ಪ್ರೀತಿ ನಿರಾಕರಿಸಿದ್ದಕ್ಕೆ ತಾಯಿ, ಮಗಳ ಮೇಲೆ ಹಲ್ಲೆ ನಡೆಸಿದ ವಿವಾಹಿತ

– ಯುವತಿಯ ಕೈ, ಕಾಲು ಮುರಿದ ಗೂಂಡಾ ಪ್ರೇಮಿ

ಯಾದಗಿರಿ: ಪ್ರೀತಿ ನಿರಾಕರಿಸಿದ್ದಕ್ಕೆ ಮಗಳು ಮತ್ತು ತಾಯಿಯ ಮೇಲೆ ವಿವಾಹಿತ ಗೂಂಡಾ ಪ್ರೇಮಿಯೊಬ್ಬ ಹಾಡಹಗಲೇ ಮಾರಣಾಂತಿಕ ಹಲ್ಲೆ ನಡೆಸಿದ ಘಟನೆ ಯಾದಗಿರಿ ನಗರದ ಸುಭಾಷ್ ವೃತ್ತದಲ್ಲಿ ನಡೆದಿದೆ.

ಮುದ್ನಾಳ ದೊಡ್ಡ ತಾಂಡಾದ ನಿವಾಸಿ ಆನಂದ ಹಲ್ಲೆ ನಡೆಸಿದ ಗೂಂಡಾ ಪ್ರೇಮಿ. ಕಲಬುರಗಿ ಜಿಲ್ಲೆಯ ಮಳಖೇಡದ ನಿವಾಸಿ ಬೇಬಿಬಾಯಿ ಹಾಗೂ ಮಗಳು ಪ್ರಿಯಾಂಕಾ ಹಲ್ಲೆಗೊಳಗಾಗಿದ್ದಾರೆ. ಮಳಖೇಡದಿಂದ ಖಾಸಗಿ ಕೆಲಸಕ್ಕೆಂದು ಪ್ರಿಯಾಂಕಾ ತಮ್ಮ ತಾಯಿಯ ಜೊತೆ ಯಾದಗಿರಿಗೆ ಬಂದಿದ್ದರು. ಆನ್‍ಲೈನ್‍ನಲ್ಲಿ ಅರ್ಜಿ ಸಲ್ಲಿಸುವಾಗ ಕಂಪೂಟರ್ ಕೇಂದ್ರಕ್ಕೆ ನುಗ್ಗಿದ ಆನಂದ್ ಮತ್ತು ಅವನ ಕುಟುಂಬಸ್ಥರು ಏಕಾಏಕಿ ಪ್ರಿಯಾಂಕಾ ಹಾಗೂ ಆಕೆಯ ತಾಯಿ ಮೇಲೆ ಹಲ್ಲೆ ಮಾಡಿದ್ದಾರೆ.

ಹೆಣ್ಣುಮಕ್ಕಳು ಅಂತ ನೋಡದೆ ಕಬ್ಬಿಣದ ರಾಡ್‍ನಿಂದ ಮನಸೋಯಿಚ್ಛೆ ಥಳಿಸಿದ ಆನಂದ ಮತ್ತು ಕುಟುಂಬಸ್ಥರು, ಪ್ರಿಯಾಂಕಾಳ ಕಾಲು ಮತ್ತು ಕೈ ಮುರಿದಿದ್ದಾರೆ. ಆನಂದಗೆ ಈಗಾಗಲೇ ಮದುವೆಯಾಗಿದ್ದರೂ ಪ್ರಿಯಾಂಕಾಳನ್ನು ಪ್ರೀತಿ ಮಾಡುವಂತೆ ಕಿರುಕುಳ ಕೊಡುತ್ತಿದ್ದ ಎನ್ನಲಾಗಿದೆ.

ಆನಂದನ ಕಿರುಕುಳಕ್ಕೆ ಬೇಸತ್ತು ಪ್ರಿಯಾಂಕಾ ಕುಟುಂಬಸ್ಥರು ಈಗಾಗಲೇ ಮಳಖೇಡ ಠಾಣೆಯಲ್ಲಿ ದೂರು ಸಹ ದಾಖಲಿಸಿದ್ದಾರಂತೆ. ಹೀಗಾಗಿ ಇದರಿಂದ ಆನಂದ ಪ್ರಿಯಾಂಕಾ ಕುಟುಂಬಸ್ಥರ ಮೇಲೆ ದ್ವೇಷ ಇಟ್ಟುಕೊಂಡಿದ್ದನು. ಬೇಬಿಬಾಯಿ, ಪ್ರಿಯಾಂಕಾ ಮಂಗಳವಾರ ಯಾದಗಿರಿ ಬಂದಿದ್ದನ್ನು ತಿಳಿದ ಆನಂದ ಮತ್ತು ಕುಟುಂಬಸ್ಥರು ಹಲ್ಲೆ ನಡೆಸಿದ್ದಾರೆ. ಹಲ್ಲೆ ಮಾಡಿದ ದೃಶ್ಯ ಸಿಸಿಟಿವಿಯಲ್ಲಿ ಕ್ಯಾಮರಾದಲ್ಲಿ ಸೆರೆಯಾಗಿದ್ದು, ಮಹಿಳಾ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣ ದಾಖಲಾಗಿದೆ.