Tag: ಖಳನಟ

ಬೆಂಗಳೂರು: ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಕಷ್ಟದಲ್ಲಿರುವವರಿಗೆ ಸಹಾಯ ಮಾಡೋದರಲ್ಲಿ ಸದಾ ಮುಂದು. ಆದರೆ ಎಡಗೈಲಿ ಕೊಟ್ಟಿದ್ದು ಬಲಗೈಗೆ ಗೊತ್ತಾಗಬಾರದೆಂಬಂಥಾ ಸೂಕ್ಷ್ಮವಂತಿಕೆಯನ್ನೂ ಕೂಡಾ ಅವರು ಮೈಗೂಡಿಸಿಕೊಂಡಿದ್ದಾರೆ. ಯಾರಿಗೆ ಅದೆಷ್ಟೇ ಸಹಾಯ ಮಾಡಿದರೂ ತಾವಾಗೇ ಎಂದೂ ಹೇಳಿಕೊಳ್ಳುವ ಜಾಯಮಾನವೂ ಅವರದ್ದಲ್ಲ. ಆದರೆ, ಆಗಾಗ ದರ್ಶನ್ ಅವರ ದೊಡ್ಡತನಗಳು ಫಲಾನುಭವಿಗಳ ಕಡೆಯಿಂದಲೇ ಜಾಹೀರಾಗೋದಿದೆ. ಇದೀಗ ಅಂಥಾದ್ದೇ ಒಂದು ಮನಮಿಡಿಯುವ ವೃತ್ತಾಂತವನ್ನು ಹಿರಿಯ ಖಳನಟ ಭರತ್ ಅವರು ಹೇಳಿಕೊಂಡಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಮಾನವೀಯ ಮನಸ್ಥಿತಿ, ಸಹಾಯಹಸ್ತದ ಗುಣವನ್ನು ತಮ್ಮ ಅನುಭವದ ಮೂಲಕವೇ ಭಹಿರಂಗಗೊಳಿಸಿರುವವರು ಹಿರಿಯ ಖಳನಟ ಭರತ್. ಈ ಬಣ್ಣದ ಲೋಕದಲ್ಲಿ ಅದೆಷ್ಟೇ ಮಿರುಗಿದವರಾದರೂ ಏಕಾಏಕಿ ಮರೆಯಾಗಿ ಬಿಟ್ಟರೆ ಜನ ಮರೆತು ಬಿಡುತ್ತಾರೆ. ಚಿತ್ರರಂಗದ ಮಂದಿಯೇ ತಮ್ಮ ಜೊತೆಗಿದ್ದ ಜೀವದ ಕಥೆ ಏನಾಯ್ತೆಂಬುದರ ಬಗ್ಗೆಯೂ ಆಲೋಚಿಸೋದಿಲ್ಲ. ತಲೆಗೆ ಸ್ಟ್ರೋಕ್ ಆಗಿದ್ದರಿಂದಾಗಿ ಬೇಡಿಕೆಯಲ್ಲಿರುವಾಗಲೇ ಮರೆಗೆ ಸರಿದಿದ್ದ ಭರತ್ ಕೂಡಾ ಅಂಥಾ ಅನೇಕ ಸಂಕಟಗಳನ್ನ ಅನುಭವಿಸಿದ್ದಾರೆ. ಹಾಸಿಗೆ ಹಿಡಿದ ಸಂದರ್ಭದಲ್ಲಿ ತಾವೇ ಸಹಾಯಕ್ಕಾಗಿ ಕೈ ಚಾಚಿದರೂ ಯಾರೋ ಮಾನವೀಯತೆ ತೋರಿಸದಿದ್ದರಿಂದಾಗಿ ಬದುಕಿದ್ದೂ ಸತ್ತಂಥಾ ಸ್ಥಿತಿಯಲ್ಲಿ ಒದ್ದಾಡಿದ್ದಾರೆ.

ಹೀಗೆ ಯಾವ ಮನುಷ್ಯನೂ ತಲುಪ ಬಾರದ ಸ್ಥಿತಿಗಿಳಿದು ಇನ್ನೇನು ಸಾವಿನ ತೆಕ್ಕೆಗೆ ಶರಣಾಗಬೇಕೆಂಬಷ್ಟರಲ್ಲಿ ನಟ ಭರತ್ ಅವರತ್ತ ಸಹಾಯಹಸ್ತವೊಂದು ಚಾಚಿಕೊಂಡಿತ್ತು. ಅದು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಮಾನವೀಯ ನಡೆ!

ಯಾವುದೇ ಪ್ರಚಾರವನ್ನೂ ಬಯಸದೇ ದರ್ಶನ್ ಹಿರಿಯ ಖಳನಟ ಭರತ್ ಅವರ ಚಿಕಿತ್ಸೆಗೆ ನೆರವಾಗಿದ್ದರು. ಇದರಿಂದಾಗಿಯೇ ಭರತ್ ಎಲ್ಲ ಥರದ ಚಿಕಿತ್ಸೆ ಪಡೆದು ಮೆಲ್ಲಗೆ ಚೇತರಿಸಿಕೊಂಡು ಮೇಲೆದ್ದು ನಿಂತಿದ್ದಾರೆ. ದರ್ಶನ್ ಅವರ ಸಹಾಯವೇ ಅವರಿಗೆ ಮರುಹುಟ್ಟು ನೀಡಿದೆ. ಹೀಗೆ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಕರ್ಣನಂಥಾ ಗುಣವನ್ನು ನೆನಪಿಸಿಕೊಂಡಿರೋ ಭರತ್ ಟೈಗರ್ ಪ್ರಭಾಕರ್, ಮಾಲಾಶ್ರೀ, ಶಿವರಾಜ್ ಕುಮಾರ್ ಸೇರಿದಂತೆ ಘಟಾನುಘಟಿಗಳ ಚಿತ್ರಗಳಲ್ಲಿ ಖಳ ನಟನಾಗಿ ಅಬ್ಬರಿಸಿದ್ದವರು. ಥರ ಥರದ ಪಾತ್ರಗಳನ್ನು ನಿರ್ವಹಿಸುತ್ತಲೇ ಪ್ರತಿಭಾವಂತ ನಟನಾಗಿ ಕೈ ತುಂಬಾ ಅವಕಾಶಗಳನ್ನು ಪಡೆದುಕೊಂಡಿದ್ದವರು.

ಅವರೀಗ ಅನಾರೋಗ್ಯದ ವನವಾಸ ಮುಗಿಸಿಕೊಂಡಿದ್ದಾರೆ. ಮತ್ತೆ ಹಳೆಯ ರೀತಿಯಲ್ಲಿ ದೇಹವನ್ನು ಹುರಿಗೊಳಿಸಿಕೊಂಡು ಜಲ್ಲಿಕಟ್ಟು ಎಂಬ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಹೀಗೆ ತಾನು ಮರು ಹುಟ್ಟು ಪಡೆಯಲು ಕಾರಣವಾಗಿರೋ ದರ್ಶನ್ ಅವರನ್ನು ಕಂಡು ಮಾತಾಡಿಸಿ ಧನ್ಯವಾದ ಹೇಳಬೇಕೆಂಬ ಆಸೆ ಭರತ್ ಅವರದ್ದು.