ಮಂಡ್ಯ: ಜಿಲ್ಲೆಯ ಮದ್ದೂರು ಸಮೀಪದ ಮದ್ದೂರಮ್ಮ ಕೆರೆಯಲ್ಲಿ ಅಪರೂಪದ ಏರೋಪ್ಲೇನ್ ಮಾದರಿಯ ಮೀನೊಂದು ಮೀನುಗಾರರ ಬಲೆಗೆ ಸಿಲುಕಿದೆ.
ದೇಶಹಳ್ಳಿ ಗ್ರಾಮದ ಮೀನುಗಾರ ನಾಗರಾಜ ನಾಯಕ್ ಅವರು ಎಂದಿನಂತೆ ಮೀನು ಹಿಡಿಯಲು ಕೆರೆಯಲ್ಲಿ ಬಲೆ ಬೀಸಿದ್ದರು. ಮಧ್ಯಾಹ್ನ ಮೀನಿನ ಬಲೆಯನ್ನು ಎಳೆದು ಪರೀಕ್ಷಿಸಿದಾಗ, ಸುಮಾರು 1 ಕೆಜಿ ತೂಕದ ಏರೋಪ್ಲೇನ್ ಹೋಲುವ ವಿಶೇಷ ಮೀನು ಪತ್ತೆಯಾಗಿದೆ.
ಕಂದು ಬಣ್ಣದ ಈ ಮೀನಿನ ಮೈ ಮೇಲೆ ಹಳದಿ ಬಣ್ಣದ ಗೆರೆಗಳಿವೆ. ಮೀನಿನ ಬಾಯಿ ತಿಮಿಂಗಲದ ಬಾಯಿಯಂತಿದ್ದು, ಮೀನಿನ ಎರಡು ಬದಿಯಲ್ಲಿ ನಾಲ್ಕು ರೆಕ್ಕೆಗಳಿವೆ. ಮೀನಿನ ಮೇಲ್ಭಾಗದಲ್ಲಿ ನಾಲ್ಕು ಹಂತದ ಚೂಪಾದ ಮುಳ್ಳುಗಳಿವೆ.
ಇದೇ ಮೊದಲ ಬಾರಿಗೆ ಈ ರೀತಿಯ ವಿಶೇಷ ಮೀನು ನಮ್ಮ ಕೆರೆಯಲ್ಲಿ ಸಿಕ್ಕಿದೆ. ಈ ಹಿಂದೆ ಈ ರೀತಿಯ ಮೀನು ನಾನು ನೋಡಿರಲಿಲ್ಲ. ಇದು ಯಾವ ಜಾತಿಯ ಮೀನು ತಿಳಿದಿಲ್ಲ. ಬಲೆಯಲ್ಲಿ ಸಿಲುಕಿ ಈಚೆ ಬಂದ ಮೇಲೂ ಬದುಕಿದ್ದ ಈ ಮೀನನ್ನು ರೈತ ಶೈಲೇಂದ್ರ ಅವರ ತೋಟದ ಬಾವಿಯಲ್ಲಿ ಬಿಡಲಾಗಿದೆ ಎಂದು ಮೀನುಗಾರ ನಾಗರಾಜನಾಯಕ್ ತಿಳಿಸಿದ್ದಾರೆ.
