ಸಸ್ಯಾಹಾರಿಗಳಿಗೆ ಮೆಚ್ಚಿನ ಖಾದ್ಯಗಳಲ್ಲಿ ಚನಾ ಮಸಾಲ ಕೂಡ ಒಂದಾಗಿದೆ. ಚನಾ ಮಸಾಲವನ್ನು ಚಪಾತಿ, ರೋಟಿ, ಪರೋಟ ಹಾಗೂ ದೋಸೆ ಜೊತೆಗೆ ಸವಿಯಬಹುದು. ಬಾಯಲ್ಲಿ ನೀರೂರಿಸುವಂತಹ ಸಖತ್ ಟೇಸ್ಟಿಯಾದ ಚನಾ ಮಸಾಲ ರೆಸಿಪಿಯನ್ನು ತಯಾರಿಸುವುದು ಹೇಗೆ ಎಂಬುದನ್ನು ನಾವು ನಿಮಗೆ ತಿಳಿಸುತ್ತೇವೆ. ಹಾಗಿದ್ರೆ ನೀವೂ ಕೂಡ ನಿಮ್ಮ ಮನೆಯಲ್ಲಿ ಇದನ್ನು ಮಾಡಿ ನೋಡಿ.
ಬೇಕಾಗುವ ಸಾಮಗ್ರಿಗಳು:
ನೆನೆಸಿಟ್ಟ ಕಾಬುಲ್ ಕಡ್ಲೆ – ಎರಡೂವರೆ ಕಪ್
ಹೆಚ್ಚಿದ ಟೊಮೆಟೊ – ಮೂರು ಕಪ್
ಹಸಿ ಮೆಣಸಿನಕಾಯಿ – ನಾಲ್ಕು
ಈರುಳ್ಳಿ – ಎರಡು
ಬೆಳ್ಳುಳ್ಳಿ ಪೇಸ್ಟ್ – ಎರಡು ಚಮಚ
ಶುಂಠಿ ಪೇಸ್ಟ್ – ಅರ್ಧ ಚಮಚ
ಕೊತ್ತಂಬರಿ ಸೊಪ್ಪು – ಎರಡು ಚಮಚ
ಅರಿಶಿನ – ಒಂದು ಚಮಚ
ಜೀರಿಗೆ ಪುಡಿ – ಎರಡು ಚಮಚ
ಗರಂ ಮಸಾಲ – ಒಂದು ಚಮಚ
ಖಾರದ ಪುಡಿ – ಒಂದು ಚಮಚ
ಉಪ್ಪು – ರುಚಿಗೆ ತಕ್ಕಷ್ಟು
ಎಣ್ಣೆ – ಅಗತ್ಯಕ್ಕೆ ತಕ್ಕಂತೆ
ಮಾಡುವ ವಿಧಾನ:
*ಮೊದಲಿಗೆ ಒಲೆಯ ಮೇಲೆ ಪಾತ್ರೆ ಇಟ್ಟು ಎಣ್ಣೆ ಹಾಕಿ. ಎಣ್ಣೆ ಬಿಸಿಯಾದ ಮೇಲೆ ಹೆಚ್ಚಿದ ಈರುಳ್ಳಿ ಹಾಕಿ ಫ್ರೈ ಮಾಡಿಕೊಳ್ಳಿ. ಬಳಿಕ ಇದಕ್ಕೆ ಶುಂಠಿ ಹಾಗೂ ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿವಾಸನೆ ಹೋಗುವವರೆಗೆ ಹುರಿಯಿರಿ.
*ಇವು ಚೆನ್ನಾಗಿ ಬೆಂದ ಬಳಿಕ ಹೆಚ್ಚಿದ ಟೊಮೆಟೊ, ಕೊತ್ತಂಬರಿ ಸೊಪ್ಪು, ಅರಿಶಿನ, ಜೀರಿಗೆ ಪುಡಿ ಹಾಗೂ ಮೆಣಸಿನ ಪುಡಿಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಚೆನ್ನಾಗಿ ಬೇಯಿಸಿ.
*ಬಳಿಕ ನೆನೆಸಿದ ಕಾಬೂಲ್ ಚನಾ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಎರಡೂವರೆ ಕಪ್ ನೀರು ಸೇರಿಸಿ. ಈಗ ಇದಕ್ಕೆ ಉಪ್ಪು ಸೇರಿಸಿ ಸ್ವಲ್ಪ ಕೊತ್ತಂಬರಿ ಸೊಪ್ಪು ಹಾಕಿ ಮುಚ್ಚಿಟ್ಟು ಕಾಲು ಗಂಟೆ ಬೇಯಲು ಬಿಡಿ.
*ಕಾಲು ಗಂಟೆಯ ಬಳಿಕ ಗರಂ ಮಸಾಲ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಿ. ಮತ್ತೆ ಮುಚ್ಚಿ ಮೂರು ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಬೇಯಿಸಿ.
*ಬಳಿಕ ಮುಚ್ಚಳ ತೆಗದು ಸರಿಯಾಗಿ ಮಿಕ್ಸ್ ಮಾಡಿ. ಕಾಬುಲ್ ಚನಾ ಚೆನ್ನಾಗಿ ಬೆಂದಿದ್ದರೆ ಚನಾ ಮಸಾಲ ಸವಿಯಲು ಸಿದ್ಧ.