ಬೀದರ್: ರಾಜ್ಯದ ಸಾಕಷ್ಟು ಸರ್ಕಾರಿ ಶಾಲೆಗಳಲ್ಲಿ ಮೂಲಭೂತ ಸೌಲಭ್ಯಗಳ ಸಮಸ್ಯೆ ಕಾಡುತ್ತಿದೆ. ಆದರೆ ಜಿಲ್ಲೆಯ ಔರಾದ್ ತಾಲೂಕಿನ 20 ಕುಗ್ರಾಮದ ಸರ್ಕಾರಿ ಶಾಲೆಯ ಸಾವಿರಾರು ವಿದ್ಯಾರ್ಥಿಗಳಿಗೆ ಇಂದು ಹೈಟೆಕ್ ಶಿಕ್ಷಣ ಭಾಗ್ಯ ಲಭಿಸಿದೆ.
ರೈತ ಸಂಘ, ರಿಲಯನ್ಸ್ ಫೌಂಡೇಶನ್, ಮೇಂಡಾ ಫೌಂಡೇಶನ್ ಮತ್ತು ಸೇಲ್ಕಾ ಫೌಂಡೇಶನ್ ಸಯೋಗದಲ್ಲಿ ಒಟ್ಟು 2 ಲಕ್ಷ ರೂ. ಹಣ ಖರ್ಚು ಮಾಡಿ ಸಾವಿರಾರು ವಿದ್ಯಾರ್ಥಿಗಳಿಗೆ ಸ್ಮಾರ್ಟ್ ಕ್ಲಾಸ್ ಭಾಗ್ಯ ದೊರಕಿಸಿ ಕೊಡಲಾಗಿದೆ. ಔರಾದ್ ತಾಲೂಕಿನ ಬೋರ್ಗಿ, ನಾಗೂರು ಎಂ, ಲಿಂಗದಹಳ್ಳಿ, ಜೀರ್ಗಾ ಕೆ, ಚಟ್ನಹಳ್ಳಿ, ಹಾಲಿಹಿಪ್ಪರ್ಗಾ, ಸೇರಿದಂತೆ ಒಟ್ಟು 20 ಸರ್ಕಾರಿ ಶಾಲೆಗಳಲ್ಲಿ ಸದ್ಯ ಸ್ಮಾರ್ಟ್ ಕ್ಲಾಸ್ ಭಾಗ್ಯ ಲಭಿಸುತ್ತಿದೆ.
ಪ್ರಮುಖವಾಗಿ ಬೋರ್ಗಿಯ ಪ್ರಾಥಮಿಕ ಮತ್ತು ಪ್ರೌಡ ಶಿಕ್ಷಣ ಸರ್ಕಾರಿ ಶಾಲೆಗಳಲ್ಲಿ ಸ್ಮಾರ್ಟ್ ಕ್ಲಾಸ್ ಸೌಲಭ್ಯ ದೊರಕಿದೆ. 130 ವಿದ್ಯಾರ್ಥಿಗಳು ಹೈಟೆಕ್ ಶಿಕ್ಷಣ ಪಡೆದುಕೊಳ್ಳುತ್ತಿದ್ದಾರೆ. ಸ್ಮಾರ್ಟ್ ಕ್ಲಾಸ್ ಜೊತೆಗೆ ‘ಪಂಚಸೂತ್ರ’ ಮತ್ತು ‘ನಲಿಕಲಿ’ ಎಂಬ ವಿಶೇಷ ಕಾರ್ಯಕ್ರಮಗಳನ್ನು ವಿದ್ಯಾರ್ಥಿಗಳಿಗೆ ನೀಡಲಾಗುತ್ತಿದೆ. ಸ್ಮಾರ್ಟ್ ಕ್ಲಾಸ್ ತಂತ್ರಜ್ಞಾನ ಬಳಿಸಿಕೊಂಡು ದೃಶ್ಯ ಮತ್ತು ಆಡಿಯೋ ಮೂಲಕ ವಿದ್ಯಾರ್ಥಿಗಳಿಗೆ ಶಿಕ್ಷಕರು ಪಾಠ ಮಾಡುತ್ತಿದ್ದಾರೆ.
