– ಮಹಿಳಾ ಅಧಿಕಾರಿ ಮೇಲೆ ಹಲ್ಲೆ
ಬೆಂಗಳೂರು: ನಗರದ ಬಿಎಂಟಿಸಿ ಬಸ್ಸಿನಲ್ಲಿ ಮಹಿಳೆಯೊಬ್ಬರು ಕ್ಯಾತೆ ತೆಗೆದಿದ್ದು, ಪರಿಣಾಮ ಪ್ರಯಾಣಿಕರು ಹಾಗೂ ಬಸ್ಸಿನ ನಿರ್ವಾಹಕರು ಸುಸ್ತಾಗಿದ್ದಾರೆ.
ಈ ಘಟನೆ ಜೆಪಿ ನಗರದ ಬಿಎಂಟಿಸಿ ಬಸ್ಸಿನಲ್ಲಿ ನಡೆದಿದೆ. ಮಹಿಳೆ, ಟಿಕೆಟ್ ತಗೊಳ್ಳಲ್ಲ, ಪಾಸ್ ತೋರಿಸಲ್ಲ. ಏನ್ ಮಾಡ್ಕೋತಿರೋ ಮಾಡ್ಕೊಳ್ಳಿ ಎಂದು ರೇಗಾಡಿದ್ದಾರೆ. ಅಷ್ಟೇ ಅಲ್ಲದೆ ಟಿಕೆಟ್ ಕೊಡಮ್ಮ ಎಂದು ಕೇಳಿದ ಬಿಎಂಟಿಸಿ ಮಹಿಳಾ ಅಧಿಕಾರಿಯ ಮೇಲೆಯೇ ಹಲ್ಲೆಗೆ ಮುಂದಾಗಿದ್ದಾರೆ.
ಮಹಿಳೆಯ ಕಿರಿಕ್ ನಿಂದಾಗಿ ಬಸ್ ಸರಿಸುಮಾರು ಅರ್ಧ ಗಂಟೆಗಳ ಕಾಲ ನಿಂತಿದೆ. ಬಸ್ ಹತ್ತಿದ ಮಹಿಳೆಗೆ ಕಂಡೆಕ್ಟರ್ “ಎಲ್ಲಿಗೆ ಟಿಕೆಟ್” ಎಂದು ಕೇಳಿದ್ದಾರೆ. ಆಗ ಮಹಿಳೆ ಪಾಸ್ ಇದೆ ಎಂದು ಹೇಳಿದ್ದಾರೆ. ಆಗ ಕಂಡಕ್ಟರ್ ಪಾಸ್ ತೋರಿಸಿ ಅಂದಿದ್ದೇ ತಡ ಮಹಿಳೆ ನಾನು ಪಾಸ್ ತೋರಿಸಲ್ಲ ಅಂದ್ರೆ ತೋರಿಸಲ್ಲ ಎಂದು ರಂಪಾಟ ಮಾಡಿದ್ದಾರೆ. ನಂಗೆ ಹೋಂಮಿನಿಸ್ಟರ್ ನಿಂದ ಬಿಎಂಟಿಸಿ ಅಧಿಕಾರಿಗಳು ಗೊತ್ತು ಎಂದು ಫುಲ್ ಅವಾಜ್ ಹಾಕಿದ್ದಾರೆ.
ಕೊನೆಗೆ ಕಂಡಕ್ಟರ್ ಬಿಎಂಟಿಸಿ ಅಧಿಕಾರಿಯನ್ನು ಸ್ಥಳಕ್ಕೆ ಕರೆಸಿದಾಗಲೂ ಅಧಿಕಾರಿಯ ಮೇಲೆಯೇ ಹಲ್ಲೆ ಮಾಡಲು ಮಹಿಳೆ ಮುಂದಾಗಿದ್ದಾರೆ. ಈಗ ಈ ಮಹಿಳೆಯ ವಿಡಿಯೋ ವೈರಲ್ ಆಗಿದೆ.
ಸಂಭಾಷಣೆ ಹೀಗಿದೆ..
ಬಿಎಂಟಿಸಿ ಅಧಿಕಾರಿ– ನಿಮ್ಮಿಂದ ಪ್ಯಾಸೆಂಜರ್ ಗೆ ತೊಂದರೆಯಾಗ್ತಿದೆ, ಎಷ್ಟು ಜನ ಇದ್ದಾರೆ ನೋಡಿ
ನಿರ್ವಾಹಕ – ಪಾಸ್ ಇದ್ಯೋ ಇಲ್ವೋ ನಿಮ್ಮ ಹತ್ರ
ಮಹಿಳೆ– ಇದೆ
ನಿರ್ವಾಹಕ – ತೋರಿಸಿ ಪಾಸ್ ಮತ್ತೆ.
ಮಹಿಳೆ– ತೋರಿಸಲ್ಲ ಅಂದ್ರೇ ತೋರಿಸಲ್ಲ, ಎಲ್ಲಾ ಸೇರಿ ಕಿತಾಪತಿ ಮಾಡ್ತೀರಾ..?
ಅಧಿಕಾರಿ– ಕಿತಾಪತಿ ಅಂದ್ರೇ ಏನ್ರಿ ಅರ್ಥ, ನಮಗ್ಯಾಕೆ ತೊಂದರೆ ಕೊಡ್ತೀರಾ
ಪ್ರಯಾಣಿಕರು– ಲೇಟ್ ಆಗುತ್ತೆ ನಮ್ಗೆ ಇಳ್ಕೊಳ್ರಿ..
ಮಹಿಳೆ– ನಂಗೆ ಬಿಎಂಟಿಸಿಲಿ ಗೊತ್ತು
ಅಧಿಕಾರಿ– ಯಾರ್ರಿ ಗೊತ್ತು? ಗೊತ್ತಿದ್ರೇ ನಾವೇನ್ ಮಾಡೋಣ? ಕಾಮನ್ ಸೆನ್ಸ್ ಇದ್ಯಾ
ಮಹಿಳೆ– ನಂಗೆ ಕಾಮನ್ ಸೆನ್ಸ್ ಇದೆ. ನಿಮಗೆ ಇದ್ಯಾ?
ಪ್ರಯಾಣಿಕರು – ಅಯ್ಯೋ ಇಳ್ಕೊಳ್ರಿ ಹೋಗ್ಲಿ
ನಿರ್ವಾಹಕ– ಟಿಕೇಟ್ ತಗೊಳ್ರಿ
ಮಹಿಳೆ– ಬಿಎಂಟಿಸಿನಾ ಕೇಳಿ. ..
ಪ್ರಯಾಣಿಕರು– ಎಲ್ ಹೋಗ್ಬೇಕು
ಮಹಿಳೆ– ಜಂಬೂ ಸವಾರಿ ದಿಣ್ಣೆಗೆ
ಪ್ರಯಾಣಿಕರು– ದುಡ್ಡು ಇಲ್ವಾ
ಮಹಿಳೆ– ದುಡ್ಡು ಇದೆ, ಪಾಸ್ ಇದೆ ಆದ್ರೇ ಪಾಸ್ ತೋರಿಸಲ್ಲ.
