ಧಾರವಾಡ: ಬೆಲ್ಟ್ ಕಟ್ ಆಗಿ ಲಿಫ್ಟ್‌ನಲ್ಲಿದ್ದ 9 ಮಂದಿ ಗಾಯಗೊಂಡ ಘಟನೆ ಧಾರವಾಡ ನಗರದ ಹೊರವಲಯದ ಖಾಸಗಿ ಹೊಟೇಲ್‍ನಲ್ಲಿ ನಡೆದಿದೆ.
ಕಳೆದ ರಾತ್ರಿ ಧಾರವಾಡದ ಬೇಲೂರಿನ ಸ್ಟಾರ್ ಕಂಪನಿಯ ಉದ್ಯೋಗಿಗಳು ಊಟ ಮಾಡಿ ಲಿಫ್ಟ್ ಮೂಲಕ ಇಳಿಯುವಾಗಿ ಈ ಘಟನೆ ನಡೆದಿದ್ದು, 9 ಜನ ಗಾಯಗೊಂಡವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ನಿಗದಿತ ಭಾರಕ್ಕಿಂತ ಹೆಚ್ಚಿನ ಜನರು ಲಿಫ್ಟ್‌ನಲ್ಲಿ ಪ್ರಯಾಣಿಸಿದ ಕಾರಣ ಲಿಫ್ಟ್‌ನ ಬೆಲ್ಟ್ ಕಟ್ ಆಗಿದೆ ಎಂದು ತಿಳಿದು ಬಂದಿದೆ.
ಸ್ಟಾರ್ ಕಂಪನಿಯ ಉದ್ಯೋಗಿಗಳಾದ ಆನಂದ್ ಪವಾರ್(32), ಅನೀಲ್ ರಾಮಸಿಂಗ್(34), ಕೆಂಪಯ್ಯ ಪುರಾಣಿಕ್(34), ಆಂಟೋನಿ(44), ಬಸೀರ್ ಅಹ್ಮದ್ (22) ಸೇರಿದಂತೆ 9 ಮಂದಿ ಗಾಯಗೊಂಡಿದ್ದಾರೆ. ಕಳೆದ ರಾತ್ರಿ ಪಾರ್ಟಿ ಮುಗಿಸಿದ್ದ ಸ್ಟಾರ್ ಕಂಪನಿಯ 13 ಉದ್ಯೋಗಿಗಳು ಏಕಕಾಲಕ್ಕೆ ಈ ಲಿಫ್ಟ್‌ನಲ್ಲಿ ಹತ್ತಿದ್ದಾರೆ.
ಮೂರನೇ ಮಹಡಿಯಿಂದ ಎರಡನೇ ಮಹಡಿಗೆ ಲಿಫ್ಟ್ ಇಳಿಯುವುದರಲ್ಲಿ ಲಿಫ್ಟಿನ ಬೆಲ್ಟ್ ಕಟ್ ಆಗಿದೆ. ಸದ್ಯ ಕೆಲ ಗಾಯಾಳುಗಳನ್ನು ಧಾರವಾಡ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಹೆಚ್ಚಿನ ಗಾಯವಾದವರಿಗೆ ಖಾಸಗಿ ಆಪತ್ರೆಗೆ ರವಾನೆ ಮಾಡಲಾಗಿದೆ.
ಲಿಫ್ಟ್ ಟೆಕ್ನಿಷಿಯನ್ ಹೇಳುವ ಪ್ರಕಾರ, ‘ಹೆಚ್ಚಿನ ಜನರು ಲಿಫ್ಟ್‌ನಲ್ಲಿದ್ದ ಕಾರಣ ಎರಡನೇ ಮಹಡಿಗೆ ಬಂದಾಗ ಲಿಫ್ಟ್ ರಭಸದಿಂದ ಇಳಿದಿದೆ ಎಂದಿದ್ದಾರೆ. ಆದರೆ ಲಿಫ್ಟ್‌ನಲ್ಲಿದ್ದವರು ಲಿಫ್ಟ್‌ಗೆ ಹೆಚ್ಚಿನ ಲೋಡ್ ಆಗಿದ್ದರೆ ಬಾಗಿಲನ್ನು ತೆರೆದುಕೊಳ್ಳಬೇಕಿತ್ತು ಎಂದಿದ್ದಾರೆ. ಈ ಕುರಿತು ಧಾರವಾಡ ಉಪನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.