ಲಂಡನ್: ತನ್ನ ತಾಯಿ ಮೃತಪಟ್ಟ ಹಿನ್ನೆಲೆಯಲ್ಲಿ 22ರ ಮಹಿಳೆಯೊಬ್ಬರು ತಮ್ಮ ಕಿರಿಯ ಸಹೋದರ-ಸಹೋದರಿಯನ್ನು ದತ್ತು ಪಡೆಯುವ ಮೂಲಕ ರಾತ್ರೋರಾತ್ರಿ ಏಳು ಮಕ್ಕಳ ತಾಯಿಯಾಗಿದ್ದಾರೆ.
ಶ್ಯಾನ್ನೋನ್ ಎಲ್ಲಿಸ್ 2 ಮಕ್ಕಳ ತಾಯಿ. ಇವರಿಗೆ ಈಗಾಗಲೇ ಇಬ್ಬರು ಮಕ್ಕಳಿದ್ದಾರೆ. ಎಲ್ಲಿಸ್ ಅವರ 39 ವರ್ಷದ ತಾಯಿ ಶೆಲ್ಲಿ ಮೃತಪಟ್ಟಿದ್ದಾರೆ. ನಂತರ ಎಲ್ಲಿಸ್ ತಮ್ಮ ಐದು ಕಿರಿಯ ಸಹೋದರ ಮತ್ತು ಸಹೋದರಿಯರನ್ನು ದತ್ತು ತೆಗೆದುಕೊಂಡಿದ್ದಾರೆ. ಹೀಗಾಗಿ ಎಲ್ಲಿಸ್ ತಮ್ಮಿಬ್ಬರು ಮಕ್ಕಳು ಸೇರಿದಂತೆ ಈಗ ಏಳು ಮಕ್ಕಳ ತಾಯಿಯಾಗಿದ್ದಾರೆ.
ವಿಶ್ವ ತಾಯಿಯಂದಿರ ದಿನ ಎಲ್ಲಿಸ್ ಅವರಿಗೆ ಅವರ ಮಕ್ಕಳು ಕೈಯಿಂದ ತಯಾರಿಸಿದ್ದ ಕಾರ್ಡುಗಳು, ಚಾಕ್ಲೇಟ್‍ಗಳು ಮತ್ತು ಹೂವುಗಳನ್ನು ನೀಡಿದರು. ಅಷ್ಟೇ ಅಲ್ಲದೇ ಪಾರ್ಕಿನ ಮರವೊಂದರ ಬಳಿ ಹೋಗಿ ತಮ್ಮ ತಾಯಿ ಶೆಲ್ಲಿ ಅವರಿಗೆ ಕುಟುಂಬದವರು ಒಟ್ಟಿಗೆ ಅಂತಿಮ ನಮನ ಸಲ್ಲಿಸಿದ್ದಾರೆ.
ಎಲ್ಲಿಸ್ ತಾಯಿ ಶೆಲ್ಲಿ ಬದುಕ್ಕಿದ್ದಾಗ ತಮ್ಮ ಎಲ್ಲ ಮಕ್ಕಳನ್ನು ಕರೆದುಕೊಂಡು ಪಾರ್ಕಿನಲ್ಲಿದ್ದ ಮರದ ಬಳಿ ಹೋಗುತ್ತಿದ್ದರು. ಅಲ್ಲಿ ಅವರು ಕುಟುಂಬದವರ ಜೊತೆ ಸಂತೋಷದಿಂದ ಇರುತ್ತಿದ್ದರು. ಹೀಗಾಗಿ ಅವರ ತಾಯಿಗೆ ಪ್ರಿಯವಾದ ಅದೇ ಮರದ ಬಳಿಯೇ ಅಸ್ಥಿ ವಿಸರ್ಜನೆ ಮಾಡಲಾಗಿದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ. ಹೀಗಾಗಿ ಮರದ ಬಳಿ ಮಕ್ಕಳು ಹೋಗಿ ಅಂತಿಮ ನಮನ ಸಲ್ಲಿಸಿದ್ದಾರೆ.
ಎಲ್ಲಿಸ್ ತಾಯಿ ಶೆಲ್ಲಿ ಮೃತಪಟ್ಟ ನಂತರ ಅವರ ಸಹೋದರ-ಸಹೋದರಿಯರನ್ನು ದೂರ ಮಾಡಿಕೊಳ್ಳಲು ಇಷ್ಟವಿರಲಿಲ್ಲ. ಆಗ ಎಲ್ಲಿಸ್ ತಮ್ಮ ಪತಿ ಕೀರನ್ ಫರ್ಗ್ಯೂಸನ್ ಬಳಿ ಅವರನ್ನು ದತ್ತು ಪಡೆದುಕೊಳ್ಳವ ಬಗ್ಗೆ ಹೇಳಿದ್ದಾರೆ. ಆಗ ಪತಿ ಇದಕ್ಕೆ ಒಪ್ಪಿಗೆ ಸೂಚಿಸಿದ್ದಾರೆ. ನಂತರ ಅವರನ್ನು ತಮ್ಮ ಮಕ್ಕಳಂತೆ ನೋಡಿಕೊಳ್ಳಲು ನಿರ್ಧಾರ ಮಾಡಿದ್ದಾರೆ.
“ನಮ್ಮ ತಾಯಿ ಬಯಸಿದ್ದಂತೆ ನಮ್ಮ ಕುಟುಂಬ ತುಂಬಾ ದೊಡ್ಡದಾಗಿತ್ತು. ಜೊತೆಗೆ ಯಾವಾಗಲೂ ನಾವು ಸಂತಸದಿಂದ ಇದ್ದೆವು. ನಮಗೆ ತಂದೆ ಇಲ್ಲದಿದ್ದರು ನಮ್ಮ ತಾಯಿ ನಾವು ಕೇಳಿದ ಎಲ್ಲವನ್ನು ಕೊಡಿಸುತ್ತಿದ್ದರು. ಎಲ್ಲರನ್ನು ಪ್ರೀತಿಯಿಂದ ನೋಡಿಕೊಳ್ಳುತ್ತಿದ್ದರು ಎಂದು ಎಲ್ಲಿಸ್ ಹೇಳಿದ್ದಾರೆ.
ಜನವರಿ 2018ರಲ್ಲಿ ನಮ್ಮ ತಾಯಿ ಅನಾರೋಗ್ಯದಿಂದ ಬಳಲುತ್ತಿದ್ದರು. ಕೂಡಲೇ ಅವರನ್ನು ಹಾಟ್ರ್ಲೆಪೂಲ್ ನ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದೆ. ಅಲ್ಲಿ ವೈದ್ಯರು ನಮ್ಮ ತಾಯಿ ಅಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಇವರು ಬದುಕುವ ಸಾಧ್ಯತೆ ಕಡಿಮೆ ಎಂದು ತಿಳಿಸಿದ್ದರು. ಆಗ ನಮ್ಮ ತಾಯಿ ನನ್ನ ಕಡೆ ದುಃಖದಿಂದ ನೋಡಿದರು. ಈ ವೇಳೆ ನಾನು ಅಮ್ಮನಿಗೆ ನನ್ನ ಸಹೋದರ ಮತ್ತು ಸಹೋದರಿಯರನ್ನು ನೋಡಿಕೊಳ್ಳುತ್ತೇನೆಂದು ಭರವಸೆ ನೀಡಿದ್ದೇನೆ. ಹೀಗಾಗಿ ನಾನು ಎಲ್ಲರಿಗೂ ಅಮ್ಮನಾಗಬೇಕೆಂದು ಬಯಸಿದ್ದೇನೆ ಎಂದು ಎಲ್ಲಿಸ್ ತಿಳಿಸಿದ್ದಾರೆ.
2018 ಜನವರಿ 25 ರಂದು ಶೆಲ್ಲಿ ಮೃತಪಟ್ಟಿದ್ದರು. ಅಂದಿನಿಂದ ಎಲ್ಲಿಸ್ ತಾನು ಕೊಟ್ಟ ಮಾತಿನಂತೆ ತನ್ನ ಕಿರಿಯ ಸಹೋದರ ಸಹೋದರಿಯರಿಗೆ ಕಾನೂನಿನ ಪ್ರಕಾರ ತಾಯಿಯಾಗಿದ್ದಾರೆ.
