ಕಾರವಾರ: ಡೀಸೆಲ್ ತುಂಬಿದ್ದ ಟ್ಯಾಂಕರಿಗೆ ಲಾರಿಯೊಂದು ಹಿಂದಿನಿಂದ ಬಂದು ಡಿಕ್ಕಿ ಹೊಡೆದಿದೆ. ಪರಿಣಾಮ ಟ್ಯಾಂಕರ್ ನಿಂದ ಸೋರಿಕೆಯಾಗಿ ರಸ್ತೆಯಲ್ಲಿ ಡೀಸೆಲ್ ಹೊಳೆಯೇ ಹರಿದುಬಿಟ್ಟಿದೆ.
ಉತ್ತರ ಕನ್ನಡ ಜಿಲ್ಲೆಯ ಭಟ್ಕಳ ತಾಲೂಕಿನ ರಾಷ್ಟ್ರೀಯ ಹೆದ್ದಾರಿ 66ರ ಬೇಂಗ್ರೆಯ ಭಾರತ್ ಪೆಟ್ರೋಲ್ ಬಂಕ್ ಬಳಿ ಈ ಘಟನೆ ನಡೆದಿದೆ. ಭಟ್ಕಳದ ಕಡೆ ತೆರಳುತಿದ್ದ ಡೀಸೆಲ್ ಟ್ಯಾಂಕರ್ ಗೆ ಲಾರಿ ಡಿಕ್ಕಿ ಹೊಡೆದಿದೆ. ಈ ವೇಳೆ ಟ್ಯಾಂಕರ್ ಹಿಂಬದಿಗೆ ಬಲವಾಗಿ ಹೊಡೆತಬಿದ್ದು, ಟ್ಯಾಂಕರ್ ಒಡೆದು ಡೀಸೆಲ್ ಸೋರಿಕೆಯಾಗಿದೆ.ಸೋರಿಕೆಯಿಂದಾಗಿ ಇಡೀ ರಸ್ತೆಯಲ್ಲಿ ಡೀಸೆಲ್ ನೀರಿನ ಕೋಡಿಯಂತೆ ಹರಿದು ಹೋಗುತ್ತಿತ್ತು.
ಈ ವೇಳೆ ಟ್ಯಾಂಕರ್ ನಿಂದ ಹರಿಯುತ್ತಿದ್ದ ಡೀಸೆಲ್‍ನನ್ನು ಸುತ್ತಮುತ್ತಲ ಜನ ಮನೆಯಲ್ಲಿದ್ದ ಪಾತ್ರೆ ಹಾಗೂ ಕ್ಯಾನ್‍ಗಳನ್ನು ತಂದು ಅದನ್ನು ತುಂಬಿಕೊಂಡಿದ್ದಾರೆ. ಅಲ್ಲದೆ ಈ ಮಾರ್ಗದಲ್ಲಿ ಸಾಗುತ್ತಿದ್ದ ಕೆಲ ವಾಹನ ಸವಾರರು ಕೂಡ ಡೀಸೆಲ್‍ಗಾಗಿ ಮುಗಿಬಿದ್ದಿದ್ದರು. ಅಪಾಯ ಸಂಭವಿಸಬಹುದು ಎಂಬುವ ಅರಿವೇ ಇಲ್ಲದೇ ಜನ ಸೋರುತಿದ್ದ ಡೀಸೆಲ್ ಗೆ ಪಾತ್ರೆ ಹಿಡಿದಿದ್ದರು.