ನವದೆಹಲಿ: ಹೆಚ್ಚಿನ ಭದ್ರತಾ ಗುಣವಿಶೇಷಗಳೊಂದಿಗೆ 10 ರೂಪಾಯಿ ನೋಟನ್ನ ಶೀಘ್ರದಲ್ಲೇ ಹೊಸ ರೂಪದಲ್ಲಿ ಬಿಡುಗಡೆ ಮಾಡಲಾಗುತ್ತದೆ ಎಂದು ಗುರುವಾರದಂದು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಹೇಳಿದೆ.
2005ರ ಮಹಾತ್ಮಾ ಗಾಂಧಿ ಸೀರೀಸ್‍ನಲ್ಲಿ ಬರಲಿರುವ ನೋಟುಗಳಲ್ಲಿ ಎರಡೂ ನಂಬರ್ ಪ್ಯಾನೆಲ್‍ನಲ್ಲಿ ಎಲ್ ಅಕ್ಷರ ಹಾಗೂ ಊರ್ಜಿತ್ ಪಟೇಲ್ ಅವರ ಹಸ್ತಾಕ್ಷರವಿರಲಿದೆ.
ಮುದ್ರಣ ವರ್ಷ 2017 ನೋಟಿನ ಹಿಂಭಾಗದಲ್ಲಿ ಇರಲಿದೆ. ಅಲ್ಲದೆ ಎರಡೂ ಪ್ಯಾನೆಲ್‍ನ ಸಂಖ್ಯೆಗಳು ಎಡದಿಂದ ಬಲಕ್ಕೆ ಸಣ್ಣದರಿಂದ ದೊಡ್ಡ ಗಾತ್ರಕ್ಕೆ ಸಾಗುವಂತೆ ಇರಲಿವೆ. ಮೊದಲ ಮೂರು ಅಕ್ಷರ ಮತ್ತು ಸಂಖ್ಯೆಗಳ ಗಾತ್ರ ಹಿಂದೆ ಇದ್ದಂತೆಯೇ ಮುಂದುವರೆಯಲಿದೆ.
ಈ ಹಿಂದೆ ವಿತರಿಸಲಾಗಿರುವ ಎಲ್ಲಾ 10 ರೂ. ಮುಖಬೆಲೆಯ ನೋಟುಗಳು ಚಲಾವಣೆಯಲ್ಲಿರಲಿವೆ ಎಂದು ಆರ್‍ಬಿಐನ ಅಧಿಸೂಚನೆಯಲ್ಲಿ ಹೇಳಲಾಗಿದೆ.
