Tag: Vaibhavi Joshi

ಬೆಂಗಳೂರು: ಕಿರುತೆರೆ ಜಗತ್ತಿನಲ್ಲಿ ಅದ್ದೂರಿತನದ ಸೂಪರ್ ಹಿಟ್ ಮೆಗಾ ಧಾರಾವಾಹಿಗಳನ್ನು ನಿರ್ದೇಶನ ಮಾಡಿ ಸೈ ಅನ್ನಿಸಿಕೊಂಡಿದ್ದವರು ರಾಣಾ ಸುನೀಲ್ ಕುಮಾರ್ ಸಿಂಗ್. ಅವರು ಧಾರಾವಾಹಿ ಲೋಕದಿಂದ ಹಿರಿತೆರೆಯತ್ತ ಮುಖ ಮಾಡಿ ಒಂದಷ್ಟು ವರ್ಷಗಳೇ ಕಳೆದಿವೆ. ಈ ಹಿಂದೆ ‘ಮದುವೆ ಮನೆ’ ಎಂಬ ಚಿತ್ರ ನಿರ್ದೇಶನ ಮಾಡಿದ್ದ ಅವರು ಇದೀಗ ತಮ್ಮ ಜೀವಿತದ ಮಹಾ ಕನಸಿನಂಥಾ ‘www.ಮೀನಾ ಬಜಾರ್.ಕಾಮ್’ ಎಂಬ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಅದ್ದೂರಿ ಮೇಕಿಂಗ್ ಸೂಚನೆಗಳೊಂದಿಗೇ ಮನಸೆಳೆದಿರೋ ಈ ಚಿತ್ರವೀಗ ಬಿಡುಗಡೆಗೆ ಸಜ್ಜಾಗಿದೆ. ಇದೀಗ ‘ಮೀನಾ ಬಜಾರ್’ನ ಮೋಹಕವಾದ ಟೀಸರ್ ಬಿಡುಗಡೆಗೊಂಡಿದೆ.

ಹೇಳಿಕೇಳಿ ರಾಣಾ ಸುನೀಲ್ ಕುಮಾರ್ ಸಿಂಗ್ ಎಂದರೆ ಅದ್ದೂರಿತನ ಎಂಬಂಥಾ ಇಮೇಜ್ ಇದೆ. ಅದಕ್ಕೆ ತಕ್ಕುದಾಗಿಯೇ ಈ ಟೀಸರ್ ರೂಪುಗೊಂಡಿದೆ. ರೋಮಾಂಚಕ ಸನ್ನಿವೇಶಗಳ ಆಳದಲ್ಲಿ ರೌದ್ರ ಲೋಕದ ಕಥೆಯೊಂದಿರೋ ಸುಳಿವಿನೊಂದಿಗೆ ಈ ಟೀಸರ್ ಈಗ ವ್ಯಾಪಕ ಮೆಚ್ಚುಗೆಯನ್ನೂ ಪಡೆದುಕೊಳ್ಳುತ್ತಿದೆ. ಎಲ್ಲವನ್ನೂ ಕಾಣಿಸಿ ಏನೂ ಗೊತ್ತಾಗದಂಥಾ ಭಾವ ಹುಟ್ಟಿಸಿ ಅಚ್ಚರಿ ಮತ್ತು ಸಿನಿಮಾದೆಡೆಗಿನ ಕುತೂಹಲ ಕಾಯ್ದಿಟ್ಟುಕೊಳ್ಳುವ ತಂತ್ರಗಾರಿಕೆಯೊಂದಿಗೆ ಮೂಡಿ ಬಂದಿರೋ ಈ ಟೀಸರ್ ನಿಜಕ್ಕೂ ಪ್ರಾಮಿಸಿಂಗ್ ಆಗಿದೆ.

ಸಿ.ಎನ್.ನಾಗೇಂದ್ರ ಸಿಂಗ್ ನಿರ್ಮಾಣ ಮಾಡಿರೋ ‘ಮೀನಾ ಬಜಾರ್’ ಏಕ ಕಾಲದಲ್ಲಿಯೇ ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ನಿರ್ಮಾಣಗೊಂಡಿದೆ. ಅತ್ಯಂತ ಸಾವಕಾಶದಿಂದ ವರ್ಷಗಟ್ಟಲೆ ಸಮಯ ತೆಗೆದುಕೊಂಡೇ ಸುನೀಲ್ ಕುಮಾರ್ ಸಿಂಗ್ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಮುಖ್ಯ ಪಾತ್ರದಲ್ಲಿಯೂ ನಟಿಸಿದ್ದಾರೆ. ಈ ಟೀಸರ್‍ನಲ್ಲಿಯೇ ಈ ಸಿನಿಮಾ ಮೂಡಿ ಬಂದಿರೋ ರೀತಿಯೂ ಸ್ಪಷ್ಟವಾಗಿ ಜಾಹೀರಾಗಿದೆ. ಪ್ರತಿ ದೃಶ್ಯಗಳೂ ಕಣ್ಣಿಗೆ ಹಬ್ಬದಂತೆ ಕಾಣಿಸುತ್ತಾ, ಮೋಹಕ್ಕೀಡು ಮಾಡುತ್ತಲೇ ಬೆಚ್ಚಿ ಬೀಳೋ ಹೊಳಹುಗಳನ್ನೂ ನೀಡುವ ಮೂಲಕ ಮೀನಾ ಬಜಾರ್ ಟೀಸರ್ ಇದೀಗ ಎಲ್ಲೆಡೆ ಹರಿದಾಡಲಾರಂಭಿಸಿದೆ.