ಫುಡ್ ಡೆಲೆವರಿ ಬಾಯ್ಸ್ ಕೈಗೆ ಸಿಕ್ಕಿ ಬಿದ್ರು ದರೋಡೆಕೋರರು!

ಬೆಂಗಳೂರು: ಗ್ರಾಹಕರಂತೆ ಫುಡ್ ಆರ್ಡರ್ ಮಾಡಿ, ದರೋಡೆ ಮಾಡುತ್ತಿದ್ದ ಐದು ಮಂದಿ ಆರೋಪಿಗಳನ್ನು ಫುಡ್ ಡೆಲಿವರಿ ಬಾಯ್ಸ್ ತಂಡವೊಂದು ಗುರುವಾರ ರಾತ್ರಿ ಸೆರೆ ಹಿಡಿದು, ಪೊಲೀಸರಿಗೆ ಒಪ್ಪಿಸಿದ ಘಟನೆ ಶೇಷಾದ್ರಿಪುರಂನಲ್ಲಿ ನಡೆದಿದೆ.

ಬುಧವಾರ ರಾತ್ರಿ ಊಟ ಬುಕ್ ಮಾಡಿ ಮಲ್ಲೇಶ್ವರಂಗೆ ತಂದುಕೊಡುವಂತೆ ವ್ಯಕ್ತಿಯೊಬ್ಬ ಆರ್ಡರ್ ಮಾಡಿದ್ದ. ರಾಜಾಜಿನಗರದ ಫುಡ್ ಕೋರ್ಟ್ ನಿಂದ ಮುಬಾರಕ್ ಎನ್ನುವವರು ಊಟವನ್ನು ಬೈಕಿನಲ್ಲಿ ತಗೆದುಕೊಂಡು ಹೋಗುತ್ತಿದ್ದರು. ಈ ವೇಳೆ ಐದು ಜನ ಮುಬಾರಕ್ ಅವರಿಗೆ ಅಡ್ಡಗಟ್ಟಿ, ಚಾಕು ಇರಿದು, ಮೊಬೈಲ್ ಹಾಗೂ ಹಣ ದರೋಡೆ ಮಾಡಿದ್ದರು.

ಘಟನೆಯಿಂದಾಗಿ ಫುಡ್ ಡೆಲಿವರಿ ಬಾಯ್ಸ್ ಜಾಗೃತಗೊಂಡಿದ್ದು, ಗುರುವಾರ ರಾತ್ರಿಯೂ ಇಂತಹದ್ದೇ ಕರೆ ಬಂದಿತ್ತು. ಹೀಗಾಗಿ ಒಬ್ಬ ಹುಡುಗನನ್ನು ಮುಂದೆ ಕಳುಹಿಸಿ, ಹಿಂದೆ ತಂಡವಾಗಿ ಹುಡುಗರು ಹೋಗಿದ್ದರು. ದಾರಿಯಲ್ಲಿ ಒಬ್ಬಂಟಿಯಾಗಿ ಸಿಕ್ಕಿದ್ದ ಹುಡುಗನಿಂದ ಹಣ, ಮೊಬೈಲ್ ದರೋಡೆ ಮಾಡುತ್ತಿದ್ದಂತೆ, ಎಲ್ಲ ಹುಡುಗರು ದರೋಡೆಕೋರರನ್ನು ಸೆರೆ ಹಿಡಿದು ಶೇಷಾದ್ರಿಪುರಂ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಪ್ರಕರಣ ಕುರಿತು ಶೇಷಾದ್ರಿಪುರಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.