ಅಮೆರಿಕದಲ್ಲಿ ಡೊನಾಲ್ಡ್ ಟ್ರಂಪ್ (Donald Trump) ಅಧ್ಯಕ್ಷರಾಗಿ ಆಯ್ಕೆಯಾಗಿರುವುದು ಚೀನಾಗೆ (China) ತಲೆನೋವು ತಂದಿದೆ. ಟ್ರಂಪ್ ಮತ್ತೆ ಅಧಿಕಾರಕ್ಕೆ ಮರಳಿರುವುದು ಇಡೀ ವಿಶ್ವದಲ್ಲಿ ರಾಜಕೀಯ ಮತ್ತು ಆರ್ಥಿಕ ಸಮೀಕರಣಗಳನ್ನು ಬದಲಿಸಿದೆ. ಇತರೆ ದೇಶಗಳೊಂದಿಗಿನ ಅಮೆರಿಕ ವ್ಯಾಪಾರ ಒಪ್ಪಂದದಲ್ಲಿ ಬದಲಾವಣೆಯ ಸುಳಿಗಾಳಿ ಬೀಸಿದೆ. ‘ಅಮೆರಿಕ ಫಸ್ಟ್’ ಎಂಬುದು ಟ್ರಂಪ್ ಪಾಲಿಸಿ. ಇದು ಆರ್ಥಿಕವಾಗಿ ಪ್ರಬಲವಾಗಿರುವ ಇತರೆ ರಾಷ್ಟ್ರಗಳಿಗೆ ಪೆಟ್ಟು ನೀಡುವುದಂತೂ ಖಂಡಿತು. ಅದಕ್ಕಾಗಿ ನೂತನ ಅಮೆರಿಕ ಅಧ್ಯಕ್ಷರು ‘ವಾಣಿಜ್ಯ ಯುದ್ಧ’ (Trade War) ಎಂಬ ‘ಟ್ರಂಪ್’ ಕಾರ್ಡ್ ಅನ್ನು ಮತ್ತೆ ಬಳಸಲು ಮುಂದಾಗಿದ್ದಾರೆ. ಈ ಹಿಂದೆ ಜಪಾನ್ ಮೇಲೆ ಈ ಅಸ್ತ್ರವನ್ನು ಅಮೆರಿಕ ಪ್ರಯೋಗಿಸಿತ್ತು. ಈಗ ಅದನ್ನು ಚೀನಾ ಮೇಲೆ ಪ್ರಯೋಗಿಸಲು ಮುಂದಾಗಿದೆ. ಜಾಗತಿಕ ಆರ್ಥಿಕತೆಯಾಗಿ ಬೆಳೆಯುತ್ತಿರುವ ಭಾರತ ಕೂಡ ಟಾರ್ಗೆಟ್ ಲಿಸ್ಟ್‌ನಲ್ಲಿದೆ ಎಂಬುದು ತಜ್ಞರ ಅಭಿಪ್ರಾಯ.
ಪಾಶ್ಚಿಮಾತ್ಯ ನೇತೃತ್ವದ ರಾಜಕೀಯ-ಆರ್ಥಿಕ ಕ್ರಮವನ್ನು ಅನುಸರಿಸದೆಯೇ ಕೆಲವೇ ದಶಕಗಳಲ್ಲಿ ಉತ್ಪಾದನಾ ಶಕ್ತಿ ಮತ್ತು ಪ್ರಮುಖ ಜಾಗತಿಕ ರಫ್ತುದಾರನಾಗಿ ಚೀನಾ ಆರ್ಥಿಕ ಬೆಳವಣಿಗೆ ಸಾಧಿಸಿದೆ. ಚೀನಾದ ಈ ಕ್ರಮವು ದೇಶದ ಕೋಟ್ಯಂತರ ಜನರನ್ನು ಬಡತನದಿಂದ ಮೇಲಕ್ಕೆತ್ತಿತು. ಆದಾಗ್ಯೂ, ಜಾಗತಿಕ ಪ್ರಾಬಲ್ಯಕ್ಕಾಗಿ ನಡೆಯುವ ‘ವಾಣಿಜ್ಯ ಯುದ್ಧ’ವು ಚೀನಾ ಬಾಗಿಲಿಗೆ ಬಂದು ನಿಂತಿದೆ. ಏಕೆಂದರೆ, ಮುಕ್ತ ವ್ಯಾಪಾರ ತತ್ವಗಳ ವಿರೋಧಿಯೇ ಆಗಿರುವ ಡೊನಾಲ್ಡ್ ಟ್ರಂಪ್ ಯುಎಸ್ ಅಧ್ಯಕ್ಷರಾಗಿ ಮತ್ತೆ ಆಯ್ಕೆಯಾಗಿದ್ದಾರೆ.
ಅಷ್ಟಕ್ಕೂ ಏನಿದು ವಾಣಿಜ್ಯ ಯುದ್ಧ? ಈ ಅಸ್ತ್ರ ಪ್ರಯೋಗ ಯಾಕೆ? ಒಂದು ರಾಷ್ಟ್ರಕ್ಕೆ ಇದರಿಂದಾಗುವ ಅನುಕೂಲ ಅನಾನುಕೂಲಗಳೇನು? ತಿಳಿಯೋಣ ಬನ್ನಿ..
ವಾಣಿಜ್ಯ ಯುದ್ಧ ಅಂದ್ರೇನು?
ಆಮದು ಸುಂಕವನ್ನು ಹೆಚ್ಚಿಸುವ ಮೂಲಕ ಅಥವಾ ಇತರ ದೇಶದ ಆಮದಿನ ಮೇಲೆ ನಿರ್ಬಂಧಗಳನ್ನು ಹೇರುವ ಮೂಲಕ ಒಂದು ದೇಶ ಮತ್ತೊಂದು ದೇಶದ ವಿರುದ್ಧ ಪ್ರತಿಕಾರ ತೀರಿಸಿಕೊಳ್ಳುವುದೇ ವಾಣಿಜ್ಯ ಯುದ್ಧ.
ವಾಣಿಜ್ಯ ಯುದ್ಧದ ಇತಿಹಾಸವೇನು?
* ಬ್ರಿಟಿಷ್ ಸಾಮ್ರಾಜ್ಯವು ಇಂತಹ ವ್ಯಾಪಾರ ಯುದ್ಧಗಳ ಇತಿಹಾಸವನ್ನು ಹೊಂದಿದೆ. 19ನೇ ಶತಮಾನದ ಚೀನಾದೊಂದಿಗಿನ ಅಫೀಮು ಯುದ್ಧಗಳಲ್ಲಿ ಇಂತಹ ಒಂದು ಉದಾಹರಣೆ ಕಾಣಬಹುದು.
* 1930 ರಲ್ಲಿ ಯುನೈಟೆಡ್ ಸ್ಟೇಟ್ಸ್ ಸ್ಮೂಟ್-ಹಾಲೆ ಸುಂಕ ಕಾಯ್ದೆಯನ್ನು ಜಾರಿಗೆ ತಂದಿತು. ಅಮೆರಿಕದ ರೈತರನ್ನು ಯುರೋಪಿಯನ್ ಕೃಷಿ ಉತ್ಪನ್ನಗಳಿಂದ ರಕ್ಷಿಸಲು ಸುಂಕವನ್ನು ಹೆಚ್ಚಿಸಿತು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಹಲವಾರು ರಾಷ್ಟ್ರಗಳು ತಮ್ಮದೇ ಆದ ಹೆಚ್ಚಿನ ಸುಂಕಗಳನ್ನು ವಿಧಿಸುವ ಮೂಲಕ ಯುನೈಟೆಡ್ ಸ್ಟೇಟ್ಸ್ ವಿರುದ್ಧ ಪ್ರತೀಕಾರ ತೀರಿಸಿಕೊಂಡವು. ಇದರಿಂದ ಜಾಗತಿಕ ವ್ಯಾಪಾರವು ವಿಶ್ವಾದ್ಯಂತ ಕುಸಿಯಿತು. ವಿನಾಶಕಾರಿ ವ್ಯಾಪಾರ ನೀತಿಗಳಿಂದ ಅಮೆರಿಕ ಮಹಾ ಆರ್ಥಿಕ ಕುಸಿತಕ್ಕೆ ಪ್ರವೇಶಿಸುತ್ತಿದ್ದಂತೆ, ಅಧ್ಯಕ್ಷ ರೂಸ್ವೆಲ್ಟ್ ಪರಸ್ಪರ ವ್ಯಾಪಾರ ಒಪ್ಪಂದಗಳ ಕಾಯ್ದೆ ಸೇರಿದಂತೆ ವ್ಯಾಪಾರ ಅಡೆತಡೆಗಳನ್ನು ಕಡಿಮೆ ಮಾಡಲು ಹಲವಾರು ಕಾರ್ಯಗಳನ್ನು ಜಾರಿಗೆ ತರಲು ಪ್ರಾರಂಭಿಸಿದರು.
* 2016 ರಲ್ಲಿ ಅಮೆರಿಕ ಅಧ್ಯಕ್ಷರಾಗಿ ಆಯ್ಕೆಯಾದ ಬಳಿಕ ಡೊನಾಲ್ಡ್ ಟ್ರಂಪ್ ಉಕ್ಕು ಮತ್ತು ಅಲ್ಯೂಮಿನಿಯಂನಿಂದ ಹಿಡಿದು ಸೌರ ಫಲಕಗಳ ವರೆಗೂ ಎಲ್ಲದಕ್ಕೂ ಸುಂಕ ವಿಧಿಸಿದರು. ಇದು ಯುರೋಪಿಯನ್ ಯೂನಿಯನ್ ಕೆನಡಾ, ಚೀನಾ ಮತ್ತು ಮೆಕ್ಸಿಕೊದ ಸರಕುಗಳ ಮೇಲೆ ಪರಿಣಾಮ ಬೀರಿತು. ವಾಣಿಜ್ಯ ಯುದ್ಧಕ್ಕೆ ಇಂತಹ ಹಲವಾರು ಉದಾಹರಣೆಗಳಿವೆ.
ಜಪಾನ್ ಮೇಲೆ ವಾಣಿಜ್ಯ ಯುದ್ಧ
‘ಅಗ್ಗದ’ ಚೀನಿ ರಫ್ತುಗಳನ್ನು ಗುರಿಯಾಗಿಸಿ ಟ್ರಂಪ್ ಚುನಾವಣಾ ಪ್ರಚಾರ ನಡೆಸಿದ್ದರು. ಇದು ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅವರಿಗೆ ಲಾಭವನ್ನು ತಂದುಕೊಟ್ಟಿದೆ. ಆರ್ಥಿಕ ಪ್ರಾಬಲ್ಯದ ಉದ್ದೇಶದಿಂದ ‘ಅಮೆರಿಕ ಮೊದಲು’ ಎಂಬ ಹಳೆಯ ಪ್ಲೇಕಾರ್ಡ್ ಅನ್ನೇ ಪ್ರಯೋಗಿಸಲಾಯಿತು. 1970 ರ ದಶಕದಲ್ಲಿ, ಯುಎಸ್ ಜಪಾನ್ ವಿರುದ್ಧ ಗಮನಾರ್ಹವಾದ ರೀತಿಯ ವಾಣಿಜ್ಯ ಯುದ್ಧ ನಡೆಸಿತ್ತು. ಸೋನಿ ಮತ್ತು ಟೊಯೋಟಾದಂತಹ ಬ್ರ‍್ಯಾಂಡ್‌ಗಳು ಗ್ರಾಹಕ ಎಲೆಕ್ಟ್ರಾನಿಕ್ಸ್ ಮತ್ತು ಆಟೋಮೊಬೈಲ್‌ಗಳಲ್ಲಿ ಜಾಗತಿಕ ಮಾರುಕಟ್ಟೆಗಳಲ್ಲಿ ಪ್ರಾಬಲ್ಯ ಸಾಧಿಸಿದಾಗಿನಿಂದ ‘ವಾಣಿಜ್ಯ ಯುದ್ಧ’ ಜಪಾನ್‌ಗೆ ಬೆದರಿಕೆಯಾಗಿ ಹೊರಹೊಮ್ಮಿದೆ. 2019ರ ಅವಧಿಯಲ್ಲೂ ಟ್ರಂಪ್ ಅಧ್ಯಕ್ಷರಾಗಿದ್ದಾಗ ಯೂರೋಪ್ ಮತ್ತು ಜಪಾನ್‌ನಂತಹ ಮಿತ್ರರು ತಯಾರಿಸುವ ಉಕ್ಕಿನ ಮೇಲೆ ಸುಂಕ ಹೇರಿದ್ದರು.
ವಾಣಿಜ್ಯ ತಜ್ಞರು ಹೇಳೋದೇನು?
ಚೀನಾ ಟ್ರಂಪ್‌ನ ಮೊದಲ ಟಾರ್ಗೆಟ್ ಆಗಬಹುದು. ಏಷ್ಯಾದಲ್ಲಿನ ತನ್ನ ಕಾರ್ಯತಂತ್ರದ ಸ್ಥಾನದಿಂದಾಗಿ ಭಾರತಕ್ಕೆ ಲಾಭವಾಗಬಹುದು ಎಂದು ಟ್ರೇಡ್ ಅರ್ಥಶಾಸ್ತ್ರಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ವಿಶ್ವ ವ್ಯಾಪಾರ ಸಂಸ್ಥೆಯಲ್ಲಿ (ಡಬ್ಲ್ಯೂಟಿಒ) ಸುಧಾರಣೆಗೆ ಸಲಹೆ ನೀಡುವುದು ಮತ್ತು ಸಕ್ರಿಯ ಪಾತ್ರವನ್ನು ವಹಿಸುವುದು ಭಾರತದ ಹಿತಾಸಕ್ತಿಯಾಗಿದೆ. ಆದರೆ, ಯುಎಸ್ ಮತ್ತು ಭಾರತ ನಿಕಟ ಪ್ರತಿಸ್ಪರ್ಧಿಗಳಾದಾಗ ಭಾರತದ ಔಷಧೀಯ ಮತ್ತು ಸೇವಾ ಕ್ಷೇತ್ರಗಳ ಮೇಲೆ ಪೆಟ್ಟು ಬೀಳುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.
ಟ್ರಂಪ್ 2ನೇ ಅವಧಿಯಲ್ಲೂ ಇರುತ್ತಾ ಲೈಟ್ಹೈಸರ್ ಪಾತ್ರ?
ಟ್ರಂಪ್‌ನ ಮೊದಲ ಆಡಳಿತದಲ್ಲಿ ರಾಬರ್ಟ್ ಲೈಟ್ಹೈಜರ್ ಯುಎಸ್ ಟ್ರೇಡ್ ರೆಪ್ರೆಸೆಂಟೇಟಿವ್ ಆಗಿದ್ದರು. ಎರಡನೇ ಅವಧಿಯಲ್ಲಿ ಇದೇ ರೀತಿಯ ಪಾತ್ರವು, ಟ್ರಂಪ್ ನೇತೃತ್ವದ ವಾಣಿಜ್ಯ ಯುದ್ಧವು ಅಮೆರಿಕಕ್ಕೆ ಉತ್ಪಾದನಾ ಉದ್ಯೋಗಗಳನ್ನು ಮರಳಿ ತರುವ ಗುರಿಯನ್ನು ಹೊಂದಿದೆ. ಹೊಸ ವ್ಯಾಪಾರದ ಆದ್ಯತೆಯಾಗಿ ಪರಿಣಮಿಸುತ್ತದೆ. ಇದರಿಂದ ಭಾರತ ಸೇರಿದಂತೆ ಎಲ್ಲಾ ದೇಶಗಳು ಅಡ್ಡಹಾಯುವ ಸಾಧ್ಯತೆಯಿದೆ. ಲೈಟ್ಹೈಜರ್‌ನ ನಾಯಕತ್ವದಲ್ಲಿ, ಭಾರತವು 2019 ರಲ್ಲಿ ತನ್ನ ಜನರಲೈಸ್ಡ್ ಸಿಸ್ಟಮ್ ಆಫ್ ಪ್ರಿಫರೆನ್ಸ್ (ಜಿಎಸ್‌ಪಿ) ಸ್ಥಾನಮಾನವನ್ನು ಕಳೆದುಕೊಂಡಿತ್ತು. ಇದು ಯುಎಸ್‌ಗೆ 5.7 ಶತಕೋಟಿ ಮೌಲ್ಯದ ಭಾರತೀಯ ರಫ್ತುಗಳ ಲಾಭವನ್ನು ತಂದುಕೊಟ್ಟಿದೆ.
ಮುಕ್ತ ವ್ಯಾಪಾರವು ಸುಲಭವಾದ ಆಮದುಗಳನ್ನು ಸಕ್ರಿಯಗೊಳಿಸುತ್ತದೆ. ಕಾರ್ಪೊರೇಟ್ ಲಾಭಗಳನ್ನು ಹೆಚ್ಚಿಸುತ್ತದೆ. ಇದು ಅಂತಿಮವಾಗಿ ಸ್ಥಳೀಯ ಸಮುದಾಯಗಳಿಗೆ ಉದ್ಯೋಗ ನಷ್ಟದಂತಹ ಸಮಸ್ಯೆಗಳನ್ನು ತಂದೊಡ್ಡುತ್ತದೆ ಎಂಬುದು ಲೈಟ್ಹೈಜರ್ ವಾದವಾಗಿದೆ.
ಯುಎಸ್ ಉತ್ಪಾದನಾ ಕಂಪನಿಗಳಿಗೆ ಇತರೆ ರಾಷ್ಟ್ರಗಳ ಕಂಪನಿಗಳು ‘ಅನ್ಯಾಯ’ದ ಸ್ಪರ್ಧೆ ಒಡ್ಡುವುದರ ವಿರುದ್ಧ ಸುಂಕದ ರಕ್ಷಣೆಯನ್ನು ಪಡೆಯಲು ದಶಕಗಳ ಕಾಲ ಸಹಾಯ ಮಾಡಿದ ಲೈಟ್ಹೈಜರ್, ಡಬ್ಲ್ಯೂಟಿಒ ನಿಯಮಗಳು ಯುಎಸ್‌ಗೆ ಹಾನಿಕಾರಕವಾಗಿದೆ ಎಂದು ನಂಬುತ್ತಾರೆ. ಏಕೆಂದರೆ ಡಬ್ಲ್ಯೂಟಿಒ, ಸುಂಕದ ಮೂಲಕ ತನ್ನ ಕೈಗಾರಿಕೆಗಳನ್ನು ರಕ್ಷಿಸಲು ಅಮೆರಿಕಾದ ಸಾರ್ವಭೌಮ ಹಕ್ಕನ್ನು ನಿರ್ಬಂಧಿಸಿದೆ ಎಂದು ಪ್ರತಿಪಾದಿಸಿದ್ದರು. 2019 ರಲ್ಲಿ ಅವರು, ಕೋರಮ್‌ಗೆ ಅಗತ್ಯವಾದ ನ್ಯಾಯಾಧೀಶರ ನೇಮಕಾತಿಯನ್ನು ನಿರ್ಬಂಧಿಸುವ ಮೂಲಕ ಡಬ್ಲ್ಯೂಟಿಒ ವಿವಾದ ಇತ್ಯರ್ಥ ಮಂಡಳಿಯನ್ನು ಪರಿಣಾಮಕಾರಿಯಾಗಿ ನಿಷ್ಕ್ರಿಯಗೊಳಿಸಿದರು. ಉನ್ನತ ವ್ಯಾಪಾರ ಸಂಸ್ಥೆಯಿಂದ ಯಾವುದೇ ಪರಿಣಾಮಗಳಿಲ್ಲದೆ ದೇಶಗಳ ಮೇಲೆ ಸುಂಕಗಳನ್ನು ವಿಧಿಸಲು ಇದು ಟ್ರಂಪ್‌ಗೆ ಅವಕಾಶ ಮಾಡಿಕೊಟ್ಟರು.
ಜಾಗತಿಕ ಪ್ರಾಬಲ್ಯಕ್ಕಾಗಿ ಶ್ರೀಮಂತ ರಾಷ್ಟ್ರಗಳು ವಾಣಿಜ್ಯ ನಿಯಮವನ್ನು ತಮಗೆ ಬೇಕಾದಂತೆ ಬಗ್ಗಿಸುವುದು ಭಾರತದಂತಹ ಅಭಿವೃದ್ಧಿಶೀಲ ರಾಷ್ಟçಗಳಿಗೆ ಪೆಟ್ಟು ನೀಡಬಹುದು ಎಂದು ವಾಣಿಜ್ಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಭಾರತ ಟಾರ್ಗೆಟ್ ಆಗುತ್ತಾ?
ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಫಾರಿನ್ ಟ್ರೇಡ್ (ಐಐಎಫ್‌ಟಿ) ಯ ಡಬ್ಲ್ಯುಟಿಒ ಅಧ್ಯಯನ ಕೇಂದ್ರದ ಮಾಜಿ ಮುಖ್ಯಸ್ಥ ಅಭಿಜಿತ್ ದಾಸ್, ಟ್ರಂಪ್ ಅವರ ಎರಡನೇ ಅವಧಿಯು ಡಬ್ಲ್ಯುಟಿಒ ನಿಯಮಗಳನ್ನು ಉಲ್ಲಂಘಿಸುವ ಕ್ರಮಗಳ ರಾಂಪ್-ಅಪ್ ಅನ್ನು ನೋಡಬಹುದು. ಯುಎಸ್‌ನಿಂದ ವಿಧಿಸಲಾದ ಯಾವುದೇ ಹೆಚ್ಚುವರಿ ತೆರಿಗೆಗಳಿಗೆ ಪ್ರತಿಕ್ರಿಯಿಸುವುದು ಭಾರತದ ಏಕೈಕ ಪರಿಣಾಮಕಾರಿ ವಿಧಾನವಾಗಿದೆ. ಉಕ್ಕು ಮತ್ತು ಅಲ್ಯೂಮಿನಿಯಂ ಮೇಲಿನ ಯುಎಸ್ ಸುಂಕಗಳಿಗೆ ಪ್ರತಿಕ್ರಿಯೆಯಾಗಿ ಭಾರತವು ಯುಎಸ್ ಕೃಷಿ ಉತ್ಪನ್ನಗಳ ಮೇಲೆ ಸುಂಕವನ್ನು ಹೆಚ್ಚಿಸಿದಾಗ ಈ ವಿಧಾನವು ಯಶಸ್ವಿಯಾಗಿದೆ ಎಂದು ಹೇಳುತ್ತಾರೆ.
ಚೀನಾ ವಿರುದ್ಧದ ಯುಎಸ್ ವಾಣಿಜ್ಯ ಯುದ್ಧವು, ವ್ಯಾಪಾರಕ್ಕಿಂತ ಮುಖ್ಯವಾಗಿ ಚೀನಾದ ತಾಂತ್ರಿಕ ಮತ್ತು ಹೈಟೆಕ್ ವಲಯಗಳನ್ನು ನಿಯಂತ್ರಿಸಲು ಪ್ರಯತ್ನಿಸುತ್ತಿದೆ. ಶ್ರೀಮಂತರು ಮತ್ತು ಶಕ್ತಿಶಾಲಿಗಳು ನಿಯಮಗಳನ್ನು ಉಲ್ಲಂಘಿಸಿದರೆ ಖಂಡಿತವಾಗಿಯೂ ಭಾರತಕ್ಕೆ ಪರಿಣಾಮ ಉಂಟಾಗುತ್ತವೆ. ಇಂದು, ಚೀನಾ ಗುರಿಯಾಗಿದೆ. ದಶಕಗಳ ಹಿಂದೆ ಜಪಾನ್ ಗುರಿಯಾಗಿತ್ತು. ನಾಳೆ ಭಾರತವೂ ಟಾರ್ಗೆಟ್ ಆಗಬಹುದು. ಯುಎಸ್ ಭಾರತವನ್ನು ಕೆಲವು ವಲಯಗಳಲ್ಲಿ ಸ್ಪರ್ಧಾತ್ಮಕ ಬೆದರಿಕೆ ಎಂದು ಗ್ರಹಿಸಿದೆ. ಫಾರ್ಮಾಸ್ಯುಟಿಕಲ್‌ಗಳಲ್ಲಿ ಭಾರತ ಈಗಾಗಲೇ ಅಮೆರಿಕದ ಹದ್ದಿನ ಕಣ್ಣಿಗೆ ಗುರಿಯಾಗಿದೆ ಎಂದು ದಾಸ್ ಅವರು ವಿಶ್ಲೇಷಿಸಿದ್ದಾರೆ.
ಈಚೆಗೆ ಚೀನಾದ ವಿರುದ್ಧ ಮಾಡಲಾದ ಎಲ್ಲಾ ಆರೋಪಗಳು ಒಮ್ಮೆ ಜಪಾನ್ ವಿರುದ್ಧ ಮಾಡಿದ ಆರೋಪಗಳಿಗೆ ಹೋಲುತ್ತವೆ. ಕಡಿಮೆ ಗುಣಮಟ್ಟದ ಸರಕುಗಳು, ಬೌದ್ಧಿಕ ಆಸ್ತಿ ಕಳ್ಳತನ, ಡಂಪಿಂಗ್.. ಈ ರೀತಿಯ ಆರೋಪಗಳು ಒಂದೇ ರೀತಿ ಇವೆ. ವ್ಯತ್ಯಾಸವೆಂದರೆ ಜಪಾನ್ ಭದ್ರತೆಗಾಗಿ ಯುಎಸ್ ಅನ್ನು ಅವಲಂಬಿಸಿದೆ. ಆದರೆ ಚೀನಾ ಮಾತ್ರ ಅದನ್ನು ಅವಲಂಬಿಸಿಲ್ಲ. ಯುಎಸ್ ತನ್ನ ಇಚ್ಛೆಗೆ ಜಪಾನ್ ಅನ್ನು ಬಗ್ಗಿಸಬಹುದು, ಆದರೆ ಚೀನಾದೊಂದಿಗೆ ಅದೇ ರೀತಿ ಮಾಡಲು ಸಾಧ್ಯವಾಗುವುದಿಲ್ಲ ಎಂದು ದಾಸ್ ಅಭಿಪ್ರಾಯಪಟ್ಟಿದ್ದಾರೆ.
ಔಷಧ ಮತ್ತು ಸೇವಾ ವಲಯ ಟಾರ್ಗೆಟ್?
ಯುಎಸ್‌ಗೆ ಹೆಚ್ಚು ಅನುಕೂಲಕರ ಮತ್ತು ದೇಶೀಯ ಕೈಗಾರಿಕೆಗಳನ್ನು ರಕ್ಷಿಸಲು ಅಮೆರಿಕದ ಟ್ರಂಪ್ ಆಡಳಿತವು ತನ್ನ ಟ್ರೇಡ್ ಪಾಲುದಾರರ ಮೇಲೆ ಸುಂಕಗಳನ್ನು ಅಸ್ತ್ರವಾಗಿ ಪ್ರಯೋಗಿಸಿದೆ ಎಂದು ಭಾರತೀಯ ರಫ್ತು ಸಂಸ್ಥೆಗಳ ಒಕ್ಕೂಟದ (ಎಫ್‌ಐಇಒ) ಮಹಾನಿರ್ದೇಶಕ ಮತ್ತು ಸಿಇಒ ಅಜಯ್ ಸಹಾಯ್ ತಿಳಿಸಿದ್ದಾರೆ.
ಯುಎಸ್‌ನೊಂದಿಗಿನ ಭಾರತದ ವ್ಯಾಪಾರ ಕೊರತೆಯು 2019 ರಲ್ಲಿ 25 ಶತಕೋಟಿಯಿಂದ 2023 ರ ಹೊತ್ತಿಗೆ 50 ಶತಕೋಟಿಗೆ ಹೆಚ್ಚಳವಾಗಿರುವುದು ಟ್ರಂಪ್‌ಗೆ ಇಷ್ಟವಾಗುವುದಿಲ್ಲ. ಚಿಕ್ಕ ಆರ್ಥಿಕತೆಯ ಹೊರತಾಗಿಯೂ, ಭಾರತವು ಚೀನಾದೊಂದಿಗೆ 100 ಶತಕೋಟಿ ವ್ಯಾಪಾರ ಕೊರತೆಯನ್ನು ನಿರ್ವಹಿಸುತ್ತಿದೆ. ಟ್ರಂಪ್‌ರ ಹಿಂದಿನ ಸುಂಕಗಳು ಮುಖ್ಯವಾಗಿ ಚೀನಾ, ಮೆಕ್ಸಿಕೊ, ಕೆನಡಾ ಮತ್ತು ಇಯು ಅನ್ನು ಟಾರ್ಗೆಟ್ ಮಾಡಿದ್ದು, ಭಾರತದ ಮೇಲೆ ಸೀಮಿತ ಪರಿಣಾಮ ಬೀರಿದೆ ಎಂದು ಹೇಳಿದ್ದಾರೆ.
ವಿಶಾಲ ಸುಂಕದ ನೀತಿಯು ಔಷಧಗಳು, ಐಟಿ ಸೇವೆಗಳು, ಜವಳಿ ಮತ್ತು ಉಕ್ಕಿನಂತಹ ಎರಡೂ ದೇಶಗಳು ಪೈಪೋಟಿ ನಡೆಸುವ ಕ್ಷೇತ್ರಗಳ ಮೇಲೆ ಪರಿಣಾಮ ಬೀರುತ್ತದೆ. ಭಾರತೀಯ ಸರಕುಗಳ ಶ್ರೇಣಿಯ ಮೇಲೆ ಸುಂಕಗಳನ್ನು ವಿಧಿಸಿದರೆ, ಇದು ಜವಳಿ, ಔಷಧಗಳು, ರತ್ನಗಳು, ಆಭರಣಗಳು ಮತ್ತು ಐಟಿ ಸೇವೆಗಳಂತಹ ಪ್ರಮುಖ ಕೈಗಾರಿಕೆಗಳಿಂದ ರಫ್ತುಗಳನ್ನು ಕಡಿಮೆ ಮಾಡಬಹುದು. ಏಕೆಂದರೆ ಈ ಉತ್ಪನ್ನಗಳು ಮತ್ತು ಸೇವೆಗಳಲ್ಲಿ ಭಾರತೀಯ ರಫ್ತಿಗೆ ಯುಎಸ್ ಪ್ರಮುಖ ತಾಣವಾಗಿದೆ ಎಂದು ವಿಶ್ಲೇಷಿಸಿದ್ದಾರೆ.
