Bloggers Unite

Tag: recipe

  • ಸಂಕ್ರಾಂತಿಗೆ ಸಿಹಿ ಪೊಂಗಲ್ ಮಾಡುವ ಸರಳ ವಿಧಾನ

    ಸಂಕ್ರಾಂತಿಗೆ ಸಿಹಿ ಪೊಂಗಲ್ ಮಾಡುವ ಸರಳ ವಿಧಾನ

    ಸುಗ್ಗಿ ಹಬ್ಬವಾದ ಸಂಕ್ರಾಂತಿಯನ್ನು ಕರ್ನಾಟಕದಲ್ಲಷ್ಟೇ ಅಲ್ಲದೆ ಕೇರಳ, ತಮಿಳುನಾಡು ಮತ್ತು ದೇಶದ ಹಲವೆಡೆ ಸಂಭ್ರಮ ಸಡಗರದಿಂದ ಆಚರಿಸಲಾಗುತ್ತದೆ. ಈ ಹಬ್ಬದ ವಿಶೇಷ ಅಡುಗೆ ಪೊಂಗಲ್. ಆದ್ದರಿಂದ ನಿಮಗಾಗಿ ಸಿಹಿ ಪೊಂಗಲ್ ಮಾಡುವ ವಿಧಾನ ಇಲ್ಲಿದೆ…

    ಬೇಕಾಗುವ ಸಾಮಗ್ರಿಗಳು:
    1. ಹೆಸರುಬೇಳೆ – 1 ಕಪ್
    2. ಅಕ್ಕಿ – 1 ಕಪ್
    3. ಪುಡಿ ಮಾಡಿದ ಬೆಲ್ಲ/ ಸಕ್ಕರೆ – 1 ಕಪ್
    4. ಏಲಕ್ಕಿ – 4
    5. ದ್ರಾಕ್ಷಿ ,ಗೋಡಂಬಿ- 50 ಗ್ರಾಂ
    6. ತುಪ್ಪ – 4 ಚಮಚ

    ಮಾಡುವ ವಿಧಾನ:
    * ಮೊದಲಿಗೆ ಒಂದು ಬಾಣಲೆಯಲ್ಲಿ ಹೆಸರುಬೇಳೆಯನ್ನು ಹಾಕಿ ಅದು ಕೆಂಪಾಗುವ ತನಕ ಕಡಿಮೆ ಉರಿಯಲ್ಲಿ ಹುರಿಯಿರಿ.
    * ಕುಕ್ಕರ್ ನಲ್ಲಿ ತೊಳೆದ ಅಕ್ಕಿ ಮತ್ತು ಹುರಿದ ಹೆಸರುಬೇಳೆ ಹಾಕಿ 4 ಕಪ್ ನೀರು ಹಾಕಿ ಒಂದು ವಿಷಲ್ ಬರುವ ತನಕ ಬೇಯಿಸಿ.
    * ಮತ್ತೊಂದು ಪ್ಯಾನ್ ನಲ್ಲಿ ಪುಡಿಮಾಡಿದ ಬೆಲ್ಲ ಹಾಕಿ ಕರಗಿಸಿ.(ಒಂದು ವೇಳೆ ಬೆಲ್ಲದಲ್ಲಿ ಕಲ್ಮಶವಿದ್ದರೆ ಒಮ್ಮೆ ಶೋಧಿಸಿಕೊಳ್ಳಿ)
    * ಈಗ ಬೆಂದ ಅಕ್ಕಿ ಮತ್ತು ಬೇಳೆಗೆ ಬೆಲ್ಲದ ಪಾಕ ಹಾಕಿ ಚೆನ್ನಾಗಿ ತಿರುವಿ.
    * ನಂತರ ಪುಡಿ ಮಾಡಿದ ಏಲಕ್ಕಿ, ತುಪ್ಪದಲ್ಲಿ ಕರಿದ ದ್ರಾಕ್ಷಿ ಗೋಡಂಬಿ ಹಾಕಿ ಒಲೆಯಿಂದ ಇಳಿಸಿ.
    (ಇದಕ್ಕೆ ಬೇಕಿದ್ದಲ್ಲಿ ಸ್ವಲ್ಪ ಪಚ್ಚ ಕರ್ಪೂರ ಮತ್ತು ಒಂದು ಚಿಟಿಕೆ ಲವಂಗದ ಪುಡಿಯನ್ನು ಸೇರಿಸಬಹುದು)

    ಇದನ್ನೂ ಓದಿ: ಸಂಕ್ರಾಂತಿ ಸ್ಪೆಷಲ್ – ಎಳ್ಳು, ಬೆಲ್ಲ ಮಾಡುವ ವಿಧಾನ

    ಇದನ್ನೂ ಓದಿ: ಸಂಕ್ರಾಂತಿ ಯಾಕೆ ಮಾಡ್ತಾರೆ? ಈ ದಿನ ಎಳ್ಳಿಗೆ ಮಹತ್ವ ಯಾಕೆ?

    ಇದನ್ನೂ ಓದಿ: ಮಕರ ಸಂಕ್ರಾಂತಿಗೆ ಗಾಳಿಪಟ ಹಾರಿಸೋದೇಕೆ? ವಿಶೇಷತೆ ಏನು?

    ಇದನ್ನೂ ಓದಿ:  ಸಂಕ್ರಾಂತಿಗೆ ಚಟಾಪಟ್ ಅಂತಾ ಮಾಡಿ ಸಕ್ಕರೆ ಅಚ್ಚು

    ಇದನ್ನೂ ಓದಿ:  ಸಂಕ್ರಾಂತಿಗೆ ನಿಮ್ಮ ಮನೆಯಲ್ಲಿರಲಿ ಅವಲಕ್ಕಿ ಸಿಹಿ ಪೊಂಗಲ್

  • ಸಂಕ್ರಾಂತಿ ಸ್ಪೆಷಲ್ – ಎಳ್ಳು, ಬೆಲ್ಲ ಮಾಡುವ ವಿಧಾನ

    ಸಂಕ್ರಾಂತಿ ಸ್ಪೆಷಲ್ – ಎಳ್ಳು, ಬೆಲ್ಲ ಮಾಡುವ ವಿಧಾನ

    ‘ಎಳ್ಳು ಬೆಲ್ಲ ತಿಂದು, ಒಳ್ಳೆಯ ಮಾತನಾಡಿ’ ಎಂಬ ಗಾದೆ ಇದೆ. ಅದರಂತೆಯೇ ಸಂಕ್ರಾಂತಿ ಹಬ್ಬದಂದು ಎಲ್ಲರೂ ಎಳ್ಳು ಬೆಲ್ಲ ತಿಂದು ಹೊಸ ವರ್ಷದ ಮೊದಲ ಹಬ್ಬವನ್ನು ಸಿಹಿಯಾಗಿ ಬರಮಾಡಿಕೊಳ್ಳುತ್ತಾರೆ. ಆದ್ದರಿಂದ ಹಬ್ಬಕ್ಕಾಗಿ ಅಂಗಡಿಯಿಂದ ತಂದು ಮಾಡುವ ಬದಲು ಮನೆಯಲ್ಲಿಯೇ ಸುಲಭವಾಗಿ ತಯಾರು ಮಾಡಿ. ನಿಮಗಾಗಿ ಎಳ್ಳು-ಬೆಲ್ಲ ತಯಾರು ಮಾಡುವ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಬಿಳಿ ಎಳ್ಳು – 200 ಗ್ರಾಂ
    2. ಅಚ್ಚು ಬೆಲ್ಲ – 2
    3. ಕೊಬ್ಬರಿ – 2 ಓಳು
    4. ಹುರಿಗಡಲೆ – 1 ಕಪ್
    5. ಕಡ್ಲೆಕಾಯಿಬೀಜ – 1 ಕಪ್
    6. ಜೀರಿಗೆ ಪೆಪ್ಪರ್ ಮೆಂಟ್ – 100 ಗ್ರಾಂ
    7. ಬಿಳಿ ಬತಾಸು – 100 ಗ್ರಾಂ

    ಮಾಡುವ ವಿಧಾನ
    * ಕಡ್ಲೆಕಾಯಿ ಬೀಜವನ್ನು ಚೆನ್ನಾಗಿ ಹುರಿದು ಸಿಪ್ಪೆ ತೆಗೆದು ಬಿಡಿ ಬಿಡಿ ಮಾಡಿಕೊಳ್ಳಿ.
    * ಎಳ್ಳನ್ನು ಸ್ವಲ್ಪ ಹುರಿದುಕೊಳ್ಳಿ.
    * ಅಚ್ಚು ಬೆಲ್ಲವನ್ನು ಚಾಕುವಿನಿಂದ ಸಣ್ಣ ಸಣ್ಣದಾಗಿ ಕಟ್ ಮಾಡಿ.
    * ಕೊಬ್ಬರಿ ಕಪ್ಪು ಭಾಗವನ್ನು ತೆಗೆದು ಚಿಕ್ಕದಾಗಿ ಕಟ್ ಮಾಡಿ.
    * ಹುರಿಗಡಲೆಯನ್ನು ಬೆಚ್ಚಗಾಗುವಷ್ಟು ಹುರಿದುಕೊಳ್ಳಿ.
    * ಈಗ ಒಂದು ಮಿಕ್ಸಿಂಗ್ ಬೌಲ್‍ಗೆ ಎಳ್ಳು, ಕಡ್ಲೆಕಾಯಿಬೀಜ, ಹುರಿಗಡಲೆ, ಸಣ್ಣಗೆ ತುಂಡರಿಸಿದ ಬೆಲ್ಲ, ಕೊಬ್ಬರಿ, ಜೀರಿಗೆ ಪೆಪ್ಪರ್ ಮೆಂಟ್, ಬಿಳಿ ಬತಾಸು ಸೇರಿಸಿ ಮಿಕ್ಸ್ ಮಾಡಿ.
    * ಒಂದು ಏರ್ ಟೈಟ್ ಜಾರ್ ಗೆ  ಶೇಖರಿಸಿಟ್ಟರೆ ತಿಂಗಳುಗಳ ಕಾಲ ತಿನ್ನಲು ಯೋಗ್ಯವಾಗಿರುತ್ತದೆ.
    * ಅಂಗಡಿಯಲ್ಲಿ ಸಿಗುವ ರೆಡಿ ಮಿಕ್ಸ್ ಗಿಂತ ಮನೆಯಲ್ಲೇ ಮಾಡಿ ಪ್ರೆಶ್ ಆಗಿ ತಿನ್ನಿರಿ.

    ಇದನ್ನೂ ಓದಿ: ಸಂಕ್ರಾಂತಿ ಯಾಕೆ ಮಾಡ್ತಾರೆ? ಈ ದಿನ ಎಳ್ಳಿಗೆ ಮಹತ್ವ ಯಾಕೆ?

    ಇದನ್ನೂ ಓದಿ: ಮಕರ ಸಂಕ್ರಾಂತಿಗೆ ಗಾಳಿಪಟ ಹಾರಿಸೋದೇಕೆ? ವಿಶೇಷತೆ ಏನು?

    ಇದನ್ನೂ ಓದಿ:  ಸಂಕ್ರಾಂತಿಗೆ ಚಟಾಪಟ್ ಅಂತಾ ಮಾಡಿ ಸಕ್ಕರೆ ಅಚ್ಚು

    ಇದನ್ನೂ ಓದಿ:  ಸಂಕ್ರಾಂತಿಗೆ ನಿಮ್ಮ ಮನೆಯಲ್ಲಿರಲಿ ಅವಲಕ್ಕಿ ಸಿಹಿ ಪೊಂಗಲ್

  • ಸಂಕ್ರಾಂತಿಗೆ ನಿಮ್ಮ ಮನೆಯಲ್ಲಿರಲಿ ಅವಲಕ್ಕಿ ಸಿಹಿ ಪೊಂಗಲ್

    ಸಂಕ್ರಾಂತಿಗೆ ನಿಮ್ಮ ಮನೆಯಲ್ಲಿರಲಿ ಅವಲಕ್ಕಿ ಸಿಹಿ ಪೊಂಗಲ್

    ಸಂಕ್ರಾಂತಿಗೆ ಮನೆಯಲ್ಲಿ ಈಗಾಗಲೇ ಸಿದ್ಧತೆ ನಡೆದಿರುತ್ತದೆ. ಕಳೆದ ಒಂದು ವಾರದಿಂದ ಮಾರುಕಟ್ಟೆಯಲ್ಲಿ ಸಂಕ್ರಾಂತಿ ಎಳ್ಳು-ಬೆಲ್ಲ ಬಣ್ಣ ಬಣ್ಣದ ಪ್ಯಾಕೆಟ್ ಗಳಲ್ಲಿ ಮಾರಾಟಕ್ಕೆ ಇಟ್ಟಿರೋದನ್ನು ಕಾಣಬಹುದು. ಸಕ್ಕರೆ ಅಚ್ಚು, ಎಳ್ಳು-ಬೆಲ್ಲ ಮಿಶ್ರಣದ ಪ್ಯಾಕೆಟ್ ಹೀಗೆ ಸಿಹಿ ಪದಾರ್ಥಗಳು ಮಾರುಕಟ್ಟೆಯಲ್ಲಿ ಸಿಗುತ್ತಿವೆ. ಹಬ್ಬ ಅಂದ್ರೆ ಮನೆಯಲ್ಲಿ ಶುಚಿ-ರುಚಿಯಾಗಿ ತಯಾರಿಸಿದ ಅಡುಗೆ ಇರಲೇ ಬೇಕು. ಸಂಕ್ರಾಂತಿ ಬಂದ್ರೆ ಸಾಕು ಎಲ್ಲರ ಮನೆಯಲ್ಲೂ ಪೊಂಗಲ್ ಪರಿಮಳ ಹರಡಿರುತ್ತದೆ. ಸಾಮಾನ್ಯವಾಗಿ ಅಕ್ಕಿ ಬಳಸಿಯೇ ಪೊಂಗಲ್ ಮಾಡುತ್ತಾರೆ. ಆದ್ರೆ ಈ ಬಾರಿ ಅವಲಕ್ಕಿ ಸಿಹಿ ಪೊಂಗಲ್ ತಯಾರಿಸಿ ಹಬ್ಬವನ್ನು ವಿಶೇಷವಾಗಿ ಆಚರಿಸಿ.

    ಬೇಕಾಗುವ ಸಾಮಾಗ್ರಿಗಳು
    * ಹೆಸರುಬೇಳೆ – ಅರ್ಧ ಕಪ್
    * ಗಟ್ಟಿ ಅವಲಕ್ಕಿ – 1 ಕಪ್
    * ಬೆಲ್ಲ – 1 ಅಚ್ಚು
    * ತುಪ್ಪ – ಅರ್ಧ ಕಪ್
    * ದ್ರಾಕ್ಷಿ, ಗೋಡಂಬಿ – ಅರ್ಧ ಬಟ್ಟಲು
    * ಏಲಕ್ಕಿ ಪುಡಿ – ಸ್ವಲ್ಪ
    * ಪಚ್ಚಕರ್ಪೂರ – ಚಿಟಿಕೆ

    ಮಾಡುವ ವಿಧಾನ
    * ಒಂದು ಬೌಲ್‍ಗೆ ಬೆಲ್ಲವನ್ನು ಕುಟ್ಟಿ ಹಾಕಿ ಸ್ವಲ್ಪ ನೀರು ಹಾಕಿಡಿ.
    * ಮೊದಲಿಗೆ ಒಂದು ಪ್ಯಾನ್‍ಗೆ ಹೆಸರುಬೇಳೆಯನ್ನು ಹಾಕಿ ತಿಳಿಕಂದು ಬಣ್ಣಕ್ಕೆ ತಿರುಗುವವರೆಗೆ ಹುರಿದು ಪಕ್ಕಕ್ಕಿಡಿ.
    * ಒಂದು ಪಾತ್ರೆಯನ್ನು ಸ್ಟೌವ್ ಮೇಲಿಟ್ಟು ನೀರು ಹಾಕಿ ಕುದಿಸಿ.
    * ನೀರು ಒಂದು ಕುದಿ ಬಂದ ಮೇಲೆ ಹುರಿದ ಹೆಸರು ಬೇಳೆಯನ್ನು ಸೇರಿಸಿ.
    * ಹೆಸರುಬೇಳೆ ಕುದಿಯುತ್ತಿರುವಾಗ ನೆನೆ ಹಾಕಿದ್ದ ಬೆಲ್ಲವನ್ನು ಸೋಸಿ ಹಾಕಿ.
    * ಈಗ ತುಪ್ಪದಲ್ಲಿ ದ್ರಾಕ್ಷಿ, ಗೋಡಂಬಿಯನ್ನು ಹುರಿದುಕೊಳ್ಳಿ.
    * ಅವಲಕ್ಕಿಯನ್ನು ನೀರಿನಲ್ಲಿ 2-5 ನಿಮಿಷ ನೆನೆಸಿ ಸೋಸಿಕೊಳ್ಳಿ. ಗಟ್ಟಿಯಾಗಿ ನೀರಿಲ್ಲದಂತೆ ಹಿಂಡಿಕೊಳ್ಳಿ.


    * ಈಗ ಕುದಿಯುತ್ತಿರುವ ಹೆಸರುಬೇಳೆ, ಬೆಲ್ಲದ ಪಾತ್ರೆಗೆ ಅವಲಕ್ಕಿಯನ್ನು ಸೇರಿಸಿ.
    * ಗಂಟು ಕಟ್ಟದಂತೆ ಒಮ್ಮೆಲೆ ತಿರುಗಿಸಿ.
    * ಈಗ ಪೊಂಗಲ್‍ಗೆ ಏಲಕ್ಕಿ ಪುಡಿ, ಚಿಟಿಕೆ ಪಚ್ಚಕರ್ಪೂರವನ್ನು ಹಾಕಿ ತಿರುಗಿಸಿ. ಇದರಿಂದ ಪೊಂಗಲ್ ಘಮಘಮ ಅನ್ನುತ್ತಿರುತ್ತದೆ.
    * ಗಟ್ಟಿಯಾಗುತ್ತಾ ಬಂದ ಪೊಂಗಲ್‍ಗೆ ಹುರಿದ ದ್ರಾಕ್ಷಿ, ಗೋಡಂಬಿ, 1 ಸ್ಪೂನ್ ತುಪ್ಪವನ್ನು ಸೇರಿಸಿ ಸ್ಟೌವ್ ಆರಿಸಿ.
    * ಕೆಲಕಾಲ ಪಾತ್ರೆಗೆ ತಟ್ಟಿ ಮುಚ್ಚಿಡಿ. ಬಳಿಕ ನಿಮ್ಮ ಸಿಹಿ ಪೊಂಗಲ್ ರೆಡಿ.

    ಇದನ್ನೂ ಓದಿ : ಸಂಕ್ರಾಂತಿಗೆ ಚಟಾಪಟ್ ಅಂತಾ ಮಾಡಿ ಸಕ್ಕರೆ ಅಚ್ಚು

  • ಸಂಕ್ರಾಂತಿಗೆ ಚಟಾಪಟ್ ಅಂತಾ ಮಾಡಿ ಸಕ್ಕರೆ ಅಚ್ಚು

    ಸಂಕ್ರಾಂತಿಗೆ ಚಟಾಪಟ್ ಅಂತಾ ಮಾಡಿ ಸಕ್ಕರೆ ಅಚ್ಚು

    ಮಕರ ಸಂಕ್ರಾಂತಿ ಹಬ್ಬಕ್ಕೆ ಕೆಲವೇ ದಿನಗಳು ಬಾಕಿ ಉಳಿದುಕೊಂಡಿದೆ. ದೊಡ್ಡವರಿಗೆ ಪೂಜೆ ಪುನಸ್ಕಾರ ಮಾಡೋದರ ಚಿಂತೆಯಾದ್ರೆ, ಮಕ್ಕಳಿಗೆ ಸಕ್ಕರೆ ಅಚ್ಚು ತಿನ್ನುವ ಆಸೆ. ಸಂಕ್ರಾಂತಿ ಸಮೀಪಿಸುತ್ತಿದ್ದಂತೆ ಬಣ್ಣ ಬಣ್ಣದ ಸಕ್ಕರೆ ಅಚ್ಚುಗಳು ಮಾರುಕಟ್ಟೆಗೆ ಲಗ್ಗೆ ಇಡುತ್ತೇವೆ. ಖರೀದಿ ವೇಳೆ ಯಾವ ಸಕ್ಕರೆ ಅಚ್ಚು ಮಿಠಾಯಿ ಒಳ್ಳೆಯದು? ಗುಣಮಟ್ಟ ಹೇಗಿರುತ್ತೆ ಎಂಬ ಪ್ರಶ್ನೆ ಗ್ರಾಹಕರಲ್ಲಿ ಹುಟ್ಟಿಕೊಳ್ಳುತ್ತವೆ. ಈ ಎಲ್ಲ ಟೆನ್ಷನ್ ಬದಿಗಿಟ್ಟು ಮನೆಯಲ್ಲಿ ಸಕ್ಕರೆ ಅಚ್ಚು ಮಾಡಿ ಆರೋಗ್ಯಕರ ಸಂಕ್ರಾಂತಿ ಆಚರಿಸಿ.

    ಬೇಕಾಗುವ ಸಾಮಾಗ್ರಿಗಳು
    1. ಸಕ್ಕರೆ – ಅರ್ಧ ಕೆಜಿ
    2. ಹಾಲು – ಕಾಲು ಕಪ್
    3. ನೀರು – ಕಾಲು ಕಪ್
    4. ಮೊಸರು – ಕಾಲು ಕಪ್
    5. ಸಕ್ಕರೆ ಅಚ್ಚು ಮಾಡುವ ಮರದ ಮೌಲ್ಡ್ ಅಥವಾ ಪ್ಲಾಸ್ಟಿಕ್
    6. ಫುಡ್ ಕಲರ್ – ಬೇಕಿದ್ದಲ್ಲಿ

    ಮಾಡುವ ವಿಧಾನ
    * ಮೊದಲಿಗೆ ನೀವು ಸಕ್ಕರೆ ಅಚ್ಚು ಮಾಡಲು ಮರದ ಮೌಲ್ಡ್ ಬಳಸುತ್ತಿದ್ದರೆ, ಅದನ್ನು 3 – 4 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ಸಕ್ಕರೆ ಪಾಕ ಮಾಡುವಾಗ ನೀರಿನಿಂದ ತೆಗೆದು ಒಣಗಿದ ಬಟ್ಟೆಯಲ್ಲಿ ಒರೆಸಿಡಿ. ಪ್ಲಾಸ್ಟಿಕ್ ಅಥವಾ ಫೈಬರ್ ಮೌಲ್ಡ್ ಆಗಿದ್ರೆ ಡೈರೆಕ್ಟ್ ಆಗೇ ಹಾಕಬಹುದು.
    * ಸಕ್ಕರೆ ಪಾಕ ತಯಾರಿಸಲು ಗಟ್ಟಿ ತಳದ ಪಾತ್ರೆ ಬಳಸಿ.
    * ಪಾತ್ರೆಗೆ ಸಕ್ಕರೆ ಹಾಕಿ ಅದಕ್ಕೆ ಕಾಲು ಕಪ್ ನೀರು ಹಾಕಿ ಕುದಿಸಿ. (ಸಕ್ಕರೆಯನ್ನು ನೀರಿನಲ್ಲಿ ಕರಗಿಸಿಯೂ ಬಳಸಬಹುದು)


    * ಸಕ್ಕರೆ ಕರಗಿದ ಮೇಲೆ ಅದಕ್ಕೆ ಕಾಲು ಕಪ್ ಹಾಲು ಹಾಕಿ 2-3 ನಿಮಿಷ ಕುದಿಸಿ.
    * ಬಳಿಕ ಮಿಶ್ರಣಕ್ಕೆ ಕಾಲು ಕಪ್ ಮೊಸರು ಹಾಕಿ 2-3 ನಿಮಿಷ ಕುದಿಸಿ. ಪಾಕ ಹಾಲು ಒಡೆದಂತೆ ಆಗುತ್ತದೆ. (ಹಾಲು, ಮೊಸರು ಬಳಸುವುದರಿಂದ ಅಚ್ಚು ಮೃದುವಾಗಿರುತ್ತದೆ)
    * ಈಗ ಸಕ್ಕರೆ ಪಾಕದ ಮಿಶ್ರಣವನ್ನು ಮತ್ತೊಂದು ಪಾತ್ರೆಗೆ ಸೋಸಿಕೊಳ್ಳಿ.
    * ಈಗ ಮರದ ಮೌಲ್ಡ್‍ಗೆ ಎರಡು ಕಡೆ ರಬ್ಬರ್ ಬ್ಯಾಂಡ್ ಹಾಕಿಡಿ. ಏಕೆಂದರೆ ಪಾಕ ಮಾಡಿ ರಬ್ಬರ್ ಬ್ಯಾಂಡ್ ಹಾಕುವಷ್ಟರಲ್ಲಿ ಪಾಕ ಗಟ್ಟಿ ಆಗಿರುತ್ತದೆ.
    * ಈಗ ಸೋಸಿಕೊಂಡ ಪಾಕವನ್ನು ಮತ್ತೆ ಒಲೆಯ ಮೇಲಿಟ್ಟು. ಚೆನ್ನಾಗಿ ಕುದಿಸಿ… ಚೆನ್ನಾಗಿ ಬಬಲ್ಸ್ ಬರುತ್ತದೆ.(ಕಡಿಮೆ ಉರಿಯಲ್ಲಿ ಕುದಿಸಿ).

    * ಪಾಕ್ ಥಿಕ್‍ನೆಸ್ ಬಂದಮೇಲೆ ಡೈರೆಕ್ಟ್ ಅಚ್ಚಿನ ಮೌಲ್ಡ್‍ಗೆ ಹಾಕಿ.. 10-15 ನಿಮಿಷ ಬಿಟ್ಟು ಮೌಲ್ಡ್‍ನಿಂದ ತೆಗೆದರೆ ಸಕ್ಕರೆ ಅಚ್ಚು ರೆಡಿ.
    ( ಸಕ್ಕರೆ ಅಚ್ಚು ಕಲರ್ ಕಲರ್ ಬೇಕಿದ್ದಲ್ಲಿ ಪಾಕ್ ಥಿಕ್‍ನೆಸ್ ಬರೋವಾಗ ಫುಡ್ ಕಲರ್ ಸೇರಿಸಿಕೊಳ್ಳಿ)
    * ಅಚ್ಚು ತೆಗೆಯುವಾಗ ಮುರಿದು ಹೋದ್ರೆ.. ಮತ್ತೆ ಪಾತ್ರೆಗೆ ಹಾಕಿ ಒಲೆಯ ಮೇಲಿಟ್ಟು ಬಿಸಿ ಮಾಡಿ ಅಚ್ಚು ಮಾಡಬಹುದು.

  • ಮನೆಯಲ್ಲೇ ಕೇಕ್ ತಯಾರಿಸಿ ನ್ಯೂ ಇಯರ್ ಸೆಲೆಬ್ರೇಟ್ ಮಾಡಿ

    ಮನೆಯಲ್ಲೇ ಕೇಕ್ ತಯಾರಿಸಿ ನ್ಯೂ ಇಯರ್ ಸೆಲೆಬ್ರೇಟ್ ಮಾಡಿ

    ನ್ಯೂ ಇಯರ್‌ಗೆ ಈಗಾಗಲೇ ಸಲಕ ಸಿದ್ಧತೆ ನಡೆಯುತ್ತಿದೆ. ಇನ್ನೂ ಒಂದು ದಿನದಲ್ಲಿ ಹೊಸ ವರ್ಷ ಶುರುವಾಗುತ್ತೆ. ನ್ಯೂ ಇಯರ್ ದಿನ ಎಲ್ಲರೂ ಕೇಕ್ ಕಟ್ ಮಾಡಿ ವರ್ಷ ಪೂರ್ತಿ ತಮ್ಮ ಜೀವನ ಸಿಹಿಯಾಗಿರಲಿ ಎಂದು ಸಂಭ್ರಮಿಸುತ್ತಾರೆ. ಕೆಲವರು ಬೇಕರಿಯಿಂದ ಕೇಕ್ ತಂದು ನ್ಯೂ ಇಯರ್ ಸೆಲೆಬ್ರೇಷನ್ ಮಾಡುತ್ತಾರೆ. ಹೊಸ ವರ್ಷ ಎಂದರೆ ಹೊಸದಾಗಿಯೇ ವರ್ಷವನ್ನು ಆರಂಭಿಸಬೇಕು. ಹೀಗಾಗಿ ನೀವೇ ಮನೆಯಲ್ಲಿ ಸಿಂಪಲ್ ಆಗಿ ಕೇಕ್ ಮಾಡಿ, ನ್ಯೂ ಇಯರ್ ಆಚರಣೆ ಮಾಡಿ. ಆದ್ದರಿಂದ ನಿಮಗೆ ಎಗ್‍ಲೆಸ್ ಕೇಕ್ ಮಾಡುವ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಮೈದಾ – 1 ಬಟ್ಟಲು
    2. ಸಕ್ಕರೆ ಪುಡಿ – 1 ಬಟ್ಟಲು
    3. ಎಣ್ಣೆ – 4-5 ಚಮಚ
    4. ಅಡುಗೆ ಸೋಡಾ – ಚಿಟಿಕೆ
    5. ಹಾಲು – ಕಾಲು ಕಪ್
    6. ವೆನಿಲ್ಲಾ ಎಸೆನ್ಸ್ – 1 ಚಮಚ
    7. ಉಪ್ಪು – ಚಿಟಿಕೆ
    8. ತುಪ್ಪ – 1 ಚಮಚ

    ಮಾಡುವ ವಿಧಾನ
    * ಮೊದಲಿಗೆ ಕೇಕ್ ಪ್ಯಾನ್‍ಗೆ ತುಪ್ಪ ಸವರಿ ಕೇಕ್ ಪೇಪರ್ ಹಾಕಿ ಇಡಿ.
    * ಈಗ ಒಂದು ಮಿಕ್ಸಿಂಗ್ ಬೌಲ್‍ಗೆ ಸಕ್ಕರೆ ಪುಡಿ, ಎಣ್ಣೆ ಸೇರಿಸಿ ಚೆನ್ನಾಗಿ ಗಂಟುಗಳಿಲ್ಲದಂತೆ ಮಿಕ್ಸ್ ಮಾಡಿ.
    * ಅದೇ ಮಿಶ್ರಣಕ್ಕೆ ಮೈದಾ ಹಿಟ್ಟು, ಚಿಟಿಕೆ ಉಪ್ಪು, ಅಡುಗೆ ಸೋಡಾ ಸೇರಿಸಿ ಕಲಸಿ.
    * ಈಗ ಹಾಲು ಸೇರಿಸಿ ಇಡ್ಲಿ ಹಿಟ್ಟಿನ ಹದಕ್ಕೆ ಚೆನ್ನಾಗಿ ಗಂಟುಗಳು ಇಲ್ಲದಂತೆ ಮಿಕ್ಸ್ ಮಾಡಿ.
    * ಬಳಿಕ ವೆನಿಲಾ ಎಸೆನ್ಸ್ ಸೇರಿಸಿ ಚೆನ್ನಾಗಿ ಕಲಸಿ. ಗಂಟುಗಳು ಇಲ್ಲದಂತೆ ನಯವಾದ ಮಿಶ್ರಣ ರೆಡಿ ಮಾಡಬೇಕು.
    (ಬೇಕಿದ್ದರೆ ಬೇರೆ ಫ್ಲೇವರ್‍ನ ಎಸೆನ್ಸ್ ಅನ್ನು ಬಳಸಿಕೊಳ್ಳಬಹುದು)
    * ಈಗ ಮಿಶ್ರಣವನ್ನು ತುಪ್ಪ ಸವರಿ ಕೇಕ್ ಪೇಪರ್ ಹಾಕಿಟ್ಟಿದ್ದ ಕೇಕ್ ಪ್ಯಾನ್‍ಗೆ ಹಾಕಿ. ಬಬಲ್ಸ್ ಬರದಂತೆ ನೋಡಿಕೊಳ್ಳಿ.
    * ಒಂದು ಕುಕ್ಕರ್‌ಗೆ ಅರ್ಧ ಇಂಚಿನಷ್ಟು ಮರಳು ಹಾಕಿ 5 ನಿಮಿಷ ಕಾದ ಮೇಲೆ ಪ್ಯಾನ್ ಸ್ಟಾಂಡ್ ಇಟ್ಟು ಮಿಶ್ರಣ ಹಾಕಿದ ಪ್ಯಾನ್ ಅನ್ನು ಇಡಿ.
    * ಕುಕ್ಕರ್‌ಗೆ ವಿಶಲ್ ಹಾಕದೇ 10-15 ನಿಮಿಷ ಕಡಿಮೆ ಉರಿಯಲ್ಲಿ ಬೇಯಿಸಿ..
    * ಎಗ್‍ಲೆಸ್ ವೆನಿಲಾ ಕೇಕ್ ಸವಿಯಲು ರೆಡಿ.

  • ಮನೆಯಲ್ಲಿ ಹನಿಕೇಕ್ ಮಾಡಿ ಆರೋಗ್ಯಕರ ಕ್ರಿಸ್‍ಮಸ್ ಆಚರಿಸಿ

    ಮನೆಯಲ್ಲಿ ಹನಿಕೇಕ್ ಮಾಡಿ ಆರೋಗ್ಯಕರ ಕ್ರಿಸ್‍ಮಸ್ ಆಚರಿಸಿ

    ಮಂಗಳವಾರ ಕ್ರಿಸ್‍ಮಸ್ ಹಬ್ಬ. ಈಗಾಗಲೇ ಜನರು ಕ್ರಿಸ್‍ಮಸ್ ಹಬ್ಬಕ್ಕೆ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೆ. ಅಲಂಕಾರಿಕ ವಿದ್ಯುತ್ ದೀಪಗಳು, ಕ್ರಿಸ್‍ಮಸ್ ಟ್ರೀ, ಸಾಂತಾ ಡ್ರೆಸ್ ಹೀಗೆ ಸಿದ್ಧತೆ ಭರ್ಜರಿಯಾಗಿಯೇ ನಡೆದಿದೆ. ಮಾರುಕಟ್ಟೆಗಳಲ್ಲಿ ಕ್ರಿಸ್‍ಮಸ್ ಟ್ರೀಗಳ ಅಲಂಕಾರ ಸೆಂಟರ್ ಆಫ್ ಅಟ್ರ್ಯಾಕ್ಷನ್ ಆಗಿದೆ. ಹಬ್ಬ ಅಂದಮೇಲೆ ಮನೆಯಲ್ಲಿ ಸಿಹಿ ಇರಲೇಬೇಕು. ಕ್ರಿಸ್‍ಮಸ್ ಅಂದ್ರೆ ಕೇಕ್ ಬೇಕೇ ಬೇಕು. ಇತ್ತೀಚಿನ ದಿನಗಳಲ್ಲಿ ಗ್ರಾಹಕರನ್ನು ಸೆಳೆಯಲು ಕೆಲ ವ್ಯಾಪಾರಿ ಅಪಾಯಕಾರಿ ಕೆಮಿಕಲ್ ಬಳಸಿ ನೋಡಲು ಚೆನ್ನಾಗಿ ಕಾಣುವ ಕೇಕ್ ತಯಾರಿಸಿ ಮಾರಟಕ್ಕೀಡುತ್ತಾರೆ. ಕೆಮಿಕಲ್ ಮಿಶ್ರಿತ ಕೇಕ್ ತಿನ್ನುವ ಬದಲು ಮನೆಯಲ್ಲಿಯೇ ತಯಾರಿಸಿ ಆರೋಗ್ಯಕರ ಕ್ರಿಸ್‍ಮಸ್ ಆಚರಿಸಿ.

    ಸಿಂಪಲ್ ಹನಿಕೇಕ್ ಮಾಡುವ ವಿಧಾನಗಳು

    ಬೇಕಾಗುವ ಸಾಮಾಗ್ರಿಗಳು
    * ಮೈದಾ ಹಿಟ್ಟು – 1 ಕಪ್
    * ಜೋಳದ ಹಿಟ್ಟು – 1.5 ಸ್ಪೂನ್
    * ಉಪ್ಪು – ಚಿಟಿಕೆ
    * ಬೇಕಿಂಗ್ ಪೌಡರ್, ಸೋಡಾ – 1 ಸ್ಪೂನ್
    * ಕಂಡೆನ್ಡ್ಸ್ ಮಿಲ್ಕ್ – 200 ಎಂಎಲ್
    * ಸಕ್ಕರೆ ಪುಡಿ – 3 ಸ್ಪೂನ್
    * ವೆನಿಲಾ ಎಸೆನ್ಸ್ – 1 ಸ್ಪೂನ್
    * ಅಡುಗೆ ಎಣ್ಣೆ – ಅರ್ಧ ಕಪ್
    * ಹಾಲು – ಅರ್ಧ ಕಪ್
    * ವೆನಿಗರ್ – ಅರ್ಧ ಸ್ಪೂನ್
    * ಸಕ್ಕರೆ – ಅರ್ಧ ಕಪ್
    * ಜೇನುತುಪ್ಪ – 2-3 ಸ್ಪೂನ್
    * ಜಾಮ್ – ಅರ್ಧ ಕಪ್
    * ಒಣಕೊಬ್ಬರಿ ಪೌಡರ್ – ಅರ್ಧ ಕಪ್

    ಮಾಡುವ ವಿಧಾನ
    * ಮೊದಲು ಒಂದು ಬೌಲ್‍ಗೆ ಮೈದಾ ಹಿಟ್ಟು, ಜೋಳದ ಹಿಟ್ಟು, ಚಿಟಿಕೆ ಉಪ್ಪು, ಬೇಕಿಂಗ್ ಪೌಡರ್, ಅಡುಗೆ ಸೋಡಾ ಹಾಕಿ ಮಿಕ್ಸ್ ಮಾಡಿ.
    * ಈಗ ಒಂದು ಮಿಕ್ಸಿಂಗ್ ಬೌಲ್‍ಗೆ ಕಂಡೆನ್ಡ್ಸ್ ಮಿಲ್ಕ್, 1 ಸ್ಪೂನ್ ಸಕ್ಕರೆ ಪುಡಿ, 1 ಸ್ಪೂನ್ ವೆನಿಲಾ ಎಸೆನ್ಸ್ ಸೇರಿಸಿ ಮಿಕ್ಸ್ ಮಾಡಿ..
    * ಮಿಶ್ರಣಕ್ಕೆ ಅರ್ಧ ಕಪ್ ಎಣ್ಣೆ ಸೇರಿಸಿ ಮಿಕ್ಸ್ ಮಾಡಿ. ಈಗ ಮೊದಲು ಮಿಶ್ರಣ ಮಾಡಿದ ಮೈದಾ, ಜೋಳದ ಹಿಟ್ಟು ಮಿಶ್ರಣವನ್ನು ಸೇರಿಸಿ ಹಾಲು ಸೇರಿಸಿ ಮಿಕ್ಸ್ ಮಾಡಿ
    * ಮಿಶ್ರಣದ ಬ್ಯಾಟರ್‍ನಲ್ಲಿ ಯಾವುದೇ ಗಂಟುಗಳು ಇಲ್ಲದಂತೆ ಮಿಕ್ಸ್ ಮಾಡಿ. ಮಿಶ್ರಣ ತೀರ ಗಟ್ಟಿಯಾಗಿ, ತೆಳ್ಳಗೂ ಇರಬಾರದು.
    * ಈಗ ಅರ್ಧ ಸ್ಪೂನ್ ವೆನಿಗರ್ ಸೇರಿಸಿ ಮಿಕ್ಸ್ ಮಾಡಿಟ್ಟುಕೊಳ್ಳಿ.
    * ಈಗ ಒಂದು ಕೇಕ್ ಪ್ಯಾನ್‍ಗೆ ಎಣ್ಣೆ ಸವರಿ ಕೇಕ್ ಪೇಪರ್ ಹಾಕಿ. ಅದರ ಮೇಲೆ ಮಿಶ್ರಣವನ್ನು ಸಮ ಪ್ರಮಾಣದಲ್ಲಿ ಹಾಕಿ.

    * ಈಗ ಪ್ರಿಹೀಟ್ ಆಗಿರುವ ಓವನ್‍ನಲ್ಲಿ ಪ್ಯಾನ್ ಇಟ್ಟು 180 ಡಿಗ್ರಿಯಲ್ಲಿ 35 ನಿಮಿಷ ಬೇಯಿಸಿ.
    * ಕೇಕ್ ಬೇಯುವಷ್ಟರಲ್ಲಿ ಒಂದು ಪಾತ್ರೆಯನ್ನು ಸ್ಟೌವ್ ಮೇಲಿಟ್ಟು ಅರ್ಧ ಕಪ್ ಸಕ್ಕರೆ, ಅರ್ಧ ಕಪ್ ನೀರು ಸೇರಿಸಿ. ಕರಗುವ ತನಕ ಕಾಯಿಸಿ. ದಪ್ಪ ಪಾಕ ಬೇಡ.
    * ಸಕ್ಕರೆ ಕರಗಿದ ಮೇಲೆ ಕೆಳಗಿಳಿಸಿ. ಸ್ವಲ್ಪ ಆರಿದ ಮೇಲೆ 2-3 ಸ್ಪೂನ್ ಜೇನು ಸೇರಿಸಿ.
    * ಬಳಿಕ ಒಂದು ನಾನ್‍ಸ್ಟಿಕ್ ಪ್ಯಾನ್‍ಗೆ ರೆಡಿ ಇರುವ ಜಾಮ್ ತೆಗೆದುಕೊಳ್ಳಿ. (ಕಿಸಾನ್ ಜಾಮ್, ಫ್ರೂಟ್ ಜಾಮ್ ಯಾವುದಾದರೂ ಬಳಸಬಹುದು)
    * ಒಂದು ಕಪ್‍ನಷ್ಟು ಜಾಮ್‍ಗೆ 1 ಸ್ಪೂನ್ ಪುಡಿ ಸಕ್ಕರೆ ಸೇರಿಸಿ. 2 ನಿಮಿಷ ಬೇಯಿಸಿ. ಜಾಮ್ ಲಿಕ್ವಿಡ್ ರೂಪಕ್ಕೆ ಬಂದಾಗ ಕೆಳಗಿಳಿಸಿ.
    * ಈಗ ಓವನ್‍ನಲ್ಲಿಟ್ಟ ಕೇಕ್ ಹೊರ ತೆಗೆದು ಒಂದು ಗಾರ್ನಿಷಿಂಗ್ ಪ್ಲೇಟ್‍ಗೆ ಹಾಕಿ.
    * ಕೇಕ್‍ನ ಅಂಚುಗಳನ್ನು ಕಟ್ ಮಾಡಿ.
    * ಕೇಕ್ ಮೇಲ್ಭಾಗದಲ್ಲಿ ಫೋರ್ಕ್‍ನಿಂದ ಸಣ್ಣ ಸಣ್ಣ ರಂಧ್ರಗಳನ್ನ ಮಾಡಿ..
    * ಈಗ ಆ ರಂಧ್ರಗಳ ಮೂಲಕ ಕೇಕ್‍ಗೆ ಸಕ್ಕರೆ ಪಾಕವನ್ನು ಹಾಕಿರಿ.
    * ಬಳಿಕ ಮೇಲ್ಭಾಗದಲ್ಲಿ ಕರಗಿಸಿಟ್ಟ ಜಾಮ್ ಅನ್ನು ಲೇಪಿಸಿ.
    * ಈಗ ಚಿಕ್ಕ ಚಿಕ್ಕಿ ಭಾಗವಾಗಿ ಕೇಕ್ ಅನ್ನು ಕತ್ತರಿಸಿ, ಮಿಕ್ಕ ಸಕ್ಕರೆ ಪಾಕದಲ್ಲಿ ಕೇಕ್‍ಅನ್ನು ಡಿಪ್ ಮಾಡಿ.
    * ಬಳಿಕ ಜಾಮ್ ಭಾಗವನ್ನು ಒಣಕೊಬ್ಬರಿ ಪೌಡರ್ ನಲ್ಲಿ ಡಿಪ್ ಮಾಡಿದ್ರೆ ಹನಿ ಕೇಕ್ ರೆಡಿ.

    ಇದನ್ನೂ ಓದಿ: ಕ್ರಿಸ್‍ಮಸ್ ಸ್ಪೆಷಲ್- ಮನೆಯಲ್ಲಿಯೇ ಮಾಡಿ ಕಾರ್ನ್ ಕೇಕ್

  • ಕ್ರಿಸ್‍ಮಸ್ ಸ್ಪೆಷಲ್- ಮನೆಯಲ್ಲಿಯೇ ಮಾಡಿ ಕಾರ್ನ್ ಕೇಕ್

    ಕ್ರಿಸ್‍ಮಸ್ ಸ್ಪೆಷಲ್- ಮನೆಯಲ್ಲಿಯೇ ಮಾಡಿ ಕಾರ್ನ್ ಕೇಕ್

    ಕ್ರಿಸ್‍ಮಸ್ ಬಂದ್ರೆ ಮನೆಯಲ್ಲಿ ಕೇಕ್ ಇರಲೇಬೇಕು. ಅಂಗಡಿಗಳಲ್ಲಿ ಸಿಗುವ ಕೇಕ್ ಹೇಗಿರುತ್ತೋ? ಆರೋಗ್ಯಕರವಾಗಿರುತ್ತೋ ಎಂಬಿತ್ಯಾದಿ ಪ್ರಶ್ನೆಗಳು ಗೃಹಿಣಿಯರ ಮನದಲ್ಲಿ ಹುಟ್ಟಿಕೊಳ್ಳುತ್ತವೆ. ಕೆಲಸದ ನಿಮಿತ್ತ ಕುಟುಂಬದಿಂದ ದೂರ ಇರುವವರು ಬೇಕರಿಯಲ್ಲಿ ಸಿಗುವ ಕೇಕ್ ತಿಂದು ಸಾಕಾಗಿದೆ ಎಂಬ ಮನಸ್ಥಿತಿಗೆ ಬಂದಿರುತ್ತಾರೆ. ಕೇಕ್ ಮಾಡಬೇಕೆಂದ್ರೆ ಓವನ್ ಇರಬೇಕು ಮತ್ತಿತ್ತರ ಸಾಮಾಗ್ರಿಗಳು ನಮ್ಮಲ್ಲಿ ಇಲ್ಲ ಎಂದು ಪೇಚಾಡುವರರೂ ಇರುತ್ತಾರೆ. ಓವನ್ ಇಲ್ಲದೇ ಸರಳವಾಗಿ ಕೇಕ್ ಮಾಡುವ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಗ್ರಿಗಳು

    ಜೋಳದ ಹಿಟ್ಟು – 1 ಕಪ್
    ಗಟ್ಟಿ ಹಾಲು – 1 ಕಪ್
    ಪಚ್ಚೆ ಬಾಳೆಹಣ್ಣು – 1
    ಅಡುಗೆ ಸೋಡಾ – ಅರ್ಧ ಸ್ಪೂನ್
    ಬೆಲ್ಲ – ಸ್ವಲ್ಪ
    ತುಪ್ಪ – 2 ಸ್ಪೂನ್
    ಡ್ರೈಫ್ರೂಟ್ಸ್ ಅಥವಾ ಟೂಟಿ ಫ್ರೂಟಿ

     

    ಮಾಡುವ ವಿಧಾನ
    * ಮೊದಲು ಒಂದು ಬೌಲ್ ತೆಗೆದುಕೊಂಡು ಅದಕ್ಕೆ ಚೆನ್ನಾಗಿ ಮಾಗಿದ ಪಚ್ಚೆ ಬಾಳೆಹಣ್ಣನ್ನು ಸಿಪ್ಪೆ ಸುಲಿದು ಹಾಕಿ ಚೆನ್ನಾಗಿ ಮ್ಯಾಶ್ ಮಾಡಿ.
    * ನಂತರ ಅದೇ ಬೌಲ್‍ಗೆ ಪುಡಿ ಮಾಡಿದ ಬೆಲ್ಲ, ತುಪ್ಪ, ಸೋಡಾ ಹಾಕಿ ಚೆನ್ನಾಗಿ ಗಂಟು ಬಾರದಂತೆ ಮಿಕ್ಸ್ ಮಾಡಿ.
    * ಬಳಿಕ ಅದೇ ಮಿಶ್ರಣಕ್ಕೆ ಗಟ್ಟಿ ಹಾಲು, ಜೋಳದ ಹಿಟ್ಟು ಸೇರಿಸಿ ಚೆನ್ನಾಗಿ ಗಂಟು ಇಲ್ಲದಂತೆ ಮಿಕ್ಸ್ ಮಾಡಿ
    * ಈಗ ಕೇಕ್‍ನ ಮಿಶ್ರಣ ರೆಡಿ.
    * ಇತ್ತ ಒಂದು ತುಪ್ಪ ಸವರಿದ ಕೇಕ್ ಪ್ಯಾನ್ ಅಥವಾ ಅಗಲವಾದ ಪಾತ್ರೆಗೆ ಈ ಮಿಶ್ರಣವನ್ನು ಹಾಕಿ.
    * ಪಾತ್ರೆಯಲ್ಲಿ ಸಮ ಪ್ರಮಾಣದಲ್ಲಿ ಮಿಶ್ರಣವನ್ನು ಕೂರಿಸಲು ಸ್ವಲ್ಪ ನೆಲಕ್ಕೆ ಕುಟ್ಟಿ. ಬಳಿಕ ಮಿಶ್ರಣದ ಮೇಲೆ ಸಣ್ಣಗೆ ಹೆಚ್ಚಿದ ಡ್ರೈಫ್ರೂಟ್ಸ್ ಅಥವಾ ಟೂಟಿ ಫ್ರೂಟಿ ಹಾಕಿ.
    * ಈಗ ಈ ಪ್ಯಾನ್ ಅನ್ನು ಕುಕ್ಕರ್‍ಗೆ ನೀರು ಹಾಕಿ ಕುದಿ ಬಂದ ಮೇಲೆ ಪ್ಯಾನ್ ಸ್ಟ್ಯಾಂಡ್ ಇಟ್ಟು ಅದರ ಮೇಲೆ ಕೇಕ್ ಮಿಶ್ರಣ ಇಟ್ಟು 15 ನಿಮಿಷ ಬೇಯಿಸಬೇಕು.
    * ಕುಕ್ಕರ್ ಬಿಸಿ ಕಡಿಮೆ ಆದ ಮೇಲೆ ತೆಗೆದು ಮಿಶ್ರಣವನ್ನು ಚಾಕುವಿನಿಂದ ಕತ್ತರಿಸಿ
    * ನಿಮಗೆ ಬೇಕಾದ ಶೇಪ್‍ಗೆ ಕತ್ತರಿಸಿ ಸವಿಯಿರಿ.

  • ಹೆಲ್ದಿ ಸಲಾಡ್ ತಿನ್ನಿ ಆರೋಗ್ಯ ಕಾಪಾಡಿಕೊಳ್ಳಿ

    ಹೆಲ್ದಿ ಸಲಾಡ್ ತಿನ್ನಿ ಆರೋಗ್ಯ ಕಾಪಾಡಿಕೊಳ್ಳಿ

    ಪ್ರತಿ ನಿತ್ಯ ಹೊರಗಿನ ಆಹಾರಗಳನ್ನು ತಿನ್ನುತ್ತೇವೆ. ಕೆಲವೊಮ್ಮೆ ಬೇಜಾರಾದರೂ ಅದೇ ಅನಿವಾರ್ಯವಾಗಿರುತ್ತದೆ. ಹೀಗಾಗಿ ವಾರದಲ್ಲಿ ಒಂದು ಬಾರಿಯಾದರೂ ಮನೆಯಲ್ಲೇ ಹೆಲ್ದಿ ಸಲಾಡ್ ಮಾಡಿ ತಿನ್ನಿ. ಈ ಮೂಲಕ ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಿ.

    ಬೇಕಾಗುವ ಸಾಮಾಗ್ರಿಗಳು
    * ಮೊಳಕೆ ಹೆಸರುಕಾಳು- 1 ಸಣ್ಣ ಬಟ್ಟಲು
    * ಮೊಳಕೆ ಕಡ್ಲೆಕಾಳು- 1 ಸಣ್ಣ ಬಟ್ಟಲು
    * ದಾಳಿಂಬೆ- 1 ಸಣ್ಣ ಬಟ್ಟಲು
    * ಸ್ವೀಟ್ ಕಾರ್ನ್
    * ಕ್ಯಾರೆಟ್ ತುರಿ- ಸ್ವಲ್ಪ
    * ಸೌತೆಕಾಯಿ- ಸಣ್ಣಗೆ ಹೆಚ್ಚಿದ್ದು
    * ಕ್ಯಾಪ್ಸಿಕಂ- ಸಣ್ಣಗೆ ಹೆಚ್ಚಿದ್ದು
    * ಎಲೆಕೋಸು- ಸಣ್ಣಗೆ ಹೆಚ್ಚಿದ್ದು

    * ಕೊತ್ತಂಬರಿ- ಸಣ್ಣಗೆ ಹೆಚ್ಚಿದ್ದು
    * ಕಾಯಿ ತುರಿ- ಸ್ವಲ್ಪ
    * ಪೆಪ್ಪರ್ ಪೌಡರ್- ಸ್ವಲ್ಪ
    * ಚಾಟ್ ಮಸಾಲ- ಸ್ವಲ್ಪ
    * ಉಪ್ಪು- ರುಚಿಗೆ ತಕ್ಕಷ್ಟು
    * ಖಾರದ ಪುಡಿ- ಸ್ವಲ್ಪ
    * ಜೀರಿಗೆ ಪುಡಿ- ಸ್ವಲ್ಪ
    * ಟೊಮೆಟೋ- 2
    * ಈರುಳ್ಳಿ- 1 ಕಟ್ ಮಾಡಿದ್ದು

    ಮಾಡುವ ವಿಧಾನ
    * ಒಂದು ಮಿಕ್ಸಿಂಗ್ ಬೌಲ್ ತೆಗೆದುಕೊಂಡು ಅದಕ್ಕೆ ಮೇಲಿನ ಎಲ್ಲಾ ಪದಾರ್ಥಗಳನ್ನು ಹಾಕಿ ಮಿಕ್ಸ್ ಮಾಡಿ
    * ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಪೆಪ್ಪರ್ ಪೌಡರ್, ಚಾಟ್ ಮಸಾಲ, ಖಾರದ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ, ನಂತರ ಅದರ ಮೇಲೆ ಕೊತ್ತಂಬರಿ ಸೊಪ್ಪು ಉದುರಿಸಿ ಸರ್ವ್ ಮಾಡಿ

  • ಸಿಂಪಲ್ಲಾಗಿ ಮಾಡಿ ವೆಜಿಟೇಬಲ್ ಸೂಪ್

    ಸಿಂಪಲ್ಲಾಗಿ ಮಾಡಿ ವೆಜಿಟೇಬಲ್ ಸೂಪ್

    ಇತ್ತೀಚಿನ ದಿನಗಳಲ್ಲಿ ಸಂಜೆಯಾಗುತ್ತಿದ್ದಂತೆ ಚಳಿಯಾಗುತ್ತಿದ್ದು, ಬಿಸಿ ಬಿಸಿ ಏನಾದರೂ ತಿನ್ನಬೇಕು ಅಥವಾ ಕುಡಿಯಬೇಕು ಎನಿಸುವುದು ಸಹಜ. ಹೀಗಾಗಿ ಮನೆಯಲ್ಲೇ ಮಾಡಿ ಸಿಂಪಲ್ಲಾಗಿ ವೆಜಿಟೇಬಲ್ ಸೂಪ್ ಮಾಡಿ ಕುಡಿಯಿರಿ.

    ಬೇಕಾಗುವ ಸಾಮಾಗ್ರಿಗಳು:
    ಬಟಾಣಿ – ಒಂದು ಹಿಡಿ
    ಎಲೆಕೋಸು- ಸಣ್ಣಗೆ ಹೆಚ್ಚಿದ್ದು ಸ್ವಲ್ಪ
    ಕ್ಯಾರೆಟ್ – ಸಣ್ಣಗೆ ಹೆಚ್ಚಿದ್ದು ಸ್ವಲ್ಪ
    ಸ್ವೀಟ್ ಕಾರ್ನ್ – ಸ್ವಲ್ಪ
    ಬೆಳ್ಳುಳ್ಳಿ – 3-4 ಎಸಳು
    ಆಲೂಗಡ್ಡೆ – ಬೇಯಿಸಿದ್ದು 1
    ಪೆಪ್ಪರ್ ಪೌಡರ್ – 1 ಸ್ಪೂನ್
    ಬೀಟ್‍ರೂಟ್ – ಸಣ್ಣಗೆ ಹೆಚ್ಚಿದ್ದು ಸ್ವಲ್ಪ
    ಕಾರ್ನ್ ಫ್ಲೋರ್ – 1 ಸ್ಪೂನ್
    ಕೊತ್ತಂಬರಿ – ಸಣ್ಣಗೆ ಹೆಚ್ಚಿದ್ದು ಸ್ವಲ್ಪ
    ಉಪ್ಪು – ರುಚಿಗೆ ತಕ್ಕಷ್ಟು
    (ಮಿಂಟ್ ಫ್ಲೇವರ್ ಬೇಕಾದ್ರೆ ಪುದೀನ ಹಾಕಿ.. ಇಲ್ಲವಾದರೆ ಬೇಡ)

    ಮಾಡುವ ವಿಧಾನ
    * ಒಂದು ಅಗಲವಾದ ಪಾತ್ರೆಗೆ ಮುಕ್ಕಾಲು ಲೀಟರ್ ನಷ್ಟು ನೀರು ಹಾಕಿ. ಎಲ್ಲಾ ತರಕಾರಿ ಹಾಕಿ ಬೇಯಲು ಬಿಡಿ
    * ಒಂದು ಮಿಕ್ಸಿ ಜಾರಿಗೆ ಬೇಯಿಸಿದ ಆಲೂಗಡ್ಡೆ ನೀರು ಸೇರಿಸಿ ಪೇಸ್ಟ್ ರೀತಿ ಮಾಡಿಕೊಳ್ಳಿ
    * ಒಂದು ಸಣ್ಣ ಬಟ್ಟಲಿಗೆ ಕಾರ್ನ್‍ಫ್ಲೋರ್ ಹಾಕಿ ನೀರು ಸೇರಿಸಿ ಮಿಕ್ಸ್ ಮಾಡಿ
    * ಈಗ ಬೇಯುತ್ತಿರುವ ತರಕಾರಿಗೆ ಆಲೂಗಡ್ಡೆ ಪೇಸ್ಟ್, ಕಾರ್ನ್‍ಫ್ಲೋರ್ ಪೇಸ್ಟ್ ಸೇರಿಸಿ ಬೇಯಿಸಿ
    * ಸಣ್ಣ ಕುದಿ ಬಂದ ಮೇಲೆ ರುಚಿಗೆ ತಕ್ಕಷ್ಟು ಉಪ್ಪು, ಮೆಣಸಿನ ಪುಡಿ ಸೇರಿಸಿ ಮಿಕ್ಸ್ ಮಾಡಿ
    * 2-3 ನಿಮಿಷ ಕುದಿ ಬಂದ ಮೇಲೆ ಕೆಳಗಿಳಿಸಿ ಸರ್ವ್ ಮಾಡಿ
    * ಸರ್ವ್ ಮಾಡುವಾಗ ಅದರ ಮೇಲೆ ಕೊತ್ತಂಬರಿ ಉದುರಿಸಿ ಕೊಡಿ

     

  • ರುಚಿ, ಆರೋಗ್ಯಕರವಾದ ಅಕ್ಕಿ ಹಾಲುಬಾಯಿ ಮಾಡೋ ವಿಧಾನ

    ರುಚಿ, ಆರೋಗ್ಯಕರವಾದ ಅಕ್ಕಿ ಹಾಲುಬಾಯಿ ಮಾಡೋ ವಿಧಾನ

    ಕರ್ನಾಟಕದ ಸಾಂಪ್ರದಾಯಿಕ ಸಿಹಿ ತಿನಿಸುಗಳಲ್ಲಿ ಅಕ್ಕಿ ಹಾಲು ಬಾಯಿಯೂ ಒಂದಾಗಿದೆ. ಮಲೆನಾಡು ಮತ್ತು ಕರಾವಳಿಯಲ್ಲಿ ಕಡೆ ಇದನ್ನು ಅಕ್ಕಿ ಮನ್ನಿ ಅಂತಾನೂ ಕರೆಯುತ್ತಾರೆ. ಇದರಲ್ಲಿ ಜಿಡ್ಡಿನ ಅಂಶ ಹೆಚ್ಚು ಇರುವುದಿಲ್ಲ. ಅಲ್ಲದೆ ಸಕ್ಕರೆಯ ಅಂಶ ಕೂಡ ಇಲ್ಲದಿರುವುದರಿಂದ ಆರೋಗ್ಯಕ್ಕೂ ಒಳ್ಳೆಯದಾಗಿದೆ. ಹೀಗೆ ರುಚಿಕರ ಹಾಗೂ ಆರೋಗ್ಯಕರವಾದ ಅಕ್ಕಿ ಹಾಲುಬಾಯಿ ಮಾಡುವ ಸುಲಭ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು:
    * ದೋಸೆ ಅಕ್ಕಿ- 1 ಕಪ್
    * ಉಪ್ಪು- ರುಚಿಗೆ ತಕ್ಕಷ್ಟು
    * ತುಪ್ಪ- 3 ಚಮಚ
    * ಪಡಿಮಾಡಿದ ಬೆಲ್ಲ- ಒಂದು ಕಪ್
    * ತೆಂಗಿನ ಹಾಲು
    * ಏಲಕ್ಕಿ ಪುಡಿ- ಅರ್ಧ ಚಮಚ

    ಮಾಡುವ ವಿಧಾನ:
    * ದೋಸೆ ಅಕ್ಕಿಯನ್ನು 2 ಗಂಟೆಗಳ ಕಾಲ ನೆನೆಯಲು ಬಿಡಿ. ನಂತರ ಅದನ್ನು ಮಿಕ್ಸಿ ಜಾರಿಗೆ ಹಾಕಿ, ಅದಕ್ಕೆ ಉಪ್ಪು ಹಾಗೂ ತೆಳುವಾದ ತೆಂಗಿನ ಹಾಲನ್ನು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. (ನೀರು ಹಾಕಿಯೂ ರಬ್ಬಬಹುದು)
    * ಇತ್ತ ಒಂದು ಬಾಣಲೆಗೆ ತುಪ್ಪ ಸವರಿಕೊಂಡು ಅದನ್ನು ಒಲೆಯ ಮೇಲಿಟ್ಟು ನಂತರ ಅದಕ್ಕೆ ರುಬ್ಬಿದ ಹಿಟ್ಟು ಹಾಕಿಕೊಳ್ಳಿ. ಈಗ ಅದೇ ಮಿಕ್ಸಿ ಜಾರಿಗೆ ಒಂದು ಕಪ್ಪು ನೀರು ಹಾಕಿ ತೊಳೆದು ಹಿಟ್ಟಿಗೆ ಬೆರೆಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ.

    * ನಂತರ ಎರಡೂವರೆ ಕಪ್ ಆಗುವಷ್ಟು ದಪ್ಪ ತೆಂಗಿನ ಹಾಲು ಹಾಗೂ ಒಂದು ಕಪ್ ಬೆಲ್ಲ, ಏಲಕ್ಕಿ ಪುಡಿಯನ್ನು ಸೇರಿಸಿ ಸಣ್ಣ ಉರಿಯಲ್ಲಿಟ್ಟು ಕೈ ಬಿಡದೆ ಮಿಕ್ಸ್ ಮಾಡುತ್ತಿರಬೇಕು. ಇಲ್ಲವೆಂದಲ್ಲಿ ಹಿಟ್ಟು ಗಂಟು ಗಂಟಾಗುತ್ತದೆ.
    * ಹೀಗೆ ಹಿಟ್ಟು ದಪ್ಪಾಗುತ್ತಾ ಹೋಗುತ್ತದೆ. ಸ್ವಲ್ಪ ಹೊತ್ತಿನ ನಂತರ 2 ಚಮಚ ತುಪ್ಪ ಹಾಕಬೇಕು. ಬಳಿಕ ಚೆನ್ನಾಗಿ ಕಲಸಿಕೊಳ್ಳಿ.

    * ಹಿಟ್ಟು ಗಟ್ಟಿಯಾದ ನಂತರ ಬಾಳೆ ಎಲೆ ಅಥವಾ ಒಂದು ದೊಡ್ಡದಾದ ಪ್ಲೇಟಿಗೆ ಹಾಕಿ ಅದನ್ನು ಹರಡಿಕೊಳ್ಳಬೇಕು. ತಣ್ಣಗಾದ ನಂತರ ಅದನ್ನು ಚೌಕಾಕಾರ ಅಥವಾ ತ್ರಿಕೋನಾಕಾರದಲ್ಲಿ ಕಟ್ ಮಾಡಿಕೊಂಡರೆ ಅಕ್ಕಿ ಹಾಲುಬಾಯಿ ಸೇವಿಸಲು ಸಿದ್ಧ.