ಅಂಟಾರ್ಕ್ಟಿಕಾದ ಮೇಲಿನ ಉಪಗ್ರಹ ಮಾಪನಗಳು ಓಝೋನ್ ಪದರದಲ್ಲಿ ದೈತ್ಯ ರಂಧ್ರವನ್ನು ಪತ್ತೆಹಚ್ಚಿದೆ. ವಿಜ್ಞಾನಿಗಳು ಓಝೋನ್ ಸವಕಳಿ ಪ್ರದೇಶ ಎಂದು ಕರೆಯುವ ರಂಧ್ರವು 2.60 ಕೋಟಿ ಚದರ ಕಿ.ಮೀ ಗಾತ್ರದಲ್ಲಿದ್ದು, ಸರಿಸುಮಾರು ಬ್ರೆಜಿಲ್ ದೇಶದ ಮೂರು ಪಟ್ಟು ದೊಡ್ಡದಾಗಿದೆ.
ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆ ಕೋಪರ್ನಿಕಸ್ ಸೆಂಟಿನೆಲ್-5ಪಿ ಉಪಗ್ರಹವು ಪರಿಸರ ಮೇಲ್ವಿಚಾರಣಾ ಕಾರ್ಯದ ಭಾಗವಾಗಿ ಇತ್ತೀಚೆಗೆ ಇದನ್ನು ಪತ್ತೆಹಚ್ಚಿತು. ಈ ರಂಧ್ರ ಇಲ್ಲಿಯವರೆಗೆ ಪತ್ತೆಹಚ್ಚಲಾದ ಅತಿ ದೊದ್ದ ಓಝೋನ್ ರಂಧ್ರಗಳಲ್ಲಿ ಒಂದಾಗಿದೆ ಎಂದು ಹೇಳಿತು. ಈ ವರ್ಷದ ಓಝೋನ್ ರಂಧ್ರ ಸಾಮಾನ್ಯಕ್ಕಿಂತ ಬೇಗನೆ ಪ್ರಾರಂಭವಾಗಿದ್ದು, ಈ ಕಾರಣಕ್ಕೆ ಅದು ಅತ್ಯಂತ ದೊಡ್ಡದಾಗಿ ಮಾರ್ಪಟ್ಟಿದೆ ಎಂಬುದು ತಿಳಿದುಬಂದಿದೆ. ಸದ್ಯ ಈ ಓಝೋನ್ ರಂಧ್ರ ಅಂಟಾರ್ಕ್ಟಿಕಾದ ಮೇಲ್ಮೈಯಲ್ಲಿ ತಾಪಮಾನವನ್ನು ಹೆಚ್ಚಿಸುವ ಸಾಧ್ಯತೆಯಿಲ್ಲ ಎಂದು ತಜ್ಞರು ತಿಳಿಸಿದ್ದಾರೆ.
ಏನಿದು ಓಝೋನ್ ಪದರ?
ಓಝೋನ್ ಪದರವು ವಾಯುಮಂಡಲದಲ್ಲಿನ ಒಂದು ರೀತಿಯ ಅನಿಲವಾಗಿದ್ದು, ಭೂಮಿಯ ವಾತಾವರಣದ 4 ಪದರಗಳಲ್ಲಿ ಒಂದಾಗಿದೆ. ಇದು ನೇರಳಾತೀತ ವಿಕಿರಣವನ್ನು ಹೀರಿಕೊಳ್ಳುವ ರಕ್ಷಣಾತ್ಮಕ ಅನಿಲ ಕವಚವಾಗಿ ಕಾರ್ಯನಿರ್ವಹಿಸುತ್ತದೆ. ಸೂರ್ಯನ ಅಪಾಯಕಾರಿ ಪ್ರಮಾಣದ ಯುವಿ ಕಿರಣಗಳಿಣದ ಮಾನವರು ಮತ್ತು ಪರಿಸರ ವ್ಯವಸ್ಥೆಗಳನ್ನು ರಕ್ಷಿಸುವ ಕೆಲಸವನ್ನು ಇದು ಮಾಡುತ್ತದೆ. ಯುವಿ ಕಿರಣಗಳು ಚರ್ಮದ ಕ್ಯಾನ್ಸರ್‌ಗಳನ್ನು ಉಂಟುಮಾಡುತ್ತದೆ. ಆದ್ದರಿಂದ ಯುವಿ ಕಿರಣಗಳಿಂದ ನಮ್ಮನ್ನು ರಕ್ಷಿಸಲು ಹಾಗೂ ಕ್ಯಾನ್ಸರ್ ದರವನ್ನು ಕಡಿಮೆ ಮಾಡಲು ಈ ಓಝೋನ್ ಪದರ ಸಹಾಯ ಮಾಡುತ್ತದೆ.
ಓಝೋನ್ ರಂಧ್ರ ಎಂದರೇನು?
ಓಝೋನ್ ರಂಧ್ರಗಳು ಪ್ರತಿ ವರ್ಷ ಬೆಳೆಯುತ್ತವೆ ಮತ್ತು ಕುಗ್ಗುತ್ತವೆ. ಅಂಟಾರ್ಕ್ಟಿಕಾದ ಮೇಲಿನ ಓಝೋನ್ ರಂಧ್ರದ ಗಾತ್ರ ಪ್ರತಿ ವರ್ಷವೂ ಏರಿಳಿತಗೊಳ್ಳುತ್ತದೆ. ಈ ರಂಧ್ರ ಪ್ರತಿ ವರ್ಷ ಆಗಸ್ಟ್‌ನಲ್ಲಿ ತೆರೆಯುತ್ತದೆ ಮತ್ತು ನವೆಂಬರ್ ಅಥವಾ ಡಿಸೆಂಬರ್‌ನಲ್ಲಿ ಮತ್ತೆ ಮುಚ್ಚುತ್ತದೆ. ಅಂಟಾರ್ಕ್ಟಿಕಾದ ಮುಚ್ಚಿದ ಭೂಪ್ರದೇಶದ ಮೇಲೆ ಭೂಮಿಯ ತಿರುಗುವಿಕೆಯಿಂದಾಗಿ ಒಂದು ರೀತಿಯ ವಿಶೇಷ ಗಾಳಿ ಉಂಟಾಗುತ್ತದೆ. ಇದರಿಂದಾಗಿ ಓಝೋನ್ ರಂಧ್ರ ತೆರೆದುಕೊಳ್ಳುತ್ತದೆ. ಈ ಗಾಳಿ ಕಡಿಮೆಯಾದಂತೆ ರಂಧ್ರ ಮುಚ್ಚಲಾರಂಭಿಸುತ್ತದೆ.
ಈ ವರ್ಷ ದೈತ್ಯ ಓಝೋನ್ ರಂಧ್ರಕ್ಕೆ ಕಾರಣವೇನು?
ವಿಜ್ಞಾನಿಗಳು ಈ ವರ್ಷದ ದೊಡ್ಡ ಓಝೋನ್ ರಂಧ್ರವು ಡಿಸೆಂಬರ್ 2022 ಮತ್ತು ಜನವರಿ 2023ರ ಅವಧಿಯಲ್ಲಿ ಹಂಗಾ ಟೊಂಗೈನ್ ಟೊಂಗಾದಲ್ಲಿ ಉಂಟಾದ ಭಾರೀ ಜ್ವಾಲಾಮುಖಿ ಸ್ಫೋಟಗಳಿಂದ ಉಂಟಾಗಿರಬಹುದು ಎಂದು ತಿಳಿಸಿದ್ದಾರೆ. ಸಾಮಾನ್ಯ ಪರಿಸ್ಥಿತಿಗಳಲ್ಲಿ, ಜ್ವಾಲಾಮುಖಿ ಸ್ಫೋಟದಿಂದ ಬಿಡುಗಡೆಯಾಗುವ ಅನಿಲ ವಾಯುಮಂಡಲದ ಮಟ್ಟಕ್ಕಿಂತ ಕೆಳಗಿರುತ್ತದೆ. ಆದರೆ ಈ ಸ್ಫೋಟ ಹೆಚ್ಚಿನ ನೀರಿನ ಆವಿಯನ್ನು ವಾಯುಮಂಡಲಕ್ಕೆ ಕಳುಹಿಸಿದೆ. ಈ ಕಾರಣಕ್ಕೆ ಬೃಹತ್ ರಂಧ್ರ ತೆರೆದುಕೊಂಡಿದೆ ಎಂದು ನಂಬಲಾಗಿದೆ. ಇದನ್ನೂ ಓದಿ: 2021ರ ಹೊಸ ಐಟಿ ನಿಯಮವೇನು? ಭಾರತದಲ್ಲಿ 74 ಲಕ್ಷ ವಾಟ್ಸಪ್ ಖಾತೆಗಳ ನಿಷೇಧವೇಕೆ?
ರಾಸಾಯನಿಕ ಕ್ರಿಯೆಗಳ ಮೂಲಕ ನೀರು ಓಝೋನ್ ಪದರದ ಮೇಲೆ ಪ್ರಭಾವ ಬೀರುತ್ತದೆ. ಮತ್ತು ಅದರ ತಾಪನ ದರವನ್ನು ಬದಲಾಯಿಸುತ್ತದೆ. ನೀರಿನ ಆವಿಯು ಬ್ರೋಮಿನ್ ಮತ್ತು ಅಯೋಡಿನ್‌ನಂತಹ ಓಝೋನ್ ಅನ್ನು ಸವಕಳಿ ಮಾಡುವ ಅಂಶಗಳನ್ನು ಒಳಗೊಂಡಿದೆ. ಆದರೆ ಈ ಬಾರಿ ಉಂಟಾಗಿರುವ ಬೃಹತ್ ರಂಧ್ರಕ್ಕೆ ಮಾನವರೇ ಕಾರಣ ಎಂಬುದಕ್ಕೆ ಹೆಚ್ಚಿನ ಪುರಾವೆಗಳಿಲ್ಲ.
ಮಾನವರಿಂದ ಉಂಟಾಗಿತ್ತು ಬೃಹತ್ ಓಝೋನ್ ರಂಧ್ರ:
1970 ರ ವೇಳೆ ವಿಜ್ಞಾನಿಗಳು ಮಾನವನ ಚಟುವಟಿಕೆಗಳಿಂದ ಭಾರೀ ಓಝೋನ್ ರಂಧ್ರ ಸೃಷ್ಟಿಯಾಗುತ್ತಿರುವುದನ್ನು ಪತ್ತೆಹಚ್ಚಿದರು. ನೆಲ ಮತ್ತು ಉಪಗ್ರಹ ಆಧಾರಿತ ಮಾಪನಗಳು ಕ್ಲೋರೊಫ್ಲೋರೋಕಾರ್ಬನ್ ಎಂಬ ರಾಸಾಯನಿಕಗಳ ವ್ಯಾಪಕ ಬಳಕೆಯಿಂದ ಉಂಟಾದ ಈ ರಂಧ್ರಗಳನ್ನು ಪತ್ತೆಹಚ್ಚಿದವು. ಈ ರಾಸಾಯನಿಕವನ್ನು ಮಾನವರು ಹೇರ್ ಸ್ಪ್ರೇ, ಶೇವಿಂಗ್ ಜೆಲ್ ಹಾಗೂ ಫ್ರಿಜ್‌ಗಳಲ್ಲಿ ವ್ಯಾಪಕವಾಗಿ ಬಳಸುತ್ತಿದ್ದರು. ಇದರ ಅನಿಲದ ಪ್ರೊಪೆಲ್ಲಂಟ್‌ಗಳು ಕ್ಲೋರಿನ್ ಅನ್ನು ಹೊಂದಿರುತ್ತವೆ. ಇದು ವಾಯುಮಂಡಲದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಬಿಡುಗಡೆಯಾಗುತ್ತದೆ ಮತ್ತು ಓಝೋನ್ ಅನ್ನು ಖಾಲಿ ಮಾಡುತ್ತದೆ ಎಂಬುದು ತಿಳಿದುಬಂತು.
ಈ ವಿಚಾರವನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ ತಕ್ಷಣ ಜಗತ್ತು ತ್ವರಿತವಾಗಿ ಕ್ರಮವನ್ನು ತೆಗೆದುಕೊಂಡಿತು. 1987 ರಲ್ಲಿ ಈ ಹಾನಿಕಾರಕ ಪದಾರ್ಥಗಳ ಉತ್ಪಾದನೆಯನ್ನು ಹಂತಹಂತವಾಗಿ ಕಡಿಮೆ ಮಾಡುವ ಮೂಲಕ ಓಝೋನ್ ಪದರವನ್ನು ರಕ್ಷಿಸಲು ಮಾಂಟ್ರಿಯಲ್ ಪ್ರೋಟೋಕಾಲ್ ಅನ್ನು ರಚಿಸಲಾಯಿತು. ಈ ಪ್ರೋಟೋಕಾಲ್ ಪರಿಣಾಮಕಾರಿಯಾಯಿತು. ಓಝೋನ್ ರಂಧ್ರ ಸೃಷ್ಟಿಗೆ ಕಾರಣವಾಗುತ್ತಿದ್ದ ಅನಿಲ ಹೊರಸೂಸುವಿಕೆಯ ನಿಯಂತ್ರಣದ ನಂತರ ದಶಕಗಳಲ್ಲಿ ಓಝೋನ್ ರಂಧ್ರಗಳು ಚಿಕ್ಕದಾಗಿದೆ.
ಓಝೋನ್ ರಂಧ್ರಕ್ಕೆ ಹವಾಮಾನ ಬದಲಾವಣೆಯೂ ಕಾರಣವೆ?
ಓಝೋನ್ ಸವಕಳಿಗೆ ಜಾಗತಿಕ ಹವಾಮಾನ ಬದಲಾವಣೆ ಪ್ರಮುಖ ಕಾರಣವಲ್ಲ ಎಂದು ವಿಜ್ಞಾನಿಗಳು ಒಪ್ಪುತ್ತಾರೆ. ಆದರೂ ಇತ್ತೀಚೆಗೆ ಹೆಚ್ಚುತ್ತಿರುವ ಜಾಗತಿಕ ತಾಪಮಾನ ಓಝೋನ್ ರಂಧ್ರಗಳ ಮೇಲೆ ಪರಿಣಾಮ ಬೀರುವ ಲಕ್ಷಣಗಳೂ ಕಂಡುಬಂದಿದೆ ಎನ್ನಲಾಗಿದೆ. ಓಝೋನ್ ರಂಧ್ರದ ತಗ್ಗಿಸುವಿಕೆಯನ್ನು 1980 ರ ದಶಕದಿಂದಲೂ ಉತ್ತಮವಾಗಿ ಕಾರ್ಯನಿರ್ವಹಿಸಲಾಗುತ್ತಿದೆ. ಆದರೆ 2020 ಓಝೋನ್ ರಂಧ್ರ ತುಂಬಾ ದೊಡ್ಡದಾಗಿ ಹಾಗೂ ದೀರ್ಘಕಾಲ ಉಳಿಯುವುದು ಗಮನಕ್ಕೆ ಬಂದ ಬಳಿಕ ಸ್ವಲ್ಪ ಆತಂಕಕ್ಕೆ ಕಾರಣವಾಗಿದೆ.
2020 ರಲ್ಲಿ ದೊಡ್ಡ ಓಝೋನ್ ರಂಧ್ರಕ್ಕೆ ಮುಖ್ಯ ಕಾರಣವೆಂದರೆ ಆಗ್ನೇಯ ಆಸ್ಟ್ರೇಲಿಯಾದಲ್ಲಿ ಆ ವರ್ಷ ಸಂಭವಿಸಿದ ಕಾಳ್ಗಿಚ್ಚು ಎಂದು 2021ರಲ್ಲಿ ನಡೆಸಿದ ಸಂಶೋಧನೆಯೊಂದು ತೋರಿಸಿದೆ. ಹವಾಮಾನ ಬಿಕ್ಕಟ್ಟು ಮುಂದುವರಿದಂತೆ, ಭೂಮಿ ಬೆಚ್ಚಗಾಗುವುದು ಮುಂದುವರಿಸುವುದರೊಂದಿಗೆ ಬೆಂಕಿಯ ದುರಂತಗಳೂ ಪ್ರಪಂಚದಾದ್ಯಂತ ಸಾಮಾನ್ಯವಾಗುತ್ತಿದೆ. ನಾವು ಹೆಚ್ಚು ಹೊಗೆಯನ್ನು ವಾಯುಮಂಡಲಕ್ಕೆ ಬಿಟ್ಟಷ್ಟೂ ಓಝೋನ್ ಸವಕಳಿ ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ತಜ್ಞರು ತಿಳಿಸಿದ್ದಾರೆ.
