Bloggers Unite

Tag: Supernovas

  • ಮಹಿಳಾ ಟಿ20 ಚಾಲೆಂಜ್ ಫೈನಲ್ – ವೆಲಾಸಿಟಿ ವಿರುದ್ಧ ಗೆದ್ದ ಸೂಪರ್ನೋವಾಸ್ ಚಾಂಪಿಯನ್

    ಮಹಿಳಾ ಟಿ20 ಚಾಲೆಂಜ್ ಫೈನಲ್ – ವೆಲಾಸಿಟಿ ವಿರುದ್ಧ ಗೆದ್ದ ಸೂಪರ್ನೋವಾಸ್ ಚಾಂಪಿಯನ್

    ಪುಣೆ: ಮಹಿಳಾ ಟಿ20 ಚಾಲೆಂಜ್ ಫೈನಲ್ ಪಂದ್ಯದಲ್ಲಿ ವೆಲಾಸಿಟಿ ವಿರುದ್ಧ ಸೂಪರ್ನೋವಾಸ್ 4 ರನ್‌ಗಳ ರೋಚಕ ಜಯ ದಾಖಲಿಸಿ ಚಾಂಪಿಯನ್ ಆಗಿದೆ.

    ಗೆಲ್ಲಲು 166 ರನ್ ಗುರಿ ಪಡೆದ ವೆಲಾಸಿಟಿ ಪರ ಲಾರಾ ವೊಲ್ವಾರ್ಡ್ಟ್ ಅಜೇಯ 65 ರನ್‌ (44 ಎಸೆತ, 5 ಬೌಂಡರಿ, 3 ಸಿಕ್ಸ್) ಸಿಡಿಸಿ ಕೊನೆಯ ಎಸೆತದವರೆಗೆ ಗೆಲುವಿಗಾಗಿ ಕೆಚ್ಚೆದೆಯ ಹೋರಾಟ ನಡೆಸಿದರು. ಇವರಿಗೆ ಉಳಿದ ಬ್ಯಾಟರ್‌ಗಳು ಉತ್ತಮ ಸಾಥ್‌ ನೀಡಲು ವಿಫಲರಾದರು. ಇತರ ಬ್ಯಾಟರ್‌ಗಳನ್ನು ಅಬ್ಬರಿಸಲು ಸೂಪರ್ನೋವಾಸ್ ತಂಡದ ಬೌಲರ್ಸ್ ಅವಕಾಶ ನೀಡಲಿಲ್ಲ. ಸ್ಲಾಗ್‌ ಓವರ್‌ಗಳಲ್ಲಿ ಸಿಮ್ರಾನ್ ಬಹದ್ದೂರ್ ಗೆಲುವಿಗಾಗಿ ಹೋರಾಡಿದರೂ ಗೆಲುವಿನ ದಡ ಸೇರಿಸಲು ಸಾಧ್ಯವಾಗದೆ ಅಂತಿಮವಾಗಿ ವೆಲಾಸಿಟಿ 20 ಓವರ್‌ಗಳಲ್ಲಿ 8 ವಿಕೆಟ್‌ ಕಳೆದುಕೊಂಡು 161 ರನ್ ಪೇರಿಸಲಷ್ಟೇ ಶಕ್ತವಾಗಿ ಫೈನಲ್‍ನಲ್ಲಿ ಮುಗ್ಗರಿಸಿತು. ಸೂಪರ್ನೋವಾಸ್ ಪರ ಅಲಾನಾ ಕಿಂಗ್ ಪ್ರಮುಖ 3 ವಿಕೆಟ್ ಕಿತ್ತು ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

    ಈ ಬಾರಿ ಮಹಿಳಾ ಟಿ20 ಚಾಲೆಂಲ್‍ಗೆ ಸೂಪರ್ನೋವಾಸ್, ಟ್ರೈಲ್ಬ್ಲೇಜರ್ಸ್ ಮತ್ತು ವೆಲಾಸಿಟಿ ಮೂರು ತಂಡಗಳು ಭಾಗವಹಿಸಿದ್ದವು. ಸೂಪರ್ನೋವಾಸ್‍ಗೆ ಹರ್ಮನ್ ಪ್ರೀತ್ ಕೌರ್, ಟ್ರೈಲ್ಬ್ಲೇಜರ್ಸ್‍ಗೆ ಸ್ಮೃತಿ ಮಂದಾನ ಮತ್ತು ವೆಲಾಸಿಟಿ ತಂಡಕ್ಕೆ ದೀಪ್ತಿ ಶರ್ಮಾ ನಾಯಕಿಯಾಗಿದ್ದರು. ಪುಣೆಯ ಎಮ್‍ಸಿಎ ಮೈದಾನದಲ್ಲಿ ಎಲ್ಲಾ ಪಂದ್ಯಗಳು ನಡೆಯಿತು. ಸೂಪರ್ನೋವಾಸ್ ಮತ್ತು ವೆಲಾಸಿಟಿ ತಂಡಗಳು ಫೈನಲ್‍ನಲ್ಲಿ ಮುಖಾಮುಖಿಯಾಗಿ ಸೂಪರ್ನೋವಾಸ್ ತಂಡ ಪ್ರಶಸ್ತಿಗೆ ಮುತ್ತಿಕ್ಕಿದೆ.

    ಈ ಮೊದಲು ಟಾಸ್ ಗೆದ್ದ ವೆಲಾಸಿಟಿ ಎದುರಾಳಿ ತಂಡ ಸೂಪರ್ನೋವಾಸ್ ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ನೀಡಿತು. ಈ ಅವಕಾಶವನ್ನು ಸರಿಯಾಗಿ ಬಳಸಿಕೊಂಡ ಬ್ಯಾಟರ್ಸ್ ವೆಲಾಸಿಟಿ ಬೌಲರ್‌ಗಳ ಬೆವರಿಳಿಸಿದರು.

    ಆರಂಭಿಕ ಆಟಗಾರ್ತಿ ಪ್ರಿಯಾ ಪುನಿಯಾ 28 ರನ್ (29 ಎಸೆತ, 2 ಸಿಕ್ಸ್), ಡಿಯಾಂಡ್ರಾ ಡಾಟಿನ್ 62 ರನ್ (44 ಎಸೆತ, 1 ಬೌಂಡರಿ, 4 ಸಿಕ್ಸ್) ಮತ್ತು ಹರ್ಮನ್‍ಪ್ರೀತ್ ಕೌರ್ 43 ರನ್ (29 ಎಸೆತ, 1 ಬೌಂಡರಿ, 3 ಸಿಕ್ಸ್) ನೆರವಿನಿಂದ 20 ಓವರ್‌ಗಳ ಅಂತ್ಯಕ್ಕೆ 7 ವಿಕೆಟ್ ನಷ್ಟಕ್ಕೆ 165 ರನ್‍ಗಳ ಉತ್ತಮ ಮೊತ್ತ ಕಲೆಹಾಕಿತು.

  • ಮಂದಾನ ಸೂಪರ್ ಬ್ಯಾಟಿಂಗ್ – ಮೊದಲ ಬಾರಿ ಮಹಿಳಾ ಐಪಿಎಲ್‍ ಟ್ರೋಫಿಗೆ ಮುತ್ತಿಕ್ಕಿದ ಟ್ರೈಲ್‍ಬ್ಲೇಜರ್ಸ್

    ಮಂದಾನ ಸೂಪರ್ ಬ್ಯಾಟಿಂಗ್ – ಮೊದಲ ಬಾರಿ ಮಹಿಳಾ ಐಪಿಎಲ್‍ ಟ್ರೋಫಿಗೆ ಮುತ್ತಿಕ್ಕಿದ ಟ್ರೈಲ್‍ಬ್ಲೇಜರ್ಸ್

    – ಸೋತರು ದಾಖಲೆ ಬರೆದ ರಾಧಾ ಯಾದವ್

    ಶಾರ್ಜಾ: ಇಂದು ನಡೆದ ಮಹಿಳಾ ಐಪಿಎಲ್‍ನ ಫೈನಲ್ ಪಂದ್ಯದಲ್ಲಿ ಸ್ಮೃತಿ ಮಂದಾನ ನೇತೃತ್ವದ ಟ್ರೈಲ್‍ಬ್ಲೇಜರ್ಸ್ ತಂಡ 16 ರನ್‍ಗಳ ಅಂತರದಲ್ಲಿ ಗೆದ್ದು ಚೊಚ್ಚಲ ಐಪಿಎಲ್ ಟ್ರೋಫಿಗೆ ಮುತ್ತಿಕ್ಕಿದೆ.

    ಶಾರ್ಜಾ ಮೈದಾನದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಟ್ರೈಲ್‍ಬ್ಲೇಜರ್ಸ್ ತಂಡ ನಾಯಕಿ ಸ್ಮೃತಿ ಮಂದಾನ ಅವರ ಭರ್ಜರಿ ಬ್ಯಾಟಿಂಗ್‍ನಿಂದ ನಿಗದಿತ 20 ಓವರಿನಲ್ಲಿ 118 ರನ್‍ಗಳಿಸಿತ್ತು. ಈ ಗುರಿಯನ್ನು ಬೆನ್ನಟ್ಟಿದ ಸೂಪರ್ನೋವಾಸ್ ತಂಡ ಸಲ್ಮಾ ಖತುನ್ ಮತ್ತು ದೀಪ್ತಿ ಶರ್ಮಾ ಅವರ ಬೌಲಿಂಗ್ ದಾಳಿಗೆ ನಲುಗಿ 20 ಓವರಿನಲ್ಲಿ ಏಳು ವಿಕೆಟ್ ಕಳೆದುಕೊಂಡ 102 ರನ್ ಸಿಡಿಸಿ 16 ರನ್‍ಗಳ ಅಂತರದಲ್ಲಿ ಸೋತಿತು.

    ಟ್ರೈಲ್‍ಬ್ಲೇಜರ್ಸ್ ನೀಡಿದ ಗುರಿಯನ್ನು ಬೆನ್ನಟ್ಟಿದ ಸೂಪರ್ನೋವಾಸ್ ತಂಡಕ್ಕೆ ಸೋಫಿ ಎಕ್ಲೆಸ್ಟೋನ್ ಆರಂಭಿಕ ಆಘಾತ ನೀಡಿದರು. ಉತ್ತಮ ಫಾರ್ಮ್ ನಲ್ಲಿದ್ದ ಚಮರಿ ಅಥಾಪತ್ತು ಅವರನ್ನು ಎರಡನೇ ಓವರಿನಲ್ಲಿ ಔಟ್ ಮಾಡಿದರು. ನಂತರ ಬಂದ ತಾನಿಯಾ ಭಾಟಿಯಾ 20 ಬಾಲಿಗೆ 14 ರನ್ ಸಿಡಿಸಿ ದೀಪ್ತಿ ಶರ್ಮಾ ಅವರಿಗೆ ಔಟ್ ಆದರು. ಇದಾದ ಬಳಿಕ ಜೆಮಿಮಾ ರೊಡ್ರಿಗಸ್ ಅನ್ನು ಕೂಡ ದೀಪ್ತಿ ಶರ್ಮಾ ಅವರು ಔಟ್ ಮಾಡಿ ಪೆವಿಲಿಯನ್‍ಗೆ ಅಟ್ಟಿದರು.

    ನಂತರ ಜೊತೆಯಾದ ನಾಯಕ ಹರ್ಮನ್‍ಪ್ರೀತ್ ಕೌರ್ ಮತ್ತು ಶಶಿಕಲಾ ಸಿರಿವರ್ಧನೆ 38 ಬಾಲಿಗೆ 37 ರನ್‍ಗಳ ಜೊತೆಯಾಟವಾಡಿದರು. ಈ ವೇಳೆ 18 ಬಾಲಿಗೆ 19 ರನ್ ಹೊಡೆದಿದ್ದ ಶಶಿಕಲಾ ಸಲ್ಮಾ ಖತುನ್ ಅವರ ಬೌಲಿಂಗ್‍ನಲ್ಲಿ ಔಟ್ ಆದರು. ಕೊನೆಯ ಎರಡು ಓವರಿಗೆ 28 ರನ್ ಬೇಕಾದಾಗ ಅನುಜಾ ಪಾಟೀಲ್ ರನೌಟ್ ಆದರು. ಇದಾದ ನಂತರದ ಬಾಲಿನಲ್ಲೇ 30 ರನ್‍ಗಳಿಸಿದ್ದ ನಾಯಕಿ ಹರ್ಮನ್‍ಪ್ರೀತ್ ಕೌರ್ ಬೌಲ್ಡ್ ಆದರು. ನಂತರ ಬಂದ ಯಾವುದೇ ಆಟಗಾರ್ತಿ ಬ್ಯಾಟ್ ಬೀಸಲಿಲ್ಲ. ಪರಿಣಾಮ ಎರಡು ಭಾರಿ ಚಾಂಪಿಯನ್ ಆದ ಸೂಪರ್ನೋವಾಸ್ ತಂಡ ಸೋತಿತು.

    ಇದಕ್ಕೂ ಮುನ್ನ ಬ್ಯಾಟಿಂಗ್ ಮಾಡಿದ್ದ ಟ್ರೈಲ್‍ಬ್ಲೇಜರ್ಸ್ ಆರಂಭದಲ್ಲೇ ಉತ್ತಮವಾಗಿ ಬ್ಯಾಟ್ ಬೀಸಿತ್ತು. ಓಪನರ್ಸ್ ಆಗಿ ಬಂದ ದಿಯಾಂಡ್ರಾ ಡೊಟಿನ್ ಮತ್ತು ಸ್ಮೃತಿ ಮಂಧಾನ ಮೊದಲ ವಿಕೆಟ್‍ಗೆ ಅರ್ಧಶತಕದ ಜೊತೆಯಾಟವಾಡಿದರು. ಆದರೆ 49 ಬಾಲಿಗೆ ಐದು ಬೌಂಡರಿ ಮತ್ತು ಮೂರು ಸಿಕ್ಸ್ ಸಮೇತ 68 ರನ್ ಸಿಡಿಸಿದ್ದ ಮಂದಾನ ಔಟ್ ಆದ ನಂತರ ಟ್ರೈಲ್‍ಬ್ಲೇಜರ್ಸ್ ರಾಧಾ ಯಾದವ್ ಬೌಲಿಂಗ್ ದಾಳಿಗೆ ಸಿಲುಕಿ ಉತ್ತಮ ಆರಂಭ ಪಡೆದರೂ 118 ರನ್‍ಗಳ ಸಾಧಾರಣ ಗುರಿ ನೀಡಿತ್ತು.

    ರಾಧಾ ಯಾದವ್ ದಾಖಲೆ
    ಇಂದಿನ ಪಂದ್ಯದಲ್ಲಿ ಸೂಪರ್ನೋವಾಸ್ ತಂಡದ ಸ್ಪಿನ್ನರ್ ರಾಧಾ ಯಾದವ್ ಉತ್ತಮವಾಗಿ ಬೌಲ್ ಮಾಡಿ ದಾಖಲೆ ಬರೆದಿದ್ದಾರೆ. ಇಂದಿನ ಪಂದ್ಯದಲ್ಲಿ ತಮ್ಮ ಕೋಟಾದ ನಾಲ್ಕು ಓವರ್ ಬೌಲ್ ಮಾಡಿದ ರಾಧಾ ಯಾದವ್ ಕೇವಲ 16 ರನ್ ನೀಡಿ ಐದು ವಿಕೆಟ್ ಪಡೆದರು. ಈ ಮೂಲಕ ವುಮೆನ್ಸ್ ಐಪಿಎಲ್‍ನಲ್ಲಿ ಐದು ವಿಕೆಟ್ ಪಡೆದ ಮೊದಲ ಆಟಗಾರ್ತಿ ಎಂಬ ದಾಖಲೆ ನಿರ್ಮಿಸಿದರು.

  • ಕೊನೆಯ ಬಾಲ್‍ನಲ್ಲಿ ರೋಚಕವಾಗಿ ಗೆದ್ದ ಕೌರ್ ಪಡೆ

    ಕೊನೆಯ ಬಾಲ್‍ನಲ್ಲಿ ರೋಚಕವಾಗಿ ಗೆದ್ದ ಕೌರ್ ಪಡೆ

    – ಗೆಲುವಿನ ಸನಿಹದಲ್ಲಿ ಮುಗ್ಗರಿಸಿದ ಸ್ಮೃತಿ ಮಂಧಾನ ತಂಡ

    ಶಾರ್ಜಾ: ಇಂದು ನಡೆದ ಮಹಿಳಾ ಐಪಿಎಲ್-2020ಯ ಮೂರನೇ ಪಂದ್ಯದಲ್ಲಿ ಹರ್ಮನ್‍ಪ್ರೀತ್ ಕೌರ್ ನೇತೃತ್ವದ ಸೂಪರ್ನೋವಾಸ್ ತಂಡ ಎರಡು ರನ್‍ಗಳ ಅಂತರದಲ್ಲಿ ಗೆದ್ದು ಬೀಗಿದೆ. ಗೆಲುವಿನ ಸನಿಹದಲ್ಲಿದ್ದ ಸ್ಮೃತಿ ಮಂಧಾನ ನೇತೃತ್ವದ ತಂಡ ಸೋತಿದೆ.

    ಶಾರ್ಜಾ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಸೂಪರ್ನೋವಾಸ್ ತಂಡ ಆರಂಭಿಕ ಆಟಗಾರ್ತಿ ಚಮರಿ ಅಟಪಟ್ಟು ಅವರ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ನಿಗದಿತ 20 ಓವರಿನಲ್ಲಿ 146 ರನ್ ಕಲೆ ಹಾಕಿತು. ಈ ಗುರಿಯನ್ನು ಬೆನ್ನಟ್ಟಿದ ಟ್ರೈಲ್‍ಬ್ಲೇಜರ್ಸ್ ತಂಡ ತೀವ್ರ ಪೈಪೋಟಿ ನೀಡಿದರೂ ಕೊನೆ ಓವರಿನಲ್ಲಿ ಬೇಕಾದ 10 ರನ್ ಹೊಡೆಯಲಾಗದೇ ಕೇವಲ ಎರಡು ರನ್‍ಗಳಿಂದ ಸೋತಿತು.

    ಸೂಪರ್ನೋವಾಸ್ ನೀಡಿದ 147ರನ್‍ಗಳನ್ನು ಬೆನ್ನಟ್ಟಿದ ಟ್ರೈಲ್‍ಬ್ಲೇಜರ್ಸ್ ತಂಡಕ್ಕೆ ಆರಂಭಿಕ ಆಟಗಾರ್ತಿಯರಾದ ದಿಯಾಂಡ್ರಾ ಡೊಟಿನ್ ಮತ್ತು ಸ್ಮೃತಿ ಮಂಧಾನ ಆರಂಭ ನೀಡಿದರು. ಈ ಮೂಲಕ ಟ್ರೈಲ್‍ಬ್ಲೇಜರ್ಸ್ ಪವರ್ ಪ್ಲೇ ಮುಕ್ತಾಯದ ವೇಳೆಗೆ ಒಂದು ವಿಕೆಟ್ ಕಳೆದುಕೊಳ್ಳದೇ 43 ರನ್ ಪೇರಿಸಿತು. ಆದರೆ ಆರನೇ ಓವರ್ ಮೂರನೇ ಬಾಲಿನಲ್ಲಿ 15 ಬಾಲಿಗೆ 27 ರನ್ ಸಿಡಿಸಿ ಸ್ಫೋಟಕವಾಗಿ ಆಡುತ್ತಿದ್ದ ದಿಯಾಂಡ್ರಾ ಡೊಟಿನ್ ಅವರು ಶಕೇರಾ ಸೆಲ್ಮನ್ ಅವರಿಗೆ ಔಟ್ ಆದರು.

    ನಂತರ ಬಂದ ರಿಚಾ ಘೋಷ್ ಒಂದು ಬೌಂಡರಿ ಬಾರಿಸಿ ಅಬ್ಬರಿಸುವ ಸೂಚನೆ ನೀಡಿದರು. ಆದರೆ ನಂತರದ ಬಾಲಿನಲ್ಲೇ ಶಕೇರಾ ಸೆಲ್ಮನ್‍ಗೆ ಕ್ಲೀನ್ ಬೌಲ್ಡ್ ಆಗಿ ಹೊರನಡೆದರು. ನಂತರ ಜೊತೆಯಾದ ಸ್ಮೃತಿ ಮಂಧಾನ ಮತ್ತು ದೀಪ್ತಿ ಶರ್ಮಾ 34 ಬಾಲಿಗೆ 35 ರನ್‍ಗಳ ಜೊತೆಯಾಟವಾಡಿದರು. ಆದರೆ 12ನೇ ಓವರ್ ಮೂರನೇ ಬಾಲಿನಲ್ಲಿ 40 ಬಾಲಿಗೆ 33 ರನ್ ಸಿಡಿಸಿದ್ದ ನಾಯಕಿ ಸ್ಮೃತಿ ಮಂಧಾನ ಕ್ಯಾಚ್ ಕೊಟ್ಟು ಪೆವಿಲಿಯನ್ ಸೇರಿದರು.

    4 ರನ್ ಗಳಸಿ ದಯಾಲನ್ ಹೇಮಲತಾ ಅವರು ಕೀಪರ್ ಕ್ಯಾಚ್ ಕೊಟ್ಟು ಔಟ್ ಆದರು. ಇದಾದ ನಂತರ ಒಂದಾದ ದೀಪ್ತಿ ಶರ್ಮಾ ಮತ್ತು ಹರ್ಲೀನ್ ಡಿಯೋಲ್ ಸ್ಫೋಟಕ ಬ್ಯಾಟಿಂಗ್ ಮುಂದಾದರು. ಜೊತೆಗೆ 19ನೇ ಓವರಿನಲ್ಲಿ 14 ರನ್ ಸಿಡಿಸಿ ಟ್ರೈಲ್‍ಬ್ಲೇಜರ್ಸ್ ತಂಡಕ್ಕೆ ಗೆಲುವಿನ ಆಸೆ ತಂದಿತ್ತರು. ಆದರೆ 2 ಬಾಲಿಗೆ ನಾಲ್ಕು ರನ್ ಬೇಕಿದ್ದಾಗ 27 ರನ್ ಗಳಿಸಿದ್ದ ಡಿಯೋಲ್ ಅವರು ಔಟ್ ಆದರು. ಈ ಮೂಲಕ ಗೆಲುವಿನ ಸನಿಹಕ್ಕೆ ಬಂದು ಟ್ರೈಲ್‍ಬ್ಲೇಜರ್ಸ್ ತಂಡ ಎರಡು ರನ್‍ಗಳ ಅಂತರದಲ್ಲಿ ಸೋತಿತು.

  • ಮಹಿಳಾ ಐಪಿಎಲ್: ಮೊದಲನೇ ಪಂದ್ಯದಲ್ಲಿ 5 ವಿಕೆಟ್‍ಗಳ ಜಯ ಸಾಧಿಸಿದ ಮಿಥಾಲಿ ಪಡೆ

    ಮಹಿಳಾ ಐಪಿಎಲ್: ಮೊದಲನೇ ಪಂದ್ಯದಲ್ಲಿ 5 ವಿಕೆಟ್‍ಗಳ ಜಯ ಸಾಧಿಸಿದ ಮಿಥಾಲಿ ಪಡೆ

    – ಕುಸಿದ ವೆಲಾಸಿಟಿಗೆ ಆಸರೆಯಾದ ಸುಷ್ಮಾ, ಲೂಸೆ

    ಶಾರ್ಜಾ: ಇಂದು ನಡೆದ ಮಹಿಳಾ ಐಪಿಎಲ್-2020ಯ ಮೊದಲನೇ ಪಂದ್ಯದಲ್ಲಿ ಮಿಥಾಲಿ ರಾಜ್ ನೇತೃತ್ವದ ವೆಲಾಸಿಟಿ ತಂಡ ಹರ್ಮನ್‍ಪ್ರೀತ್ ಕೌರ್ ನೇತೃತ್ವದ ಸೂಪರ್ನೋವಾಸ್ ತಂಡವನ್ನು ಐದು ವಿಕೆಟ್‍ಗಳಿಂದ ಮಣಿಸಿದೆ.

    ಇಂದು ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಸೂಪರ್ನೋವಾಸ್ ತಂಡ ಚಮರಿ ಅಥಾಪತ್ತು ಮತ್ತು ನಾಯಕಿ ಹರ್ಮನ್‍ಪ್ರೀತ್ ಕೌರ್ ಅವರ ಭರ್ಜರಿ ಬ್ಯಾಟಿಂಗ್ ಸಲುವಾಗಿ ನಿಗದಿತ 20 ಓವರಿನಲ್ಲಿ 126 ರನ್‍ಗಳಿಸಿತ್ತು. ಈ ಗುರಿಯನ್ನು ಬೆನ್ನಟ್ಟಿದ ವೆಲಾಸಿಟಿ ತಂಡ ಆರಂಭಿಕ ಆಘಾತ ಅನುಭವಿಸಿದರೂ ನಂತರ ಮಧ್ಯಮ ಕ್ರಮಾಂಕದಲ್ಲಿ ಸುಷ್ಮಾ ವರ್ಮಾ ಮತ್ತು ಸುನೆ ಲೂಸ್ ಸ್ಫೋಟಕ ಬ್ಯಾಟಿಂಗ್‍ನಿಂದ ಒಂದು ಬಾಲ್ ಉಳಿದಂತೆ 129 ರನ್‍ಗಳಿಸಿ ಐದು ವಿಕೆಟ್‍ಗಳಿಂದ ಗೆದ್ದು ಬೀಗಿತು.

    ಸುಷ್ಮಾ, ಲೂಸೆ ಭರ್ಜರಿ ಜೊತೆಯಾಟ
    ಇಂದಿನ ಪಂದ್ಯದಲ್ಲಿ ವೆಲಾಸಿಟಿ ತಂಡಕ್ಕೆ ಆರಂಭಿಕ ಆಘಾತ ಎದುರಾಗಿತ್ತು. ತಂಡ ಟಾಪ್ ಆರ್ಡರ್ ಬ್ಯಾಟ್ಸ್ ಮನ್‍ಗಳಾದ ಶಫಾಲಿ ವರ್ಮಾ, ಡೇನಿಯಲ್ ವ್ಯಾಟ್ ಮತ್ತು ಮಿಥಾಲಿ ರಾಜ್ ಬೇಗ ಔಟ್ ಆದರು. ಆದರೆ ನಂತರ ಜೊತೆಯಾದ ಸುಷ್ಮಾ ವರ್ಮಾ (34 ರನ್, 33 ಎಸೆತ, 02 ಸಿಕ್ಸ್) ಮತ್ತು ಸುನೆ ಲೂಸ್ (37 ರನ್, 21 ಎಸೆತ 4 ಫೋರ್ 1 ಸಿಕ್ಸ್) ಸಮೇತ 36 ಎಸೆತದಲ್ಲಿ 51 ರನ್‍ಗಳ ಜೊತೆಯಾಟವಾಡಿ ವೆಲಾಸಿಟಿ ತಂಡಕ್ಕೆ ಗೆಲುವು ತಂದಿತ್ತರು.

    ಸೂಪರ್ನೋವಾಸ್ ನೀಡಿದ 127 ರನ್‍ಗಳ ಗುರಿ ಬೆನ್ನಟ್ಟಿದ ವೆಲಾಸಿಟಿ ತಂಡಕ್ಕೆ ಸೂಪರ್ನೋವಾಸ್ ತಂಡದ ವೇಗಿ ಅಯಾಬೊಂಗಾ ಖಾಕ ಶಾಕ್ ನೀಡಿದರು. ಇನ್ನಿಂಗ್ಸ್ ನ ಮೊದಲೇ ಓವರಿನಲ್ಲೇ ಡೇನಿಯಲ್ ವ್ಯಾಟ್ ಔಟ್ ಆದರು. ಇದಾದ ನಂತರ ಅಬ್ಬರದ ಬ್ಯಾಟಿಂಗ್ ಮುಂದಾದ ಶಫಾಲಿ ವರ್ಮಾ ಹ್ಯಾಟ್ರಿಕ್ ಬೌಂಡರಿಗಳನ್ನು ಸಿಡಿಸಿದರು. ಆದರೆ ಮೂರನೇ ಓವರ್ ಕೊನೆಯ ಬಾಲಿನಲ್ಲಿ 11 ಬಾಲಿಗೆ 17 ರನ್ ಸಿಡಿಸಿದ್ದ ಶಫಾಲಿ ವರ್ಮಾ ಅಯಾಬೊಂಗಾ ಖಾಕಗೆ ಔಟ್ ಆದರು.

    ನಂತರ ಜೊತೆಯಾದ ನಾಯಕಿ ಮಿಥಾಲಿ ರಾಜ್ ಮತ್ತು ಕನ್ನಡತಿ ವೇದ ಕೃಷ್ಣಮೂರ್ತಿ ತಾಳ್ಮೆಯಿಂದ ಜೊತೆಯಾಟವಾಡಿದರು. ಆದರೆ ಎಂಟನೇ ಓವರಿನ ಮೂರನೇ ಬಾಲಿನಲ್ಲಿ ದೊಡ್ಡ ಹೊಡೆತಕ್ಕೆ ಕೈ ಹಾಕಿದ ಮಿಥಾಲಿ 7 ರನ್ ಗಳಿಸಿ ಶಶಿಕಲಾ ಸಿರಿವರ್ಧನೆ ಅವರಿಗೆ ಔಟ್ ಆದರು. ಇದಾದ ಬಳಿಕ 28 ಬಾಲಿಗೆ 29 ರನ್ ಸಿಡಿಸಿ ವೆಲಾಸಿಟಿ ಭರವಸೆ ಮೂಡಿಸಿದ್ದ ಕನ್ನಡತಿ ವೇದಾ ಕೃಷ್ಣಮೂರ್ತಿ 12ನೇ ಓವರ್ ಕೊನೆಯ ಬಾಲಿನಲ್ಲಿ ರಾಧಾ ಯಾದವ್ ಅವರಿಗೆ ಔಟ್ ಆದರು.

    ವೇದಾ ಔಟ್ ಆದ ನಂತರ ಜೊತೆಯಾದ ಸುಷ್ಮಾ ವರ್ಮಾ ಮತ್ತು ಸುನೆ ಲೂಸ್ ಸ್ಫೋಟಕ ಆಟಕ್ಕೆ ಮುಂದಾದರು. ಈ ಜೋಡಿ ಐದನೇ ವಿಕೆಟ್‍ಗೆ 35 ಬಾಲಿನಲ್ಲಿ ಅರ್ಧಶತಕದ ಜೊತೆಯಾಟವಾಡಿತು. ಆದರೆ 19ನೇ ಓವರಿನ ಐದನೇ ಬಾಲಿನಲ್ಲಿ 33 ಬಾಲಿಗೆ 34 ರನ್ ಸಿಡಿಸಿ ಆಡುತ್ತಿದ್ದ ಸುಷ್ಮಾ ವರ್ಮಾ ಅವರು ಬೌಂಡರಿ ಗೆರೆಯ ಬಳಿ ಕ್ಯಾಚ್ ಕೊಟ್ಟು ಪೂನಂ ಯಾದವ್‍ಗೆ ಔಟ್ ಆದರು. ಆದರೆ ಶಿಖಾ ಪಾಂಡೆ ಮತ್ತು ಸುನೆ ಲೂಸ್ ಸೇರಿಕೊಂಡು ಕೊನೆಯ ಓವರಿನಲ್ಲಿ 9 ರನ್ ಭಾರಿಸಿ ವೆಲಾಸಿಟಿ ತಂಡಕ್ಕೆ ಗೆಲುವು ತಂದಿತ್ತರು.