Tag: ಉಪಯೋಗ

ಸ್ಮಾರ್ಟ್ ಫೋನ್ ಇಂದು ನಮ್ಮ ಜೀವನದ ಅವಶ್ಯಕ ವಸ್ತುಗಳಲ್ಲಿ ಒಂದಾಗಿದೆ. ಬಹಳಷ್ಟು ಜನ ಪ್ರತಿ ದಿನ ಸಾಕಷ್ಟು ಗಂಟೆ ಫೋನಿನಲ್ಲೇ ಕಾಲ ಕಳೆಯುತ್ತಾರೆ. ಅತಿಯಾದರೆ ಅಮೃತವೂ ವಿಷ ಆಗುತ್ತೆ ಎನ್ನುವುಂತೆ ಸ್ಮಾರ್ಟ್ ಫೋನ್ ಬಳಕೆಯೂ ನಮ್ಮ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆ. ಹೀಗಾಗಿ ಸ್ಮಾರ್ಟ್ ಫೋನಲ್ಲಿ ಮಾಡಲೇ ಬಾರದ 10 ಪ್ರಮುಖ ವಿಚಾರಗಳ ಪಟ್ಟಿಯನ್ನು ಇಲ್ಲಿ ನೀಡಲಾಗಿದೆ.

1. ಗಂಟೆಗಟ್ಟಲೇ ಫೋನ್ ಚಾರ್ಜಿಂಗ್:
ಸ್ಮಾರ್ಟ್ ಫೋನ್‍ಗಳನ್ನು ಗಂಟೆ ಗಟ್ಟಲೇ ಚಾರ್ಜ್ ಮಾಡುವುದನ್ನು ಮಾಡಬಾರದು. ಮೊಬೈಲ್ ಸಂಪೂರ್ಣವಾಗಿ ಚಾರ್ಜ್ ಆದ ಬಳಿಕ ಕೂಡಲೇ ಚಾರ್ಜರ್ ಅನ್ನು ಅನ್‍ಪ್ಲಗ್ ಮಾಡಬೇಕು. ಚಾರ್ಜ್ ಆದ ನಂತರವೂ ಚಾರ್ಜ್ ಮಾಡುತ್ತಲೇ ಇದ್ದರೆ ಬ್ಯಾಟರಿಯ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ.

2. ಶರ್ಟ್ ಜೇಬಲ್ಲಿ ಇಡಬೇಡಿ:
ಸ್ಮಾರ್ಟ್ ಫೋನ್‍ಗಳಿದ್ದ ಹೊರಸೂಸುವ ತರಂಗಗಳು ದೇಹದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರುತ್ತದೆಂದು ವೈದ್ಯರು ಸ್ಪಷ್ಟಪಡಿಸಿದ್ದು, ಅದರಲ್ಲಿ ಎದೆಯ ಹತ್ತಿರ ಬಳಿ ಯಾವುದೇ ಕಾರಣಕ್ಕೂ ಇಟ್ಟುಕೊಳ್ಳಬಾರದು. ಒಂದು ವೇಳೆ ಪದೇ ಪದೇ ಶರ್ಟ್ ಪ್ಯಾಕೇಟ್‍ನಲ್ಲಿ ಇಟ್ಟುಕೊಳ್ಳುವುದರಿಂದ ಹೃದಯಸ್ತಂಭನವಾಗುವ ಸಾಧ್ಯತೆಯಿದೆ ಎಂಬುದು ವರದಿಗಳಲ್ಲಿ ಸಾಬೀತಾಗಿದೆ. ಹೀಗಾಗಿ ಮೊಬೈಲ್‍ಗಳನ್ನು ಶರ್ಟ್ ಪಾಕೇಟ್‍ಗಳಲ್ಲಿ ಇರಿಸಿಕೊಳ್ಳಬಾರದು.

3. ಚಾರ್ಜಿಂಗ್ ವೇಳೆ ಹೆಡ್‍ಫೋನ್ ಬಳಕೆ ಬೇಡ:
ಫೋನನ್ನು ಚಾರ್ಜಿಂಗ್ ಹಾಕಿದ ಸಮಯದಲ್ಲಿ ಯಾವುದೇ ಕಾರಣಕ್ಕೂ ಹೆಡ್‍ಫೋನ್‍ಗಳನ್ನು ಬಳಕೆ ಮಾಡಬಾರದು. ಚಾರ್ಜಿಂಗ್ ಆಗುತ್ತಿರುವ ವೇಳೆ ಮೊಬೈಲ್ ತರಂಗಳು ಹಾಗೂ ವಿದ್ಯುತ್ತಿನ ವ್ಯತ್ಯಾಸದಿಂದ ಉಂಟಾಗುವ ಕಂಪನದಿಂದ ಸಾವನ್ನಪ್ಪುವ ಸಾಧ್ಯತೆಗಳು ಹೆಚ್ಚಾಗಿರುತ್ತವೆ. ಈ ಹಿಂದೆ ಭಾರತದಲ್ಲಿ ಚಾರ್ಜಿಂಗ್ ವೇಳೆ ಹೆಡ್‍ಫೋನ್ ಹಾಕಿದ್ದಾಗ ಫೋನ್ ಸ್ಟೋಟಗೊಂಡ ಪ್ರಕರಣಗಳು ಮಾಧ್ಯಮಗಳಲ್ಲಿ ಸುದ್ದಿಯಾಗಿದೆ.

4. ಮಲಗುವಾಗ ಫೋನ್ ಬೇಡ:
ಸ್ಮಾರ್ಟ್ ಫೋನ್‍ಗಳನ್ನು ಹತ್ತಿರದಲ್ಲಿಟ್ಟುಕೊಂಡು ಮಲಗಲೇಬಾರದು. ಅಲ್ಲದೇ ತಲೆದಿಂಬಿನ ಕೆಳಗೆ ಮೊಬೈಲ್ ಇಟ್ಟುಕೊಳ್ಳಬಾರದು. ಮೊಬೈಲ್ ನೆಟ್‍ವರ್ಕ್‍ನ ತರಂಗಗಳು ತಮ್ಮ ಮೆದುಳಿನ ಮೇಲೆ ಪ್ರಭಾವ ಬೀರಿ, ನಮ್ಮ ನೆಮ್ಮದಿಯ ನಿದ್ದೆಗೆ ಭಂಗವನ್ನು ತರುತ್ತವೆ.

5. ಸೂರ್ಯನಿಗೆ ಮುಖಮಾಡಿ ಚಾರ್ಜ್ ಮಾಡಬೇಡಿ:
ಸ್ಮಾರ್ಟ್ ಫೋನ್‍ಗಳನ್ನು ಚಾರ್ಜಿಂಗ್ ಹಾಕುವಾಗ ಅದನ್ನು ನೆರಳು ಅಥವಾ ಸೂರ್ಯನ ಕಿರಣಗಳು ತಾಗದೇ ಇರುವಂತಹ ಸ್ಥಳದಲ್ಲಿ ಹಾಕಿರಿ. ಕಿಟಕಿಯ ಹತ್ತಿರ ಚಾರ್ಜಿಂಗ್ ಹಾಕುವುದು ಅಥವಾ ಸೂರ್ಯನ ಕಿರಣಗಳು ನೇರವಾಗಿ ಫೋನ್‍ಗೆ ಬೀಳುವ ಕಡೆ ಇಟ್ಟರೆ, ಸ್ಮಾರ್ಟ್‍ಫೋನ್‍ಗಳು ಹೆಚ್ಚೆಚ್ಚು ಬಿಸಿಯಾಗುವ ಸಂಭವವಿರುತ್ತದೆ. ಸುಮಾರು 45 ಡಿಗ್ರಿವರೆಗೂ ತಮ್ಮ ಶಾಖವನ್ನು ಸ್ಮಾರ್ಟ್ ಫೋನ್‍ಗಳು ಹೆಚ್ಚಿಸಿಕೊಳ್ಳುತ್ತವೆ.

6. ಕಳಪೆ ಗುಣಮಟ್ಟದ ಚಾರ್ಜರ್ ಗಳನ್ನು ಬಳಸಬೇಡಿ:
ಕಂಪೆನಿ ಫೋನಿನೊಂದಿಗೆ ನೀಡಿದ ಚಾರ್ಜರ್ ಅನ್ನು ಮಾತ್ರ ಬಳಸಿ. ಕಡಿಮೆ ಬೆಲೆಗೆ ಸಿಗುತ್ತದೆ ಎನ್ನುವ ಕಾರಣಕ್ಕೆ ಕಳಪೆ ಗುಣಮಟ್ಟದ ಚಾರ್ಜರ್ ಬಳಸಲು ಹೋಗಬೇಡಿ. ಕಡಿಮೆ ಗುಣಮಟ್ಟ ಪವರ್ ಬ್ಯಾಂಕ್ ಖರೀದಿಸಬೇಡಿ. ಕಳಪೆ ಗುಣಮಟ್ಟದ ಚಾರ್ಜರ್ ಬಳಸಿ ಪ್ರತಿಷ್ಠಿತ ಕಂಪೆನಿಗಳ ಫೋನ್ ಗಳ ಸ್ಫೋಟಗೊಂಡಿರುವ ಪ್ರಕರಣಗಳು ಮಾಧ್ಯಮಗಳಲ್ಲಿ ವರದಿಯಾಗುತ್ತಲೇ ಇರುವುದನ್ನು ನೀವು ಗಮನಿಸಿರಬಹುದು.

7. ಚಾರ್ಜಿಂಗ್ ವೇಳೆ ಸ್ಮಾರ್ಟ್‍ಫೋನ್ ರಕ್ಷಣಾ ಕವಚ(ಕೇಸ್)ಗಳನ್ನು ತೆಗೆಯಿರಿ:
ಸಾಧ್ಯವಾದರೆ ಮೊಬೈಲ್ ಚಾರ್ಜ್ ಮಾಡುವ ವೇಳೆ ಮೊಬೈಲ್ ಕೇಸ್‍ಗಳನ್ನು ತೆಗೆದು ಚಾರ್ಜ್ ಮಾಡಬೇಕು. ಇದರಿಂದ ಮೊಬೈಲ್ ಹೀಟ್ ಆಗುವ ಪ್ರಕ್ರಿಯೆ ಕಡಿಮೆಯಾಗಯತ್ತದೆ. ಹೀಗೆ ಮಾಡಿದರೆ ಮೊಬೈಲ್‍ಗೆ ವಾತಾವರಣದಲ್ಲಿನ ಗಾಳಿಯು ನೇರವಾಗಿ ಸೇರುವುದರಿಂದ ಮೊಬೈಲ್ ಹೀಟ್ ಆಗುವ ಪ್ರಮೇಯ ಇರುವುದಿಲ್ಲ.

8.ಥರ್ಡ್ ಪಾರ್ಟಿ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಬೇಡಿ:
ಆ್ಯಪ್ ಸ್ಟೋರ್ ಗಳನ್ನು ಹೊರತು ಪಡಿಸಿ ಇತರೆ ಯಾವುದೇ ಮೂಲಗಳಿಂದ ಆ್ಯಪ್‍ಗಳನ್ನು ಡೌನ್‍ಲೋಡ್ ಮಾಡಿಕೊಳ್ಳಬೇಡಿ. ವಿಶೇಷವಾಗಿ ಗೂಗಲ್ ಕಂಪೆನಿ ತನ್ನ ಪ್ಲೇ ಸ್ಟೋರ್ ನಲ್ಲಿ ಅಪ್ಲಿಕೇಶನ್ ಸೇರ್ಪಡೆಯಾಗಲು ಕೆಲವೊಂದು ಮಾನದಂಡಗಳನ್ನು ನಿಗದಿ ಪಡಿಸಿದೆ. ಈ ಮಾನದಂಡಗಳನ್ನು ಉಲ್ಲಂಘಿಸಿದ ಆ್ಯಪ್ ಗಳು ಪ್ಲೇ ಸ್ಟೋರ್ ನಲ್ಲಿ ಲಭ್ಯವಿರುವುದಿಲ್ಲ. ಆದರೆ ವೆಬ್ ಸೈಟ್ ಮೂಲಕ ಡೌನ್‍ಲೋಡ್ ಮಾಡಬಹುದು. ಈ ಆಂಡ್ರಾಯ್ಡ್ ಅಪ್ಲಿಕೇಶನ್ ಡೌನ್ ಲೋಡ್ ಮಾಡಿದರೆ ಫೋನಿನಲ್ಲಿ ಡೇಟಾ ನಮಗೆ ಗೊತ್ತಿಲ್ಲದಂತೆ ಕದಿಯುವ ಸಾಧ್ಯತೆ ಹೆಚ್ಚಿರುತ್ತದೆ.

9. ನೀರಿಗೆ ಬಿದ್ದ ಕೂಡಲೇ ಹೆಡ್‍ಫೋನ್ ತೆಗೆಯಬೇಡಿ:
ಒಂದು ವೇಳೆ ಚಾರ್ಜಿಂಗ್ ಹಾಕಿದಾಗ ಅಥವಾ ಹೆಡ್‍ಫೋನ್ ಸಹಿತ ಮೊಬೈಲ್ ನೀರಿನಲ್ಲಿ ಬಿದ್ದರೆ, ತಕ್ಷಣವೇ ಮೊಬೈಲನ್ನು ನೀರಿನಿಂದ ತೆಗಿಯಿರಿ. ಹೆಡ್‍ಫೋನ್ ಹಾಗೂ ಚಾರ್ಜರ್ ಕೇಬಲ್ ಅನ್ನು ನೀರಿನಲ್ಲೇ ತೆಗೆಯಬೇಡಿ. ನೀರಿನಲ್ಲಿ ಕೇಬಲ್ ತೆಗೆದರೆ ನೀರು ಮೊಬೈಲ್ ಒಳ ಪ್ರವೇಶಿಸುವ ಸಾಧ್ಯತೆ ಹೆಚ್ಚಿರುತ್ತದೆ. ಈಗ ದುಬಾರಿ ಬೆಲೆಯ ಫೋನ್ ಗಳಿಗೆ ಜಲ ನಿರೋಧಕ ವಿಶೇಷತೆ ನೀಡಿದರೂ ಬಜೆಟ್ ಫೋನ್‍ಗಳ ಬಳಕೆ ವೇಳೆ ಎಚ್ಚರದಲ್ಲಿರಬೇಕಾಗುತ್ತದೆ.

10. ಫೋನ್‍ಗಳನ್ನು ಅನ್‍ಲಾಕ್‍ನಲ್ಲಿಡಬೇಡಿ:
ಸ್ಮಾರ್ಟ್ ಫೋನ್‍ಗಳಲ್ಲಿ ಎಲ್ಲಾ ವೈಯಕ್ತಿಕ ವಿಷಯಗಳನ್ನು ಸಂಗ್ರಹಿಸಿರುತ್ತೇವೆ. ಹೀಗಾಗಿ ಯಾವುದೇ ಕಾರಣಕ್ಕೂ ಫೋನ್‍ಗಳನ್ನು ಅನ್‍ಲಾಕ್ ಮಾಡಿ ಬಿಡಬೇಡಿ. ಕಡ್ಡಾಯವಾಗಿ ನಿಮಗೆ ಬೇಕಾದ ರೀತಿಯಲ್ಲಿ ಲಾಕಿಂಗ್ ವ್ಯವಸ್ಥೆ ಮಾಡಿಕೊಳ್ಳಿ. ಇದರ ಜೊತೆ ಫಿಂಗರ್ ಪ್ರಿಂಟ್ ಸೆನ್ಸರ್ ಹಾಗೂ ಫೇಸ್ ಲಾಕ್ ಗಳನ್ನು ಬಳಸಿಕೊಳ್ಳಿ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv