ವೆಲ್ಲಿಂಗ್ಟನ್: ಮಹಿಳಾ ವಿಶ್ವಕಪ್‍ನ ಎರಡನೇ ಹೋರಾಟದಲ್ಲಿ ಭಾರತ ತಂಡ ಸೋಲು ಕಂಡಿದೆ. ಭಾರತದ ಪರ ಹರ್ಮನ್‍ಪ್ರೀತ್ ಕೌರ್ ಏಕಾಂಗಿ ಹೋರಾಟದ ನಡುವೆಯೂ ನ್ಯೂಜಿಲೆಂಡ್ ತಂಡ 65 ರನ್‍ಗಳಿಂದ ಗೆದ್ದಿದೆ.
ಭಾರತ ತಂಡ ವಿಶ್ವಕಪ್‍ನ ಮೊದಲ ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ಭರ್ಜರಿ ಜಯ ದಾಖಲಿಸಿದರೆ, ಎರಡನೇ ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ ಬ್ಯಾಟಿಂಗ್‍ನಲ್ಲಿ ವೈಫಲ್ಯ ಅನುಭವಿಸಿ ಸೋಲು ಕಂಡಿದೆ. ಗೆಲ್ಲಲು 261 ರನ್ ಗುರಿ ಪಡೆದ ಭಾರತ ಆರಂಭದಿಂದಲೇ ವಿಕೆಟ್ ಕಳೆದುಕೊಂಡು ಸಾಗಿತು. ಸ್ಮೃತಿ ಮಂದಾನ 6 ಮತ್ತು ದೀಪ್ತಿ ಶರ್ಮಾ 5 ರನ್‍ಗಳಿಗೆ ವಿಕೆಟ್ ನೀಡಿ ನಿರಾಸೆ ಅನುಭವಿಸಿದರು. ಇದನ್ನೂ ಓದಿ: ವಿಶ್ವಕಪ್‍ನಲ್ಲಿ ಅತೀ ಹೆಚ್ಚು ವಿಕೆಟ್ – ದಾಖಲೆ ಸರಿಗಟ್ಟಿದ ಜೂಲನ್ ಗೋಸ್ವಾಮಿ
ನಂತರ ಜೊತೆಯಾದ ನಾಯಕಿ ಮಿಥಾಲಿ ರಾಜ್ ಮತ್ತು ಹರ್ಮನ್‍ಪ್ರೀತ್ ಕೌರ್ ತಂಡಕ್ಕೆ ಚೇತರಿಕೆ ನೀಡಿದರು. ಈ ಜೋಡಿ 4ನೇ ವಿಕೆಟ್‍ಗೆ 47 ರನ್ (63 ಎಸೆತ) ಜೊತೆಯಾಟವಾಡಿ ಬೇರ್ಪಟ್ಟಿತು. ಮಿಥಾಲಿ ರಾಜ್ 31 ರನ್ (56 ಎಸೆತ, 1 ಬೌಂಡರಿ) ಸಿಡಿಸಿ ಔಟ್ ಆದರು. ಆ ಬಳಿಕ ಏಕಾಂಗಿ ಹೋರಾಟ ನಡೆಸಿದ ಹರ್ಮನ್‍ಪ್ರೀತ್ ಕೌರ್ 71 ರನ್ (63 ಎಸೆತ, 6 ಬೌಂಡರಿ, 2 ಸಿಕ್ಸ್) ಸಿಡಿಸಿ ಕೊನೆಗೆ ವಿಕೆಟ್ ಒಪ್ಪಿಸಿ ಹೊರ ನಡೆದರು.
ಆ ಬಳಿಕ ಭಾರತದ ಯಾವೊಬ್ಬ ಬ್ಯಾಟರ್ ಕೂಡ ಹೋರಾಡಲಿಲ್ಲ. ಕೊನೆಗೆ 46.4 ಓವರ್‌ಗಳಲ್ಲಿ ಟೀಂ ಇಂಡಿಯಾ 198 ರನ್‍ಗಳಿಗೆ ಸರ್ವಪತನ ಕಂಡಿತು. ನ್ಯೂಜಿಲೆಂಡ್ ಪರ ಲೀ ತಹುಹು ಮತ್ತು ಅಮೆಲಿಯಾ ಕೆರ್ ತಲಾ 3 ವಿಕೆಟ್, ಹೇಲಿ ಜೆನ್ಸನ್ 2 ವಿಕೆಟ್ ಮತ್ತು ಹನ್ನಾ ರೋವ್, ಜೆಸ್ ಕೆರ್ ತಲಾ 1 ವಿಕೆಟ್ ಕಿತ್ತು ಭಾರತದ ಬ್ಯಾಟರ್‌ಗಳಿಗೆ ಕಡಿವಾಣ ಹಾಕಿದರು. ಇದನ್ನೂ ಓದಿ: ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ಶ್ರೀಶಾಂತ್‌ ವಿದಾಯ
ಈ ಮೊದಲು ನ್ಯೂಜಿಲೆಂಡ್ ತಂಡ ಅಮೆಲಿಯಾ ಕೆರ್ 50 ರನ್ (64 ಎಸೆತ, 5 ಬೌಂಡರಿ), ಆಮಿ ಸ್ಯಾಟರ್ಥ್‍ವೈಟ್ 75 ರನ್ (84 ಎಸೆತ, 9 ಬೌಂಡರಿ) ಮತ್ತು ಕೇಟಿ ಮಾರ್ಟಿನ್ 41 ರನ್ (51 ಎಸೆತ, 3 ಬೌಂಡರಿ) ಬಾರಿಸಿ ತಂಡಕ್ಕೆ ನೆರವಾದರು. ಅಂತಿಮವಾಗಿ 50 ಓವರ್‌ಗಳ ಅಂತ್ಯಕ್ಕೆ ನ್ಯೂಜಿಲೆಂಡ್ 9 ವಿಕೆಟ್ ಕಳೆದುಕೊಂಡು 260 ರನ್ ಮಾಡಿತು. ಭಾರತದ ಪರ ಪೂಜಾ ವಸ್ತ್ರಕರ್ 4 ವಿಕೆಟ್ ಕಿತ್ತು ಮಿಂಚಿದರು.
