Bloggers Unite

Tag: note

  • ಬರೋಬ್ಬರಿ 5 ಕೋಟಿ ರೂ. ನಲ್ಲಿ ಕಂಗೊಳಿಸುತ್ತಿದೆ ಮುತ್ತುಮಾರಿಯಮ್ಮ ದೇವಿ

    ಬರೋಬ್ಬರಿ 5 ಕೋಟಿ ರೂ. ನಲ್ಲಿ ಕಂಗೊಳಿಸುತ್ತಿದೆ ಮುತ್ತುಮಾರಿಯಮ್ಮ ದೇವಿ

    ಚೆನ್ನೈ: ತಮಿಳರಿಗೆ ಶನಿವಾರ ಹೊಸ ವರ್ಷದ ಸಂಭ್ರಮ. ಹೀಗಾಗಿ ತಮಿಳುನಾಡು ರಾಜ್ಯಾದ್ಯಂತ ಹೊಸ ವರ್ಷದ ಸಂಭ್ರಮ ಕಳೆಗಟ್ಟಿತ್ತು.

    ಹೊಸ ವರ್ಷವನ್ನು ಕೊಯಂಬತ್ತೂರಿನಲ್ಲಿ ವಿಭಿನ್ನವಾಗಿ ಆಚರಿಸಲಾಗಿದೆ. ಪ್ರಸಿದ್ಧ ಮುತ್ತು ಮಾರಿಯಮ್ಮ ದೇವಸ್ಥಾನದಲ್ಲಿ ದೇವರಿಗೆ ವಿಶೇಷ ಅಲಂಕಾರ ಮಾಡಲಾಗಿತ್ತು. ಬರೋಬ್ಬರಿ 4 ಕೋಟಿ ರೂ.ಮೌಲ್ಯದ ನೋಟುಗಳಿಂದ ಮುತ್ತು ಮಾರಿಯಮ್ಮನಿಗೆ ಅಲಂಕಾರ ಮಾಡಲಾಗಿತ್ತು.

    ಶ್ರೀ ಮುತ್ತುಮರಿಯಮ್ಮನ್ ದೇವಾಲಯವು ಪುರಾತನ ಕಾಲದ ಮಂದಿರವಾಗಿದೆ. ಇಲ್ಲಿಗೆ ದೂರದ ಪ್ರದೇಶಗಳಿಂದ ಸ್ಥಳೀಯರು ಮತ್ತು ಭಕ್ತರು ನಿರಂತರವಾಗಿ ಭೇಟಿ ನೀಡುತ್ತಿದ್ದಾರೆ. ವಿಶೇಷವಾಗಿ ಉತ್ಸವಗಳಲ್ಲಿ ಪ್ರವಾಸಿಗರು ಬರುತ್ತಾರೆ. ಆದ್ದರಿಂದ ಹೊಸ ವರ್ಷದ ಆಚರಣೆ ಪ್ರಯುಕ್ತ ಅನೇಕ ಭಕ್ತರು ಮತ್ತು ಪ್ರವಾಸಿಗರು ಬಂದಿದ್ದರು.


    ಗರಿ ಗರಿಯ 2 ಸಾವಿರ 500 ಮತ್ತು 200 ರೂ. ನೋಟುಗಳಲ್ಲಿ ಮುತ್ತು ಮಾರಿಯಮ್ಮನನ್ನು ಅಲಂಕರಿಸಲಾಗಿತ್ತು. ಒಟ್ಟು 4 ಕೋಟಿ ರೂ. ಮೌಲ್ಯದ ನೋಟುಗಳ ಜೊತೆಗೆ 1 ಕೋಟಿ ಮೌಲ್ಯದ ವಜ್ರ ಹಾಗೂ ಮುತ್ತುಗಳನ್ನು ಅಲಂಕಾರದಲ್ಲಿ ಬಳಸಲಾಗಿತ್ತು.

    ಸಕಲ ಸಂಪನ್ನೆಯಾಗಿ ಮೈದಳೆದಿರುವ ನೋಟಿನ ದೇವಿಯನ್ನು ಕಣ್ತುಂಬಿಕೊಳ್ಳಲು ಭಕ್ತರ ದಂಡೇ ದೇವಸ್ಥಾನಕ್ಕೆ ಹರಿದು ಬಂದಿತ್ತು. ಭಕ್ತರಂತೂ ಬಿಟ್ಟ ಕಣ್ಣನ್ನು ಬಿಟ್ಟಂತೆ ದೇವಿಯನ್ನು ನೋಡಿ ಕೈ ಮುಗಿದಿದ್ದಾರೆ.

  • ಎಟಿಎಂಗಳಲ್ಲಿ ಹರಿದ ನೋಟುಗಳು ಪತ್ತೆ!

    ಎಟಿಎಂಗಳಲ್ಲಿ ಹರಿದ ನೋಟುಗಳು ಪತ್ತೆ!

    ಬಳ್ಳಾರಿ: ಚುನಾವಣೆ ಘೋಷಣೆಯಾದ ದಿನದಿಂದ ಎಟಿಎಂಗಳಲ್ಲಿ ಹಣವೇ ಸಿಗುತ್ತಿರಲಿಲ್ಲ. ಆದರೆ ಈಗ ಎಟಿಎಂಗಳಲ್ಲಿ ಹರಿದ ನೋಟುಗಳು ಸಿಗುತ್ತಿರುವುದು ಗ್ರಾಹಕರ ಆಕ್ರೋಶಕ್ಕೆ ಕಾರಣವಾಗಿದೆ.

    ಹಡಗಲಿ ತಾಲೂಕಿನ ಹೊಳಲು ಗ್ರಾಮದ ಎಸ್.ಬಿ.ಐ ಬ್ಯಾಂಕ್ ನ ಎಟಿಎಂ ನಲ್ಲಿ ಗ್ರಾಹಕರೊಬ್ಬರಿಗೆ ಹರಿದು ನೋಟುಗಳು ಬಂದಿರುವುದು ಪತ್ತೆಯಾಗಿದೆ. ಐದು ನೂರು ಮುಖಬೆಲೆಯ ಹತ್ತಾರು ಹರಿದ ನೋಟುಗಳು ಕಂಡುಬಂದಿದ್ದು, ಸಾರ್ವಜನಿಕರನ್ನು ತಲ್ಲಣಗೊಳಿಸಿವೆ.

    ಗ್ರಾಮಸ್ಥರಾದ ರಾಮಾಚಾರಿ ಎಟಿಎಂ ನಲ್ಲಿ ಎರಡು ಸಾವಿರ ಹಣ ಡ್ರಾ ಮಾಡಿದ್ದಾರೆ. ಆದರೆ ಈ ವೇಳೆ ಮೂರು ಹರಿದ ಐದು ನೂರು ರೂಪಾಯಿಯ ನೋಟುಗಳು ಎಟಿಎಂನಲ್ಲಿ ದೊರೆತಿವೆ. ನಂತರ ಮತ್ತೊಬ್ಬ ಗ್ರಾಹಕರು ಐದುಸಾವಿರ ಹಣವನ್ನು ಡ್ರಾ ಮಾಡಿದ್ದಾರೆ. ಅವರಿಗೂ ಕೂಡ ನಾಲ್ಕೈದು ಹರಿದ ಹಾಗೂ ತೇಪೆ ಹಚ್ಚಿದ ನೋಟುಗಳು ಬಂದಿವೆ.

    ಇದರಿಂದ ಆತಂಕಗೊಂಡ ಗ್ರಾಹಕರು ಬ್ಯಾಂಕಿಗೆ ತೆರಳಿ ನೋಟು ಬದಲಾವಣೆ ಮಾಡಿಕೊಡುವಂತೆ ಕೇಳಿದ್ದಾರೆ. ಬ್ಯಾಂಕ್ ವ್ಯವಹಾರ ರಹಿತ ದಿನವಾಗಿರುವುದರಿಂದ ನಾಳೆ ಬದಲಾವಣೆ ಮಾಡಿಕೊಡುವುದಾಗಿ ಬ್ಯಾಂಕ್ ಸಿಬ್ಬಂದಿ ತಿಳಿಸಿದ್ದಾರೆ.

    ಹೀಗಾಗಿ ನಮ್ಮ ಹಣವನ್ನು ತಾವೂ ತೆಗೆದುಕೊಳ್ಳುವ ವೇಳೆ ಈ ರೀತಿಯಾದರೆ ಹೇಗೆ ಅಂತಾ ಗ್ರಾಹಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

  • ಹೊಸ 10 ರೂ. ನೋಟಿನ ಚಿತ್ರ ರಿಲೀಸ್- ಇಲ್ಲಿದೆ ಅದರ ವೈಶಿಷ್ಟ್ಯತೆಗಳು

    ಹೊಸ 10 ರೂ. ನೋಟಿನ ಚಿತ್ರ ರಿಲೀಸ್- ಇಲ್ಲಿದೆ ಅದರ ವೈಶಿಷ್ಟ್ಯತೆಗಳು

    ನವದೆಹಲಿ: ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ(ಆರ್‍ಬಿಐ) ಶೀಘ್ರದಲ್ಲೇ ಹೊಸ ವಿನ್ಯಾಸದ 10 ರೂ. ನೊಟುಗಳನ್ನ ಬಿಡುಗಡೆಗೊಳಿಸಿದೆ. ಸದ್ಯ ಹೊಸ ನೋಟುಗಳ ಚಿತ್ರವನ್ನ ಆರ್‍ಬಿಐ ಬಿಡುಗಡೆ ಮಾಡಿದೆ.

    ಹೊಸ 10 ರೂ. ನೋಟಿನಲ್ಲಿ ಕೊನಾರ್ಕ್ ಸೂರ್ಯ ದೇವಾಲಯ(ಸನ್ ಟೆಂಪಲ್) ನ ಚಿತ್ರವಿದೆ. ಮಹಾತ್ಮಾ ಗಾಂಧಿ ಹೊಸ ಸರಣಿಯ ಈ ನೋಟುಗಳಲ್ಲಿ ಗವರ್ನರ್ ಊರ್ಜಿತ್ ಪಟೇಲ್ ಅವರ ಸಹಿ ಇದೆ.

    ನೋಟಿನ ಬಣ್ಣ ಕಂದು(ಚಾಕ್ಲೆಟ್ ಬ್ರೌನ್) ಆಗಿದ್ದು, ಇತರೆ ಡಿಸೈನ್‍ಗಳಿವೆ. ನೋಟಿನ ಮುಂಭಾಗದ ಮಧ್ಯಭಾಗದಲ್ಲಿ ಮಹಾತ್ಮಾ ಗಾಂಧೀಜಿ ಚಿತ್ರವಿದೆ. ಸಣ್ಣ ಅಕ್ಷರದಲ್ಲಿ ಆರ್‍ಬಿಐ, ಭಾರತ್, ಇಂಡಿಯಾ ಹಾಗೂ 10ರ ಮುದ್ರಣವಿದೆ. ಮಹಾತ್ಮಾ ಗಾಂಧೀಜಿ ಚಿತ್ರದ ಬಲಭಾಗಕ್ಕೆ ಆರ್‍ಬಿಐ ಗವರ್ನರ್ ಸಹಿ, ಆರ್‍ಬಿಐ ಲಾಂಛನ ಹಾಗೂ ಅಶೋಕ ಸ್ತಂಭದ ಲಾಂಛನವಿದೆ. ಮಹಾತ್ಮಾ ಗಾಂಧಿ ಚಿತ್ರ ಹಾಗೂ 10 ರೂ. ವಾಟರ್‍ಮಾರ್ಕ್ ಇದೆ. ಮೇಲಿನ ಎಡಭಾಗ ಹಾಗೂ ಕೆಳಗಿನ ಬಲಭಾಗದಲ್ಲಿ ಸಣ್ಣ ಗ್ರಾತದಿಂದ ದೊಡ್ಡದ್ದಕ್ಕೆ ಸಾಗುವ ನಂಬರ್ ಪ್ಯಾನೆಲ್ ಇದೆ.

    ನೋಟಿನ ಹಿಂಭಾಗದಲ್ಲಿ ನೋಟು ಮುದ್ರಣದ ವರ್ಷ, ಸ್ವಚ್ಛ ಭಾರತ್ ಲಾಂಛನ ಹಾಗೂ ಘೋಷವಾಕ್ಯ ಮತ್ತು ಭಾಷೆಗಳ ಪ್ಯಾನೆಲ್ ಇದೆ. ಸೂರ್ಯ ದೇವಾಲಯ ಚಿತ್ರ ಹಾಗೂ ದೇವನಾಗರಿಯಲ್ಲಿ ಸಂಖ್ಯೆ 10 ಮುದ್ರಿಸಲಾಗಿದೆ. ನೋಟಿನ ಅಳತೆ 63ಮಿಮಿ * 123ಮಿಮಿ ಇರಲಿದೆ.

    ಈ ಹಿಂದಿನ ಸರಣಿಯಲ್ಲಿ ಬಿಡುಗಡೆಗೊಂಡಿರೋ ಹಳೇ 10 ರೂ. ನೋಟುಗಳು ಕೂಡ ಚಲಾವಣೆಯಲ್ಲಿ ಇರಲಿವೆ ಎಂದು ಆರ್‍ಬಿಐ ತಿಳಿಸಿದೆ.

    2016ರ ನವೆಂಬರ್ 8 ರಂದು 1 ಸಾವಿರ ರೂ. ಹಾಗೂ 500 ರೂ. ನೋಟು ನಿಷೇಧದ ಬಳಿಕ ಆರ್ ಬಿಐ ಹೊಸ 500 ರೂ. 2 ಸಾವಿರ ಮುಖ ಬೆಲೆಯ ನೋಟುಗಳನ್ನು ಬಿಡುಗಡೆಗೊಳಿಸಿತ್ತು. ನೋಟ್ ಬ್ಯಾನ್ ಬಳಿಕ ಸೃಷ್ಟಿಯಾಗಿದ್ದ ಚಿಲ್ಲರೆ ಸಮಸ್ಯೆಯನ್ನು ಬಗೆ ಹರಿಸಲು ಆಗಸ್ಟ್ ತಿಂಗಳಿನಲ್ಲಿ ಆರ್ ಬಿಐ ಹೊಸ 200 ರೂ. ಹಾಗೂ 50 ರೂ. ಮುಖ ಬೆಲೆಯ ನೋಟುಗಳನ್ನು ಬಿಡುಗಡೆಗೊಳಿಸಿತ್ತು. 200 ರೂ. ಮುಖ ಬೆಲೆ ನೋಟಿನಲ್ಲಿ ಭಾರತದ ಸಂಸ್ಕೃತಿ ಪರಂಪರೆ ತಿಳಿಸುವ ಸಲುವಾಗಿ ಸಾಂಚಿ ಸೂಪ್ತವನ್ನು ಮುದ್ರಿಸಿದ್ದರೆ, 50 ರೂ. ನೋಟಿನಲ್ಲಿ ಹಂಪಿಯ ಕಲ್ಲಿನ ರಥದ ಚಿತ್ರವನ್ನು ಮುದ್ರಿಸಲಾಗಿತ್ತು.

    ಈ ಹಿಂದೆ 2005ರಲ್ಲಿ 10 ರೂ. ಮುಖ ಬೆಲೆಯ ಹೊಸ ನೋಟುಗಳನ್ನು ಆರ್‍ ಬಿಐ ಬಿಡುಗಡೆ ಮಾಡಿತ್ತು.

  • 1 ರೂ. ನೋಟ್ ಬಿಡುಗಡೆಯಾಗಿ ಇಂದಿಗೆ 100 ವರ್ಷ – ಈ ನೋಟಿನ ವಿಶೇಷತೆ ನಿಮಗೆ ಗೊತ್ತಾ?

    1 ರೂ. ನೋಟ್ ಬಿಡುಗಡೆಯಾಗಿ ಇಂದಿಗೆ 100 ವರ್ಷ – ಈ ನೋಟಿನ ವಿಶೇಷತೆ ನಿಮಗೆ ಗೊತ್ತಾ?

    ನವದೆಹಲಿ: ಒಂದು ರೂ. ಮುಖಬೆಲೆಯ ನೋಟ್ ಬಿಡುಗಡೆ ಮಾಡಿ ಇಂದಿಗೆ 100 ವರ್ಷ ತುಂಬಿದೆ. ಮೊದಲು 1 ರೂ. ನೋಟನ್ನು ರಾಜ 5ನೇ ಜಾರ್ಜ್ ಫೋಟೋ ಜೊತೆಗೆ 1917 ನವೆಂಬರ್ 30 ರಂದು ಪರಿಚಯಿಸಲಾಗಿತ್ತು.

    ಇತರೆ ನೋಟುಗಳಿಗಿಂತ ಒಂದು ರೂ. ನೋಟು ಸಾಕಷ್ಟು ಕಾರಣಗಳಿಂದ ತನ್ನದೇ ವಿಶಿಷ್ಟತೆ ಹೊಂದಿದೆ. ಈ ನೋಟುಗಳನ್ನ ಭಾರತ ಸರ್ಕಾರ ವಿತರಿಸುತ್ತದೆಯೇ ಹೊರತು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ವಿತರಿಸುವುದಿಲ್ಲ ಮತ್ತು ಇದು ಬಾಧ್ಯತೆಯಾಗಿರುವ ಪ್ರಾಮಿಸರಿ ನೋಟ್ ಅಲ್ಲ. ಒಂದು ರೂ. ನೋಟ್ ಏಕೈಕ ಕರೆನ್ಸಿ ನೋಟು ಅಥವಾ ಆಸ್ತಿ ಎಂದು ಹೇಳಬಹುದು.

    ಮೊದಲನೇ ವಿಶ್ವ ಯುದ್ಧದ ಸಂದರ್ಭದಲ್ಲಿ ನಾಣ್ಯಗಳನ್ನ ಠಂಕಿಸಲು ಸಾಧ್ಯವಾಗದಿದ್ದಾಗ ಅಂದಿನ ವಸಹತು ಅಧಿಕಾರಿಗಳು 1917 ರಲ್ಲಿ ನೋಟನ್ನು ಮುದ್ರಿಸಿ ಚಲಾವಣೆಗೆ ತಂದಿದ್ದರು. ರಿಸರ್ವ್ ಬ್ಯಾಂಕ್ ವೆಬ್‍ಸೈಟ್ ಪ್ರಕಾರ 1926 ರಲ್ಲಿ ಈ ನೋಟಿನ ವಿತರಣೆ ನಿಲ್ಲಿಸಲಾಗಿತ್ತು. ಮತ್ತೆ 1940 ರಲ್ಲಿ ಮರು ಪರಿಚಯಿಸಲಾಯಿತು. 1994 ರಲ್ಲಿ ಮತ್ತೆ ವಿತರಣೆ ನಿಲ್ಲಿಸಿ ಇದೀಗ 2015 ರಿಂದ ಮತ್ತೆ ಚಲಾವಣೆಯಲ್ಲಿದೆ.

    ಈ ಜರ್ನಿಯಲ್ಲಿ 1 ರೂ. ನೋಟು ತನ್ನ ವಿಶಿಷ್ಟತೆಯನ್ನ ಉಳಿಸಿಕೊಂಡು ಬಂದಿದೆ. ಜೊತೆಗೆ ಇದನ್ನು ಕಾನೂನು ಭಾಷೆಯಲ್ಲಿ ನಾಣ್ಯ ಎಂದೇ ಕರೆಯುತ್ತಾರೆ. ಮೊದಲ ಬಾರಿಗೆ ಬೆಳ್ಳಿ ನಾಣ್ಯಗಳಿಗೆ ಬದಲಾಗಿ 1 ರೂ. ನೋಟನ್ನು ಪರಿಚಯಿಸಲಾಗಿತ್ತು. ಮೊದಲನೇ ಮಹಾ ಯುದ್ಧದ ಸಂದರ್ಭದಲ್ಲಿ ಬೆಳ್ಳಿಯ ಬೆಲೆ ಏರಿಕೆಯಾಗಿದ್ದರಿಂದ ನೋಟು ಮುದ್ರಣ ಮಾಡಬೇಕಾಯ್ತು. ಆಗ ಅಂದಿನ ಬೆಳ್ಳಿ ನಾಣ್ಯದ ಫೋಟೋವನ್ನ ನೋಟ್ ಮೇಲೆ ಮುದ್ರಿಸಿ 1 ರೂ. ನೋಟು ಜಾರಿಗೆ ತರಲಾಗಿತ್ತು. ಅಂದಿನಿಂದ ಪ್ರತಿ 1 ರೂ. ನೋಟಿನಲ್ಲೂ ಆಯಾ ವರ್ಷದ ಒಂದು ರೂ. ನಾಣ್ಯದ ಫೋಟೋವನ್ನ ಮುದ್ರಿಸಲಾಗಿರುತ್ತದೆ.

    ಇತರೆ ಬ್ಯಾಂಕ್ ನೋಟುಗಳಂತೆ ಇದಕ್ಕೆ ಆರ್‍ಬಿಐ ಗವರ್ನರ್ ಸಹಿ ಮಾಡುವುದಿಲ್ಲ. ಬದಲಾಗಿ ಹಣಕಾಸು ಕಾರ್ಯದರ್ಶಿ ಸಹಿ ಮಾಡುತ್ತಾರೆ. ಮೊದಲ ಒಂದು ರೂ. ನೋಟು ಮೂವರು ಬ್ರಿಟಿಷ್ ಹಣಕಾಸು ಕಾರ್ಯದರ್ಶಿಗಳಾದ ಎಮ್‍ಎಮ್‍ಎಸ್ ಗುಬ್ಬೆ, ಎಸಿ ಮ್ಯಾಕ್ ವಾಟರ್ಸ್ ಮತ್ತು ಎಚ್ ಡೆನ್ನಿಂಗ್ ಅವರ ಸಹಿ ಹೊಂದಿತ್ತು. ಸ್ವಾತಂತ್ರ್ಯದ ನಂತರದಿಂದ ಇಲ್ಲಿಯವರೆಗೆ 18 ಹಣಕಾಸು ಕಾರ್ಯದರ್ಶಿಗಳನ್ನ ಒಳಗೊಂಡಂತೆ ಪ್ರತಿ ನೋಟಿನ ಮೇಲೂ ಹಣಕಾಸು ಕಾರ್ಯದರ್ಶಿ ಸಹಿ ಮಾಡುತ್ತಾರೆ.

    ಒಂದು ರೂ. ನೋಟನ್ನ ಎರಡು ಬಾರಿ ಚಲಾವಣೆಯಿಂದ ಹಿಂಪಡೆಯಲಾಗಿತ್ತು. ನೋಟಿನ ವಿನ್ಯಾಸದಲ್ಲೂ ಮೂರು ಬಾರಿ ಬದಲಾವಣೆಯನ್ನ ಮಾಡಲಾಗಿದೆ. 1940 ರಲ್ಲಿ ಬ್ರಿಟಿಷ್ ಈ ನೋಟಿನ ಗಾತ್ರವನ್ನ ಅರ್ಧಕ್ಕೆ ಇಳಿಸಿದ್ದರ ಜೊತೆಗೆ ಲಕ್ಷಣಗಳನ್ನು ಬದಲಾಯಿಸಿತ್ತು. 1949 ರಲ್ಲಿ ಸರ್ಕಾರ ಬ್ರಿಟಿಷ್ ಚಿಹ್ನೆಗಳ ಬದಲಾಗಿ ಹೊಸದಾಗಿ ನಿರ್ಮಾಣವಾಗಿದ್ದ ಗಣರಾಜ್ಯದ ಅಧಿಕೃತ ಚೆಹ್ನೆಗಳನ್ನ ತಂದಿತ್ತು. ಕೊನೆಯದಾಗಿ 2016ರಲ್ಲಿ ನೋಟಿನ ವಿನ್ಯಾಸದಲ್ಲಿ ಬದಲಾವಣೆಯಾಗಿ ಪ್ರಸ್ತುತ ಜಾರಿಯಲ್ಲಿವಂತೆ ಇದೆ.

  • ಮಂಡ್ಯ: ಜಮೀನಿನಲ್ಲಿ ನೋಟಿನ ಚೂರುಗಳು ಪತ್ತೆ

    ಮಂಡ್ಯ: ಜಮೀನಿನಲ್ಲಿ ನೋಟಿನ ಚೂರುಗಳು ಪತ್ತೆ

    ಮಂಡ್ಯ: ತಾಲೂಕಿನ ರಾಗಿಮುದ್ದನಹಳ್ಳಿ ಗ್ರಾಮದಲ್ಲಿನ ಜಮೀನೊಂದರ ಬಳಿ ಇಂದು ಬೆಳಿಗ್ಗೆ ನೋಟಿನ ಮಾದರಿಯ ಚೂರುಗಳು ಪತ್ತೆಯಾಗಿವೆ.

    ಜಕ್ಕನಹಳ್ಳಿ ತೂಬಿನಕೆರೆ ಮುಖ್ಯರಸ್ತೆಯಲ್ಲಿರುವ ಜಮೀನಿನ ಪಕ್ಕದಲ್ಲಿ ನೋಟಿನ ಚೂರುಗಳು ಬಿದ್ದಿದೆ. ಗ್ರಾಮಸ್ಥರು ಇವು ನಕಲಿ ನೋಟಿನ ಚೂರುಗಳಿರಬಹುದು ಅಂತಾ ಸಂಶಯ ವ್ಯಕ್ತಪಡಿಸಿದ್ದಾರೆ. ಗ್ರಾಮದ ಯುವಕರೊಬ್ಬರು, ಜಮೀನಿನ ಬಳಿ ಬಂದಾಗ ಈ ನೋಟಿನ ಚೂರುಗಳು ಕಣ್ಣಿಗೆ ಬಿದ್ದಿವೆ.

    ಗ್ರಾಮಸ್ಥರು ಮಂಡ್ಯ ಪೊಲೀಸರಿಗೂ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ಸಿಕ್ಕಿರುವ ಚೂರುಗಳು ಅಸಲಿ ನೋಟಿನದ್ದಾ ಅಥವಾ ನಕಲಿ ನೋಟಿನ ಪೇಪರ್ ಚೂರುಗಳಾ ಅನ್ನೋದು ಪರಿಶೀಲನೆ ಮಾಡಿದ ಬಳಿಕವೇ ತಿಳಿಯಬೇಕಿದೆ.

     

  • ಚಲಾವಣೆಗೆ ಬರಲಿದೆ ಹೊಸ 100 ರೂ. ನೋಟು

    ಚಲಾವಣೆಗೆ ಬರಲಿದೆ ಹೊಸ 100 ರೂ. ನೋಟು

    ನವದೆಹಲಿ: 2018ರ ಎಪ್ರಿಲ್‍ನಲ್ಲಿ ಹೊಸ ವಿನ್ಯಾಸದ 100 ರೂ. ನೋಟುಗಳನ್ನು ಚಲಾವಣೆಗೆ ತರಲು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‍ಬಿಐ) ಮುಂದಾಗಿದೆ.

    100 ರೂ. ಮುಖಬೆಲೆಯ ಹೊಸ ನೋಟುಗಳ ಮುದ್ರಣ ಪ್ರಕ್ರಿಯೆಯನ್ನು ಎಪ್ರಿಲ್ ವೇಳೆ ಆರಂಭಿಸಲಾಗುವುದು. 200 ರೂ.ಗಳ ಹೊಸ ನೋಟುಗಳ ಮುದ್ರಣ ಮುಗಿದ ನಂತರ ಹೊಸ ವಿನ್ಯಾಸ 100 ರೂ. ನೋಟುಗಳ ಮುದ್ರಣ ಆರಂಭವಾಗಲಿದೆ ಎಂದು ಆರ್‍ಬಿಐ ಮೂಲಗಳು ತಿಳಿಸಿವೆ.

    ಆರ್‍ಬಿಐ ಆಗಸ್ಟ್ ತಿಂಗಳಿನಲ್ಲಿ 200 ರೂ. ಮುಖಬೆಲೆಯ ಹೊಸ ನೋಟುಗಳನ್ನು ಚಲಾವಣೆಗೆ ತಂದಿತ್ತು. ಆದರೆ ಈ ನೋಟುಗಳು ಇನ್ನೂ ಗ್ರಾಹಕರ ಕೈ ಸೇರಿಲ್ಲ. ಕೆಲ ಬ್ಯಾಂಕ್ ಗಳು 200 ರೂ. ನೋಟುಗಳನ್ನು ಹಾಕಲು ಎಟಿಎಂ ಯಂತ್ರಗಳನ್ನು ಪರಿವರ್ತನೆ ಮಾಡಲು ಸೂಚಿಸಿದೆ.

    ಎಟಿಎಂ ಯಂತ್ರಗಳ ಮರು ಪರಿವರ್ತನೆಯನ್ನು ತಪ್ಪಿಸಲು ಹೊಸ ನೋಟುಗಳು ಸಮಾನ ಅಳತೆಯನ್ನು ಹೊಂದಿರಲಿದೆ ಎಂದು ಹೇಳಲಾಗಿದೆ. 

    ಮುಂದಿನ 6 ತಿಂಗಳ ಒಳಗಡೆ 200 ರೂ. ನೋಟುಗಳು ಎಲ್ಲ ಜನರ ಕೈಗೆ ಸಿಕ್ಕಿದ ಬಳಿಕ ಹೊಸ 100 ರೂ. ನೋಟುಗಳನ್ನು ಮುದ್ರಣ ಮಾಡಲು ಆರ್‍ಬಿಐ ಮುಂದಾಗಿದೆ. ಎಟಿಎಂನಲ್ಲಿರುವ ಒಟ್ಟು 4 ಕ್ಯಾಸೆಟ್ ಗಳಲ್ಲಿ ಒಂದರಲ್ಲಿ 100 ರೂ. ಮಾತ್ರ ಇರಲಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.

    ನವೆಂಬರ್ 8 ರಂದು 500, 1 ಸಾವಿರ ರೂ. ಮುಖಬೆಲೆಯ ನೋಟುಗಳನ್ನು ನಿಷೇಧಿಸಿದ ಬಳಿಕ ಆರ್‍ಬಿಐ 2 ಸಾವಿರ ರೂ. ಮತ್ತು 500 ರೂ. ನೋಟುಗಳನ್ನು ಬಿಡುಗಡೆ ಮಾಡಿತ್ತು. ಇದಾದ ಬಳಿಕ 200 ರೂ. ಮತ್ತು 50 ರೂ. ನೋಟುಗಳನ್ನು ಬಿಡುಗಡೆ ಮಾಡಿತ್ತು.

    ನೋಟು ಬ್ಯಾನ್ ಬಳಿಕ ಜನರಿಗೆ ಆಗಲಿರುವ ಸಮಸ್ಯೆಯನ್ನು ತಪ್ಪಿಸಲು ಬಿಡುಗಡೆಯಾಗಿದ್ದ 2 ಸಾವಿರ ರೂ. ನೋಟುಗಳ ಮುದ್ರಣ ಕಾರ್ಯವನ್ನು ಆರ್‍ಬಿಐ ಈಗ ಸಂಪೂರ್ಣ ಸ್ಥಗಿತಗೊಳಿಸಿದೆ.

     

     

  • ಟೊಮೆಟೋ ಮಾರಿದ್ದಕ್ಕೆ ರೈತನಿಗೆ ಸಿಕ್ತು 500ರೂ. ನಕಲಿ ನೋಟು!

    ಟೊಮೆಟೋ ಮಾರಿದ್ದಕ್ಕೆ ರೈತನಿಗೆ ಸಿಕ್ತು 500ರೂ. ನಕಲಿ ನೋಟು!

    ರಾಮನಗರ: ರೈತನೋರ್ವ ತಾನು ಬೆಳೆದ ಟೊಮೆಟೋವನ್ನು ಎಪಿಎಂಸಿ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಿದ ವೇಳೆ ಬಂದ ಹಣದಲ್ಲಿ ನಕಲಿ ಜೆರಾಕ್ಸ್ ನೋಟೊಂದು ಪತ್ತೆಯಾಗಿರುವ ಘಟನೆ ರಾಮನಗರದಲ್ಲಿ ನಡೆದಿದೆ.

    ರಾಮನಗರದ ಕೃಷಿ ಮಾರುಕಟ್ಟೆಗೆ ಚನ್ನಪಟ್ಟಣದ ರೈತ ಸುಜೀವನ್‍ಕುಮಾರ್ ಎಂಬುವವರು ಸುಮಾರು 30 ಕ್ರೇಟ್ ಟೊಮೆಟೋವನ್ನ ತಂದಿದ್ರು. ತಾವು ತಂದಿದ್ದ ಎಲ್ಲ ಟೊಮೆಟೋವನ್ನು ಮಾರಾಟ ಮಾಡಿದ ವೇಳೆ ವರ್ತಕ ಹಣವನ್ನ ನೀಡಿದ್ದಾನೆ. ವರ್ತಕನಿಂದ ಹಣ ಪಡೆದ ಬಳಿಕ ಹಣ ಎಣಿಸಿಕೊಳ್ಳುವ ವೇಳೆ ಜೆರಾಕ್ಸ್ ನೋಟು ಪತ್ತೆಯಾಗಿದೆ.

    500 ರೂಪಾಯಿಯ ಜೆರಾಕ್ಸ್ ನೋಟು ಪತ್ತೆಯಾದ ಬಳಿಕ ಹಣ ನೀಡಿದ ವರ್ತಕನ ಹುಡುಕಾಟ ಸಹ ನಡೆಸಿದ್ದಾರೆ. ನಂತರ ರೈತ ಸುಜೀವನ್ ಕುಮಾರ್ ಎಪಿಎಂಸಿ ಮಾರುಕಟ್ಟೆಗೆ ಭೇಟಿ ನೀಡಿ ತಮಗೆ 500 ರೂಪಾಯಿಯ ಜೆರಾಕ್ಸ್ ನೋಟು ಬಂದ ಬಗೆಯನ್ನು ವಿವರಿಸಿ ಅಧಿಕಾರಿಗಳಿಗೆ ದೂರು ನೀಡಿದ್ದಾರೆ.

    ಬೆಳಗ್ಗೆ ಮಾರುಕಟ್ಟೆಯಲ್ಲಿ ಹಣ ನೀಡಿದ ವರ್ತಕ ಯಾರೆಂದು ಪತ್ತೆ ಹಚ್ಚುವಂತೆ ರೈತ ಆಗ್ರಹಿಸಿದ್ದಾರೆ. ಅಲ್ಲದೇ ಮಾರುಕಟ್ಟೆಯಲ್ಲಿ ಖೋಟಾನೋಟುಗಳ ಹಾವಳಿ ಹೆಚ್ಚಾಗುತ್ತಿದೆ ಕೂಡಲೇ ಪೊಲೀಸ್ರು ಈ ಬಗ್ಗೆ ಕ್ರಮ ಕೈಗೊಳ್ಳಬೇಕೆಂದು ರೈತರು ಒತ್ತಾಯ ಮಾಡಿದ್ದಾರೆ.

  • ಹೊಸ 200 ರೂ. ನೋಟು ಇಂದಿನಿಂದ ಪೂರೈಕೆ

    ಹೊಸ 200 ರೂ. ನೋಟು ಇಂದಿನಿಂದ ಪೂರೈಕೆ

     

    ನವದೆಹಲಿ: ಸಾಕಷ್ಟು ದಿನಗಳಿಂದ 200 ರೂಪಾಯಿ ನೋಟು ಸುದ್ದಿಯಲ್ಲಿತ್ತು. ಗಣೇಶ ಹಬ್ಬದ ದಿನವಾದ ಇಂದು 200 ರುಪಾಯಿ ಮುಖಬೆಲೆಯ ಹೊಸ ನೋಟುಗಳು ಬ್ಯಾಂಕ್‍ಗಳಿಗೆ ಪೂರೈಕೆ ಆಗಲಿದೆ.
    ಆರಂಭದಲ್ಲಿ ಆಯ್ದ ಆರ್‍ಬಿಐ ಕಚೇರಿ ಹಾಗೂ ಕೆಲವು ಬ್ಯಾಂಕ್‍ಗಳಲ್ಲಿ ಮಾತ್ರ ಹೊಸ 200 ರೂ. ನೋಟು ವಿತರಣೆಯಾಗಲಿದೆ.

    ಇಂದಿನಿಂದ 3 ದಿನ ಸರ್ಕಾರಿ ರಜೆ ಇದ್ದು, ಸೋಮವಾರದಿಂದ ಹೊಸ ನೋಟು ಸಿಗಲಿದೆ. ಇದ್ರಿಂದ ಚಿಲ್ಲರೆ ಸಮಸ್ಯೆ ಬಗೆಹರಿಯಲಿದೆ ಅಂತ ಆರ್‍ಬಿಐ ಹೇಳಿದೆ.

    200ರ ನೋಟು ಕಡು ಹಳದಿ ಬಣ್ಣದಲ್ಲಿದೆ. ನೋಟಿನ ಹಿಂಭಾಗದಲ್ಲಿ ಸಾಂಚಿ ಸ್ತೂಪದ ಚಿತ್ರವಿದೆ. ದೇವನಾಗರಿಯಲ್ಲಿ 200 ರೂ. ನ ಮುದ್ರಣ, ಮಧ್ಯಭಾಗದಲ್ಲಿ ಮಹಾತ್ಮಾ ಗಾಂಧೀಜಿಯ ಚಿತ್ರವಿದೆ. ಮೈಕ್ರೋ ಲಿಪಿಯಲ್ಲಿ ಆರ್‍ಬಿಐ, ಭಾರತ್, ಇಂಡಿಯಾ ಹಾಗೂ 200 ಮುದ್ರಣವಿದೆ. ಬಣ್ಣ ಬದಲಾಗುವಂತಹ ಸೆಕ್ಯೂರಿಟಿ ಥ್ರೆಡ್ ಇದ್ದು ಅದರ ಮೇಲೆ ಭಾರತ್ ಹಾಗೂ ಆರ್‍ಬಿಐ ಮುದ್ರಣವಿದೆ. ನೋಟನ್ನ ಸ್ವಲ್ಪ ತಿರುಗಿಸಿ ನೋಡಿದ್ರೆ ಈ ಥ್ರೆಡ್‍ನ ಬಣ್ಣ ಹಸಿರಿನಿಂದ ನೀಲಿ ಬಣ್ಣಕ್ಕೆ ತಿರುಗುತ್ತದೆ.

     

    ನೋಟಿನ ಬಲಭಾಗದಲ್ಲಿ ಅಶೋಕ ಸ್ತಂಭ, 200 ರ ವಾಟರ್‍ಮಾರ್ಕ್ ಇದೆ. ನೋಟಿನ ಮೇಲ್ಭಾಗದ ಎಡಗಡೆ ಹಾಗೂ ಕೆಳಭಾಗದ ಬಲಗಡೆಯಲ್ಲಿ ನಂಬರ್ ಪ್ಯಾನಲ್ ಇದ್ದು, ನಂಬರ್‍ಗಳು ಸಣ್ಣದರಿಂದ ದೊಡ್ಡ ಗಾತ್ರಕ್ಕೆ ಮುದ್ರಣವಾಗಿರಲಿದೆ. ಅಂಧರಿಗೆ ಅನುಕೂಲವಾಗುವಂತೆ ಮಹಾತ್ಮಾ ಗಾಂಧಿ ಹಾಗೂ ಅಶೋಕ ಸ್ತಂಭದ ಉಬ್ಬಿದ ಮುದ್ರಣವಿದೆ. ‘ಹೆಚ್’ ಅಕ್ಷರದ ಉಬ್ಬಿದ ಗುರುತು ಇದೆ. ಎಡ ಹಾಗೂ ಬಲ ಭಾಗದಲ್ಲಿ ಆಂಗುಲರ್ ಬ್ಲೀಡ್ ಲೈನ್‍ಗಳಿದ್ದು, ಲೈನ್‍ಗಳ ಮಧ್ಯೆ ಎರಡು ವೃತ್ತಗಳಿವೆ. ನೋಟಿನ ಹಿಂಭಾಗದಲ್ಲಿ ಮುದ್ರಣದ ವರ್ಷ ಹಾಗೂ ಸ್ವಚ್ಛ ಭಾರತ ಲಾಂಛನವಿದೆ. ಅಲ್ಲದೆ ನೋಟಿನ ಬಣ್ಣಕ್ಕೆ ಹೊಂದಿಕೊಳ್ಳುವಂತೆ ಜಾಮಿಟ್ರಿಕ್ ಪ್ಯಾಟ್ರನ್ ಹಾಗೂ ಇತರೆ ಡಿಸೈನ್‍ಗಳಿವೆ. ನೋಟಿನ ಮೇಲೆ ಆರ್‍ಬಿಐ ಗವರ್ನರ್ ಊರ್ಜಿತ್ ಪಟೇಲ್ ಅವರ ಸಹಿ ಇದೆ.

     

    ಶೀಘ್ರದಲ್ಲೇ ಹೊಸ ವಿನ್ಯಾಸದ 50 ರೂ. ನೋಟು ಕೂಡ ಬಿಡುಗಡೆಯಾಗಲಿದೆ. ಹೊಸ 50 ರೂ. ನೋಟಿನಲ್ಲಿ ವಿಶ್ವವಿಖ್ಯಾತ ಹಂಪಿಯ ಚಿತ್ರವಿರಲಿದೆ.

  • 200 ರೂ. ನೋಟು ಮುದ್ರಣಕ್ಕೆ ಆರ್‍ಬಿಐ ಚಾಲನೆ

    200 ರೂ. ನೋಟು ಮುದ್ರಣಕ್ಕೆ ಆರ್‍ಬಿಐ ಚಾಲನೆ

    ನವದೆಹಲಿ: ದೇಶದಲ್ಲಿ ಇದೇ ಮೊದಲ ಬಾರಿಗೆ ಆರ್‍ಬಿಐ 200 ರೂ. ನೋಟುಗಳ ಮುದ್ರಣಕ್ಕೆ ಚಾಲನೆ ನೀಡಿದೆ. ಜನರ ವ್ಯವಹಾರವನ್ನು ಸರಳಗೊಳಿಸಲು ಈ ನೋಟುಗಳನ್ನು ಮುದ್ರಿಸಲು ಈಗ ಮುಂದಾಗಿದೆ.

    200 ರೂ. ನೋಟು ಮುದ್ರಣವಾಗುತ್ತಿರುವ ವಿಚಾರವನ್ನು ಆರ್‍ಬಿಐ ಅಧಿಕೃತವಾಗಿ ತಿಳಿಸಿಲ್ಲ. ಆದರೂ ಆರ್‍ಬಿಐ ಮೂಲಗಳು ಮಾಧ್ಯಮಗಳಿಗೆ ನೋಟು ಮುದ್ರಣವಾಗುತ್ತಿರುವ ಬಗ್ಗೆ ಮಾಹಿತಿ ನೀಡಿವೆ.

    ಶೀಘ್ರದಲ್ಲೇ 200 ರೂ. ಮುಖಬೆಲೆಯ ನೋಟುಗಳನ್ನ ಬಿಡುಗಡೆ ಮಾಡಲಿರುವ ಏಪ್ರಿಲ್‍ನಲ್ಲಿ ವರದಿಯಾಗಿತ್ತು. ಮಾರ್ಚ್ ನಲ್ಲಿ ನಡೆದ ಸಭೆಯಲ್ಲಿ ಆರ್‍ಬಿಐ 200 ರೂ. ನೋಟು ಬಿಡುಗಡೆ ಮಾಡುವ ಸಂಬಂಧ ನಿರ್ಧಾರ ತೆಗೆದುಕೊಂಡಿದೆ ಎಂದು ಹೇಳಲಾಗಿದೆ.

    2016ರ ನವೆಂಬರ್ 8ರಂದು ಹಳೇ 500 ಹಾಗೂ 1000 ರೂ. ನೋಟ್‍ಗಳನ್ನು ನಿಷೇಧಿಸಿದ್ದ ಮೋದಿ ಸರ್ಕಾರ ಹೊಸ ವಿನ್ಯಾಸದ 500 ರೂ. ಹಾಗೂ ಗುಲಾಬಿ ಬಣ್ಣದ 2 ಸಾವಿರ ರೂ. ಮುಖಬೆಲೆಯ ನೋಟುಗಳನ್ನ ಬಿಡುಗಡೆ ಮಾಡಿತ್ತು.

     

     

     

     

  • ಆರ್‍ಬಿಐನಿಂದ ಹೊಸ ಬ್ಯಾಚ್‍ನ 500 ರೂ. ನೋಟ್ ಬಿಡುಗಡೆ

    ಆರ್‍ಬಿಐನಿಂದ ಹೊಸ ಬ್ಯಾಚ್‍ನ 500 ರೂ. ನೋಟ್ ಬಿಡುಗಡೆ

    ನವದೆಹಲಿ: ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಹೊಸ ಬ್ಯಾಚ್‍ನ 500 ರೂ. ನೋಟ್‍ಗಳನ್ನ ಬಿಡುಗಡೆ ಮಾಡುತ್ತಿದೆ.

    ಈ ಹೊಸ ನೋಟ್‍ಗಳು ಹಳೇ ನೋಟಿನ ವಿನ್ಯಾಸದಲ್ಲೇ ಇದ್ದು, ಹೊಸ ನೋಟಿನ ನಂಬರ್ ಪ್ಯಾನೆಲ್‍ನಲ್ಲಿ ‘A’ ಅಕ್ಷರ ಇರಲಿದೆ.

    ಈ ಬಗ್ಗೆ ಅಧಿಸೂಚನೆ ಹೊರಡಿಸಿರುವ ಆರ್‍ಬಿಐ, ಹೊಸ ಬ್ಯಾಚ್‍ನ 500 ರೂ. ನೋಟ್ ಬಿಡುಗಡೆ ಮಾಡಲಾಗುತ್ತಿದ್ದು, ಈ ನೋಟ್‍ಗಳಲ್ಲಿ ಎರಡೂ ನಂಬರ್ ಪ್ಯಾನೆಲ್‍ನಲ್ಲಿ ‘A’ ಅಕ್ಷರ ಹಾಗೂ ಆರ್‍ಬಿಐ ಗವರ್ನರ್ ಊರ್ಜಿತ್ ಪಟೇಲ್ ಅವರ ಸಹಿ ಇರಲಿದೆ. ಹಿಂಭಾಗದಲ್ಲಿ ಮುದ್ರಣದ ವರ್ಷ 2017 ಇರುವ ನೋಟ್‍ಗಳನ್ನ ವಿತರಿಸಲಾಗುತ್ತಿದೆ ಎಂದು ತಿಳಿಸಿದೆ.

    ಈ ಹೊಸ 500 ರೂ. ನೋಟಿನ ವಿನ್ಯಾಸ ಈಗಾಗಲೇ ವಿತರಿಸಲಾಗಿರುವ ಮಹಾತ್ಮ ಗಾಂಧಿ ಸೀರೀಸ್‍ನ ನೋಟಿನಂತೆಯೇ ಇದೆ ಎಂದು ಆರ್‍ಬಿಐ ತಿಳಿಸಿದೆ.

    ನವೆಂಬರ್ 8ರಂದು ನೋಟ್‍ಬ್ಯಾನ್ ಆದ ನಂತರ ಹಳೇ 500 ಹಾಗೂ 1000 ರೂ. ನೋಟ್‍ಗಳನ್ನ ರದ್ದು ಮಾಡಿ ಹೊಸ 500 ಹಾಗೂ 2000 ರೂ. ಮುಖಬೆಲೆಯ ನೋಟುಗಳನ್ನ ಪರಿಸಚಯಿಸಲಾಗಿತ್ತು. ಪ್ರಸ್ತುತ 500 ರೂ. ನೋಟಿನ ಮುಂಭಾಗದಲ್ಲಿ ಎಡ ಭಾಗದಲ್ಲಿ ಮೇಲೆ ಹಾಗೂ ಬಲಭಾಗದಲ್ಲಿ ಕೆಳಗೆ ಇರುವ ಎರಡೂ ನಂಬರ್ ಪ್ಯಾನೆಲ್‍ನಲ್ಲಿ ‘E’ ಅಕ್ಷರವಿದೆ. ಅಲ್ಲದೆ ಮಹಾತ್ಮ ಗಾಂಧಿಯ ಭಾವಚಿತ್ರ, ಅಶೋಕ ಸ್ತಂಭ, ಬ್ಲೀಡ್ ಲೈನ್‍ಗಳು, ಬಲಭಾಗದಲ್ಲಿ 500 ಎಂಬ ಮುದ್ರಣ ಹಾಗೂ ಊರ್ಜಿತ್ ಪಟೇಲ್ ಅವರ ಸಹಿ ಇದೆ. ನೋಟಿನ ಹಿಂಭಾಗದಲ್ಲಿ ಸ್ವಚ್ಛ ಭಾರತದ ಲಾಂಛನ, ಕೆಂಪು ಕೋಟೆಯ ಚಿತ್ರ ಹಾಗೂ ನೋಟು ಮುದ್ರಣದ ವರ್ಷ ಇದೆ.

    ‘A’ ಅಕ್ಷರವಿರುವ ಹೊಸ ನೋಟುಗಳ ಜೊತೆಗೆ ಪ್ರಸ್ತುತ ಇರುವ ನೋಟುಗಳು ಕೂಡ ಚಾಲ್ತಿಯಲ್ಲಿರಲಿದೆ ಎಂದು ಆರ್‍ಬಿಐ ತಿಳಿಸಿದೆ.