ಬೆಂಗಳೂರು: ಸಿಲಿಕಾನ್ ಸಿಟಿ ಉಗ್ರರ ಅಡಗುತಾಣ ಆಗಿದೆ ಎಂದು ಪದೇ ಪದೇ ಸಾಬೀತಾಗುತ್ತಿದ್ದು, ಎನ್‍ಐಎ ಅಧಿಕಾರಿಗಳು ವಾರಕ್ಕೊಬ್ಬ ಆರೋಪಿಯನ್ನು ಬಂಧಿಸುತ್ತಿದ್ದಾರೆ.
ಬುಧವಾರ ನಗರದ ಡಿಜೆ ಹಳ್ಳಿಯಲ್ಲಿ ಮತ್ತೊಬ್ಬ ಶಂಕಿತ ಉಗ್ರ ಫಝಿಯನ್ನು ಬಂಧಿಸಿದ್ದಾರೆ. ಗ್ಯಾರೇಜಿನಲ್ಲಿ ಕೆಲಸ ಮಾಡುತ್ತಿದ್ದ ಫಝಿ, ಪೊಲೀಸರು ಬಂಧಿಸಲು ತೆರಳಿದಾಗ ಹೈಡ್ರಾಮಾ ಮಾಡಿದ್ದಾನೆ.
ಶಂಕಿತ ಉಗ್ರ ಮೊಹಬೂಬ್ ಪಾಷಾನ ಬಂಧನದ ನಂತರ ಎನ್‍ಐಎ ಅಧಿಕಾರಿಗಳು ಅವನ ಬಳಿ ಮಾಹಿತಿ ಕಲೆಹಾಕಿದ್ದರು. ಪಾಷಾ ನೀಡಿದ ಮಾಹಿತಿ ಮೇರೆಗೆ ಫಝಿಯನ್ನು ಬಂಧಿಸಲು ತೆರಳಿದ್ದಾರೆ. ಈ ವೇಳೆ ಶಂಕಿತ ಉಗ್ರ ಹೈಡ್ರಾಮಾ ಮಾಡಿದ್ದಾನೆ. ನನ್ನನ್ನು ಬಂಧನ ಮಾಡಲು ನೀವು ಯಾರು ಎಂದು ಹೇಳಿ ಓಡಿ ಹೋದವ ಟ್ಯಾನರಿ ಪ್ಯಾಕ್ಟರಿ ಒಳಗೆ ಸೇರಿಕೊಂಡಿದ್ದಾನೆ. (ಟ್ಯಾನರಿ ಅಂದರೆ ಪ್ರಾಣಿಗಳ ಚರ್ಮವನ್ನು ಕೊಳೆಸುವ ಜಾಗ) ಟ್ಯಾನರಿಯಲ್ಲಿ ದುರ್ವಾಸನೆ ಮತ್ತು ಕತ್ತಲು ಇದ್ದ ಜಾಗದಲ್ಲಿ ಬರೋಬರಿ ಒಂದೂವರೆ ಗಂಟೆಗಳ ಕಾಲ ಆಟವಾಡಿಸಿದ್ದಾನೆ. ಸತತ ಒಂದೂವರೆ ಗಂಟೆ ಆಟ ಆಡಿಸಿದರೂ ಎನ್‍ಐಎ ಮತ್ತು ಐಎಸ್‍ಡಿ ಅಧಿಕಾರಿಗಳು ಬಿಡದೇ ಆರೋಪಿ ಫಝಿಯನ್ನು ಬಂಧಿಸಿದ್ದಾರೆ.
ಒಂದೂವರೆ ಗಂಟೆ ಹೈಡ್ರಾಮದ ಬಳಿಕ ಸಿಕ್ಕಿ ಬಿದ್ದಿದ್ದು, ಮತ್ತೆ ಜೀಪ್ ಹತ್ತಿಸುವಾಗಲೂ ಗಲಾಟೆ ಮಾಡಿದ್ದಾನೆ. ಸ್ಥಳೀಯರ ಸಹಾಯ ಬೇಡಿಕೊಂಡು ಕಿತ್ತಾಟ, ಚೀರಾಟ ಮಾಡಿದ್ದಾನೆ. ಈ ವೇಳೆ ಪೊಲೀಸರು ಸ್ಥಳೀಯರಿಗೆ ಬುದ್ಧಿವಾದ ಹೇಳಿ ಆರೋಪಿಯನ್ನು ಜೀಪಿಗೆ ಹತ್ತಿಸಿದ್ದಾರೆ.
