ಕನ್ನಡ ಕಿರುತೆರೆ ಲೋಕದ ಹೆಸರಾಂತ ನಿರ್ದೇಶಕ ಮತ್ತು ಎಲ್ಲಿದ್ದೇ ಇಲ್ಲೀತನಕ ಸಿನಿಮಾ ನಿರ್ದೇಶನ ಮಾಡಿರುವ ತೇಜಸ್ವಿ ಕೆ ನಾಗ್ ಇದೀಗ ಶಿವರಾಜ್ ಕುಮಾರ್ ಅವರಿಗಾಗಿ ಹೊಸ ಸಿನಿಮಾವನ್ನು ಮಾಡುತ್ತಿದ್ದು, ವೇದ ಸಿನಿಮಾ ರಿಲೀಸ್ ವೇಳೆಗೆ ಚಿತ್ರದ ಪೋಸ್ಟರ್ ಒಂದನ್ನು ಬಿಡುಗಡೆ ಮಾಡಿದ್ದಾರೆ. ಈ ಪೋಸ್ಟರ್ ನಲ್ಲಿ ಶಿವರಾಜ್ ಕುಮಾರ್ ಮಾಸ್ ಲುಕ್ ನಲ್ಲಿ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದ್ದಾರೆ. ಇದೊಂದು ಹೊಸ ರೀತಿಯ ಸಿನಿಮಾವಾಗಿದ್ದು, ಶಿವಣ್ಣನ ಲುಕ್ ಕೂಡ ಹೊಸದಾಗಿಯೇ ಇರಲಿದೆಯಂತೆ.
ಕಿರುತೆರೆ ಲೋಕದಲ್ಲಿ ತೇಜಸ್ವಿ ಸಾಕಷ್ಟು ಕೆಲಸ ಮಾಡಿದ್ದಾರೆ. ಮಜಾಟಾಕೀಸ್ ಶೋನ ನಿರ್ದೇಶಕರು ಕೂಡ ಇವರಾಗಿದ್ದರು. ಸೃಜನ್ ಲೋಕೇಶ್ ಅವರ ಚಿತ್ರದ ಮೂಲಕ ಸಿನಿಮಾ ರಂಗಕ್ಕೂ ಪ್ರವೇಶ ಮಾಡಿದವರು. ಇವರ ನಿರ್ದೇಶನದ ಚೊಚ್ಚಲು ಸಿನಿಮಾ ಎಲ್ಲಿದ್ದೇ ಇಲ್ಲೀತನಕ ಪ್ರೇಕ್ಷಕರನ್ನು ರಂಜಿಸಿತ್ತು. ಒಳ್ಳೆಯ ವಿಮರ್ಶೆ ಕೂಡ ವ್ಯಕ್ತವಾಗಿತ್ತು. ಈ ಯಶಸ್ಸಿನ ನಂತರ ನೇರವಾಗಿ ಅವರು ಸೆಂಚ್ಯುರಿ ಸ್ಟಾರ್ ಗೆ ನಿರ್ದೇಶನ ಮಾಡಲು ಹೊರಟಿದ್ದಾರೆ. ಈ ಸಿನಿಮಾಗಾಗಿ ಅವರು ವಿಭಿನ್ನ ರೀತಿಯ ಕಥೆಯನ್ನು ಬರೆದುಕೊಂಡಿದ್ದಾರಂತೆ. ಇದನ್ನೂ ಓದಿ : ಬೆಂಗಳೂರು ವಿಶ್ವವಿದ್ಯಾಲಯ ಬಿಕಾಂ ಪಠ್ಯದಲ್ಲಿ ಪುನೀತ್ ರಾಜಕುಮಾರ್
ತಾರಾಗಣ, ತಂತ್ರಜ್ಞರು ಬಗ್ಗೆ ಯಾವುದೇ ಮಾಹಿತಿಯನ್ನು ಅವರು ಇನ್ನೂ ಹಂಚಿಕೊಂಡಿಲ್ಲವಾದರೂ, ಈ ಸಿನಿಮಾವನ್ನು ನಿರ್ಮಾಣ ಮಾಡುತ್ತಿರುವುದು ಮಂಜುಳಾ ಶಿವಾರ್ಜುನ್. ಸದ್ಯದಲ್ಲೇ ಅವರು ಈ ಸಿನಿಮಾದ ಒಂದಷ್ಟು ಮಾಹಿತಿಗಳನ್ನು ಹಂಚಿಕೊಳ್ಳಲಿದ್ದಾರಂತೆ. ವೇದ ಸಿನಿಮಾ ಬಿಡುಗಡೆಯ ಹೊತ್ತಲ್ಲಿ, ಶುಭಾಶಯ ಕೋರುವುದಕ್ಕಾಗಿ ತಮ್ಮ ಸಿನಿಮಾದ ಹೊಸ ಪೋಸ್ಟರ್ ಅನ್ನು ರಿಲೀಸ್ ಮಾಡಿದ್ದಾರೆ ತೇಜಸ್ವಿ.