ಸ್ಟಾರ್ ಹೋಟೆಲ್ ಮಹಿಳಾ ಉದ್ಯೋಗಿಯಿಂದ ಉದ್ಯಮಿ ಕಿಡ್ನಾಪ್

– ರೇಪ್ ಬೆದರಿಕೆ ಒಡ್ಡಿ 30 ಲಕ್ಷಕ್ಕೆ ಡಿಮ್ಯಾಂಡ್

ನವದೆಹಲಿ: ಖಾಸಗಿ ಕಂಪನಿಯ ಉದ್ಯಮಿಯನ್ನು ಅಪಹರಣ ಮಾಡಿದ ಆರೋಪದಲ್ಲಿ ಸ್ಟಾರ್ ಹೋಟೆಲ್ ಮಹಿಳಾ ಉದ್ಯೋಗಿ ಸೇರಿದಂತೆ 6 ಮಂದಿಯನ್ನ ಪೊಲೀಸರು ಬಂಧಿಸಿರುವ ಘಟನೆ ನವದೆಹಲಿಯಲ್ಲಿ ನಡೆದಿದೆ.

ದೆಹಲಿಯ ಚಾಣಕ್ಯಪುರಿ ಪ್ರದೇಶದ ಪಂಚತಾರಾ ಹೋಟೆಲ್‍ನಲ್ಲಿ ಕೆಲಸ ಮಾಡುತ್ತಿದ್ದ ಮಹಿಳೆ ಸೇರಿದಂತೆ ನಾಲ್ವರು ಮಹಿಳೆಯರು ಕೃತ್ಯದಲ್ಲಿ ಭಾಗಿಯಾಗಿದ್ದು, 6 ಗಂಟೆಗಳ ಕಾಲ ನಾಟಕೀಯ ಬೆಳವಣಿಗೆಗಳಲ್ಲಿ ಕೊನೆಗೂ ಪೊಲೀಸರು ಆರೋಪಿಗಳನ್ನು ಬಂಧಿಸಿ ಉದ್ಯಮಿಯನ್ನು ರಕ್ಷಣೆ ಮಾಡಿದ್ದಾರೆ.

ಏನಿದು ಪ್ರಕರಣ: 64 ವರ್ಷದ ಉದ್ಯಮಿಯೊಬ್ಬರು ಮುಂಬೈಯಿಂದ ದೆಹಲಿಗೆ ಕೆಲಸ ನಿಮಿತ್ತ ಆಗಮಿಸಿದ್ದರು. ಈ ವೇಳೆ ಅನಾಮಿಕ ಮಹಿಳೆಯಿಂದ ಕರೆ ಸ್ವೀಕರಿಸಿದ ಅವರು ಹೋಟೆಲ್ ಕೊಠಡಿಯಲ್ಲಿ ಮಹಿಳೆಯನ್ನು ಭೇಟಿ ಮಾಡಲು ನಿರ್ಧಸಿದ್ದರು. ಉದ್ಯಮಿ ಹೋಟೆಲ್ ಕೊಠಡಿಗೆ ತೆರಳುತ್ತಿದಂತೆ ಅಲ್ಲಿಗೆ ಮತ್ತೆ 3 ಮಹಿಳೆಯರು ಆಗಮಿಸಿದ್ದರು.

ಮಹಿಳೆ ಉದ್ಯಮಿಯನ್ನ ತನ್ನ ಮನೆಗೆ ಕರೆದುಕೊಂಡು ಹೋಗಲು ಒಪ್ಪಿಸಿದ್ದು, ಆ ಬಳಿಕ ಮನೆಗೆ ತೆರಳಿದ ವೇಳೆ ತನ್ನ ನೈಜ ಸ್ವರೂಪವನ್ನು ತೆರೆದಿಟ್ಟಿದ್ದಾಳೆ. ತನ್ನ ಮಗಳ ಮೇಲೆ ಉದ್ಯಮಿ ರೇಪ್ ಮಾಡಿದ್ದಾನೆ ಎಂದು ಎಲ್ಲರಿಗೂ ತಿಳಿಸುವುದಾಗಿ ಬೆದರಿಕೆ ಹಾಕಿ, 30 ಲಕ್ಷ ರೂ.ಗಳನ್ನು ನಮಗೆ ನೀಡುವಂತೆ ಬೇಡಿಕೆ ಮುಂದಿಟ್ಟಿದ್ದಾಳೆ. ಇದರಿಂದ ಹೆದರಿದ ಆತ ತನ್ನ ಸಂಸ್ಥೆಯ ನೌಕರನಿಗೆ ಕರೆ ಮಾಡಿ ಹಣ ತರಲು ತಿಳಿಸಿದ್ದಾನೆ.

ಉದ್ಯಮಿ ಏಕಾಏಕಿ ಹಣ ತರಲು ಹೇಳಿದ್ದ ಬಗ್ಗೆ ಅನುಮಾನಗೊಂಡ ಆತ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಈ ಬಗ್ಗೆ ಕಾರ್ಯಾಚರಣೆಗೆ ಇಳಿದ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ. ಹೋಟೆಲ್ ಬಳಿ ಇದ್ದ ಸಿಸಿಟಿವಿ ದೃಶ್ಯ ಹಾಗೂ ಉದ್ಯಮಿ ತೆರಳಿದ್ದ ಕಾರಿನ ಮಾಹಿತಿ ಪಡೆದ ಪೊಲೀಸರು ಆರೋಪಿಗಳನ್ನು ಪತ್ತೆ ಮಾಡಲು ಯಶಸ್ವಿಯಾಗಿದ್ದಾರೆ.