Tag: ದೇವ್ ದೇವಯ್ಯ

ಒಂದು ಕಡೆಯಿಂದ ಭರಪೂರ ಗೆಲುವುಗಳ ಮೂಲಕ ಕನ್ನಡ ಚಿತ್ರರಂಗ ಕಳೆಗಟ್ಟಿಕೊಂಡಿದೆ. ಅದರ ಜೊತೆ ಜೊತೆಗೇ ಚಿತ್ರರಂಗವನ್ನು ಮತ್ತಷ್ಟು ಕಳೆಗಟ್ಟಿಸುವಂಥಾ ಭಿನ್ನ ಪ್ರಯೋಗಗಳ ಚಿತ್ರಗಳೂ ಕೂಡಾ ಸದ್ದಿಲ್ಲದೆ ರೂಪುಗೊಂಡು ಬಿಡುಗಡೆಗೆ ತಯಾರಾಗಿ ನಿಂತಿವೆ. ಆ ಸಾಲಿನಲ್ಲಿ ಬಹುಮುಖ್ಯವಾಗಿ ಗುರುತಿಸಿಕೊಳ್ಳುವ ಚಿತ್ರ, ರವೀಂದ್ರ ಪರಮೇಶ್ವರಪ್ಪ (Ravindra Parameshwarappa) ನಿರ್ದೇಶನದಲ್ಲಿ ಮೂಡಿ ಬಂದಿರುವ ʻಯೆಲ್ಲೋ ಗ್ಯಾಂಗ್ಸ್ʼ(Yellow Gangs Film). ಈ ಶೀರ್ಷೀಕೆ ಕೇಳಿದರೇನೇ ಒಂದು ಚೌಕಟ್ಟಿನ ಕಥಾನಕದ ಸುಳಿವು ತಂತಾನೇ ಬಿಚ್ಚಿಕೊಳ್ಳುತ್ತೆ. ಆದರೆ, ನಿರ್ದೇಶಕರು ತೆರೆದಿಡುತ್ತಾ ಬಂದಿರುವ ಒಂದಷ್ಟು ಅಂಶಗಳು ಇದೊಂದು ಚೌಕಟ್ಟು ಮೀರಿದ, ಹೊಸಾ ಪ್ರಯೋಗಗಳನ್ನು ಹೊಂದಿರುವ ಅಪರೂಪದ ಚಿತ್ರ ಎಂಬುದನ್ನು ಖಾತರಿಯಾಗಿಸುತ್ತದೆ. ಹೀಗೆ ನಾನಾ ಬಗೆಯಲ್ಲಿ ಕುತೂಹಲಕ್ಕೆ ಕಾರಣವಾಗಿರುವ ಈ ಸಿನಿಮಾದ ಬಿಡುಗಡೆಗೀಗ ಮುಹೂರ್ತ ನಿಗಧಿಯಾಗಿದೆ.

ʻಯೆಲ್ಲೋ ಗ್ಯಾಂಗ್ಸ್ʼ ಇದೇ ನವೆಂಬರ್ 11ರಂದು ರಾಜ್ಯಾದ್ಯಂತ ಅದ್ದೂರಿಯಾಗಿ ತೆರೆ ಕಾಣಲಿದೆ. ಈಗಾಗಲೇ ಒಂದಷ್ಟು ರೀತಿಯಲ್ಲಿ ಸದರಿ ಚಿತ್ರ ಪ್ರೇಕ್ಷಕರ ಚಿತ್ತ ಸೆಳೆದಿದೆ. ನಿರ್ದೇಶಕ ರವೀಂದ್ರ ಪರಮೇಶ್ವರಪ್ಪ ಅತ್ಯಂತ ಭಿನ್ನ ನೆಲೆಯಲ್ಲಿ ʻಯೆಲ್ಲೋ ಗ್ಯಾಂಗ್ಸ್ʼ ಅನ್ನು ಪ್ರೇಕ್ಷಕರ ಆಸಕ್ತಿ ಕೇಂದ್ರಕ್ಕೆ ತರುವಲ್ಲಿ ಯಶಸ್ವಿಯಾಗಿದ್ದಾರೆ. ಯಾವ ಚೌಕಟ್ಟಿಗೂ ಒಳಗಾಗದೆ, ಪ್ರತೀ ಹಂತದಲ್ಲಿಯೂ ಥ್ರಿಲ್ಲಿಂಗ್ ಅಂಶಗಳನ್ನು ಒಳಗೊಂಡಿರುವ ಈ ಕಥಾನಕ ಒಂದು ಡ್ರಗ್ ಡೀಲ್(Drugs Deal) ಸುತ್ತಾ ತೆರೆದುಕೊಂಡು, ಕಾಳಧನ ಕೇಂದ್ರಿತವಾಗಿ ಚಲಿಸುವ ಅಪರೂಪದ ಕಥಾನಕವನ್ನೊಳಗೊಂಡಿದೆ. ಹಾಗಂತ ನಿರ್ದೇಶಕರೇ ಹೇಳಿಕೊಂಡಿದ್ದಾರೆ. ಇದನ್ನೂ ಓದಿ:ತೆಲುಗು ಮತ್ತು ಹಿಂದಿಯಲ್ಲಿ ಕಾಂತಾರ: ರಿಲೀಸ್ ಡೇಟ್ ಫಿಕ್ಸ್

ಡ್ರಗ್ಸ್ ಮತ್ತು ಕಾಸುಗಳ ಕೇಂದ್ರಿತವಾಗಿ ಬಿಚ್ಚಿಕೊಳ್ಳುವ ʻಯೆಲ್ಲೋ ಗ್ಯಾಂಗ್ಸ್ʼ ಕಥೆ, ನಂತರದಲ್ಲಿ ಸಂಬಂಧವಿಲ್ಲದವರನ್ನೂ ಬಳಸಿಕೊಂಡು ಸಾಗುತ್ತದೆ. ಆ ಯಾನದಲ್ಲಿ ಯಾರೂ ಊಹಿಸಿಕೊಳ್ಳಲಾಗದ ತಿರುವುಗಳೂ ಎದುರಾಗುತ್ತವೆ. ಪ್ರೇಕ್ಷಕರು ಒಂದು ದಿಕ್ಕಿನಲ್ಲಿ ಅಂದಾಜಿಸಿದರೆ, ಮತ್ಯಾವುದೋ ದಿಕ್ಕಿನಿಂದ ತೂರಿ ಬರುವ ಸಸ್ಪೆನ್ಸುಗಳು ನೋಡುಗರನ್ನೆಲ್ಲ ಥ್ರಿಲ್ ಆಗಿಸುವಂತಿವೆ ಎಂಬ ಭರವಸೆ ರವೀಂದ್ರ ಪರಮೇಶ್ವರಪ್ಪ ಅವರಲ್ಲಿದೆ. ಈ ಚಿತ್ರ ಕ್ರೈಂ ಥ್ರಿಲ್ಲರ್ ಮಾದರಿಯದ್ದೆಂದು ಹೇಳಬಹುದಾದರೂ, ಆ ಜಾನರಿನ ಸಿದ್ಧಸೂತ್ರಗಳ ಸೋಂಕಿಲ್ಲದಂತೆ ತಯಾರುಗೊಂಡಿದೆ. ಪ್ರೇಕ್ಷಕರನ್ನು ಪ್ರತೀ ಹಂತದಲ್ಲಿಯೂ ಕುತೂಹಲದ ಉತ್ತುಂಗಕ್ಕೇರಿಸುವಂತೆ ಒಟ್ಟಾರೆ ಚಿತ್ರ ಮೂಡಿ ಬಂದಿದೆಯಂತೆ.

ಇದೊಂದು ರಾ ಕಥಾನಕವಾದ್ದರಿಂದ ಒಂದಿಡೀ ಚಿತ್ರವನ್ನು ಆ ಫೀಲ್‌ಗೆ ತಕ್ಕುದಾಗಿಯೇ ಚಿತ್ರೀಕರಣ ನಡೆಸಲಾಗಿದೆ. ಅದರೊಳಗಿನ ಪಾತ್ರಗಳು ನಮ್ಮ ನಡುವಿಂದಲೇ ಕದಲುತ್ತಿವೆಯೇನೋ ಎಂಬಂಥಾ ಭಾವ ಮೂಡಿಸುವಷ್ಟು ಶಕ್ತವಾಗಿ ಇಲ್ಲಿನ ದೃಷ್ಯಾವಳಿಗಳು ಮೂಡಿ ಬಂದಿವೆಯಂತೆ. ಈ ತಾಜಾತನ ಉಳಿಸಿಕೊಳ್ಳಲೆಂದೇ ಹ್ಯಾಂಡ್ ಹೆಲ್ಡ್ ತಂತ್ರಜ್ಞಾನದಲ್ಲಿ, ಸಾಕಷ್ಟು ಸವಾಲುಗಳನ್ನೆದುರಿಸಿ ʻಯೆಲ್ಲೋ ಗ್ಯಾಂಗ್ಸ್ʼ ಅನ್ನು ಚಿತ್ರೀಕರಿಸಿಕೊಳ್ಳಲಾಗಿದೆ. ದೇವ್ ದೇವಯ್ಯ(Actor dev devaih), ಅರ್ಚನಾ ಕೊಟ್ಟಿಗೆ (Archana Kottige), ಬಲ ರಾಜ್ವಾಡಿ, ಪ್ರದೀಪ್ ಪೂಜಾರಿ, ಅರುಣ್, ಸತ್ಯ, ನಾಟ್ಯ ರಂಗ ಮುಂತಾದವರು ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ.

ಇನ್ನುಳಿದಂತೆ, ಸುಜ್ಞಾನ್ ಛಾಯಾಗ್ರಹಣ, ಸುರೇಶ್ ಆರ್ಮುಗಂ ಸಂಕಲನ, ರೋಹಿತ್ ಸೋವರ್ ಸಂಗೀತ ಸಂಯೋಜನೆ ಈ ಚಿತ್ರಕ್ಕಿದೆ. ವಿಭಿನ್ನ ಸ್ಟುಡಿಯೋಸ್, ಕೀ ಲೈಟ್ಸ್ ಮತ್ತು ವಾಟ್ ನೆಕ್ಸ್ಟ್ ಮೂವೀಸ್ ಸಂಸ್ಥೆಗಳು ಜೊತೆಗೂಡಿ ಯೆಲ್ಲೋ ಗ್ಯಾಂಗ್ಸ್ ಅನ್ನು ನಿರ್ಮಾಣ ಮಾಡಿವೆ. ಮನೋಜ್ ಪಿ, ಜಿ.ಎಂ.ಆರ್ ಕುಮಾರ್(ಕೆವಿಜಿ), ಪ್ರವೀಣ್ ಡಿ.ಎಸ್ ಮತ್ತು ಜೆ.ಎನ್.ವಿ ಶಿವಮೊಗ್ಗ ಶಾಲೆಯ ಮಾಜಿ ವಿದ್ಯಾರ್ಥಿಗಳು ಚಿತ್ರಕ್ಕೆ ಹಣ ಹೂಡಿದ್ದಾರೆ. ಲೋಕೇಶ್ ಹಿತ್ತಲಕೊಪ್ಪ ಅವರು ಚಿತ್ರದ ಕಾರ್ಯಕಾರಿ ನಿರ್ಮಾಪಕರಾಗಿ ಕೆಲಸ ಮಾಡಿದ್ದಾರೆ. ಯೋಗರಾಜ್ ಭಟ್ ಗರಡಿಯಲ್ಲಿ ಪಳಗಿಕೊಂಡಿರುವ ರವೀಂದ್ರ ಪರಮೇಶ್ವರಪ್ಪ ಯೆಲ್ಲೋ ಗ್ಯಾಂಗ್ಸ್ ಮೂಲಕ ಸ್ವತಂತ್ರ ನಿರ್ದೇಶಕರಾಗಿದ್ದಾರೆ. ರವೀಂದ್ರ ಪರಮೇಶ್ವರಪ್ಪ ಮತ್ತು ಪ್ರವೀಣ್ ಕುಮಾರ್ ಜಿ ಈ ಸಿನಿಮಾಕ್ಕೆ ಸಂಭಾಷಣೆ ಬರೆದಿದ್ದಾರೆ.

Live Tv
[brid partner=56869869 player=32851 video=960834 autoplay=true]