– ಬಾರ್ ಮಾಲೀಕರ ಭರ್ಜರಿ ಆಫರ್
ಬೆಂಗಳೂರು: ಉಪಚುನಾವಣೆಯ ಕಾವು ಹೆಚ್ಚಾದಂತೆ, ಮತದಾರರ ಬೇಟೆಗೆ ಅಖಾಡ ಸಜ್ಜಾಗಿದೆ. ಎಲೆಕ್ಷನ್ ಟೈಂನಲ್ಲಿ ಈಗ ಎಣ್ಣೆ ಕಿಕ್ಕು ಸಖತ್ ಸೌಂಡ್ ಮಾಡುತ್ತಿದೆ. ಬೈ ಎಲೆಕ್ಷನ್ ಅಖಾಡದಲ್ಲಿ ನೀತಿ ನಿಯಮಗಳನ್ನು ಗಾಳಿಗೆ ತೂರಿ ಎಣ್ಣೆ ಭರಾಟೆ ಹೇಗೆ ನಡೆಯುತ್ತಿದೆ ಎಂಬುದು ಪಬ್ಲಿಕ್ ಟಿವಿ ರಹಸ್ಯ ಕಾರ್ಯಾಚರಣೆಯಲ್ಲಿ ಸೆರೆಯಾಗಿದೆ.
ಬೈ ಎಲೆಕ್ಷನ್ ಅಖಾಡದ ಕಿಕ್ ದಿನದಿಂದ ದಿನಕ್ಕೆ ಏರುತ್ತಿದೆ. ಇದರ ಮಧ್ಯೆ ಮತದಾರರನ್ನು ಬುಟ್ಟಿಗೆ ಹಾಕಿಕೊಳ್ಳುವುದಕ್ಕೆ, ಸಖತ್ ಎಣ್ಣೆ ವ್ಯೂಹ ಹೆಣೆಯಲಾಗುತ್ತಿದೆ. ಬಾರ್ ಗಳ ಎಣ್ಣೆ ಮೇಲೆ ಅಬಕಾರಿ ಹೆಚ್ಚು ಕಣ್ಣು ಇಟ್ಟಿರುವುದರಿಂದ ಈಗ ಎಲೆಕ್ಷನ್ ಎಣ್ಣೆ ಸೇಲ್‍ಗೆ ಹೊಸ ದಾರಿ ಹುಡುಕಿಕೊಂಡಿರುವುದು ಪಬ್ಲಿಕ್ ಟಿವಿಯ ಕ್ಯಾಮೆರಾ ಕಣ್ಣಿಗೆ ಬಿದ್ದಿದೆ.
ಸ್ಥಳ : ಮಾಗಡಿ ರೋಡ್
ಬಾರ್ & ರೆಸ್ಟೋರೆಂಟ್
ಮಾಗಡಿ ರೋಡ್ ಪಕ್ಕದಲ್ಲಿಯೇ ಇರುವ ಬಾರ್ ಆ್ಯಂಡ್ ರೆಸ್ಟೋರೆಂಟ್ ಇದು. ಚುನಾವಣಾ ಸಂದರ್ಭದಲ್ಲಿ ಅಬಕಾರಿ ನಿಯಮಗಳನ್ನು ಬಾರ್ ಗಳು ಪಾಲಿಸಬೇಕು. ದಿನಕ್ಕೆ ಎಷ್ಟು ಕೇಸ್ ಮಾರಾಟ ಆಗುತ್ತೆ ಎಂಬ ಮಾಹಿತಿಯನ್ನು ನೀಡಬೇಕು. ಆದರೆ ಇದ್ಯಾವುದನ್ನೂ ಪಾಲಿಸದ ಬಾರ್ ಮಾಲೀಕರು, ಚುನಾವಣೆಗೆ ಎಣ್ಣೆ ಸಪ್ಲೈ ಮಾಡುತ್ತೀರಾ ಎಂದು ಕೇಳಿದ್ದೇ ತಡ, ನಾವು ಅಬಕಾರಿಗೆ ಮಾರಾಟದ ಲೆಕ್ಕ ಕೊಡದೇ ನಿಮಗೆ ಮಾರುತ್ತೇವೆ ಡೋಂಟ್ ವರಿ, ಎಷ್ಟು ಕೇಸ್ ಬೇಕಾದರೂ ಕೊಡುತ್ತೇವೆ. ನಾವು ಕೊಡುವ ಬಾಟಲ್ ಮೇಲೆ ಇರುವ ಸೀಲ್ ಕಿತ್ತಾಕಿ, ನಿಮ್ಮ ಮನೆಗಳಲ್ಲಿ ಇಷ್ಟಿಷ್ಟು ಕೇಸ್ ಎಂದು ಇಟ್ಟುಕೊಳ್ಳಿ ಮತದಾರರಿಗೆ ಹಂಚಿ ಎಂದು ಸಲಹೆ ನೀಡುತ್ತಾರೆ.
ಪ್ರತಿನಿಧಿ : 10 ಕೇಸ್ ಎಣ್ಣೆ ಬೇಕಿತ್ತಲ್ಲ
ಮಾಲೀಕ : ಯಾವುದು
ಪ್ರತಿನಿಧಿ : ಟೋಬ್ಯಾಕ್
ಮಾಲೀಕ : ಯಾವುದು ಕೋಲ್ಡಾ
ಪ್ರತಿನಿಧಿ : ಹು ಎಲೆಕ್ಷನ್ ಇತ್ತಲ್ಲ ಹಾಗಾಗಿ
ಮಾಲೀಕ : ಗೊತ್ತಾಯ್ತು ಹಂಚುವುದಕ್ಕೆ
ಪ್ರತಿನಿಧಿ : ಹು ಸರ್ ಬೇಕಿತ್ತು
ಮಾಲೀಕ : ಎರಡು ದಿನ ರಜೆ ಇದೇ ಇವತ್ತೇ ತಗೊಂಡು ಹೋಗಿ ಇಟ್ಟುಕೊಂಡು ಬಿಡಿ
ಪ್ರತಿನಿಧಿ : ಭಾನುವಾರ ಬೇಕಿರೋದು
ಮಾಲೀಕ : ಸಂಜೆ ಬನ್ನಿ ನಂಬರ್ ಕೊಟ್ಟೋಗಿ
ಪ್ರತಿನಿಧಿ : ನಂಬರ್ ಕೊಡ್ತೀವಿ. ಹೇಗೆ ಎಲೆಕ್ಷನ್ ಟೈಂನಲ್ಲಿ ಸಿಗುತ್ತಾ
ಮಾಲೀಕ : ಸಿಗುತ್ತೆ ಆದರೆ ಪ್ಯಾಕೇಟ್ ಮೇಲಿರುವ ಲೇಬಲ್ ಕಿತ್ತಾಕಿ
ಪ್ರತಿನಿಧಿ : ಹೌದಾ
ಮಾಲೀಕ : ಲೇಬಲ್ ಕಿತ್ತಾಕಿ ಹಂಚಿ ಇಂತಹ ಬಾರು ಎಂದು ಗೊತ್ತಾಗಲ್ಲ
ಪ್ರತಿನಿಧಿ : ಹೌದಾ ಹಾಗೇ ಮಾಡಬಹುದಾ
ಮಾಲೀಕ : ಹಾಗೇ ಮಾಡಿ. ಜಾಸ್ತಿ ಕೇಸ್ ನಿಮ್ಮ ಕ್ಲೋಸ್ ಆಗಿ ಇರೋರು ಮನೇಲಿ ಹಂಚಿ
ಪ್ರತಿನಿಧಿ : ಹಂಚಬಹುದು
ಮಾಲೀಕ : ನಿಮ್ಮ ನಂಬರ್ ಕೊಟ್ಟು ಹೋಗಿ ಸಂಜೆ ಬನ್ನಿ
ಪ್ರತಿನಿಧಿ : ನಿಮ್ಮ ನಂಬರ್ ಹೇಳಿ ಕಾಲ್ ಮಾಡ್ತೀನಿ
ಸ್ಥಳ : ಮಹಾಲಕ್ಷ್ಮಿ ಲೇಔಟ್ ರೋಡ್
ಎಂಆರ್‌ಪಿ ಶಾಪ್
ಮಹಾಲಕ್ಷ್ಮಿ ಲೇಔಟ್ ರೋಡ್‍ನಲ್ಲಿ ಇರುವ ಎಂಆರ್‌ಪಿ ಶಾಪ್‍ನಲ್ಲಿ ಕೇವಲ ಪಾರ್ಸಲ್ ನೀಡುವುದು ಎಂದು ಪಬ್ಲಿಕ್ ಟಿವಿ ತಂಡ ಹೋದರೆ ಅಲ್ಲಿ ಕುಡಿಯೋದಕ್ಕೆ ಅವಕಾಶ ಕೂಡ ಮಾಡಿಕೊಡಲಾಗುತ್ತಿದೆ. ಜೊತೆಗೆ ನಾಲ್ಕು ಕೇಸ್ ಬಿಯರ್ ಬೇಕು ಚುನಾವಣಾ ನೀತಿ ಸಂಹಿತೆ ಇದೆ ಏನು ಮಾಡುವುದು ಎಂದು ಕೇಳಿದರೆ. ಹೌದು ನೀತಿ ಸಂಹಿತೆ ಇದೆ ಅಷ್ಟೊಂದು ಕೊಡುವುದಕ್ಕೆ ಆಗಲ್ಲ. ರಾತ್ರಿ 10 ಗಂಟೆ ಮೇಲಾದರೆ ನೋಡೋಣ. ಇದು ಎಂಆರ್‌ಪಿ ಆದರೂ ಇಲ್ಲಿಯೇ ಕುಡಿಯಬಹುದು ಎಂದು ಹೇಳುತ್ತಾರೆ.
ಬಾರ್ ಗಳಲ್ಲಿ ಮಾತ್ರವಲ್ಲ ಈ ಎಲೆಕ್ಷನ್ ಎಣ್ಣೆ ವ್ಯಾಪಾರ, ಡಾಬಾಗಳಲ್ಲಿ ಊಟದ ಜೊತೆ ಈಗ ಎಲೆಕ್ಷನ್ ಸ್ಪೆಷಲ್ ಎಣ್ಣೆ ಪ್ಯಾಕೇಜ್ ಭರ್ಜರಿಯಾಗಿ ನೀಡಲಾಗುತ್ತಿದೆ. ಆಯಾಯ ಕ್ಷೇತ್ರದ ಮತದಾರರನ್ನು ಸೆಳೆಯುವುದಕ್ಕೆ ಈ ಗಿಫ್ಟ್ ನೀಡಲಾಗುತ್ತಿದೆ. ಯಶವಂತಪುರ ವಿಧಾನಸಭಾ ಕ್ಷೇತ್ರದ ವ್ಯಾಪ್ತಿಯ ಮಾಗಡಿ ರೋಡ್ ಉದ್ದಕ್ಕೂ ಇರುವ ಫ್ಯಾಮಿಲಿ ರೆಸ್ಟೋರೆಂಟ್ ಮತ್ತು ಡಾಬಾಗಳಲ್ಲಿ ಅಕ್ರಮವಾಗಿ ಮದ್ಯ ಮಾರಾಟ ಮಾಡಲಾಗುತ್ತಿದೆ. ಎಲೆಕ್ಷನ್ ಬೆನ್ನಲ್ಲೆ ಎಣ್ಣೆ ಕಿಕ್‍ಗೆ ಹಾಡುಹಗಲೇ ಕುಡುಕರಿಂದ ಡಾಬಗಳಂತೂ ಹೌಸ್‍ಫುಲ್ ಆಗಿದೆ. ನೀತಿ ಸಂಹಿತೆ ಜಾರಿಯಲ್ಲಿದರೂ ಈ ಪರಿ ಅಕ್ರಮವಾಗಿ ಮದ್ಯ ಮಾರಾಟವಾಗುತ್ತಿದೆ ಅಂದರೆ ಬಹುತೇಕ ಇದಕ್ಕೆ ಸ್ಪಾನ್ಸರ್ಸ್ ಕೂಡ ಸ್ಥಳೀಯ ನಾಯಕರು ಎನ್ನುವ ಅನುಮಾನ ಶುರುವಾಗಿದೆ.
ಪ್ರತಿನಿಧಿ : ಏನಿದೆ
ಮಾಲೀಕ : ಚಿಕನ್ ಫ್ರೈ, ಚಿಕನ್ ಕೂರ್ಮಾ, ಮಟನ್ ರೈಸ್
ಪ್ರತಿನಿಧಿ : ಎಷ್ಟು ಸಿಂಗಲ್ ಪರೋಟ
ಮಾಲೀಕ : ಸಿಂಗಲ್ ಪರೋಟ ಸಾಕ
ಪ್ರತಿನಿಧಿ : ಸಾಕು ಮತ್ತೆ ಏನು ಸಿಗುತ್ತೆ
ಮಾಲೀಕ : ಏನು ಬೇಕು ಹೇಳಿ
ಪ್ರತಿನಿಧಿ : ಎಣ್ಣೆ ಸಿಗುತ್ತಾ
ಮಾಲೀಕ : ಹು ಸಿಗುತ್ತೆ
ಪ್ರತಿನಿಧಿ : ಫೋನ್ ಪೇ ಆಗುತ್ತಾ
ಮಾಲೀಕ : ಒಳಗಡೆ ಕ್ಯಾಶ್ ಕೊಡಬೇಕು
ಪ್ರತಿನಿಧಿ : ಹೌದಾ ಪರೋಟ ತಗೋಬೇಕಾ
ಮಾಲೀಕ : ಪರೋಟಗೆ ಏನಾದ್ರು ಬೇಕಾ
ಪ್ರತಿನಿಧಿ : ಎಣ್ಣೆ ಬೇಕಿತ್ತು
ಸ್ಥಳ : ಕಂಠೀರವ ಸ್ಟೇಡಿಯಂ ರೋಡ್
ಎಂಆರ್‌ಪಿ ಶಾಪ್
ಕೆಲವು ಬಾರ್ ಗಳಲ್ಲಿ ಕೇಸ್ ಗಟ್ಟಲೆ ಎಣ್ಣೆ ಬೇಕು ಎಂದರೆ, ಇಲ್ಲ ಸರ್ ಕೊಡುವುದಕ್ಕೆ ಆಗಲ್ಲ ಎಲೆಕ್ಷನ್ ಇದೆ ಕೊಡಲ್ಲ ಎಂದು ಹೇಳುತ್ತಾರೆ. ಬೇರೆ ಶಾಪ್ ಎಂಆರ್‌ಪಿನಲ್ಲಿ ಕೇಳಿ ಕೊಡುತ್ತಾರೆ. ನಾವು ಕೊಡಲ್ಲ ಎಂದು ನಿಯಮಗಳನ್ನು ಪಾಲಿಸುತ್ತಿದ್ದಾರೆ.
ಪ್ರತಿನಿಧಿ : ಎಣ್ಣೆ ಬೇಕಿತ್ತಲ್ಲ ಸರ್ ನಾಲ್ಕು ಕೇಸ್
ಸಿಬ್ಬಂದಿ : ಈವಾಗ ಸಿಗಲ್ಲ ಸರ್
ಪ್ರತಿನಿಧಿ : ಯಾಕ್ ಸರ್
ಸಿಬ್ಬಂದಿ : ಎಲೆಕ್ಷನ್ ಇದೆಯಲ್ಲ
ಪ್ರತಿನಿಧಿ : ಇದ್ದರೇನು ಕೊಡಿ ಸರ್ ಮದುವೆ ಇದೆ
ಸಿಬ್ಬಂದಿ : ಕೊಡಲ್ಲ ಸರ್ ಪ್ರಾಬ್ಲಂ ಆಗಿದೆ
ಪ್ರತಿನಿಧಿ : ಮತ್ತೇ ಹೇಗೆ
ಸಿಬ್ಬಂದಿ : ಬೇರೆ ಕಡೆ ಸಿಗುತ್ತೆ ನೋಡಿ
ಪ್ರತಿನಿಧಿ : ಎಲ್ಲಿ ಸರ್
ಸಿಬ್ಬಂದಿ : ಮುಂದೆ ಹೋಗಿ ಸಿಗುತ್ತೆ
