Bloggers Unite

Tag: cooking

  • ಆಲೂ ಟಿಕ್ಕಿ ಮಾಡುವ ವಿಧಾನ

    ಆಲೂ ಟಿಕ್ಕಿ ಮಾಡುವ ವಿಧಾನ

    ರಜಾ ದಿನಗಳು ಬಂತೆಂದರೆ ಸಾಕು ಮಕ್ಕಳು ಕೇಳುವ ತಿಂಡಿ ತಿನಿಸುಮಾಡಿಕೊಡಲು ಅಮ್ಮಂದಿರು ಪರದಾಡುತ್ತಲೇ ಇರುತ್ತಾರೆ. ಮನೆಯಲ್ಲಿ ಮಾಡಿಕೊಟ್ಟಿಲ್ಲ ಎಂದರೆ ಮಕ್ಕಳು ಹೊರಗಡೆ ಸಿಗುವ ತಿನಿಸುಗಳಿಗೆ ಮಾರುಹೋಗುತ್ತಾರೆ. ಇದರಿಂದ ಮಕ್ಕಳ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ. ಸಾಮಾನ್ಯವಾಗಿ ಮಕ್ಕಳಿಗೆ ಆಲೂಗಡ್ಡೆಯ ಟಿಕ್ಕಿ ಇಷ್ಟವಾಗುತ್ತದೆ. ಆದ್ದರಿಂದ ಮಕ್ಕಳಿಗೆ ಇಷ್ಟವಾಗುವ ರೀತಿಯಲ್ಲಿ ಮನೆಯಲ್ಲಿಯೇ ಆಲೂ ಟಿಕ್ಕಿ ಮಾಡಿಕೊಡಿ. ಇದರಿಂದ ಅವರ ಆರೋಗ್ಯದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ. ನಿಮಗಾಗಿ ಆಲೂ ಟಿಕ್ಕಿ ಮಾಡುವ ವಿಧಾನ ಇಲ್ಲಿದೆ….

    ಬೇಕಾಗುವ ಸಾಮಾಗ್ರಿಗಳು
    1. ಬೇಯಿಸಿದ ಆಲೂಗಡ್ಡೆ – 3
    2. ಬೇಯಿಸಿದ ಬಟಾಣಿ – ಮುಕ್ಕಾಲು ಕಪ್
    3. ಕತ್ತರಿಸಿದ ಈರುಳ್ಳಿ – 2
    4. ಹಸಿರು ಮೆಣಸಿನ ಕಾಯಿ – 2
    5. ಮೆಣಸಿನ ಪುಡಿ – 1 ಚಮಚ
    6. ಗರಂ ಮಸಾಲೆ -2 ಚಮಚ
    7. ಜೀರಿಗೆ ಪುಡಿ – 1ಚಮಚ
    8. ಪುದೀನ ಸೊಪ್ಪು – ಒಂದು ಸಣ್ಣ ಕಪ್
    9. ಬ್ರೆಡ್ – 2 ಬೌಲ್
    10. ಅಕ್ಕಿ ಹಿಟ್ಟು – 3 ಬೌಲ್
    11. ರುಚಿಗೆ ತಕ್ಕಷ್ಟು ಉಪ್ಪು

    ಮಾಡುವ ವಿಧಾನ
    *  ಬೇಯಿಸಿದ ಆಲೂಗಡ್ಡೆಯಲ್ಲಿ ಸಿಪ್ಪೆ ತೆಗೆದು ಒಂದು ದೊಡ್ಡ ಬೌಲ್‍ನಲ್ಲಿ ಹಾಕಿರಿ.
    * ಈಗ ಅದಕ್ಕೆ ಎಲ್ಲ ಪದಾರ್ಥಗಳು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. (ನೀರು ಬಳಸಬಾರದು)
    * ಮಿಕ್ಸ್ ಮಾಡಿದ ನಂತರ ಅದನ್ನು ಕೈಯಲ್ಲಿ ಸಣ್ಣದಾಗಿ ಇಡ್ಲಿ ಆಕಾರಕ್ಕೆ ತಟ್ಟಿಕೊಳ್ಳಿ.
    * ನಂತರ ಒಲೆಯ ಮೇಲೆ ತವ ಇಟ್ಟು ಅದಕ್ಕೆ ಸ್ವಲ್ಪ ಎಣ್ಣೆ ಹಾಕಿ. ಎಣ್ಣೆ ಕಾದ ನಂತರ ತಟ್ಟಿದ ಪದಾರ್ಥವನ್ನು ಹಾಕಿ ಮಧ್ಯಮ ಉರಿಯಲ್ಲಿಟ್ಟು 5 ನಿಮಿಷ ಎರಡೂ ಬದಿಯನ್ನು ಬೇಯಿಸಿ.
    * ಬೆಂದ ನಂತರ ಅದನ್ನು ಒಂದು ಪ್ಲೇಟ್‍ಗೆ ಹಾಕಿ ಸಾಸ್ ಜೊತೆ ಸವಿಯಿರಿ.

  • ಥಟ್ ಅಂತ ಟೊಮೆಟೊ ಗೊಜ್ಜು ಮಾಡೋ ವಿಧಾನ

    ಥಟ್ ಅಂತ ಟೊಮೆಟೊ ಗೊಜ್ಜು ಮಾಡೋ ವಿಧಾನ

    ಸರಳವಾಗಿ ಮತ್ತು ತಕ್ಷಣವೇ ಮಾಡಬಹುದಾದಂತಹ ವಿಶಿಷ್ಟ ಅಡುಗೆಯ ಶೈಲಿಯಲ್ಲಿ ಟೊಮೆಟೊ ಗೊಜ್ಜು ಒಂದಾಗಿದೆ. ಟೊಮೆಟೊದಿಂದ ಹಲವಾರು ಅಡುಗೆಯನ್ನು ಮಾಡಬಹುದು. ವಿಶಿಷ್ಟವಾದ ಮತ್ತು ಹೆಚ್ಚು ರುಚಿಕರವಾದ ಟೊಮೆಟೊ ಗೊಜ್ಜನ್ನು ಮಾಡುವುದು ತುಂಬಾ ಸರಳವಾಗಿರುತ್ತದೆ. ಆದ್ದರಿಂದ ನಿಮಗಾಗಿ ಟೊಮೆಟೊ ಗೊಜ್ಜು ಮಾಡುವ ಸುಲಭ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಟೊಮೆಟೊ – 2
    2. ಈರುಳ್ಳಿ – 1
    3. ಜೀರಿಗೆ, ಸಾಸಿವೆ- 1 ಚಮಚ
    4. ಅಡುಗೆ ಎಣ್ಣೆ – 3 ಚಮಚ
    5. ಮೆಣಸಿನ ಕಾಯಿ -2
    6. ಉಪ್ಪು – ರುಚಿಗೆ ತಕ್ಕಷ್ಟು
    7. ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ – 1 ಚಮಚ
    8. ತೆಂಗಿನ ಕಾಯಿ ತುರಿ – ಒಂದು ಸಣ್ಣ ಬೌಲ್
    9. ಗಸಗಸೆ – ಅರ್ಧ ಚಮಚ
    10. ಕೊತ್ತಂಬರಿ ಸೊಪ್ಪು -ಸ್ವಲ್ಪ

    ಮಾಡುವ ವಿಧಾನ
    * ಗಸಗಸೆಯ ಜೊತೆಗೆ ತೆಂಗಿನಕಾಯಿ ತುರಿಯನ್ನು ಮಿಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ.
    * ನಂತರ ಒಂದು ಬಾಣಲೆಯನ್ನು ಒಲೆಯ ಮೇಲಿಟ್ಟು ಕಾದ ಮೇಲೆ ಎಣ್ಣೆ ಹಾಕಿ, ನಂತರ ಅದಕ್ಕೆ ಜೀರಿಗೆ ಮತ್ತು ಸಾಸಿವೆಯನ್ನು ಹಾಕಿ ಫ್ರೈ ಮಾಡಿಕೊಳ್ಳಿ.
    * ಅದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಜೊತೆಗೆ ಸಣ್ಣಗೆ ಕತ್ತರಿಸಿದ ಈರುಳ್ಳಿ ಮತ್ತು ಮೆಣಸಿನ ಕಾಯಿಯನ್ನು ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿದುಕೊಳ್ಳಿ.
    * ನಂತರ ಅದಕ್ಕೆ ಸಣ್ಣಗೆ ಕತ್ತರಿಸಿದ ಟೊಮೆಟೊ ಜೊತೆ ರುಬ್ಬಿಕೊಂಡ ಕಾಯಿತುರಿ ಮಿಶ್ರಣ, ಸ್ವಲ್ಪ ನೀರು ಜೊತೆಗೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಬಾಣಲೆಗೆ ಪ್ಲೇಟ್ ಮುಚ್ಚಿ ಮಧ್ಯಮ ಉರಿಯಲ್ಲಿ ಬೇಯಿಸಿಕೊಳ್ಳಿ.
    * 15 ನಿಮಿಷಗಳ ನಂತರ ಆ ಪ್ಲೇಟನ್ನು ತೆಗೆದು ಅದಕ್ಕೆ ಸ್ವಲ್ಪ ಕೊತ್ತಂಬರಿ ಸೊಪ್ಪನ್ನು ಹಾಕಿದರೆ ಟೊಮೆಟೊ ಗೊಜ್ಜು ಸವಿಯಲು ಸಿದ್ಧ.
    * ಟೊಮೆಟೊ ಗೊಜ್ಜನ್ನು ನೀರು ದೋಸೆ, ಅನ್ನ ಮತ್ತು ಚಪಾತಿಯ ಜೊತೆ ಸೇವಿಸಬಹುದಾಗಿದೆ.

  • ಖಡಕ್ ಚಿಕನ್ 65 ಮಾಡುವ ವಿಧಾನ

    ಖಡಕ್ ಚಿಕನ್ 65 ಮಾಡುವ ವಿಧಾನ

    ವೀಕೆಂಡ್ ಬಂದರೆ ಸಾಕು ಮನೆಯಲ್ಲಿ ಏನಾದರೂ ಸ್ಪೆಷಲ್ ಮಾಡಬೇಕು ಎಂದು ಯೋಚನೆ ಮಾಡುತ್ತಾ ಕುಳಿತಿರುತ್ತೀರಿ. ಆದ್ದರಿಂದ ನಾವು ತಿಳಿಸುವ ಚಿಕನ್ 65 ಟ್ರೈ ಮಾಡಿ ರುಚಿ ನೋಡಿ. ಅತ್ಯಂತ ಸುಲಭವಾಗಿ ಹಾಗೂ ರುಚಿಕರವಾಗಿ ಚಿಕನ್ 65 ಮಾಡುವ ವಿಧಾನ ಇಲ್ಲಿದೆ. ಈ ಚಿಕನ್ ಚೈನಿಸ್ ಸ್ಟೈಲ್‍ನಲ್ಲಿ ಒಂದಾಗಿದೆ.

    ಬೇಕಾಗುವ ಸಾಮಾಗ್ರಿಗಳು:
    1. ಚಿಕನ್ – 450 ಗ್ರಾಂ
    2. ಕೊತ್ತಂಬರಿ ಪುಡಿ – 3 ಚಮಚ
    3. ಮೊಸರು – 3 ಚಮಚ
    4. ಹಸಿ ಮೆಣಸಿನ ಕಾಯಿ – 4
    5. ಅಡುಗೆ ಎಣ್ಣೆ – 2 ಚಮಚ
    6. ಕೆಂಪು ಮೆಣಸಿನ ಪುಡಿ – 1 ಚಮಚ
    7. ಅರಿಶಿಣ ಪುಡಿ – 1/2 ಚಮಚ
    8 ಕರಿಬೇವಿನ ಎಲೆಗಳು – 6
    9. ಟೊಮೆಟೋ – ಸ್ವಲ್ಪ
    10. ಉಪ್ಪು – ರುಚಿಗೆ ತಕ್ಕಷ್ಟು
    11. ಮೊಟ್ಟೆ – 1
    12. ಈರುಳ್ಳಿ- 2
    13. ಕಾನ್ ಫ್ಲೋರ್ ಹಿಟ್ಟು

    ಮಾಡುವ ವಿಧಾನ:
    * ಮೊದಲು 450 ಗ್ರಾಂ ಚಿಕನ್‍ಗೆ ಕಾನ್ ಫ್ಲೋರ್ ಹಿಟ್ಟನ್ನು ಹಾಕಿ ಮಿಕ್ಸ್ ಮಾಡಿಕೊಂಡು ಕಾದ ಎಣ್ಣೆಯಲ್ಲಿ ಚೆನ್ನಾಗಿ ಫ್ರೈ ಮಾಡಿಕೊಳ್ಳಬೇಕು.
    * ಬಳಿಕ ಒಂದು ಪ್ಯಾನ್‍ಗೆ ಎಣ್ಣೆ ಹಾಕಿ ಕಡಿಮೆ ಉರಿಯಲ್ಲಿ ಹಸಿ ಮೆಣಸಿನ ಕಾಯಿ, ಟೊಮೆಟೋ, ಚಿಕ್ಕದಾಗಿ ಕಟ್ ಮಾಡಿಕೊಂಡ ಈರುಳ್ಳಿ, ಕೆಂಪು ಮೆಣಸಿನ ಪುಡಿ, ಅರಿಶಿಣ ಪುಡಿ, ರುಚಿಗೆ ಉಪ್ಪು, ಕರಿಬೇವಿನ ಎಲೆ ಹಾಕಿ ಫ್ರೈ ಮಾಡಿಕೊಳ್ಳಿ.
    * ಬಳಿಕ ಫ್ರೈ ಮಾಡಿಕೊಂಡ ಎಲ್ಲ ಐಟಮ್‍ಗೆ ಈಗಾಗಲೇ ಫ್ರೈ ಮಾಡಿದ್ದ ಚಿಕನ್ ಹಾಕಿ. ನಂತರ ಅದಕ್ಕೆ ಮೊಸರು ಹಾಕಿ 3 ನಿಮಿಷ ಮತ್ತೆ ಫ್ರೈ ಮಾಡಿಕೊಳ್ಳಿ.
    * 3 ನಿಮಿಷ ಫ್ರೈ ಮಾಡಿಕೊಂಡ ಬಳಿಕ ಮೊಟ್ಟೆ ಹಾಕಿ ಮತ್ತೆ 5 ನಿಮಿಷಗಳ ಕಾಲ ಫ್ರೈ ಮಾಡಿದರೆ ಖಡಕ್ ಚಿಕನ್ 65 ಸವಿಯಲು ರೆಡಿ.

  • ರುಚಿಯಾದ ಮಟನ್ ಕರ್ರಿ ಮಾಡುವ ವಿಧಾನ

    ರುಚಿಯಾದ ಮಟನ್ ಕರ್ರಿ ಮಾಡುವ ವಿಧಾನ

    ಭಾನುವಾರ ಬಂದರೆ ಸಾಕು ನಾನ್ ವೆಜ್ ಪ್ರಿಯರಿಗೆ ಸಂಭ್ರಮ. ರಜಾ ದಿನವಾಗಿದ್ದರಿಂದ ಕೆಲವರ ಮನೆಯಲ್ಲಿ ನಾನ್ ವೆಜ್ ಮಾಡಲೇಬೇಕಾಗುತ್ತದೆ. ಪ್ರತಿವಾರದಂತೆ ಚಿಕನ್ ಸಾಂಬಾರ್, ಕಬಾಬ್, ಬಿರಿಯಾನಿ ಮಾಡಿದರೆ ಮನೆಯವರಿಗೂ ಬೇಸರವಾಗುತ್ತದೆ. ಆದ್ದರಿಂದ ನಿಮಗಾಗಿ ರುಚಿರುಚಿಯಾಗಿ ಮಟನ್ ಕರ್ರಿ ಮಾಡುವ ಸುಲಭ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು:
    1. ಮಟನ್ – 1 ಕೆ.ಜಿ.
    2. ಬೆಳ್ಳುಳ್ಳಿ – 1
    3. ಅರಿಶಿಣ – ಚಿಟಿಕೆ
    4. ಲವಂಗ – 7
    5. ಏಲಕ್ಕಿ- 3
    6. ಕೆಂಪು ಮೆಣಸಿನ ಕಾಯಿ – 8
    7. ಈರುಳ್ಳಿ – 4
    8. ಕೊಬ್ಬರಿ ತುರಿ – 2 ಕಪ್
    9. ಗಸಗಸೆ – 2 ಚಮಚ
    10. ಕರಿ ಮೆಣಸಿನ ಕಾಳು – 8
    11. ಖಾರದ ಪುಡಿ -2 ಚಮಚ
    12. ಶುಂಠಿ – ಸ್ವಲ್ಪ
    13. ಉಪ್ಪು ರುಚಿಗೆ ತಕ್ಕಷ್ಟು
    14. ಎಣ್ಣೆ – 4-5 ಚಮಚ

    ಮಾಡುವ ವಿಧಾನ:
    * ಮೊದಲಿಗೆ ಹಸಿ ಮೆಣಸಿನಕಾಯಿ, ಬೆಳ್ಳುಳ್ಳಿ ಮತ್ತು ಶುಂಠಿಯನ್ನು ಒಂದು ಮಿಕ್ಸಿ ಜಾರಿಗೆ ಹಾಕಿಕೊಂಡು ರುಬ್ಬಿಕೊಳ್ಳಿ.
    * ತೊಳೆದ ಸಣ್ಣೆಗೆ ಕತ್ತರಿಸಿದ ಮಟನ್‍ಗೆ ರುಬ್ಬಿದ ಪದಾರ್ಥವನ್ನು ಅದರ ಮೇಲೆ ಸವರಿ ಒಂದೂವರೆ ಗಂಟೆ ಇಡಿ.
    * ಕೊಬ್ಬರಿ ತುರಿಯನ್ನು ಹುರಿದುಕೊಂಡು, ಅದರ ಜೊತೆಗೆ ಕಟ್ ಮಾಡಿದ್ದ ಈರುಳ್ಳಿ(1 ಈರುಳ್ಳಿ), ಗಸಗಸೆ, ಲವಂಗ, ಏಲಕ್ಕಿ, ಕರಿಮೆಣಸು, ಖಾರದ ಪುಡಿ ಹಾಕಿಕೊಂಡು ರುಬ್ಬಿಕೊಳ್ಳಿ.
    * ಈ ಒಂದು ಬೌಲ್‍ಗೆ 4-5 ಚಮಚ ಎಣ್ಣೆ ಹಾಕಿ, ಬಿಸಿಯಾದ ಬಳಿಕ ಅದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಚಿಟಿಕೆ ಅರಿಶಿಣ ಹಾಕಿ ಫ್ರೈ ಮಾಡಿ.
    * ಬಳಿಕ ಅದಕ್ಕೆ ರುಬ್ಬಿದ ಮಸಾಲೆ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಮಟನ್ ಹಾಕಿ ಬೇಕೆನಿಸಿದರೆ ನೀರು ಹಾಕಿ ಬೇಯಿಸಬೇಕು. ಬೆಂದ ನಂತರ ಕೆಳಗೆ ಇಳಿಸಿ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಹಾಕಿದರೆ ರುಚಿರುಚಿಯಾದ ಮಟನ್ ಕರ್ರಿ ಸವಿಯಲು ಸಿದ್ಧ.

  • ದಿಢೀರ್ ಮಸಾಲ ರೈಸ್ ಮಾಡುವ ವಿಧಾನ

    ದಿಢೀರ್ ಮಸಾಲ ರೈಸ್ ಮಾಡುವ ವಿಧಾನ

    ದಿನಬೆಳಗಾದರೆ ಎಲ್ಲರಿಗೂ ಯಾವ ತಿಂಡಿ ಮಾಡುವುದು ಎಂಬುದೇ ದೊಡ್ಡ ಚಿಂತೆಯಾಗಿರುತ್ತದೆ. ಅದರಲ್ಲೂ ಕೆಲಸಕ್ಕೆ ಹೋಗುವ ಮಹಿಳೆಯರಂತೂ ಯಾವ ಅಡುಗೆ ಬೇಗನೆ ಮಾಡಬಹುದು ಎಂದು ಯೋಚಿಸುತ್ತಿರುತ್ತಾರೆ. ಕೆಲವೇ ನಿಮಿಷಗಳಲ್ಲಿ ಸುಲಭವಾಗಿ ಬಹುರುಚಿಕರವಾಗಿ ತಯಾರಿಸಬಲ್ಲ ಬೆಳಗ್ಗಿನ ತಿಂಡಿಗಳು ಬಹಳಷ್ಟಿವೆ. ಅವುಗಳಲ್ಲಿ ಮಸಾಲ ರೈಸ್ ಕೂಡ ಒಂದು. ಕೇವಲ ಹತ್ತು ನಿಮಿಷಗಳಲ್ಲಿ ತಯಾರಿಸಬಹುದಾದ ಹಾಗೂ ವಿಭಿನ್ನ ರುಚಿ ನೀಡುವ ಈ ರೆಸಿಪಿ ಮಕ್ಕಳಿಗೆ ಕೂಡ ಇಷ್ಟವಾಗುತ್ತದೆ.

    ಬೇಕಾಗುವ ಸಾಮಾಗ್ರಿಗಳು:
    1. ಬಾಸುಮತಿ ರೈಸ್/ಮಾಮೂಲಿ ಅನ್ನ- ಎರಡು ಕಪ್
    2. ಹಸಿಮೆಣಸಿನಕಾಯಿ- 2
    3. ಈರುಳ್ಳಿ- ಅರ್ಧ ಕಪ್
    4. ಟೊಮಾಟೊ- ಅರ್ಧ ಕಪ್
    5. ಬೀನ್ಸ್ – ಕಾಲು ಕಪ್
    6. ಹಸಿ ಬಟಾಣಿ- ಕಾಲು ಕಪ್
    7. ಕ್ಯಾರೆಟ್- ಕಾಲು ಕಪ್
    8. ದಪ್ಪಮೆಣಸಿಕಾಯಿ- 1 ಕಪ್
    9. ದನಿಯಾ ಪುಡಿ- 1 ಚಮಚ
    10. ಅರಿಶಿನ – ಕಾಲು ಚಮಚ
    11. ಗರಂ ಮಸಾಲ- 1 ಚಮಚ
    12. ಅಡುಗೆ ಎಣ್ಣೆ – 2 ಚಮಚ
    13. ಶುಂಠಿ,ಬೆಳ್ಳುಳ್ಳಿ ಪೇಸ್ಟ್- 1 ಚಮಚ
    14. ಉಪ್ಪು- ರುಚಿಗೆ ತಕ್ಕಷ್ಟು
    15. ಖಾರದ ಪುಡಿ- 1 ಚಮಚ

    ಮಾಡುವ ವಿಧಾನ:
    * ಮೊದಲು ಒಂದು ಪ್ಯಾನ್‍ಗೆ 2 ಚಮಚ ಎಣ್ಣೆ ಹಾಕಿ ಒಲೆಯ ಮೇಲಿಡಿ.
    * ಎಣ್ಣೆ ಕಾದ ನಂತರ ಕಟ್ ಮಾಡಿದ ಈರುಳ್ಳಿ, ಹಸಿಮೆಣಸಿನಕಾಯಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಚೆನ್ನಾಗಿ ಹಸಿವಾಸನೆ ಹೋಗುವರೆಗೆ ಬಾಡಿಸಿ ಅದಕ್ಕೆ ಹೆಚ್ಚಿದ ಟೊಮಾಟೊವನ್ನು ಸೇರಿಸಿ ಚೆನ್ನಾಗಿ ಹುರಿಯಿರಿ.
    * ಟೊಮಾಟೊ ಬೆಂದ ನಂತರ ಅದಕ್ಕೆ ಹೆಚ್ಚಿದ ಕ್ಯಾರೆಟ್, ಬೀನಿಸ್, ದಪ್ಪಮೆಣಸಿನಕಾಯಿ ಹಾಗೂ ಬಟಾಣಿಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.
    * ಮಧ್ಯಮ ಉರಿಯಲ್ಲಿ ಪ್ಯಾನ್ ಮೇಲೆ ಒಂದು ಮುಚ್ಚುಳ ಮುಚ್ಚಿ 5 ನಿಮಿಷ ಬೇಯಿಸಿ.
    * ತರಕಾರಿ ಬೆಂದ ನಂತರ ಖಾರದ ಪುಡಿ, ದನಿಯಾ ಪುಡಿ, ಅರಿಶಿಣ, ಗರಂ ಮಸಾಲ ಹಾಕಿ ಮಿಕ್ಸ್ ಮಾಡಿ ಕಡಿಮೆ ಉರಿಯಲ್ಲಿ ಬೇಯಿಸಿರಿ.
    * ನಂತರ ಅದಕ್ಕೆ ಬಾಸುಮತಿ ಅಕ್ಕಿಯಲ್ಲಿ ತಯಾರಿಸಿದ ಅನ್ನವನ್ನು ಹಾಕಿ (ಮಾಮೂಲಿ ಅನ್ನವನ್ನೂ ಬಳಸಬಹುದು) ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ನಿಧಾನವಾಗಿ ಮಿಕ್ಸ್ ಮಾಡಿ.
    * 2 ನಿಮಿಷಗಳ ಕಾಲ ಮುಚ್ಚುಳ ಮುಚ್ಚಿ ಬೇಯಿಸಿ. ಈಗ ಮಸಾಲ ರೈಸ್ ರೆಡಿಯಾಗಿದ್ದು, ಬಿಸಿ ಬಿಸಿ ಮಸಾಲ ರೈಸ್ ಸರ್ವ್ ಮಾಡಿ.

    [wonderplugin_video iframe=”https://www.youtube.com/watch?v=7Z2BzrhFEKQ” lightbox=0 lightboxsize=1 lightboxwidth=960 lightboxheight=540 autoopen=0 autoopendelay=0 autoclose=0 lightboxtitle=”” lightboxgroup=”” lightboxshownavigation=0 showimage=”” lightboxoptions=”” videowidth=600 videoheight=400 keepaspectratio=1 autoplay=1 loop=1 videocss=”position:relative;display:block;background-color:#000;overflow:hidden;max-width:100%;margin:0 auto;” playbutton=”https://publictv.in/wp-content/plugins/wonderplugin-video-embed/engine/playvideo-64-64-0.png”]

  • ತಿಂಗಳಾದರೂ ಗರಿಗರಿಯಾಗಿರುವ ರವೆ ಚಕ್ಕುಲಿ ಮಾಡುವ ವಿಧಾನ

    ತಿಂಗಳಾದರೂ ಗರಿಗರಿಯಾಗಿರುವ ರವೆ ಚಕ್ಕುಲಿ ಮಾಡುವ ವಿಧಾನ

    ಚಕ್ಕುಲಿ ಎಂದರೆ ಯಾರಿಗೆ ತಾನೇ ಇಷ್ಟವಾಗೋಲ್ಲ ಹೇಳಿ? ಸಂಜೆಯಾಯ್ತು ಎಂದರೆ ಒಂದು ಕಪ್ ಬಿಸಿ ಬಿಸಿ ಕಾಫಿ ಅಥವಾ ಟೀ ಜೊತೆಗೆ ಏನಾದರು ಕುರುಕಲು ಇದ್ದರೆ ಅದರ ಮಜಾನೇ ಬೇರೆ. ಅದರಲ್ಲೂ ಚಕ್ಕುಲಿ ಇದ್ದರಂತೂ ಇನ್ನಷ್ಟು ಸೊಗಸು. ಆದರೆ ಎಣ್ಣೆಯಲ್ಲಿ ಕರೆದಂತಹ ಚಕ್ಕಲಿಯನ್ನು ಹೆಚ್ಚೆಂದರೆ ಒಂದು ವಾರ ಇಟ್ಟುಕೊಂಡು ತಿನ್ನಬಹುದಷ್ಟೆ, ಒಂದು ವಾರ ಕಳೆದ ಮೇಲೆ ಅದು ವಾಸನೇ ಬಂದೋ ಅಥವಾ ಮೆತ್ತಗೆ ಆಗಿನೋ ಹಾಳಾಗಿಬಿಡುತ್ತದೆ. ಹೀಗಾಗಿ ತಿಂಗಳಾದರೂ ಕೆಡದೆ ಮೆತ್ತಗಾಗದೆ ಗರಿಗರಿಯಾಗಿಯೇ ಇರುವ ರವೆ ಚಕ್ಕುಲಿ ಮಾಡುವ ಸುಲಭ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಚಿರೋಟಿ ರವೆ- 1 ಕಪ್
    2. ಹುರಿಗಡ್ಲೆ ಪುಡಿ – 1 ಕಪ್
    3. ಅಕ್ಕಿಹಿಟ್ಟು – 3 ಕಪ್
    4. ಬಿಳಿ ಎಳ್ಳು – 1 ಚಮಚ
    5. ಜೀರಿಗೆ – 1 ಚಮಚ
    6. ಕರಿಮೆಣಸಿನ ಪುಡಿ/ಖಾರದ ಪುಡಿ – ಅರ್ಧ ಚಮಚ
    7. ಬೆಣ್ಣೆ – 2 ಚಮಚ
    8. ಉಪ್ಪು- ರುಚಿಗೆ ತಕ್ಕಷ್ಟು
    9. ಎಣ್ಣೆ- ಕರಿಯಲು

    ಮಾಡುವ ವಿಧಾನ:
    * ಒಂದು ಪ್ಯಾನ್‍ನಲ್ಲಿ ಎರಡೂವರೆ ಕಪ್‍ನಷ್ಟು ನೀರು ಹಾಕಿ ಒಲೆಯ ಮೇಲಿಟ್ಟು ಕಾಯಲು ಬಿಡಿ.
    * ನೀರು ಕುದಿಯುವಾಗ ಅದಕ್ಕೆ ಒಂದು ಕಪ್ ಚಿರೋಟಿ ರವೆ ಸೇರಿಸಿ ಚೆನ್ನಾಗಿ ತಿರುಗಿಸಿ. ನಂತರ ಅದನ್ನು ಮುಚ್ಚಿ 2-3 ನಿಮಿಷಗಳವರೆಗೆ ಬೇಯಲು ಬಿಡಿ. ಅದು ಬೆಂದ ನಂತರ ಕೈಯಾಡಿಸಿ ಪಕ್ಕಕ್ಕಿಡಿ.
    * ಒಂದು ದೊಡ್ಡ ಮಿಕ್ಸಿಂಗ್ ಬೌಲ್‍ನಲ್ಲಿ ಒಂದು ಕಪ್ ಹುರಿಗಡ್ಲೆ ಹಿಟ್ಟಿಗೆ ಮೂರು ಕಪ್ ಅಕ್ಕಿಹಿಟ್ಟು ಹಾಕಿ, ರುಚಿಗೆ ತಕ್ಕಷ್ಟು ಉಪ್ಪು, ಎಳ್ಳು, ಜೀರಿಗೆ, ಖಾರದಪುಡಿ/ ಮೆಣಸಿನ ಪುಡಿ ಹಾಗೂ ಬೆಣ್ಣೆ (ಬೆಣ್ಣೆ ಇಲ್ಲವಾದರೆ ಕಾಯಿಸಿದ  ತುಪ್ಪವನ್ನು ಸೇರಿಸಿ) ಹಿಟ್ಟನ್ನು ಚೆನ್ನಾಗಿ ಮಿಕ್ಸ್ ಮಾಡಿ.
    * ಮಿಕ್ಸ್ ಮಾಡಿದ ಹಿಟ್ಟಿಗೆ ಬೇಯಿಸಿ ಇಟ್ಟಿದ್ದ ರವ ಮುದ್ದೆಯನ್ನು ಸೇರಿಸಿ ಸ್ವಲ್ಪ ಸ್ವಲ್ಪವೇ ನೀರು ಸೇರಿಸುತ್ತಾ ಚಕ್ಕುಲಿ ಹಿಟ್ಟಿನ ಹದಕ್ಕೆ ಕಲಸಿಡಿ.(ತುಂಬಾ ಗಟ್ಟಿಯೂ ಬೇಡ, ತೆಳ್ಳಗೂ ಬೇಡ ಹದವಾಗಿರಬೇಕು)
    * ಹೀಗೆ ಕಲಸಿದ ಹಿಟ್ಟನ್ನು ಸ್ವಲ್ಪ ಎಣ್ಣೆಯೊಂದಿಗೆ ನಾದಿಕೊಳ್ಳಿ.


    * ನಾದಿದ ಹಿಟ್ಟನ್ನು ಚಕ್ಕುಲಿ ಹೊರಳಿಗೆ ಎಣ್ಣೆ ಸವರಿ ಹಿಟ್ಟನ್ನು ತುಂಬಿ ಚಕ್ಕುಲಿಯನ್ನು ಒತ್ತಿ ಇಡಿ.
    * ಒಂದು ಬಾಣಲೆಯಲ್ಲಿ ಕರಿಯಲು ಬೇಕಾದಷ್ಟು ಎಣ್ಣೆಯನ್ನು ಕಾಯಲು ಇಡಿ. (ಎಣ್ಣೆಯನ್ನು ಹೊಗೆ ಬರುವಷ್ಟು ಕಾಯಿಸಬಾರದು).
    * ಮಧ್ಯಮ ಉರಿಯಲ್ಲಿಟ್ಟು ಬಾಣಲೆಯಲ್ಲಿ ಬೇಯುವಷ್ಟು ಚಕ್ಕುಲಿಗಳನ್ನು ಹಾಕಿ, ಎಣ್ಣೆಯಲ್ಲಿ ಬಂದ ಗುಳ್ಳೆಗಳು ಹೋದ ನಂತರ ಚಕ್ಕುಲಿಗಳನ್ನು ಮಗುಚಿ ಬೇಯಿಸಿ.
    * ಚಕ್ಕಲಿಯ ಎರಡೂ ಕಡೆ ಹೊಂಬಣ್ಣ ಬರುವವರೆಗೆ ಬೇಯಿಸಿ. ತಣ್ಣಗಾದ ಚಕ್ಕುಲಿಗಳನ್ನು ಏರ್ ಕಂಟೈನರ್ ಬಾಕ್ಸ್ ನಲ್ಲಿ ಹಾಕಿ ಮುಚ್ಚಿಡಿ.

    ವಿಶೇಷ ಸೂಷನೆ: * 2 ಚಮಚಕ್ಕಿಂತ ಹೆಚ್ಚಿನ ಬೆಣ್ಣೆ ಹಾಕಬೇಡಿ
    * ಚಿರೋಟಿ ರವೆಯನ್ನು ಮಾತ್ರ ಬಳಸಿ
    * ತಣ್ಣಗಾಗುವವರೆಗೆ ಚಕ್ಕಲಿಯನ್ನು ಡಬ್ಬಿಯಲ್ಲಿ ಹಾಕಬೇಡಿ

  • ರಂಜಾನ್ ಸ್ಪೆಷಲ್: ಮಟನ್ ಬಿರಿಯಾನಿ ಮಾಡುವ ವಿಧಾನ

    ರಂಜಾನ್ ಸ್ಪೆಷಲ್: ಮಟನ್ ಬಿರಿಯಾನಿ ಮಾಡುವ ವಿಧಾನ

    ಇನ್ನೇನು ಒಂದೆರೆಡು ದಿನಗಳಲ್ಲಿ ರಂಜಾನ್ ಹಬ್ಬ ಬಂದೇ ಬಿಡ್ತು. ಸಾಮಾನ್ಯವಾಗಿ ಮುಸ್ಲಿಂ ಬಾಂಧವರ ಮನೆಯಲ್ಲಿ ಬಿರಿಯಾನಿ ಮಾಡೋದು ಫಿಕ್ಸ್. ಕೆಲವರು ಹಬ್ಬಕ್ಕಾಗಿ ಸ್ಪೆಷಲ್ ಬಿರಿಯಾನಿಯ ಮೊರೆ ಹೋಗುತ್ತಾರೆ. ಸ್ಪೆಷಲ್ ಅಂತ ಹೆಚ್ಚು ಮಸಾಲೆ ಪದಾರ್ಥಗಳನ್ನು ಬಳಸದೇ ಸಿಂಪಲ್ ಆಗಿ ಕಡಿಮೆ ವಸ್ತುಗಳನ್ನು ಬಳಸಿ ರುಚಿಯಾದ ಮಟನ್ ಬಿರಿಯಾನಿ ಮಾಡುವ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಮಟನ್ – 500 ಗ್ರಾಂ
    2. ಒಂದು ದೊಡ್ಡ ಈರುಳ್ಳಿ ಪೇಸ್ಟ್
    3. ಶುಂಠಿ -ಬೆಳ್ಳುಳ್ಳಿ – ಪೇಸ್ಟ್ 2 ಚಮಚ
    4. ಹಸಿಮೆಣಸಿನಕಾಯಿ – (ಖಾರಕ್ಕೆ ತಕ್ಕಷ್ಟು) ರುಬ್ಬಿದ ಪೇಸ್ಟ್
    5. ಕೊತ್ತಂಬರಿ  ಪೇಸ್ಟ್ – 3 ಚಮಚ
    6. ದನಿಯಾ ಪುಡಿ – 2-3 ಚಮಚ
    7. ಚಕ್ಕೆ, ಲವಂಗ, ಪಲಾವ್ ಎಲೆ, ಮರಾಠಿ ಮೊಗ್ಗು, ಅನಾನಸ್ ಹೂ, ಕಸೂರಿ ಮೇಥಿ – ಸ್ವಲ್ಪ
    8. ಒಂದು ಕಾಯಿ ರುಬ್ಬಿ ತೆಗೆದ ಹಾಲು
    9. ಗರಂ ಮಸಾಲ – 1 ಚಮಚ
    10. ಅಕ್ಕಿ – 1.5 ಪಾವು
    11. ಗಟ್ಟಿ ಮೊಸರು – 1/4 ಲೀಟರ್
    12. ಅರಿಶಿಣ -ಸ್ವಲ್ಪ
    13. ಎಣ್ಣೆ – 5 ಚಮಚ
    14. ಉಪ್ಪು – ರುಚಿಗೆ ತಕ್ಕಷ್ಟು
    15. ನಿಂಬೆಹಣ್ಣು – 1

    ಮಾಡುವ ವಿಧಾನ
    * ಒಂದು ಪ್ಯಾನ್‍ಗೆ ಎಣ್ಣೆ ಹಾಕಿ ಈರುಳ್ಳಿ ಪೇಸ್ಟ್ ಹಾಕಿ ಹಸಿ ವಾಸನೆ ಹೋಗುವರೆಗೂ ಫ್ರೈ ಮಾಡಿ.
    * ಬಳಿಕ ಶುಂಠಿ ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಹಸಿ ವಾಸನೆ ಹೋಗುವವರೆಗೂ ಫ್ರೈ ಮಾಡಿ.
    * ಬಳಿಕ ಹಸಿಮೆಣಸಿನಕಾಯಿ ಪೇಸ್ಟ್, ಕೊತ್ತಂಬರಿ ಪೇಸ್ಟ್ ಸೇರಿಸಿ ಫ್ರೈ ಮಾಡಿ.
    * ಈಗ ಚಕ್ಕೆ, ಲವಂಗ, ಪಲಾವ್ ಎಲೆ, ಮರಾಠಿ ಮೊಗ್ಗು, ಅನಾನಸ್ ಹೂ, ಕಸೂರಿ ಮೇಥಿ ಎಲ್ಲವನ್ನು ಹಾಕಿ ಫ್ರೈ ಮಾಡಿ 2 ನಿಮಿಷ ತಟ್ಟೆ ಮುಚ್ಚಿ.
    * ಈಗ ಅದಕ್ಕೆ ತೊಳೆದ ಮಟನ್ ಸೇರಿಸಿ, ಅರಿಶಿಣ, ಸ್ವಲ್ಪ ಉಪ್ಪು ಸೇರಿಸಿ ಫ್ರೈ ಮಾಡಿ. 10-15 ನಿಮಿಷ ತಟ್ಟೆ ಮುಚ್ಚಿ ಬೇಯಿಸಿ.
    * ನಂತರ ತೊಳೆದು ನೆನೆಸಿದ ಅಕ್ಕಿ, ಕಾಯಿ ಹಾಲು ಸೇರಿಸಿ ಒಂದು ಕುದಿ ಕುದಿಸಿ.
    * ಈಗ ಗಟ್ಟಿ ಮೊಸರು, ದನಿಯಾ ಪುಡಿ, ಗರಂ ಮಸಾಲ, ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಲಿಡ್ ಮುಚ್ಚಿ ಬೇಯಿಸಿ. (ಮಟನ್ ಬೇಯಿಸಲು ಉಪ್ಪು ಹಾಕಲಾಗಿದೆ. ನೋಡಿಕೊಂಡು ಉಪ್ಪು ಹಾಕಿ)
    * ಕುಕ್ಕರ್ ನಲ್ಲಿ ಮಾಡುತ್ತಿದ್ದರೆ 2-3 ಕೂಗು ಕೂಗಿಸಿ. ಪ್ಯಾನ್‍ನಲ್ಲಿ ಮಾಡುತ್ತಿದ್ದರೆ ಲಿಡ್ ತೆಗೆದು ಕೈಯಾಡಿಸುತ್ತಿರಿ.
    * ಬಳಿಕ ನಿಂಬೆಹಣ್ಣಿನ ರಸ ಹಿಂಡಿ ಒಂದು ಸಲ ತಿರುಗಿಸಿ. ಕೊತ್ತಂಬರಿ ಸೊಪ್ಪನ್ನು ಮೇಲೆ ಗಾರ್ನಿಶ್ ಮಾಡಿ ಸರ್ವ್ ಮಾಡಿ.

  • ಮ್ಯಾಂಗೋ ಕುಲ್ಫೀ ಮಾಡುವ ವಿಧಾನ

    ಮ್ಯಾಂಗೋ ಕುಲ್ಫೀ ಮಾಡುವ ವಿಧಾನ

    ಐಸ್ ಕ್ರೀಂ, ಕುಲ್ಫೀ ಅಂದರೆ ಎಲ್ಲರಿಗೂ ಅಚ್ಚು-ಮೆಚ್ಚು. ಆದ್ದರಿಂದ ಸುಲಭವಾಗಿ ಮನೆಯಲ್ಲಿಯೇ ಕಡಿಮೆ ಸಾಮಾಗ್ರಿಗಳಲ್ಲಿ ಮ್ಯಾಂಗೋ ಕುಲ್ಫೀ ಮಾಡುವ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಗ್ರಿಗಳು
    1. ಮಾವಿನಹಣ್ಣು 2-3
    2. ಫ್ರೆಶ್ ಕ್ರೀಮ್ – 200 ML
    3. ಕನ್ ಡೆನಸ್ಡ್ ಮಿಲ್ಕ್ – 3,4 ಚಮಚ
    4. ಮಿಲ್ಕ್ ಪೌಡರ್ – 5 ಚಮಚ
    5. ಕುಲ್ಫೀ ಮೌಲ್ಡ್

    ಮಾಡುವ ವಿಧಾನ
    * ಮೊದಲಿಗೆ ಮಾವಿನಹಣ್ಣಿನ ಸಿಪ್ಪೆ ತೆಗೆದು ನೀರು ಹಾಕದೆ ರುಬ್ಬಿಕೊಳ್ಳಿ.
    * ಬಳಿಕ ಒಂದು ಮಿಕ್ಸಿಂಗ್ ಬೌಲ್ ಗೆ ಹಾಕಿಕೊಂಡು ಸ್ಟೀರ್ ಮಾಡುತ್ತಿರಿ.
    * ಈಗ ಅದಕ್ಕೆ ಫ್ರೆಶ್ ಕ್ರೀಮ್, ಕನ್ ಡೆನಸ್ಡ್ ಮಿಲ್ಕ್ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
    * ನಂತರ ಅದಕ್ಕೆ ಹಾಲಿನ ಪೌಡರ್ ಸೇರಿಸಿ ಚೆನ್ನಾಗಿ ಕಲಸಿ
    * ಬಳಿಕ ಕುಲ್ಫೀ ಮೌಲ್ಡ್ ಗೆ ಮಿಶ್ರಣವನ್ನು ಸೇರಿಸಿ ಮಧ್ಯದಲ್ಲಿ ಐಸ್ ಕಡ್ಡಿ ಇಟ್ಟು 3-4 ಗಂಟೆ ಅಥವಾ ಕುಲ್ಫೀ ಗಟ್ಟಿ ಆಗುವವರೆಗೂ ಫ್ರೀಜ್ ಮಾಡಿ.
    * ಫ್ರೀಜರ್ ನಿಂದ ಕುಲ್ಫೀ ತೆಗೆದ ಮೇಲೆ ಒಂದು ನೀರಿನ ಬೌಲ್‍ನಲ್ಲಿ ಮೌಲ್ಡ್ ಅನ್ನು 30 ಸೆಕೆಂಡ್ ಇಟ್ಟು ತೆಗೆಯಿರಿ. ಹೀಗೆ ಮಾಡುವುದರಿಂದ ಕುಲ್ಫೀ ಸುಲಭವಾಗಿ ಹೊರ ಬರುತ್ತದೆ.
    * ಹಾಲಿನ ಪೌಡರ್ ಹಾಕುವುದರಿಂದ ಮಿಶ್ರಣದಲ್ಲಿರುವ ನೀರಿನಾಂಶವನ್ನು ಹೀರಿಕೊಳ್ಳುತ್ತದೆ. ಹೀಗಾಗಿ ನೋಡಿಕೊಂಡು ಮಿಶ್ರಣ ಮಾಡಿ.

  • ಹಳ್ಳಿ ಶೈಲಿಯ ನಾಟಿ ಕೋಳಿ ಸಾಂಬಾರ್ ಮಾಡುವ ವಿಧಾನ

    ಹಳ್ಳಿ ಶೈಲಿಯ ನಾಟಿ ಕೋಳಿ ಸಾಂಬಾರ್ ಮಾಡುವ ವಿಧಾನ

    ಭಾನುವಾರ ಬಂತೆಂದರೆ ಸ್ಪೆಷಲ್ ಅಡುಗೆ ಮಾಡುಬೇಕು. ಅದರಲ್ಲೂ ಸಂಡೆ ಎಂದರೆ ಬಹುತೇಕರ ಮನೆಯಲ್ಲೂ ನಾನ್ ವೆಜ್ ಅಡುಗೆ ಮಾಡುತ್ತಾರೆ. ಪ್ರತಿಬಾರಿ ಕಬಾಬ್, ಬಿರಿಯಾನಿ ಮಾಡುತ್ತೀರ. ಹೀಗಾಗಿ ಒಂದು ಬಾರಿ ಹಳ್ಳಿ ಶೈಲಿಯ ನಾಟಿ ಕೋಳಿ ಸಾಂಬಾರ್ ಟ್ರೈ ಮಾಡಿ. ಟೇಸ್ಟ್ ಮಾಡಿ, ನಿಮಗಾಗಿ ನಾಟಿ ಕೋಳಿ ಸಾಂಬಾರ್ ಮಾಡುವ ವಿಧಾನ.

    ಬೇಕಾಗುವ ಸಾಮಾಗ್ರಿಗಳು:
    1. ನಾಟಿ ಕೋಳಿ – 1.5 ಕೆ.ಜಿ.
    2. ಖಾರದ ಪುಡಿ -1.5 ಚಮಚ
    3. ದನಿಯಾ ಪುಡಿ – 1.5 ಚಮಚ
    4. ಈರುಳ್ಳಿ – 3
    5. ಕೊತ್ತಂಬರಿ ಸೊಪ್ಪು – ಸ್ವಲ್ಪ
    6. ಬೆಳ್ಳುಳ್ಳಿ – 10
    7. ಶುಂಠಿ – ಸ್ವಲ್ಪ
    8. ಚಕ್ಕೆ – 3 ಪೀಸ್
    9. ಲವಂಗ – ಎರಡರಿಂದ ಮೂರು
    10. ಮೆಣಸು- 2 ಚಮಚ
    11. ತೆಂಗಿನ ಕಾಯಿ ತುರಿ -2 ಕಪ್
    12. ಗಸಗಸೆ -1 ಚಮಚ
    13. ಹುರಿಗಡ್ಲೆ – 2 ಚಮಚ
    14. ಎಣ್ಣೆ -3 ಚಮಚ
    15. ಉಪ್ಪು -ರುಚಿಗೆ ತಕ್ಕಷ್ಟು

    ಮಾಡುವ ವಿಧಾನ
    *  ಮೊದಲಿಗೆ ಚೆನ್ನಾಗಿ ಚಿಕನ್ ತೊಳೆದುಕೊಂಡು ಚಿಟಿಕೆ ಅರಿಶಿಣ, ಉಪ್ಪು ಹಾಕಿ ಮಿಕ್ಸ್ ಮಾಡಿಟ್ಟುಕೊಳ್ಳಿ.
    *  ಈಗ ಒಂದು ಬಾಣಲಿಗೆ 1 ಚಮಚ ಎಣ್ಣೆ ಹಾಕಿ, ನಂತರ ಮುಕ್ಕಾಲು ಭಾಗ ಈರುಳ್ಳಿ, ಚಕ್ಕೆ, ಲವಂಗ, ಶುಂಠಿ, ಬೆಳ್ಳುಳ್ಳಿ, ಹಾಕಿ ಫ್ರೈ ಮಾಡಿಕೊಳ್ಳಿ.
    *  ಅದು ತಣ್ಣಗೆ ಆದ ಮೇಲೆ ಅದನ್ನು ಮಿಕ್ಸಿ ಜಾರಿಗೆ ಹಾಕಿ, ಅದಕ್ಕೆ ಸ್ವಲ್ಪ ಕೊತ್ತಂಬರಿ, ಅರ್ಧ ಗ್ಲಾಸ್ ನೀರು ಹಾಕಿ ರುಬ್ಬಿಕೊಳ್ಳಿ.
    *  ಈಗ ಕುಕ್ಕರ್ಗೆ  2 ಚಮಚ ಎಣ್ಣೆ ಹಾಕಿ ಬಿಸಿಯಾದ ಮೇಲೆ ಉಳಿಸಿಕೊಂಡಿದ್ದ ಈರುಳ್ಳಿ ಹಾಕಿ ಚೆನ್ನಾಗಿ ಫ್ರೈ ಮಾಡಿ.
    *  ತೊಳೆದು ಇಟ್ಟಿದ್ದ ಚಿಕನ್, 1 ಚಮಚ ಅರಿಶಿಣ, 1.5 ಚಮಚ ಉಪ್ಪು ಹಾಕಿ ಚೆನ್ನಾಗಿ ಫ್ರೈ ಮಾಡಿ (ನೀರು ಪಂಗೋವರೆಗೂ ಫ್ರೈ ಮಾಡಿ)
    *  ಈಗ ರುಬ್ಬಿದ ಮುಕ್ಕಾಲು ಭಾಗ ಮಸಾಲೆ ಹಾಕಿ 5 ನಿಮಿಷ ಬೇಯಲು ಬಿಡಿ.
    *  ಇತ್ತ ಅದೇ ಮಸಲಾಗೆ ಖಾರದ ಪುಡಿ ಮತ್ತು ದನಿಯಾ ಪುಡಿ ಎರಡೆರಡು ಚಮಚ ಹಾಕಿ, ಅದಕ್ಕೆ ಅರ್ಧ ಗ್ಲಾಸ್ ನೀರು ಹಾಕಿ ರುಬ್ಬಿಕೊಳ್ಳಿ.
    *  5 ನಿಮಿಷ ಬೆಂದ ಚಿಕನ್‍ಗೆ 2 ಗ್ಲಾಸ್ ನೀರು ಹಾಕಿ ಎರಡು ವಿಶಲ್ ಕೂಗಿಸಿಕೊಳ್ಳಿ.


    * ರುಬ್ಬಿದ ಖಾರ ಮಸಾಲೆಯನ್ನು ಒಂದು ಬೌಲ್ ಹಾಕಿ ಒಂದು ಗ್ಲಾಸ್ ನೀರು ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಈಗ ಅದನ್ನು ಚಿಕನ್‍ಗೆ ಮಿಕ್ಸ್ ಮಾಡಿ 10 ನಿಮಿಷ ಕುದಿಯಲು ಬಿಡಿ.
    *  ಮಿಕ್ಸಿ ಜಾರಿಗೆ ಕಾಯಿ, ಕಡ್ಲೆ, ಗಸಗಸೆ, ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಅದನ್ನು ಕುದಿಯುತ್ತಿರುವ ಚಿಕನ್‍ಗೆ ಹಾಕಿ ಮಿಕ್ಸ್ ಮಾಡಿ.
    *  ಗಟ್ಟೆಯಾದರೆ ಸ್ವಲ್ಪ ನೀರು ಹಾಕಿ, ರುಚಿಗೆ ತಕ್ಕಷ್ಟು ಉಪ್ಪು, ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಕ್ಯಾಪ್ ಮುಚ್ಚಿ. ಒಂದು ವಿಶಲ್ ಕೂಗಿಸಿ.
    *  ಈಗ ನಾಟಿ ಕೋಳಿ ಸಾಂಬಾರ್ ರೆಡಿಯಾಗಿದ್ದು, ಇದನ್ನು ಮುದ್ದೆ, ಅನ್ನ, ಚಪಾತಿ, ರೊಟ್ಟಿ ಜೊತೆ ಸವಿಯಿರಿ.

  • ಮ್ಯಾಂಗೋ ಐಸ್ ಕ್ರೀಂ ಮಾಡುವ ವಿಧಾನ

    ಮ್ಯಾಂಗೋ ಐಸ್ ಕ್ರೀಂ ಮಾಡುವ ವಿಧಾನ

    ಐಸ್ ಕ್ರಿಂ ಅಂದರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ. ಅದರಲ್ಲೂ ಸೀಸನ್ ನಲ್ಲಿ ಬರುವ ಮ್ಯಾಂಗೋ ಐಸ್ ಕ್ರೀಂ ಅಂತೂ ಎಲ್ಲರಿಗೂ ಅಚ್ಚುಮೆಚ್ಚು. ಹೀಗಾಗಿ ಮ್ಯಾಂಗೋ ಐಸ್ ಕ್ರೀಂ ಮಾಡುವ ಸರಳ ಹಾಗೂ ಸುಲಭ ವಿಧಾನ ಇಲ್ಲಿದೆ.

    ಬೇಕಾಗುವ ಸಾಮಾಗ್ರಿಗಳು
    1. ಮಾವಿನ ಹಣ್ಣು -2-3
    2. ಸಕ್ಕರೆ – ಚಮಚ ( ನಿಮ್ಮ ರುಚಿಗೆ ತಕ್ಕಷ್ಟು)
    3. ಫ್ರೆಶ್ ಕ್ರೀಮ್ – 100 ಗ್ರಾಂ

    ಮಾಡುವ ವಿಧಾನ
    * ಒಂದು ಮಿಕ್ಸರ್ ಜಾರ್ ಗೆ ಸಿಪ್ಪೆ ತೆಗೆದ ಮಾವಿನಹಣ್ಣಿನ ಪಲ್ಫ್ ಹಾಗೂ ಸಕ್ಕರೆ ಸೇರಿಸಿ ರುಬ್ಬಿಕೊಳ್ಳಿ.
    * ಈಗ ಒಂದು ಮಿಕ್ಸಿಂಗ್ ಬೌಲ್ ಗೆ ಫ್ರಿಜ್ಡ್ ನಲ್ಲಿಟ್ಟಿದ್ದ ಫ್ರೆಶ್ ಕ್ರೀಮ್ ಅನ್ನು ಹಾಕಿ ಚೆನ್ನಾಗಿ ಬ್ಲೆಂಡ್ ಮಾಡಿ.
    * ಬ್ಲೆಂಡ್ ಮಾಡಿದ ಫ್ರೆಶ್ ಕ್ರೀಮ್ ಗೆ ರುಬ್ಬಿದ ಮಿಶ್ರಣವನ್ನು ಸೇರಿಸಿ ಚೆನ್ನಾಗಿ ಬ್ಲೆಂಡ್ ಮಾಡಿ.
    * ಈಗ ಒಂದು ಫ್ರೀಜರ್ ಬೌಲ್ ಗೆ ಮಿಶ್ರಣವನ್ನು ಹಾಕಿ 6-7 ಗಂಟೆ ಕಾಲ ಫ್ರೀಜ್ ಮಾಡಿ.
    * ಬಳಿಕ ಸರ್ವ್ ಮಾಡಿ. ಎಂಜಾಯ್ ಮಾಡಿ
    * ಜೊತೆಗೆ ಐಸ್ ಕ್ರೀಂ ಗೆ ಟುಟಿ, ಫ್ರೂಟಿ, ಸಣ್ಣಗೆ ಕಟ್ ಮಾಡಿದ ಡ್ರೈ ಫ್ರೂಟ್ಸ್, ಕ್ಯಾರಮಲ್ ಪೀಸಸ್ ಸೇರಿಸಬಹುದು.