Tag: kyrgyzstan

ಈ ದುನಿಯಾ ವಿಚಿತ್ರ ಕಣ್ರೀ. ಇಲ್ಲಿ ಕಂಡು ಕೇಳರಿಯದ ಘಟನೆಗಳು ನಡೆಯುತ್ತದೆ. ಸಂಪ್ರದಾಯ, ಆಚರಣೆಗಳಿಗೆ ಲೆಕ್ಕವೇ ಇಲ್ಲ. ಇಂಥದ್ದೇ ಒಂದು ಕುತೂಹಲಕಾರಿ ಆಚರಣೆ ಬಗ್ಗೆ ಹೇಳುತ್ತಾ ಹೋದ್ರೆ ಮೊದಲಿಗೆ ನಮಗೆ ಕಾಣುವುದೇ ಕಿರ್ಗಿಸ್ತಾನ. ಕಿರ್ಗಿಸ್ಥಾನಿಗರ ಸಂಪ್ರದಾಯಗಳ ಪಟ್ಟಿ ಕೇಳಿದ್ರೆ ನೀವು ಒಂದು ಕ್ಷಣ ಬೆಚ್ಚಿ ಬೀಳುವುದು ಪಕ್ಕಾ. ಅಂದ ಹಾಗೆ ಚೈನಾದ ಪಕ್ಕದಲ್ಲಿ ಇರುವ ರಾಷ್ಟ್ರವೇ ಈ ಕಿರ್ಗಿಸ್ಥಾನ.

ಇಲ್ಲಿ ಬಹಳ ವಿಭಿನ್ನವಾಗಿ ಮದುವೆ ನಡೆಯುತ್ತದೆ. ನೀವಿದನ್ನು ಮೆಂಟಲ್ ಮ್ಯಾರೇಜ್ ಅಂತಾನೂ ಕರೆಯಬಹುದು. ಅಂದ ಹಾಗೆ ಇದು ಇಂದು ನಿನ್ನೆ ಕಥೆಯಲ್ಲ. ಕಾನೂನನ್ನು ಉಲ್ಲಂಘನೆ ಮಾಡುತ್ತೇವೆ ಅನ್ನೋ ಜನ ಇದನ್ನು ಒಂದು ಸಂಪ್ರದಾಯದ ರೀತಿಯಲ್ಲಿ ಇಂದಿಗೂ ಅನುಸರಿಸಿಕೊಂಡು ಬಂದಿದ್ದಾರೆ. ಅದೇನು ಸಂಪ್ರದಾಯವೋ ಗೊತ್ತಿಲ್ಲ. ಆದ್ರೆ, ಇಲ್ಲಿ ಬಲಿಯಾಗ್ತಿರೋರು ಮಾತ್ರ ಹುಡುಗೀರು ಅನ್ನುವುದೇ ಚಿಂತೆ. ಇಲ್ಲಿ ಈಗಲೂ 40% ಜನ ಮಹಿಳೆಯರು ಕಿಡ್ನಾಪ್ ಆಗಿ ಮದುವೆ ಆದವರೇ ಇದ್ದಾರೆ ಅಂದರೆ ನಂಬಲೇಬೇಕು. ಅದೆಲ್ಲ ಬಿಡಿ, ಇಲ್ಲಿ ಹುಡುಗಿಯರು ಕಿಡ್ನಾಪ್ ಹೇಗಾಗ್ತಾರೆ ಅನ್ನುವುದೇ ಇಂಟ್ರೆಸ್ಟಿಂಗ್ ಮ್ಯಾಟರು. ಇಲ್ಲಿನ ಜನ ಈ ರೀತಿಯ ಮದುವೆಯನ್ನು ಅಲ ಕಚ್ಚು ಅಂತಾ ಕರೆಯುತ್ತಾರೆ.

ನಮ್ಮಲ್ಲಿ ತಮಾಷೆಗೆ ಒಂದು ಮಾತು ಹೇಳುವುದನ್ನು ಕೇಳಿರುತ್ತೀರಿ. ಮದುವೆಗೆ ಎಲ್ಲಾ ತಯಾರಾಗಿದೆ. ಆದ್ರೆ, ಹುಡುಗಿ ಮಾತ್ರ ಇನ್ನೂ ಸಿಗಲಿಲ್ಲ ಅಂತಾ. ಕಿರ್ಗಿಸ್ಥಾನದಲ್ಲಿ ಮಾತ್ರ ಅದೇ ಮಾತು ನಿಜವಾಗಿದೆ. ಮೊದಲು ಮದುವೆಗೆ ಬೇಕಾದ ಸಾಮಾಗ್ರಿಗಳನ್ನೆಲ್ಲಾ ತರುತ್ತಾರೆ. ವಧುವಿಗೆ ಬಟ್ಟೆ, ವರನಿಗೆ ಬಟ್ಟೆ, ಒಡವೆ ಆದ ಮೇಲೆ ಮದುವೆ ಊಟವನ್ನೂ ತಯಾರಿಸಲಾಗುತ್ತದೆ. ನೆಂಟರಿಷ್ಟರನ್ನೂ ಕರೆಯುತ್ತಾರೆ. ಮಂಟಪಕ್ಕೆ ಬರೋವವರೆಗೂ ಹುಡುಗಿ ಯಾರು ಅನ್ನುವುದು ಹುಡುಗನ ಮನೆಯವರಿಗಾಗಲೀ, ಬಂಧುಗಳಿಗಾಗಲೀ ಅಥವಾ ಸ್ವತಃ ಕಿಡ್ನಾಪ್ ಆಗೋ ಹುಡುಗಿಗಾಗಲೀ ಗೊತ್ತಿರುವುದಿಲ್ಲ. ಇಷ್ಟೆಲ್ಲಾ ತಯಾರಿ ಆದಮೇಲೆ ಹುಡುಗಿಯನ್ನು ಕಿಡ್ನಾಪ್ ಮಾಡಿಕೊಂಡು ಬರಲು ಒಂದು ತಂಡ ರೆಡಿಯಾಗುತ್ತದೆ.

ಹೀಗೆ ಹೋಗುವ ತಂಡ ನೇರವಾಗಿ ರಸ್ತೆಗೆ ಇಳಿಯುತ್ತದೆ. ಅಲ್ಲೇನಾದ್ರೂ ಚೆನ್ನಾಗಿರುವ ಹುಡುಗಿ ಕಂಡು ಇವರಿಗೆ ಇಷ್ಟ ಆಯ್ತೋ ಅಷ್ಟೇ. ಅವಳ ಮದ್ವೆಗೆ ಇವರೇ ಮುಹೂರ್ತ ಫಿಕ್ಸ್ ಮಾಡುತ್ತಾರೆ. ಆಕೆಯನ್ನು ಕಿಡ್ನಾಪ್ ಮಾಡಿಕೊಂಡು ನೇರವಾಗಿ ಮನೆಗೆ ಕರೆದುಕೊಂಡು ಬರುತ್ತಾರೆ. ಅಲ್ಲಾಗಲೇ ಹುಡುಗಿಯ ಬರುವಿಕೆಗಾಗಿ ಕಾಯುತ್ತಿದ್ದ ಮನೆಯವರಿಗೆ ಅಂತೂ ಹುಡುಗಿ ಸಿಕ್ಕಳಲ್ಲಾ ಅನ್ನೋ ಸಂತೋಷ. ಆದ್ರೆ ಹುಡುಗಿ ಮಾತ್ರ ಬಲಿಪೀಠಕ್ಕೆ ಸಿದ್ಧಗೊಂಡಿರೋ ಕುರಿಯ ಹಾಗೆ ಆಗಿರುತ್ತಾಳೆ. ಮನೆಗೆ ತಲುಪಿದ ತಕ್ಷಣ ಅವಳ ತಲೆ ಮೇಲೊಂದು ಬಟ್ಟೆ ಹಾಕಿದ್ರೆ ಮುಗೀತು. ಅದು ಮದ್ವೆಯ ಮೊದಲ ಹಂತ. ಹುಡುಗನ ಮನೆಯಲ್ಲಿರುವ ಹೆಂಗಸರೆಲ್ಲಾ ಒಟ್ಟಾಗಿ ಸೇರಿಕೊಂಡು ಹುಡುಗಿಯನ್ನು ರೆಡಿ ಮಾಡಲು ಶುರು ಮಾಡುತ್ತಾರೆ. ಅವಳು ಎಷ್ಟೇ ಕೊಸರಾಡಿದ್ರೂ ಕೂಗಾಡಿದ್ರೂ ಊಹೂಂ ನೋ ಯೂಸ್.

ಇಷ್ಟೆಲ್ಲಾ ಡ್ರಾಮಾ ಒಂದು ಕಡೆ ಆಗುತ್ತಾ ಇದ್ರೆ, ಇನ್ನೊಂದು ಕಡೆ ವೆರೈಟಿ ವೆರೈಟಿ ಭಕ್ಷ್ಯ ಭೋಜನಗಳನ್ನು ತಯಾರು ಮಾಡಿಕೊಂಡಿರುತ್ತಾರೆ. ಸಣ್ಣದಾದ ಟೆಂಟ್ ಒಳಗೆ ಹುಡುಗನ ಕಡೆಯವರು ಊಟದ ತಯಾರಿ ಮಾಡುತ್ತಾ ಮದುವೆಯ ಮುಂದಿನ ತಯಾರಿಯಲ್ಲಿ ತೊಡಗುತ್ತಾರೆ. ಊಟ ಮಾಡುವ ಸ್ಥಳಕ್ಕೆ ವಧುವನ್ನು ಕರೆದುಕೊಂಡು ಬರುವುದಕ್ಕೆ ಎಲ್ಲಾ ಸಿದ್ಧತೆ ಮಾಡುತ್ತಾರೆ. ವರನ ಕಡೆಯವರು ನೂರೋ ಇನ್ನೋರೋ ಜನ ಇರುತ್ತಾರೆ. ಹೀಗಾಗಿ ವಧುವಿಗೆ ತಪ್ಪಿಸಿಕೊಳ್ಳೋ ಮಾರ್ಗವೂ ಅಲ್ಲಿ ಇರುವುದಿಲ್ಲ. ನಾನು ಬೇರೆಯವರನ್ನು ಇಷ್ಟ ಪಡುತ್ತಿದ್ದೇನೆ ಅಂತಾ ಹುಡುಗಿ ಕಿರುಚ್ತಾ ಹೇಳಿದ್ರೂ, ಇಲ್ಲಿ ನಾವು ಹೇಳಿದಷ್ಟು ನೀನು ಕೇಳಬೇಕು ಅನ್ನೋದಾಗಿ ವರನ ಕಡೆಯವರಿಂದ ಹುಕುಂ ಬರುತ್ತದೆ.

ಕಿರ್ಗಿಗಳ ಈ ಥರಹದ ಕಿರಿಕ್ ಗೆ ಜಾತಿ ಧರ್ಮದ ಹಂಗಿಲ್ಲ. ಕುಲ ಗೋತ್ರ ಅನ್ನುವುದು ಗೊತ್ತೇ ಇಲ್ಲ. ಕಾನೂನು ಕಟ್ಟಳೆಗಳು ಇವರಿಗಂತೂ ಬಿಲ್ ಕುಲ್ ಅಪ್ಲೈ ಆಗುವುದಿಲ್ಲ. ಒಂದರ್ಥದಲ್ಲಿ ಇವರು ಕಾನೂನಿಗೆ ಬೆಲೆ ಕೊಡುವುದಿಲ್ಲ. ಅಷ್ಟಕ್ಕೂ ಇವ್ರು ಕಿಡ್ನಾಪ್ ಮಾಡುವುದಕ್ಕೆ ಹಾಕುವ ಸ್ಕೆಚ್ ನೀವೇನಾದ್ರೂ ನೋಡಿದರೆ ದಂಗಾಗಿಬಿಡುತ್ತೀರಿ. ಮದುವೆಯ ಒಂದು ತಿಂಗಳ ಮೊದಲೇ ಕಿಡ್ನಾಪ್ ಎಲ್ಲಿ ಮಾಡಬೇಕು, ಹೇಗೆ ಮಾಡಬೇಕು, ಯಾರೆಲ್ಲಾ ಹೋಗಬೇಕು ಅನ್ನುವುದರ ಬಗ್ಗೆ ಗಹನವಾಗಿ ಚರ್ಚೆ ಮಾಡುತ್ತಾರೆ.

2007ರಲ್ಲಿ ಈ ಸಂಪ್ರದಾಯದ ಬಗ್ಗೆ ಒಂದು ಸಿನಿಮಾ ತೆರೆ ಕಂಡಿದೆ. ಕಿರ್ಗಿಗಳ ವಿಚಿತ್ರ ಮದುವೆ ಬಗ್ಗೆ ಬಂದಿರುವ ಸಿನಿಮಾ ಅದು. ಒಂದೇನು ಇಲ್ಲಿ ಆಗಿರೋ ಮದುವೆಗಳ ಸಂಖ್ಯೆ ನೋಡಿದರೆ ಲೈಫ್ ಲಾಂಗ್ ಕುಳಿತು ಸಿನಿಮಾ ನೋಡಬಹುದು ಬಿಡಿ. ಇನ್ನೂ ಒಂದು ವಿಷಯ ಗೊತ್ತಿದೆಯಾ..? ಸಾಮಾನ್ಯವಾಗಿ ನಾವು ಮದುವೆ ಆಗೋ ಮೊದಲೇ ಹುಡುಗಿ ಮನೆಗೆ ಹೋಗಿ ಮದುವೆ ಬಗ್ಗೆ ಮಾತುಕತೆ ಮಾಡುತ್ತೇವೆ. ಆದ್ರೆ ಇಲ್ಲಿ ಮಾತ್ರ ಮದುವೆ ಆದಮೇಲೆ, ಕ್ಷಮಿಸಿ, ನಿಮ್ಮ ಹುಡುಗಿಯನ್ನು ನಾವೇ ಕಿಡ್ನಾಪ್ ಮಾಡಿ ಮದುವೆ ಮಾಡಿಸಿದೆವು ಅನ್ನುತ್ತಾರೆ. ಇದನ್ನು ಕೇಳಿದ ಹುಡುಗಿ ಮನೆಯವರು ಮನಸಾರೆ ಒಪ್ಪಿದ್ರೆ ಸರಿ. ಇಲ್ಲ ಅಂದ್ರೆ ಬಾಗಿಲು ದಢಾರ್ ಅಂತಾ ಮುಚ್ಚಲಾಗುತ್ತದೆ. ಹುಡುಗಿ ಹೋದ್ರೆ ಹೋಗ್ಲಿ ನಾವಂತೂ ರಾಜಿ ಆಗುವುದಿಲ್ಲ ಅನ್ನುವುದನ್ನು ಸ್ಪಷ್ಟಪಡಿಸುತ್ತಾರೆ.

ಇನ್ನೂ ಒಂದು ವಿಷಯ ಏನಂದರೆ, ದಾರಿ ಮಧ್ಯೆ ನಿಂತು ನೀನು ನನ್ನನ್ನು ವಿವಾಹವಾಗುತ್ತೀಯಾ ಅಂತಾ ಕೇಳಿದ ತಕ್ಷಣ ಸರಿ ಅಂತಾ ಒಪ್ಪಿಕೊಂಡರೆ ಆಕೆಯ ಬಗ್ಗೆ ಅನುಮಾನ ಮೂಡುತ್ತದಂತೆ. ಒಂದು ವೇಳೆ, ಇಲ್ಲ ನಾನು ಆಗುವುದೇ ಇಲ್ಲ ಅಂತಾ ಪ್ರತಿಭಟಿಸಿದರೆ ಆಕೆ ಮುಗ್ಧೆ ಹಾಗೂ ಒಳ್ಳೆಯವಳು ಅಂತಾ ನಿರ್ಧರಿಸುತ್ತಾರಂತೆ. ವಿವಾಹ ಅನ್ನುವುದು ಎರಡು ಮನಸ್ಸುಗಳು ಒಪ್ಪಿ ಆಗುವುದಾದರೂ, ಇಲ್ಲಿ ಮಕ್ಕಳ ಆಟದ ರೀತಿ ಆಗಿಬಿಟ್ಟಿದೆ.

ಇನ್ನು ಕಿಡ್ನಾಪ್ ಮಾಡಿ ಮದುವೆ ಆದ್ಮೇಲೆ ಹುಡುಗ ತನ್ನ ಮನದನ್ನೆಯನ್ನು ಅಜ್ಞಾತ ಸ್ಥಳಕ್ಕೆ ಹನಿಮೂನ್ ಗೂ ಕರೆದುಕೊಂಡು ಹೋಗುತ್ತಾನೆ. ಆದಷ್ಟು ಅವಳ ಮನಸ್ಸಿಗೆ ಇಷ್ಟ ಆಗುವ ಹಾಗೆ ನಡೆದುಕೊಳ್ಳಲು ಶುರುಮಾಡುತ್ತಾನೆ. ಪಾಪ, ಬೆಕ್ಕಿಗೆ ಆಟ ಆದ್ರೆ ಇಲಿಗೆ ಪ್ರಾಣ ಸಂಕಟ ಆದ ಹಾಗಿದೆ ಹುಡುಗಿ ಸ್ಥಿತಿ. ಇನ್ನು ಕೆಲವೊಮ್ಮೆ ಹುಡುಗಿ ಒಪ್ಪಿದರೆ, ಮದುವೆಯ ನಂತರದ ಸಮಾರಂಭಗಳು ಭರ್ಜರಿಯಾಗಿ ನಡೆಯುತ್ತದೆ. ಭರ್ಜರಿ ಊಟ ಅಂದರೆ, ಬಾಡೂಟ. ಕುರಿಯನ್ನು ಕೊಂದು ಮಾಂಸದ ಅಡುಗೆ ತಯಾರಿಸ್ತಾರೆ.

ಕಿರ್ಗಿಸ್ಥಾನದ ಹಿರಿಯರು ಹೇಳುವ ಪ್ರಕಾರ ಪುರಾತನ ಮಾನಾಸ್ ಹೀರೋಗಳು ಇಂತಹಾ ಒಂದು ಸಂಪ್ರದಾಯಕ್ಕೆ ನಾಂದಿ ಹಾಡಿದರಂತೆ. ಹುಡುಗಿಯನ್ನ ಕಿಡ್ನಾಪ್ ಮಾಡುವುದು ಹಲವಾರು ದೇಶಗಳಲ್ಲಿ ಕ್ರೈಂ ಅಂತಾ ಪರಿಗಣಿಸಲಾಗುತ್ತದೆ. ಆದರೆ,ಇತ್ತೀಚಿನ ದಿನಗಳಲ್ಲಿ ಕಿರ್ಗಿಸ್ಥಾನಿಗಳು ಅಕ್ಷರಸ್ಥರಾಗುತ್ತಿರುವುದರಿಂದ ಅಲ್ಲಿ ಇಂತಹಾ ಸಂಪ್ರದಾಯಗಳನ್ನು ಕೇವಲ ಸಾಂಕೇತಿಕವಾಗಿ ಆಚರಿಸಿಕೊಂಡು ಬರಲಾಗುತ್ತಿದೆ. ಇಂತಹಾ ಮದುವೆಗಳು ಎಷ್ಟರ ಮಟ್ಟಿಗೆ ಡೇಂಜರಸ್ ಆಯ್ತು ಅಂದರೆ, ಕ್ರಿಮಿನಲ್ ಚಟುವಟಿಕೆಗಳಲ್ಲಿ ಇದ್ದ ಹುಡುಗರು, ಬಡ ಹುಡುಗರು ದುಡ್ಡಿಗಾಗಿ ಹುಡುಗಿಯರನ್ನು ಕಿಡ್ನಾಪ್ ಮಾಡೋದಕ್ಕೆ ಶುರು ಮಾಡಿದರು. ಈ ಥರಹದ ಕಿಡ್ನಾಪ್ ಗಳಿಂದಾಗಿ ಹುಡುಗಿಯರು ಶಿಕ್ಷಣ ಪಡೆಯಲು ಅಥವಾ ಹೊರಗೆ ಬಂದು ಸಾಮಾಜಿಕ ಚಟುವಟಿಕೆಗಳಲ್ಲಿ ಭಾಗವಹಿಸಲು ಹಿಂದೇಟು ಹಾಕಲು ಶುರು ಮಾಡಿದರು. ಏನೇ ಆಗಲಿ ಒಬ್ಬ ಹುಡುಗನಿಗೆ ಒಬ್ಬ ಹುಡುಗಿ ಅಂತಾ ಬ್ರಹ್ಮ ನಿರ್ಧರಿಸುತ್ತಾನಂತೆ. ಆದರೆ, ಕಿರ್ಗಿಸ್ಥಾನದಂತಹಾ ಪ್ರದೇಶಗಳಲ್ಲಿ ಮಾತ್ರ ಹಣೆ ಬರಹ ಬರೆಯಬೇಕಾದ ಬ್ರಹ್ಮ ಮದ್ವೆ ವಿಷ್ಯದಲ್ಲಿ ಹುಡುಗಿಯರಿಗೆ ಶ್ಯಾನೆ ಮೋಸ ಮಾಡಿಬಿಟ್ಟ ಅಲ್ವಾ?

– ಕ್ಷಮಾ ಭಾರದ್ವಾಜ್, ಉಜಿರೆ