ಬೆಂಗಳೂರು: ನಟ ವಿಜಯ ರಾಘವೇಂದ್ರ ಹಾಗೂ ನಿರ್ದೇಶಕ ಎನ್ ರಾಜಶೇಖರ್ ಕಾಂಬಿನೇಷನ್ ನಲ್ಲಿ ಮೂಡಿಬರುತ್ತಿರುವ ದ್ವಿತೀಯ ಚಿತ್ರ ‘ಪರದೇಸಿ ಕೇರಾಫ್ ಲಂಡನ್’. ಚಿತ್ರದ ಚಿತ್ರೀಕರಣ ಹಾಗೂ ಡಬ್ಬಿಂಗ್ ಮುಗಿದಿದ್ದು, ಈಗ ಡಿಟಿಎಸ್ ಹಂತದಲ್ಲಿದೆ. ಮುಂದಿನ ತಿಂಗಳ ಮೊದಲ ವಾರದಲ್ಲಿ ಚಿತ್ರದ ಆಡಿಯೋ ಮತ್ತು ಟ್ರೇಲರ್ ಬಿಡುಗಡೆಯಾಗಲಿದೆ.
ಮೈಸೂರು ಪಾಂಡವಪುರ, ಬಳ್ಳಾರಿ ಹಾಗೂ ಸಂಡೂರು ಸುತ್ತಮುತ್ತ ಬಹುತೇಕ ಭಾಗದ ಚಿತ್ರೀಕರಣ ನಡೆಸಲಾಗಿದೆ. ಪಾಂಡವಪುರದಲ್ಲಿ ವಿಶೇಷ ಸೆಟ್ಟೊಂದನ್ನು ಹಾಕಿ ಅಲ್ಲಿ ಹದಿನೈದು ಎತ್ತಿನಗಾಡಿ ಹಾಗೂ ಹತ್ತಕ್ಕೂ ಹೆಚ್ಚು ಟ್ರಾಕ್ಟರ್ ಗಳನ್ನು ಬಳಸಿ ಹಾಡೊಂದನ್ನು ಚಿತ್ರೀಕರಿಸಲಾಯಿತು. ಯೋಗರಾಜ್ ಭಟ್ ಅವರು ಬರೆದ ಹಾಡೊಂದನ್ನು ಕಂಠೀರವ ಸ್ಟುಡಿಯೋದಲ್ಲಿ ಚಿತ್ರೀಕರಿಸಿಕೊಳ್ಳಲಾಯಿತು.
ಬಿ.ವಿ.ಎಸ್. ಮೂವೀಸ್ ಲಾಂಛನದಲ್ಲಿ ಬಿ. ಬದರಿನಾರಾಯಣ್ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಚಿದಾನಂದ್ ಹೆಚ್.ಕೆ. ಛಾಯಾಗ್ರಹಣ, ವೀರಸಮರ್ಥ ಸಂಗೀತ, ವಿಜಯ ಭರಮಸಾಗರ ಸಂಭಾಷಣೆ, ಯೋಗರಾಜ್ ಭಟ್, ಡಾ. ವಿ. ನಾಗೇಂದ್ರ ಪ್ರಸಾದ್, ಕವಿರಾಜ್, ಶಿವು ಬೆರಗಿ ಹಾಗೂ ಎಂ. ರಾಜಶೇಖರ್ ಸಾಹಿತ್ಯ, ಕೆ.ಎಂ. ಪ್ರಕಾಶ್ ಸಂಕಲನ, ಕಲೈ ಮಾಸ್ಟರ್ ನೃತ್ಯ, ಥ್ರಿಲ್ಲರ್ ಮಂಜು ಸಾಹಸವಿದೆ. ವಿಜಯರಾಘವೇಂದ್ರ, ರಾಶಿ, ಪೂಜಾ, ಪ್ರಶಾಂತ್ ಸಿದ್ಧಿ, ರಂಗಾಯಣ ರಘು, ಸುಚೇಂದ್ರ ಪ್ರಸಾದ್, ತಬಲಾ ನಾಣಿ, ಶೋಭರಾಜ್, ಕುರಿ ಪ್ರತಾಪ್, ಡ್ಯಾನಿಯಲ್ ಕುಟ್ಟಪ್ಪ, ಮೋಹನ್ ಜುನೇಜ, ಉಮೇಶ್, ಪೆಟ್ರೋಲ್ ಪ್ರಸನ್ನ, ಸಂಗೀತಾ, ಕುರಿ ಸುನಿಲ್ ಮುಂತಾದವರ ತಾರಾಗಣವಿದೆ.