ವಡೋದರಾದಲ್ಲಿ ‘ಬ್ಯಾಗ್ ಫ್ರೀ’ ಶಿಕ್ಷಣಕ್ಕೆ ವಿದ್ಯಾರ್ಥಿಗಳು ಖುಷ್

ಗಾಂಧಿನಗರ: ವಡೋದರಾದ ಸರ್ಕಾರಿ ಶಾಲೆಗಳಲ್ಲಿ “ಬ್ಯಾಗ್ ಫ್ರೀ” ಶಿಕ್ಷಣ ನೀಡುವ ವಿಶಿಷ್ಟ ವಿಧಾನಕ್ಕೆ ವಿದ್ಯಾರ್ಥಿಗಳು ಫುಲ್ ಖುಷ್ ಆಗಿದ್ದು, ಈ ಪ್ರಯತ್ನಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

ಗುಜರಾತಿನ ವಡೋದರಾದಲ್ಲಿ ಸರ್ಕಾರಿ ಪ್ರಾಥಮಿಕ ಶಾಲೆಗಳಲ್ಲಿ ಓದುತ್ತಿರುವ ಮಕ್ಕಳು ಬ್ಯಾಗ್ ಹೊರೆ ಹೊತ್ತು ಶಾಲೆಗೆ ಹೋಗುವುದಿಲ್ಲ. ಬದಲಾಗಿ ವಿದ್ಯಾರ್ಥಿಗಳಿಗೆ ಶಿಕ್ಷಣ ಪಡೆಯಲು ಅನುಕೂಲವಾಗುವಂತೆ ಅಧ್ಯಯನ ಕಿಟ್‍ಗಳನ್ನು ನೀಡಲಾಗುತ್ತಿದೆ. ಅಲ್ಲದೆ ಶಾಲೆಯಲ್ಲಿ ಮಕ್ಕಳು ಇದನ್ನು ಬಳಸಿ ಕೊನೆಗೆ ಮನೆಗೆ ಮರಳುವಾಗ ಶಿಕ್ಷಕರು ಕಿಟ್‍ಗಳನ್ನು ಶಾಲೆಯಲ್ಲಿಯೇ ಇರಿಸಿಕೊಳ್ಳುತ್ತಾರೆ. ಹೀಗಾಗಿ ಖಾಲಿ ಕೈಯಲ್ಲಿ ಆಟವಾಡುತ್ತಾ ಮಕ್ಕಳು ಶಾಲೆಗೆ ಬರುತ್ತಾರೆ.

ಸ್ಟಡಿ ಕಿಟ್‍ಗಳ ಸಹಾಯದಿಂದ ಪಾಠ ಕಲಿತು, ಬಳಿಕ ಸ್ಟಡಿ ಕಿಟ್‍ಗಳನ್ನು ಶಾಲೆಯಲ್ಲಿಯೇ ಬಿಟ್ಟು ಮನೆಗೆ ತೆರಳುತ್ತಾರೆ. ಅಲ್ಲದೆ ಮಕ್ಕಳಿಗೆ ಯಾವುದೇ ಹೋಮ್‍ವರ್ಕ್ ಕೂಡ ಇಲ್ಲಿ ನೀಡಲಾಗುವುದಿಲ್ಲ. ಕೇವಲ ಓದು ಮಾತ್ರವಲ್ಲದೆ ಪಠ್ಯೇತರ ಚಟುವಟಿಕೆಗಳಿಗೂ ಇಲ್ಲಿ ಇಲ್ಲಿ ಶಾಲೆಗಳಲ್ಲಿ ಆದ್ಯತೆ ನೀಡಲಾಗುತ್ತದೆ. ಕಥೆ ಹೇಳುವುದು, ಹಾಡುಗಳು ಮತ್ತು ನಟನೆ ಹೀಗೆ ಪ್ರಾಯೋಗಿಕ ವಿಧಾನಗಳನ್ನು ಬಳಸಿ ಮಕ್ಕಳಿಗೆ ಕಲಿಸಲಾಗುತ್ತದೆ ಎಂದು ಶಾಲೆಯೊಂದರ ಮುಖ್ಯೋಪಾಧ್ಯಾಯರಾದ ಜಿಗರ್ ಠಾಕೂರ್ ತಿಳಿಸಿದರು.

ಶಿಕ್ಷಣ ವ್ಯವಸ್ಥೆಯಲ್ಲಿ ಸುಧಾರಣೆಗಳನ್ನು ತರಲು ರಾಜ್ಯ ಸರ್ಕಾರ ಪ್ರಜ್ಞಾ ಉಪಕ್ರಮದ ಯೋಜನೆ ಆರಂಭಿಸಿದೆ. ಬ್ಯಾಗ್ ಫ್ರೀ ಶಿಕ್ಷಣ, ಸ್ಟಡಿ ಕಿಟ್ ಈ ಯೋಜನೆಯ ಒಂದು ಭಾಗವಾಗಿದೆ. ಮಕ್ಕಳೂ ಕೂಡ ಈ ವ್ಯವಸ್ಥೆಯಿಂದ ಖುಷಿ ಖುಷಿಯಾಗಿ ಶಾಲೆಗೆ ಬರುತ್ತಿದ್ದು, ಶಿಕ್ಷಣ ಕಾರ್ಯಕ್ರಮದಲ್ಲಿ ಉತ್ಸಾಹದಿಂದ ಪಾಲ್ಗೊಳ್ಳುತ್ತಿದ್ದಾರೆ ಎಂದು ಮುಖ್ಯೋಪಾಧ್ಯಾಯರು ಹೇಳಿದ್ದಾರೆ.

ಈ ನೂತನ ವಿಧಾನದ ಬಗ್ಗೆ ವಿದ್ಯಾರ್ಥಿಯೋರ್ವ ಪ್ರತಿಕ್ರಿಯೆ ನೀಡಿ, ನಾವು ಪಾಠ ಕಲಿಯಲು ಶಾಲೆಯಲ್ಲಿಯೇ ನೋಟ್ ಬುಕ್‍ಗಳನ್ನು ಕೊಡುತ್ತಾರೆ. ಪ್ರತಿದಿನ ಹಲವು ಹೊಸ ಚಟುವಟಿಕೆಗಳನ್ನು ಶಾಲೆಯಲ್ಲಿ ನಾವು ಕಲಿಯುತ್ತೇವೆ. ಬಳಿಕ ಮನೆಗೆ ವಾಪಸ್ ಹೋಗುವಾಗ ನಮ್ಮ ಪುಸ್ತಕಗಳನ್ನು ನಾವು ಶಾಲೆಯಲ್ಲಿಯೇ ಇಟ್ಟು ಹೋಗುತ್ತೇವೆ. ಆದ್ದರಿಂದ ನಾವು ಬ್ಯಾಗ್‍ಗಳನ್ನು ಶಾಲೆಗೆ ತೆಗೆದುಕೊಂಡು ಹೋಗುವ ಅಗತ್ಯವಿಲ್ಲ ಎಂದು ಖುಷಿ ಹಂಚಿಕೊಂಡಿದ್ದಾನೆ.