Bloggers Unite

Tag: ಮರಿಗಳು

  • ಕೊಡಗಿನಲ್ಲಿ ಹುಲಿ ಪ್ರತ್ಯಕ್ಷ – ಸ್ಥಳೀಯರು ಆತಂಕ

    ಕೊಡಗಿನಲ್ಲಿ ಹುಲಿ ಪ್ರತ್ಯಕ್ಷ – ಸ್ಥಳೀಯರು ಆತಂಕ

    ಮಡಿಕೇರಿ: ಕೊಡಗು ಜಿಲ್ಲೆಯ ವಿರಾಜಪೇಟೆ ತಾಲೂಕಿನ ಆನೆ ಚೌಕೂರು ಗೇಟ್ ಬಳಿ ಹುಲಿ ಪ್ರತ್ಯಕ್ಷವಾಗಿದ್ದು, ಸ್ಥಳೀಯರು ಆತಂಕಗೊಂಡಿದ್ದಾರೆ.

    ಹುಲಿಯೊಂದು ಆನೆ ಚೌಕೂರು ಗೇಟ್ ಬಳಿ ಪ್ರತ್ಯಕ್ಷವಾಗಿದೆ. ಜೊತೆಗೆ ಮೂರು ಮರಿಗಳೊಂದಿಗೆ ಹುಲಿ ಇದೆ ಎಂದು ಸ್ಥಳೀಯರು ಹೇಳುತ್ತಿದ್ದಾರೆ. ಹುಲಿಯ ವಿಡಿಯೋವನ್ನು ಸ್ಥಳೀಯರೊಬ್ಬರು ಮೊಬೈಲ್‍ನಲ್ಲಿ ಸೆರೆ ಹಿಡಿದಿದ್ದಾರೆ.

    ನಾಗರಹೊಳೆ ರಾಷ್ಟ್ರೀಯ ಹುಲಿ ಸಂರಕ್ಷಣಾ ಸ್ಥಳದಿಂದ ಬಂದಿವೆ ಎನ್ನಲಾಗಿದೆ. ಇದೀಗ ಜನರು ಹುಲಿ ಕಂಡು ಆತಂಕಗೊಂಡಿದ್ದಾರೆ. ಸ್ಥಳೀಯರು ತಕ್ಷಣ ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ಫೋನ್ ಮಾಡಿ ಮಾಹಿತಿ ತಿಳಿಸಿದ್ದಾರೆ. ಮಾಹಿತಿ ತಿಳಿದು ಅಧಿಕಾರಿಗಳು ಸ್ಥಳಕ್ಕೆ ಬಂದು ಪರಿಶೀಲನೆ ನಡೆಸಿದ್ದಾರೆ.

  • ಮರಿಗಳಿಗಾಗಿ ಹಾವಿನ ಜೊತೆ ಸೆಣಸಾಟಕ್ಕೆ ನಿಂತ ಮರ ಕುಟಿಗ: ವಿಡಿಯೋ

    ಮರಿಗಳಿಗಾಗಿ ಹಾವಿನ ಜೊತೆ ಸೆಣಸಾಟಕ್ಕೆ ನಿಂತ ಮರ ಕುಟಿಗ: ವಿಡಿಯೋ

    – ತಾಯಿ ಪಕ್ಷಿಯ ಪ್ರೀತಿಗೆ ನೆಟ್ಟಿಗರು ಫಿದಾ

    ನವದೆಹಲಿ: ಮರಿಗಳಿಗಾಗಿ ಮರ ಕುಟಿಗ ಪಕ್ಷಿಯೊಂದು ಹಾವಿನ ಜೊತೆ ಪ್ರಾಣವನ್ನು ಲೆಕ್ಕಿಸದೆ ಹೋರಾಡಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ.

    ತಾಯಿ ಎಂದರೆ ಹಾಗೇ ಎಂಥ ಕಠಿಣ ಪರಿಸ್ಥಿತಿಯಲ್ಲೂ ತನ್ನ ಮಕ್ಕಳನ್ನು ಬಿಟ್ಟುಕೊಡುವುದಿಲ್ಲ. ಇದಕ್ಕೆ ಈ ಮರಕುಟಿಗದ ವಿಡಿಯೋ ತಾಜಾ ಉದಾಹರಣೆಯಾಗಿದೆ. ಭಾರತದ ಅರಣ್ಯಾಧಿಕಾರಿ ಸುಸಂತ್ ನಂದ ಅವರು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿರುವ ಮರ ಕುಟಿಗದ ಈ ವಿಡಿಯೋವನ್ನು ನೋಡಿದ ನೆಟ್ಟಿಗರು ಫಿದಾ ಆಗಿದ್ದಾರೆ.

    ಈ ವಿಡಿಯೋವನ್ನು ಹಂಚಿಕೊಂಡಿರುವ ಸುಸಂತ್ ನಂದ ಅವರು, ಈ ಗ್ರಹದಲ್ಲಿರುವ ಎಲ್ಲ ಶಕ್ತಿಗಳು ಒಂದುಗೂಡಿದರು ತಾಯಿ ಎಂಬ ಪ್ರೀತಿಯನ್ನು ಎಂದಿಗೂ ಸೋಲಿಸಲು ಸಾಧ್ಯವಿಲ್ಲ. ಈ ಮರ ಕುಟಿಗ ತನ್ನ ಮರಿಗಳಿಗಾಗಿ ಹಾವಿನ ಜೊತೆ ಜಗಳಕ್ಕೆ ಬಿದ್ದು ಕೊನೆಯಲ್ಲಿ ತನ್ನ ಜೀವ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ ಎಂದು ಬರೆದುಕೊಂಡಿದ್ದಾರೆ. ಈ ವಿಡಿಯೋವನ್ನು ನೋಡಿದ ನೆಟ್ಟಿಗರು ರೀಟ್ವೀಟ್ ಮಾಡುವ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ.

    27 ಸೆಕೆಂಡ್ ಇರುವ ಈ ವಿಡಿಯೋದಲ್ಲಿ ಮರ ಕುಟಿಗ ಮಾಡಿದ ಗೂಡಿನಲ್ಲಿ ಒಂದು ದೊಡ್ಡ ಗಾತ್ರದ ಹಾವು ಬಂದು ಸೇರಿಕೊಂಡಿರುತ್ತದೆ. ಅದನ್ನು ನೋಡಿದ ಪಕ್ಷಿ ಅದನ್ನು ಕುಕ್ಕಲು ಆರಂಭಿಸುತ್ತದೆ. ಆದರೆ ಹಾವು ಬಲಿಷ್ಠವಾಗಿದ್ದ ಕಾರಣ ಮರ ಕುಟಿಗವನ್ನೇ ಕಚ್ಚುತ್ತದೆ. ಆದರೆ ಛಲ ಬಿಡದ ತಾಯಿ ಪಕ್ಷಿ ತನ್ನ ಮರಿಗಳಿಗಾಗಿ ಜೀವವನ್ನೇ ಒತ್ತೆಇಟ್ಟು ಹಾವನ್ನು ಅಲ್ಲಿಂದ ಓಡಿಸುತ್ತದೆ.

    ಈ ವಿಡಿಯೋ ನೋಡಿ ಕೆಲವರು ಕಮೆಂಟ್ ಮಾಡಿದ್ದು, ಅ ತಾಯಿ ಪಕ್ಷಿ ತುಂಬ ಗ್ರೇಟ್. ತಾಯಿ ಅಂದರೆ ಹಾಗೇ ಇರಬೇಕು ಎಂದು ಹೇಳಿದ್ದಾರೆ. ಸುಸಂತ್ ನಂದ ಹಾಕಿರುವ ಈ ವಿಡಿಯೋ ಸುಮಾರು 12 ಸಾವಿರ ಜನ ವೀಕ್ಷಿಸಿದ್ದು, ಹಲವಾರು ಮಂದಿ ರೀಟ್ವೀಟ್ ಮಾಡಿದ್ದಾರೆ.

  • ಮಂಗ್ಳೂರಿನಲ್ಲಿ 1 ಹೆಣ್ಣು 4 ಗಂಡು ಮರಿಗಳಿಗೆ ಜನ್ಮ ನೀಡಿದ ಹುಲಿ

    ಮಂಗ್ಳೂರಿನಲ್ಲಿ 1 ಹೆಣ್ಣು 4 ಗಂಡು ಮರಿಗಳಿಗೆ ಜನ್ಮ ನೀಡಿದ ಹುಲಿ

    ಮಂಗಳೂರು: ಜಗತ್ತಿನಾದ್ಯಂತ ಹುಲಿಗಳ ಸಂತತಿ ಅವನತಿಯ ಹಾದಿಯಲ್ಲಿದ್ದರೆ, ಮಂಗಳೂರಿನ ಪಿಲಿಕುಳ ನಿಸರ್ಗಧಾಮದಲ್ಲಿ ಮಾತ್ರ ಹುಲಿಗಳು ಸದ್ದು ಮಾಡಲಾರಂಭಿಸಿವೆ.

    ಹೆಣ್ಣು ಹುಲಿಯೊಂದು ಒಮ್ಮೆಲೇ ಐದು ಮರಿಗಳಿಗೆ ಜನ್ಮ ನೀಡಿದ್ದು ಪಿಲಿಕುಳದಲ್ಲಿ ಹುಲಿ ಮರಿಗಳ ನಲಿದಾಟ ಆಕರ್ಷಣೆ ಹುಟ್ಟಿಸಿದೆ. ಈವರೆಗೆ 13 ಇದ್ದ ಹುಲಿಗಳ ಸಂಖ್ಯೆ ಈಗ 18 ಕ್ಕೇರಿದ್ದು ನಿಸರ್ಗಧಾಮದ ಹಿರಿಮೆ ಹೆಚ್ಚಿಸಿದೆ. ಪುಟಾಣಿ ಮರಿಗಳು ತಾಯಿ ಹುಲಿ ರಾಣಿಯ ಜೊತೆ ಆಟವಾಡುತ್ತಾ ಕೃತಕ ಕಾಡಿನಲ್ಲಿ ಅಡ್ಡಾಡುತ್ತಿರುವುದು ಸಾರ್ವಜನಿಕರ ಗಮನ ಸೆಳೆದಿದೆ. ಇದನ್ನು ಓದಿ: ಪಿಲಿಕುಳದಲ್ಲಿ ಐದು ಮರಿಗಳ ಜನನ- ಮತ್ತೆ ಅಗ್ರಸ್ಥಾನಕ್ಕೇರಿದ ಕರ್ನಾಟಕ

    ಈಗ ನಾಲ್ಕು ಗಂಡು ಮತ್ತು ಒಂದು ಹೆಣ್ಣು ಮರಿಯಾಗಿದ್ದು ಪಿಲಿಕುಳದಲ್ಲಿ ಹೊಸ ಸಂಭ್ರಮ ಮನೆಮಾಡಿದೆ. ಪಿಲಿಕುಳದಲ್ಲಿ ಹೆಚ್ಚಿನ ಪ್ರಾಣಿಗಳನ್ನು ವಿವಿಧ ಕಂಪನಿಗಳು ದತ್ತು ಪಡೆದಿದ್ದು ಅವುಗಳ ಸಂರಕ್ಷಣೆಯ ಹೊಣೆ ಹೊತ್ತುಕೊಂಡಿದೆ. ಹೀಗಾಗಿ ವಿವಿಧ ರೀತಿಯ ಅಪರೂಪದ ಕಾಡು ಪ್ರಾಣಿಗಳನ್ನು ಪಿಲಿಕುಳದಲ್ಲಿ ಸಂರಕ್ಷಿಸಲಾಗಿದ್ದು ಸಂತತಿ ಹೆಚ್ಚಳಕ್ಕೆ ಒತ್ತು ನೀಡಲಾಗಿದೆ. ಇಲ್ಲಿ ಹೆಚ್ಚುವರಿಯಾದ ಪ್ರಾಣಿಗಳನ್ನು ದೇಶದ ವಿವಿಧ ಮೃಗಾಲಯಗಳಿಗೆ ಎರವಲು ನೀಡಲಾಗುತ್ತಿದೆ.

  • ಮಳೆ ನೀರಿನಿಂದ ತನ್ನ ಮರಿಗಳನ್ನು ರಕ್ಷಿಸಿದ ನಾಯಿ – ದೃಶ್ಯ ನೋಡಿದ್ರೆ ಕಣ್ಣಂಚಲ್ಲಿ ಬರುತ್ತೆ ನೀರು

    ಮಳೆ ನೀರಿನಿಂದ ತನ್ನ ಮರಿಗಳನ್ನು ರಕ್ಷಿಸಿದ ನಾಯಿ – ದೃಶ್ಯ ನೋಡಿದ್ರೆ ಕಣ್ಣಂಚಲ್ಲಿ ಬರುತ್ತೆ ನೀರು

    ಕೋಲಾರ: ಮಳೆ ನೀರಿನ ಅವಾಂತರದಿಂದ ತಾಯಿ ನಾಯಿ ತನ್ನ ಮರಿಗಳನ್ನು ರಕ್ಷಣೆ ಮಾಡಿಕೊಳ್ಳಲು ಪರದಾಟ ನಡೆಸಿದ ಘಟನೆ ಕೋಲಾರದಲ್ಲಿ ನಡೆದಿದೆ.

    ಇಂದು ಸಂಜೆ ಬಂದ ಮಳೆಗೆ ಚರಂಡಿಯಲ್ಲಿ ನೀರು ತುಂಬಿಕೊಂಡಿದೆ. ಅದೇ ಚರಂಡಿ ಬಳಿ ಇದ್ದ ನಾಯಿ ಮರಿಗಳ ರಕ್ಷಣೆಗಾಗಿ ತಾಯಿ ನಾಯಿ ಅರಣ್ಯ ರೋಧನೆ ನಡೆಸಿತು. ನಾಯಿ ಮರಿಗಳನ್ನು ರಕ್ಷಿಸುವ ಕರುಣಾಜನಕ ದೃಶ್ಯಗಳು ಮೊಬೈಲ್ ನಲ್ಲಿ ಸೆರೆಯಾಗಿದ್ದು, ಕೋಲಾರದ ಗೌರಿಪೇಟೆಯ 5ನೇ ಕ್ರಾಸ್ ನಲ್ಲಿ ಇಂದು ಸಂಜೆ ಈ ಘಟನೆ ನಡೆದಿದೆ.

    ಮಳೆಯಾಗಿ ಚರಂಡಿಯಲ್ಲಿ ನೀರು ತುಂಬಿಕೊಂಡ ಪರಿಣಾಮ ನಾಯಿಯ ಪರದಾಟ, ಗೋಳಾಟ ಹೇಳ ತೀರದಂತಾಗಿತ್ತು. ತನ್ನ 5 ಮರಿಗಳನ್ನು ಬಾಯಲ್ಲಿ ಕಚ್ಚಿಕೊಂಡು ಮತ್ತೊಂದು ಚರಂಡಿಗೆ ಸಾಗಿಸಿದ ನಾಯಿಯ ತಾಯಿ ಪ್ರೀತಿಯನ್ನು ಕಂಡ ಸ್ಥಳಿಯರ ಕಣ್ಣಾಲೆಗಳು ನೀರು ತುಂಬಿಕೊಂಡಿತ್ತು. ಕಿಂಡಿಯಂತಿರುವ ಸಣ್ಣ ಸಂದಿಯಲ್ಲಿ ತನ್ನ 5 ಮಕ್ಕಳನ್ನು ಪಾರು ಮಾಡಿದ ನಾಯಿ ಸಾಹಸಕ್ಕೆ ಸಾಟಿಯೇ ಇಲ್ಲವಾಗಿತ್ತು. ಮರಿಗಳನ್ನು ಬಾಯಲ್ಲಿ ಕಚ್ಚಿಕೊಂಡು ಒಂದೊಂದಾಗಿ ಹೊತ್ತೊಯ್ದು ಸುರಕ್ಷಿತ ಸ್ಥಳಕ್ಕೆ ಬಿಟ್ಟಿತು.

    ಮಳೆಯಲ್ಲೇ ನಾಯಿ ತನ್ನ ಮರಿಗಳನ್ನ ರಕ್ಷಣೆ ಮಾಡುವ ಮನಕಲಕುವ ದೃಶ್ಯಗಳು ಮೊಬೈಲ್ ನಲ್ಲಿ ಸೆರೆಯಾಗಿದೆ. ಒಂದು ಕಡೆ ಮಳೆ, ಮತ್ತೊಂದೆಡೆ ಕಿಂಡಿಯಂತಿರುವ ಸಣ್ಣ ಕಾಲುವೆಯಲ್ಲಿ ಮರಿಗಳನ್ನು ರಕ್ಷಣೆ ಮಾಡಿದ ವಿಡಿಯೋ ನೋಡಿದರೆ ಕಣ್ಣಂಚಲ್ಲಿ ನೀರು ಬರುತ್ತವೆ.

  • ವಿಡಿಯೋ: ಮೊಟ್ಟೆಯಿಂದ ಹೊರಬರ್ತಿದ್ದಂತೆ ಹೆಡೆಯೆತ್ತುತ್ತಿವೆ 16 ನಾಗರ ಹಾವಿನ ಮರಿಗಳು!

    ವಿಡಿಯೋ: ಮೊಟ್ಟೆಯಿಂದ ಹೊರಬರ್ತಿದ್ದಂತೆ ಹೆಡೆಯೆತ್ತುತ್ತಿವೆ 16 ನಾಗರ ಹಾವಿನ ಮರಿಗಳು!

    ಬೆಂಗಳೂರು: ನಾಗರಹಾವಿನ ಮೊಟ್ಟೆಗಳಿಂದ ಬರೋಬ್ಬರಿ 16 ಮರಿಗಳು ಹೊರಬಂದ ಘಟನೆ ಬೆಂಗಳೂರು ಹೊರವಲಯ ನೆಲಮಂಗಲದಲ್ಲಿ ನಡೆದಿದೆ.

    ನೆಲಮಂಗಲದ ಸ್ನೇಕ್ ಲೋಕೇಶ್ ಕಳೆದ ಮೂರು ತಿಂಗಳ ಹಿಂದೆ ಹೆಸರಘಟ್ಟ ಗ್ರಾಮದಲ್ಲಿ ಮೊಟ್ಟೆಗಳನ್ನ ಸಂಗ್ರಹಿಸಿದ್ದರು. ಮೂರು ತಿಂಗಳ ಬಳಿಕ ಮೊಟ್ಟೆಯಿಂದ ಹಾವಿನ ಮರಿಗಳು ಹೊರಬಂದಿವೆ. ಹುಟ್ಟುತ್ತಲೇ ಹೆಡೆಯೆತ್ತಿ ನಾಗರಹಾವಿನ ಮರಿಗಳು ಬುಸುಗುಡುತ್ತಿವೆ. ಮೊಟ್ಟೆಯಿಂದ ಹಾವು ಮರಿಗಳು ಹೊರ ಬರುವ ಅಪರೂಪದ ದೃಶ್ಯವನ್ನು ಲೋಕೇಶ್ ಕುಟುಂಬಸ್ಥರು ಸೆರೆಹಿಡಿದ್ದಾರೆ.

    ಮಾರ್ಚ್ ತಿಂಗಳು ಸಾಮಾನ್ಯವಾಗಿ ನಾಗರಹಾವು ಮೊಟ್ಟೆಯಿಡುವ ಸಮಯವಾಗಿದೆ. ಹೆಸರಘಟ್ಟದಲ್ಲಿ ನಾರಾಯಣ ಎಂಬವರ ಮನೆಯಲ್ಲಿ ನಾಗರಹಾವು ಮೊಟ್ಟೆ ಇಟ್ಟು ಹೋಗಿತ್ತು. ಇದನ್ನು ಗಮನಿಸಿದ ಮನೆ ಮಾಲೀಕ ನನಗೆ ಫೋನ್ ಮಾಡಿ ಮಾಹಿತಿ ತಿಳಿಸಿದ್ದರು. ನಾನು ಹೋಗಿ ನಾಗರಹಾವಿನ ಮೊಟ್ಟೆಗಳನ್ನು ತಂದು ನಮ್ಮ ಮನೆಯಲ್ಲಿ ಪೋಷಣೆ ಮಾಡುತ್ತಿದ್ದು, ಇಂದು 16 ನಾಗರಹಾವಿನ ಮರಿಮಗಳು ಮೊಟ್ಟೆಯಿಂದ ಹೊರ ಬಂದಿವೆ. ಸದ್ಯಕ್ಕೆ 16 ಹಾವಿನ ಮರಿಗಳು ಆರೋಗ್ಯವಾಗಿವೆ ಎಂದು ಲೋಕೇಶ್ ತಿಳಿಸಿದ್ದಾರೆ.

    ನಮ್ಮ ತಂದೆ ತುಂಬ ವರ್ಷದಿಂದ ನಾಗರಹಾವನ್ನು ರಕ್ಷಣೆ ಮಾಡುತ್ತಿದ್ದಾರೆ. ಅನೇಕ ಕಡೆಯಿಂದ ಹಾವಿನ ಮರಿಗಳನ್ನು ತರುತ್ತಿರುತ್ತಾರೆ. ಇಂದು ನಮ್ಮ ಮನೆಯಲ್ಲಿ 16 ನಾಗರಹಾವಿನ ಮರಿಗಳಾಗಿವೆ. ಇದರಿಂದ ಎಲ್ಲರಿಗೂ ಸಂತೋಷವಾಗಿದೆ ಎಂದು ಲೋಕೇಶ್ ಅವರ ಮಗ ಹೇಳಿದ್ದಾರೆ.