ಇವ್ರು ಯಶ್ ಅಭಿಮಾನಿ-ಒಮ್ಮೆ ಈ ಅಜ್ಜಿಯ ಮಾತುಗಳನ್ನು ಕೇಳಿ

– ಕೆಜಿಎಫ್ ನೋಡಲು ಹೋದ ಅಜ್ಜಿಗೆ ಹೀಗೆ ಹೇಳೋದಾ?

ಬೆಂಗಳೂರು: ಕನ್ನಡದ ಕಿರೀಟ ಅಂತಾನೇ ಪಾತ್ರವಾಗಿರುವ ಕೆಜಿಎಫ್ ಸಿನಿಮಾ ಎಲ್ಲ ವರ್ಗದವರನ್ನು ತಲುಪವಲ್ಲಿ ಯಶಸ್ವಿಯಾಗಿದೆ. ಸಿನಿಮಾ ಬಿಡುಗಡೆಯಾಗಿ ವಾರಗಳೇ ಕಳೆದ್ರೆ ಕೆಜಿಎಫ್ ಫೀವರ್ ಮಾತ್ರ ಕಡಿಮೆಯಾಗುತ್ತಿಲ್ಲ. ಹೊಸ ವರ್ಷದ ಸಂಭ್ರಮದಲ್ಲಿರುವ ಜನರು ಇನ್ನೊಂದು ಸಾರಿ ಕೆಜಿಎಫ್ ನೋಡೋಣ ಎಂದು ಚಿತ್ರಮಂದಿರದತ್ತ ಹೆಜ್ಜೆ ಹಾಕುತ್ತಿದ್ದಾರೆ. ಎರಡೆರಡು ಬಾರಿ ಚಿತ್ರ ನೋಡುವಂತೆ ಕೆಜಿಎಫ್ ಮೋಡಿ ಮಾಡಿದೆ.

ಹಿರಿಯರು ಸಹ ಚಿತ್ರಮಂದಿರಗಳತ್ತ ತೆರಳಿ ಕೆಜಿಎಫ್ ನೋಡುತ್ತಿದ್ದಾರೆ. ಇದೀಗ ಕೆಜಿಎಫ್ ಸಿನಿಮಾ ನೋಡಿ ಅಜ್ಜಿಯ ಮಾತು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಅಜ್ಜಿಯ ಮುದ್ದು ಮಾತುಗಳಿಗೆ ಮನಸೋಲುವ ನೆಟ್ಟಿಗರು ತಮ್ಮ ಖಾತೆಗಳಲ್ಲಿ ವಿಡಿಯೋ ಶೇರ್ ಮಾಡಿಕೊಳ್ಳುತ್ತಿದ್ದಾರೆ.

ವಿಡಿಯೋದಲ್ಲಿ ಏನಿದೆ?
ಯಶು, ನನ್ನ ಹೆಸರು ಸಾವಿತ್ರಮ್ಮ, ನನಗೆ 77 ವರ್ಷ ಆಗಿದೆಯಪ್ಪ. ನಿನ್ನ ನೋಡಬೇಕು ಅಂತಾ ತುಂಬಾ ಇಷ್ಟ ಆಯ್ತು. ಸೆಕೆಂಡ್ ಶೋಗೆ ಹೋಗಿ ಕೆಜಿಎಫ್ ಸಿನಿಮಾ ನೋಡಿಕೊಂಡು ಬಂದೆ. ಆದ್ರೆ ಎಲ್ಲರು ನನ್ನನ್ನು ನಕ್ಕು, ಈ ವಯಸ್ಸಾಗಿರೋ ಅಜ್ಜಿಗೆ ಯಾಕೆ ಬೇಕು ಸಿನಿಮಾ ಅಂತಾ ಮಾತಾಡಿಕೊಂಡರು. ಏನೋ ಗೊತ್ತಿಲ್ಲ ನೀನೆಂದ್ರೆ ನನಗಿಷ್ಟ. ನಿನ್ನ ಫೋಟೋ ನೋಡಿ ಕಣ್ತುಂಬಿಕೊಳ್ಳುತ್ತೇನೆ. ನಾನು ಸಾಯೋದರಲ್ಲಿ ನಿನ್ನ ಮುಖ ನೋಡಬೇಕೆಂಬ ಅಸೆ ಇದೆ. ನಿನ್ನ ಧರ್ಮಪತ್ನಿ ರಾಧಿಕಾ ಪಂಡಿತ್ ಪುಣ್ಯ ಮಾಡಿದ್ದಾಳೆ. ನಿನ್ನ ಮಗಳು ಸಹ ಅದೃಷ್ಟವಂತೆ. ದೇವರು ನಿನಗೆ ಒಳ್ಳೆಯದನ್ನು ಮಾಡಲಿ ಅಂತಾ ಪ್ರಾರ್ಥಿಸಿಕೊಳ್ಳುತ್ತೇನೆ ಅಂತಾ ಅಜ್ಜಿ ನಗುಮೊಗದಿಂದ ಹೇಳಿದ್ದಾರೆ.

ಅಜ್ಜಿ ವಿಡಿಯೋದಲ್ಲಿ ತಮ್ಮ ಹೆಸರು ಹೇಳಿಕೊಂಡಿದ್ದು, ತಾವು ಎಲ್ಲಿಯವರು ಎಂಬುದನ್ನು ಹೇಳಿಕೊಂಡಿಲ್ಲ. ಕಳೆದ ಕೆಲ ದಿನಗಳಿಂದ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.

ಹಿರಿಯರನ್ನು ಆಕರ್ಷಿಸಿದ್ದು ಹೇಗೆ ಕೆಜಿಎಫ್?:
ಈಗ ತೆರೆಕಾಣುತ್ತಿರುವ ಸಿನಿಮಾಗಳು ಸದ್ಯದ ಟ್ರೆಂಡ್‍ನಂತೆ ಮೂಡಿಬರುತ್ತಿವೆ. ಇದು ಹಿರಿಯ ನಾಗರಿಕರಿಗೆ ನೋಡಲು ಮುಜುಗರ ಅನ್ನಿಸುತ್ತಿತ್ತು. ಇನ್ನು ಕೆಲವೊಂದು ಸಿನಿಮಾಗಳು ರಕ್ತಮಯವಾಗಿ, ಹೊಡಿ ಬಡಿ ದೃಶ್ಯಗಳನ್ನೇ ಒಳಗೊಂಡಿರುತ್ತವೆ. ಆದ್ರೆ ಕೆಜಿಎಫ್ ಒಂದು ಭೂಗತ ಲೋಕ, ಗೋಲ್ಡ್ ಮೈನಿಂಗ್ ಜೊತೆಗೆ ಮಾಸ್ ಫಿಲಂ ಆಗಿದ್ದರೂ ಎಲ್ಲಿಯೂ ಕ್ರೌರ್ಯವನ್ನು ಅಥವಾ ರಕ್ತವನ್ನು ಹೆಚ್ಚು ತೋರಿಸಿಲ್ಲ. ನಿರ್ದೇಶಕ ಪ್ರಶಾಂತ್ ನೀಲ್ ಎಲ್ಲವನ್ನು ಹದವಾಗಿ ಬೆರಸಿ ಹಿತವಾದ ಆಹಾರವನ್ನು ನೋಡುಗರಿಗೆ ನೀಡಿದ್ದಾರೆ. 1970-80ರ ಕಾಲಘಟ್ಟವನ್ನು ಮರುಸೃಷ್ಟಿಸಲು ಕಲಾ ನಿರ್ದೇಶಕ ಶಿವುಕುಮಾರ್ ಸಕ್ಸಸ್ ಆಗಿದ್ದು, ನಿರ್ದೇಶಕರ ಕಲ್ಪನೆಯನ್ನು ಛಾಯಾಗ್ರಾಹಕ ಭುವನ್ ಗೌಡ ತೆರೆಯ ಮೇಲೆ ಅಚ್ಚುಕಟ್ಟಾಗಿ ತೋರಿಸಿದ್ದಾರೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv, ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv