧಿಕಾರಿ ಕಚೇರಿ ಆವರಣದಲ್ಲಿ ಇಂದು ಪುನುಗು ಬೆಕ್ಕನ್ನು ಕಂಡು ಅಧಿಕಾರಿಗಳು ಹಾಗೂ ಸಾರ್ವಜನಿಕರು ಒಂದು ಕ್ಷಣ ಗಾಬರಿಯಾಗಿದ್ದಾರೆ.

ಪುನುಗು ಬೆಕ್ಕು ಕಂಡು ಕೆಲವರು ಹೌಹಾರಿದರೆ, ಇನ್ನೂ ಕೆಲವರು ಕುತೂಹಲದಿಂದ ನೋಡುತ್ತ ನಿಂತಿದ್ದರು. ಬೆಳ್ಳಂಬೆಳ್ಳಗ್ಗೆ ಉಪವಿಭಾಗಾಧಿಕಾರಿ ಕಚೇರಿ ಆವರಣದಲ್ಲಿ ನಾಲ್ಕು ಗಂಟೆಗೂ ಅಧಿಕ ಕಾಲ ಪುನುಗು ಬೆಕ್ಕು ಕಾಣಿಸಿಕೊಂಡಿದೆ.

ಕಚೇರಿಗೆ ಬರುತ್ತಿದ್ದ ಸಿಬ್ಬಂದಿ ಹಾಗೂ ಜನ ಪುನುಗು ಬೆಕ್ಕನ್ನು ಕುತೂಹಲದಿಂದ ನೋಡುತ್ತಲೇ ನಿಂತಿದ್ದರು. ಸುಮಾರು ನಾಲ್ಕು ಗಂಟೆಗಳ ಈ ಬೆಕ್ಕು ಕಚೇರಿ ಆವರಣದಲ್ಲಿಯೇ ಓಡಾಡುತ್ತಿತ್ತು. ಬಳಿಕ ಉರಗ ತಜ್ಞ ಯಲ್ಲಪ್ಪ ಸ್ಥಳಕ್ಕಾಗಮಿಸಿ, ಈ ಅಪರೂಪದ ಬೆಕ್ಕನ್ನು ಸೆರೆ ಹಿಡಿದು ಅರಣ್ಯದಲ್ಲಿ ಬಿಟ್ಟು ಬಂದಿದ್ದಾರೆ. ಇತ್ತೀಚೆಗೆ ಧಾರವಾಡದಲ್ಲಿ ಅಲ್ಲಲ್ಲಿ ಪುನುಗು ಬೆಕ್ಕುಗಳು ಕಂಡು ಬರುತ್ತಿದ್ದು, ಇದರ ಸಂತತಿ ಧಾರವಾಡದಲ್ಲಿ ಹೆಚ್ಚಾಗಿದೆಯಾ ಎನ್ನುವ ಸಂಶಯ ವ್ಯಕ್ತವಾಗಿದೆ.