Bloggers Unite

Tag: ಇಟಲಿ

  • ಇಟಲಿ, ಫ್ರಾನ್ಸ್ ನಲ್ಲಿ ಮತ್ತೆ ಲಾಕ್‍ಡೌನ್ ಘೋಷಣೆ

    ಇಟಲಿ, ಫ್ರಾನ್ಸ್ ನಲ್ಲಿ ಮತ್ತೆ ಲಾಕ್‍ಡೌನ್ ಘೋಷಣೆ

    ನವದೆಹಲಿ: ಯುರೋಪಿಯನ್ ರಾಷ್ಟ್ರಗಳಲ್ಲಿ ಪ್ರತಿದಿನ ಕೊರೊನಾ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದೆ. ಈ ನಡುವೆ ಇಟಲಿ ಮತ್ತು ಫ್ರಾನ್ಸ್ ನಲ್ಲಿ ಎರಡನೇ ಹಂತದ ಲಾಕ್‍ಡೌನ್ ಆರಂಭವಾಗಿದೆ.

    ಯೂರೋಪ್ ರಾಷ್ಟ್ರಗಳಲ್ಲಿ ಕಳೆದ ಎರಡು ವಾರಗಳಿಂದ ಕೊರೊನಾ ಪಾಸಿಟಿವ್ ಪ್ರಕರಣಗಳ ಸಂಖ್ಯೆ ಗಣನೀಯವಾಗಿ ಏರಿಕೆ ಕಂಡಿದೆ. ಈ ನಡುವೆ ಇಟಲಿ ಮತ್ತು ಫ್ರಾನ್ಸ್ ನಲ್ಲಿ ಮತ್ತೆ ಲಾಕ್‍ಡೌನ್ ಘೋಷಣೆಯಾಗಿದ್ದು, ಮಾರ್ಚ್ 15 ರಿಂದ ಇಟಲಿಯಲ್ಲಿ ಲಾಕ್‍ಡೌನ್ ಘೋಷಣೆಯಾದರೆ, ಫ್ರಾನ್ಸ್ ನಲ್ಲೂ ಮಾರ್ಚ್ 17 ರಿಂದಲೂ ಲಾಕ್‍ಡೌನ್ ಮಾಡಲಾಗುವುದು ಎಂಬ ನಿರ್ಧಾರ ಹೊರಬಿದ್ದಿದೆ.

    ಜರ್ಮನಿಯಲ್ಲೂ ಕೊರೊನಾ ಅಲೆ ಜೋರಾಗುತ್ತಿದ್ದು, ಕೊರೊನಾ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿರುವ ಸೀಮಿತ ಪ್ರದೇಶಗಳಲ್ಲಿ ಲಾಕ್‍ಡೌನ್ ಮಾಡಲು ಜರ್ಮನಿ ನಿರ್ಧರಿಸಿದೆ, ಹಂಗೇರಿಯಲ್ಲಿ ನೈಟ್ ಕಫ್ರ್ಯೂ ಮಾಡಲು ಕ್ರಮ ಕೈಗೊಂಡರೆ, ಪೋಲ್ಯಾಂಡ್‍ನಲ್ಲಿ ಥಿಯೇಟರ್, ಅಂಗಡಿಗಳು, ವಾಣಿಜ್ಯ ಮಳಿಗೆಗಳಿಗೆ ಮತ್ತೆ ಬೀಗ ಹಾಕಲಾಗಿದೆ ಎಂದು ವರದಿಯಾಗಿದೆ.

    ಯೂರೋಪ್ ರಾಷ್ಟ್ರಗಳಂತೆ ಭಾರತದಲ್ಲೂ ಕೊರೊನಾ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ಮಹಾರಾಷ್ಟ್ರ ಸೇರಿದಂತೆ ಕೆಲ ರಾಜ್ಯಗಳಲ್ಲಿ ಸೀಮಿತ ಪ್ರದೇಶಗಳ ಲಾಕ್ ಡೌನ್ ಪ್ರಕ್ರಿಯೆ ಆರಂಭವಾಗಿದೆ. ಹಾಗೆ ಕರ್ನಾಟಕದಲ್ಲಿ ಕಳೆದ ಒಂದೇ ದಿನದಲ್ಲಿ 1488 ಹೊಸ ಕೊರೊನಾ ಪ್ರಕರಣ ಪತ್ತೆಯಾಗಿದ್ದು, ಬೆಂಗಳೂರಿನಲ್ಲಿ ಬರೋಬ್ಬರಿ 925 ಪ್ರಕರಣ ಪತ್ತೆಯಾಗಿ ಜನಸಾಮಾನ್ಯರಲ್ಲಿ ಆತಂಕ ಮೂಡಿಸಿದೆ.

  • ವಿದೇಶಕ್ಕೆ ತೆರಳಿದ ರಾಹುಲ್‌ ಗಾಂಧಿ

    ವಿದೇಶಕ್ಕೆ ತೆರಳಿದ ರಾಹುಲ್‌ ಗಾಂಧಿ

    ನವದೆಹಲಿ: ಎಐಸಿಸಿ ಮಾಜಿ ಅಧ್ಯಕ್ಷ ರಾಹುಲ್‌ ಗಾಂಧಿ ವಿದೇಶಕ್ಕೆ ತೆರಳಿದ್ದಾರೆ.

    ಸುದ್ದಿಸಂಸ್ಥೆಗೆ ಕಾಂಗ್ರೆಸ್‌ ವಕ್ತಾರ ರಣದೀಪ್‌ ಸುರ್ಜೇವಾಲಾ ಪ್ರತಿಕ್ರಿಯಿಸಿ, ರಾಹುಲ್‌ ಗಾಂಧಿಯವರು ಸಣ್ಣ ವೈಯಕ್ತಿಕ ವಿದೇಶ ಪ್ರವಾಸದಲ್ಲಿದ್ದಾರೆ ಎಂದು ಹೇಳಿದ್ದಾರೆ. ರಾಹುಲ್‌ ಗಾಂಧಿ ಎಲ್ಲಿಗೆ ಹೋಗಿದ್ದಾರೆ ಎಂಬುದನ್ನು ಸುರ್ಜೇವಾಲಾ ತಿಳಿಸಿಲ್ಲ.

    ಆದರೆ ಮಾಧ್ಯಮವೊಂದು ರಾಹುಲ್‌ ಗಾಂಧಿ ಇಟಲಿಗೆ ಹೋಗಿದ್ದಾರೆ ಎಂದು ವರದಿ ಮಾಡಿದೆ. ಇಂದು ಬೆಳಗ್ಗೆ ಕತಾರ್‌ ಏರ್‌ವೇಸ್‌ ವಿಮಾನದಲ್ಲಿ ರಾಹುಲ್‌ ಗಾಂಧಿ ಮಿಲಾನ್‌ಗೆ ತೆರಳಿದ್ದಾರೆ ಎಂದು ವರದಿಯಾಗಿದೆ. ಇದನ್ನೂ ಓದಿ: ಆಲೂಗೆಡ್ಡೆ, ಮಧ್ಯವರ್ತಿ, ಫ್ಯಾಕ್ಟರಿ ಬಗ್ಗೆ ಭಾಷಣ – ರಾಹುಲ್ ದ್ವಿಮುಖ ನೀತಿ ಪ್ರಶ್ನಿಸಿದ ನಡ್ಡಾ

    ರಾಹುಲ್‌ ಗಾಂಧಿ ಅವರ ಅಜ್ಜಿ ಇಟಲಿಯಲ್ಲಿದ್ದು ಅವರನ್ನು ನೋಡಲು ತೆರಳಿದ್ದಾರೆ ಎಂದು ವರದಿಯಾಗಿದೆ.

  • ರೋಮನ್ ಕಾಲದ ಫಾಸ್ಟ್ ಫುಡ್ ಸ್ಟಾಲ್ ಪತ್ತೆ

    ರೋಮನ್ ಕಾಲದ ಫಾಸ್ಟ್ ಫುಡ್ ಸ್ಟಾಲ್ ಪತ್ತೆ

    ರೋಮ್: ಜ್ವಾಲಾಮುಖಿ ಬೂದಿಯಲ್ಲಿ ಹೂತುಹೋಗಿದ್ದ 2000 ವರ್ಷಗಳ ಹಳೆಯ ರೋಮನ್ ಕಾಲದ ಪುರಾತನ ಫಾಸ್ಟ್ ಫುಡ್ ಸ್ಟಾಲ್ ರೀತಿಯ ಅಂಗಡಿಯೊಂದು ಇಟಲಿಯ ಪಾಂಪೆ ನಗರದಲ್ಲಿ ಪತ್ತೆಯಾಗಿದೆ.

    ಈ ಪುರಾತನ ಕಾಲದ ಫಾಸ್ಟ್ ಫುಡ್ ಸ್ಟಾಲ್ ಸಂಶೋಧಕರಲ್ಲಿ ಬೆರಗು ಮೂಡಿಸಿದೆ. ರೋಮನ್ ಕಾಲದ ಆಹಾರ ಪದ್ಧತಿ ಹೇಗಿತ್ತು ಎನ್ನುವುದರ ಸುಳಿವು ಸಿಕ್ಕಂತಾಗಿದೆ.

    ವಿವಿಧ ರೀತಿಯ ಪೇಂಟಿಂಗ್ಸ್ ನಿಂದ ಅಲಂಕಾರ ಮಾಡಿದ ಬಾರ್ ಕೌಂಟರ್ ಇದ್ದಾಗಿದ್ದು, ಈವರೆಗೆ ಜ್ವಾಲಾಮುಖಿ ಬೂದಿಯಿಂದ ಮುಚ್ಚಿಹೋಗಿತ್ತು. ಕಳೆದ ವರ್ಷ ಪುರಾತತ್ವಶಾಸ್ತ್ರಜ್ಞರು ಅನ್ವೇಷಣೆ ಮಾಡಿದ್ದಾರೆ. ಈ ಜಾಗದ ಸಂಪೂರ್ಣವಾದ ಮಾಹಿತಿಯನ್ನು ಕಲೆ ಹಾಕಿದ್ದಾರೆ.

    ಕ್ರಿಸ್ತಶಕ 79ರಲ್ಲಿ ಮೌಂಟ್ ವೆಸುವಿಯಸ್ ಸ್ಫೋಟಿಸಿದ ಜ್ವಾಲಾಮುಖಿಯಿಂದ ಪಾಂಪೆ ನಗದ ಕುದಿಯುವ ಲಾವಾದಲ್ಲಿ ಹೂತುಹೋಗಿತ್ತು. ಈ ವೇಳೆ 2,000 ದಿಂದ 15,000 ಮಂದಿ ಸಾವನ್ನಪ್ಪಿದ್ದರು ಎಂದು ಇತಿಹಾಸ ಹೇಳುತ್ತಿದೆ. ಈಗ ಪತ್ತೆಯಾಗಿರುವ ರೊಮನ್ ಕಾಲದ ಫುಡ್ ಸ್ಟಾಲ್ ಥರ್ಮೋಪೋಲಿಯಂ ಎಂದು ಕರೆಯಲಾಗಿದೆ. ಸಿಲ್ವರ್ ವೆಡ್ಡಿಂಗ್ ಸ್ಟ್ರೀಟ್ ಮತ್ತು ಆ್ಯಲಿ ಆಫ್ ಬಾಲ್ಕನೀಸ್ ಎಂಬ ಪ್ರದೇಶದಲ್ಲಿ ಈ ಸ್ಟಾಲ್ ಪತ್ತೆ ಹಚ್ಚಲಾಗಿದೆ.

    ಸ್ಥಳದಲ್ಲಿ ಬಾತುಕೋಳಿ ಮೂಳೆಯ ಚೂರು, ಮಣ್ಣಿನ ಮಡಿಕೆ, ಹಂದಿ, ಮೇಕೆ ಹಾಗೂ ಮೀನಿನ ಅವಶೇಷಗಳು ಪತ್ತೆಯಾಗಿವೆ. ವೈನ್‍ನ ರುಚಿ ಮಾರ್ಪಡಿಸಲು ಬಳಸುವ ಕೆಲವು ವಸ್ತಗಳು ಪತ್ತೆಯಾಗಿವೆ. ಅಂಗಡಿಯ ಗೋಡೆಗಳ ಮೇಲೆ ಕೋಳಿ ಹಾಗೂ ಬಾತುಕೋಳಿ ಚಿತ್ರವನ್ನು ಕಾಣಬಹುದಾಗಿದೆ. ಈ ಎಲ್ಲಾ ಚಿತ್ರಣವನ್ನು ಗಮನಿಸಿದ ನಂತರ ಇಲ್ಲಿ ಒಂದು ಹೋಟೆಲ್ ಇದ್ದಿರಬಹುದು ಎಂಬ ಅಭಿಪ್ರಾಯಕ್ಕೆ ಬರಲಾಗಿದೆ.

    ಬಹುಶಃ ಜ್ವಾಲಾಮುಖಿ ಸ್ಫೋಟದ ಹಿನ್ನಲೆ ಅಂಗಡಿ ಮುಚ್ಚಿ ಹೋಗಿರಬಹುದು. ಈ ಥರ್ಮೀಪೋಲಿಯಂ ಜನರ ಜೀವನ ಹೇಗಿತ್ತು ಎಂಬುದು ತಿಳಿಯಬಹುದಾಗಿದೆ. ಅಂಗಡಿ ಮಾತ್ರವಲ್ಲದೇ ವ್ಯಕ್ತಿ ಅಸ್ತಪಂಜರವು ದೊರಕಿದೆ. ಸುಮಾರು 50 ವರ್ಷದ ವ್ಯಕ್ತಿ ಎಂದು ಅಂದಾಜಿಸಲಾಗಿದೆ. ರೋಮನ್ ಸಾಮ್ರಾಜ್ಯ ಅತೀ ಶ್ರೀಮಂತ ನಗರದಲ್ಲಿ ಒಂದಾಗಿದ್ದ ಪಾಂಪೆ ಸುಮಾರು 110 ಎಕರೆಯಷ್ಟು ವಿಸ್ತೀರ್ಣವಿದೆ. ಜ್ವಾಲಾಮುಖಿ ಬೂದಿಯಡಿ ಹಲವು ಕಟ್ಟಡಗಳು ಅನೇಕ ವಸ್ತುಗಳು ಹಾಗೂ ಮೃತದೇಹಗಳು ಇಲ್ಲಿ ಹುದುಗಿಹೋಗಿದೆ ಎಂದು ಎಂದು ಆರ್ಕಿಯಾಲಾಜಿಕಲ್ ಪಾಕ್ ಆಫ್ ಪಾಂಪೆಯ ನಿರ್ದೇಶಕ ಮಸ್ಸೀಮೋ ಒಸ್ಸಾನಾ ಹೇಳಿದ್ದಾರೆ.

  • ವಿಶ್ವದ ಅತ್ಯಂತ ಬೆಲೆ ಬಾಳುವ ಹ್ಯಾಂಡ್ ಬ್ಯಾಗ್- 52 ಕೋಟಿ ಬೆಲೆ, ವಿಶೇಷತೆ ಏನು ಗೊತ್ತಾ?

    ವಿಶ್ವದ ಅತ್ಯಂತ ಬೆಲೆ ಬಾಳುವ ಹ್ಯಾಂಡ್ ಬ್ಯಾಗ್- 52 ಕೋಟಿ ಬೆಲೆ, ವಿಶೇಷತೆ ಏನು ಗೊತ್ತಾ?

    ರೋಮ್: ಇಟಲಿಯ ಐಷಾರಾಮಿ ವಸ್ತುಗಳ ಬ್ರಾಂಡ್ ಆಗಿರುವ ಬೋರಿನಿ ಮಿಲನೇಸಿ ವಿಶ್ವದ ಅತ್ಯಂತ ಬೆಲೆ ಬಾಳುವ ಹ್ಯಾಂಡ್ ಬ್ಯಾಗ್ ಪರಿಚಯಿಸಿದ್ದು, ಇದರ ಬೆಲೆ ಬರೋಬ್ಬರಿ 52 ಕೋಟಿ ರೂ. ಆಗಿದೆ.

    ಬೊಲುಗ್ನಾ ಮೂಲದ ಬ್ರಾಂಡ್ ಆಗಿರುವ ಬೋರಿನಿ ಮಿಲನೇಸಿ ಕೇವಲ ಮೂರು ಐಷಾರಾಮಿ ಪರ್ವಾ ಮೀ ಬ್ಯಾಗ್‍ಗಳನ್ನು ಉತ್ಪಾದಿಸಿದೆ. ಪ್ರತಿ ಬ್ಯಾಗ್ ತಯಾರಿಸಲು 1 ಸಾವಿರ ಗಂಟೆಗಳ ಕಾಲ ಕೆಲಸ ಮಾಡಬೇಕಾಗುತ್ತದೆ ಎಂದು ವರದಿಯಾಗಿದೆ. ಈ ಬ್ಯಾಗ್ ಕುರಿತು ಬೋರಿನಿ ಮಿಲನೇಸಿ ಇನ್‍ಸ್ಟಾಗ್ರಾಮ್‍ನಲ್ಲಿ ಹಂಚಿಕೊಂಡಿದ್ದು, ಬ್ಯಾಗ್ ಮಾರಾಟದಿಂದ ಬಂದ ಆದಾಯದಲ್ಲಿ ಒಂದು ಭಾಗವನ್ನು ಸಮುದ್ರ ಸ್ವಚ್ಛಗೊಳಿಸುವ ಕಾರ್ಯಕ್ಕೆ ದಾನವಾಗಿ ನೀಡಲಾಗುವುದು ಎಂದು ಘೋಷಿಸಿದೆ.

    6 ಮಿಲಿಯನ್ ಯೂರೋ (52 ಕೋಟಿ ರೂ.) ಬೆಲೆ ಬಾಳುವ ಬ್ಯಾಗ್‍ನ್ನು ಪರಿಚಯಿಸಲು ನಮಗೆ ಹೆಮ್ಮೆಯಾಗುತ್ತದೆ. ಇದು ವಿಶ್ವದ ಅತ್ಯಂತ ಬೆಲೆ ಬಾಳುವ ಬ್ಯಾಗ್ ಎಂಬುದು ಮತ್ತೊಂದು ವಿಶೇಷ. ಪ್ಲಾಸ್ಟಿಕ್‍ನಿಂದ ಮಲಿನವಾಗುತ್ತಿರುವ ಸಮುದ್ರವನ್ನು ರಕ್ಷಿಸಬೇಕಿದ್ದು, ಈ ಕುರಿತು ಅರಿವು ಮೂಡಿಸುವ ಉದ್ದೇಶದಿಂದ ಈ ಬ್ಯಾಗ್ ತಯಾರಿಸಲಾಗಿದೆ. ಈ ಪೈಕಿ 800 ಸಾವಿರ ಯೂರೋಗಳನ್ನು ಸಮುದ್ರವನ್ನು ಸ್ವಚ್ಛಗೊಳಿಸುವ ಕಾರ್ಯಕ್ಕೆ ದಾನ ನೀಡಲಾಗುತ್ತಿದೆ ಎಂದು ಸಂಸ್ಥೆ ತನ್ನ ಇನ್‍ಸ್ಟಾಗ್ರಾಮ್‍ನಲ್ಲಿ ಬರೆದುಕೊಂಡಿದೆ.

     

    View this post on Instagram

     

    A post shared by BOARINI MILANESI (@boarinimilanesi)

    ಬ್ಯಾಗ್ ಸೆಮಿ ಶೈನಿ ಅಲಿಗೇಟರ್ ಹೊದಿಕೆ ಹೊಂದಿದ್ದು, 10 ಬಿಳಿ ಚಿನ್ನದ ಚಿಟ್ಟೆಗಳು ಹಾಗೂ ವಜ್ರದ ಕೊಕ್ಕೆಗಳಿಂದ ಬ್ಯಾಗ್ ಮೇಲ್ಭಾಗದಲ್ಲಿ ಅಲಂಕರಿಸಲಾಗಿದೆ. 10 ಚಿಟ್ಟೆಗಳಲ್ಲಿ ನಾಲ್ಕು ವಜ್ರ ಹಾಗೂ ಮೂರು ನೀಲಮಣಿ ಹಾಗೂ ಅಪರೂಪದ ಪ್ಯಾರೈಬಾ ಟೂರ್‍ಮ್ಯಾಲೈನ್‍ಗಳಿಂದ ಅಲಂಕರಿಸಲಾಗಿದೆ. ಸಮುದ್ರದಿಂದ ಪ್ರೇರಿತಗೊಂಡು ನೀಲಿ ಬಣ್ಣದಲ್ಲಿ ಚೀಲವನ್ನು ವಿನ್ಯಾಸ ಮಾಡಲಾಗಿದ್ದು, ಕಲ್ಲುಗಳ ಆಕಾರದ ಡಿಸೈನ್ ಮಾಡಲಾಗಿದೆ ಎಂದು ಸುದ್ದಿ ಸಂಸ್ಥೆ ವರದಿ ಮಾಡಿದೆ.

    ಬೋರಿನಿ ಮಿಲನೇಸಿ ಸಹ-ಸಂಸ್ಥಾಪಕ ಮ್ಯಾಟಿಯೊ ರೊಡಾಲ್ಫೊ ಮಿಲನೇಸಿ ಅವರು ತಮ್ಮ ತಂದೆಯ ನೆನಪಿನ ಗೌರವಾರ್ಥವಾಗಿ ಇದನ್ನು ಸಮರ್ಪಿಸಿದ್ದಾರೆ.

    ಬ್ಯಾಗ್ ವಿನ್ಯಾಸಕರಾದ ಕೊರೊಲಿನಾ ಬೋರಿನಿ ಈ ಕುರಿತು ಮಾಹಿತಿ ನೀಡಿ, ನೀಲಮಣಿಗಳು ಸಾಗರದ ಆಳವನ್ನು ಪ್ರತಿನಿಧಿಸುತ್ತವೆ. ಪ್ಯಾರೈಬಾ ಟೂರ್ ಮ್ಯಾಲಿನ್ ಅಸಂಖ್ಯಾತ ಕೆರಿಬಿಯನ್ ಸಮುದ್ರಗಳನ್ನು ನೆನಪಿಸುತ್ತವೆ. ಅಲ್ಲದೆ ವಜ್ರಗಳು ನೀರಿನ ಪಾರದರ್ಶಕತೆಯನ್ನು ಬಿಂಬಿಸುತ್ತವೆ ಎಂದು ವಿವರಿಸಿದ್ದಾರೆ. ಬೋರಿನಿ ಮಿಲನೇಸಿ ಕಂಪನಿಯನ್ನು 2016ರಲ್ಲಿ ಇಟಲಿಯಲ್ಲಿ ಸ್ಥಾಪಿಸಲಾಗಿದ್ದು, ಐಶಾರಾಮಿ ವಸ್ತುಗಳನ್ನು ಉತ್ಪಾದಿಸುತ್ತದೆ.

    ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ ಪ್ರಕಾರ ಈಗಿನ ವಿಶ್ವದ ಅತ್ಯಂತ ಬೆಲೆ ಬಾಳುವ ಹ್ಯಾಂಡ್ ಬ್ಯಾಗ್ ಮೌವಾಡ್ ಆಗಿದ್ದು, ಇದು ಹೃದಯದಾಕಾರದಲ್ಲಿದೆ. 1001 ನೈಟ್ಸ್ ಡೈಮಂಡ್ ಪರ್ಸ್, 18 ಕ್ಯಾರೆಟ್ ಚಿನ್ನದಿಂದ ಇದನ್ನು ಮಾಡಲಾಗಿದೆ. 4,517 ವಜ್ರಗಳನ್ನು ಹೊಂದಿದೆ.

  • ಬೀಚಿನಿಂದ 2 ಕೆಜಿ ಮರಳು ಕದ್ದಿದ್ದಕ್ಕೆ ಪ್ರವಾಸಿಗನಿಗೆ 86 ಸಾವಿರ ರೂ. ದಂಡ

    ಬೀಚಿನಿಂದ 2 ಕೆಜಿ ಮರಳು ಕದ್ದಿದ್ದಕ್ಕೆ ಪ್ರವಾಸಿಗನಿಗೆ 86 ಸಾವಿರ ರೂ. ದಂಡ

    ರೋಮ್‌: ಎರಡು ಕೆಜಿ ಮರಳನ್ನು ಕದ್ದಿದ್ದಕ್ಕೆ ಫ್ರಾನ್ಸ್‌ ಪ್ರವಾಸಿಯೊಬ್ಬರಿಗೆ 890 ಪೌಂಡ್‌ (ಅಂದಾಜು 86,633 ರೂ.) ದಂಡ ವಿಧಿಸಲಾಗಿದೆ.

    ಸಾರ್ಡಿನಿಯಾ ಮೆಡಿಟರೇನಿಯನ್‌ ಸಮುದ್ರದಲ್ಲಿ ಇಟಲಿ ದೇಶಕ್ಕೆ ಸೇರಿದ್ದ ದೊಡ್ಡ ದ್ವೀಪವಾಗಿದೆ. ಪ್ರವಾಸಿಗನ ಬಳಿಯಿದ್ದ ಬ್ಯಾಗಿನಲ್ಲಿ 2 ಕೆಜಿ ತೂಕದ ಮರಳು ಇದ್ದ ಹಿನ್ನೆಲೆಯಲ್ಲಿ ದಂಡ ಹಾಕಲಾಗಿದೆ.

    ಸಾರ್ಡಿನಿಯನ್ ಅಧಿಕಾರಿಗಳು ಈ ಬೀಚ್‌ ರಕ್ಷಣೆಯ ಹೊಣೆಯನ್ನು ಹೊತ್ತಿದ್ದಾರೆ. ಇಲ್ಲಿರುವ ಬಿಳಿ ಮರಳು ವಿಶಿಷ್ಟವಾಗಿದ್ದು ಸಂರಕ್ಷಣೆ ಮಾಡಲಾಗುತ್ತಿದೆ. ಪ್ರವಾಸಿಗರು ಸ್ವಲ್ಪ ಪ್ರಮಾಣದಲ್ಲಿ ಮರಳನ್ನು ಕಳ್ಳಸಾಗಣೆ ಮಾಡಿದರೂ ಭಾರೀ ದಂಡವನ್ನು ಎದುರಿಸಬೇಕಾಗುತ್ತದೆ. ದಂಡಗಳಲ್ಲಿ ಒಂದರಿಂದ ಆರು ವರ್ಷಗಳ ಜೈಲು ಶಿಕ್ಷೆ ಸೇರಿದೆ.

    ದ್ವೀಪದಲ್ಲಿರುವ ಸುಂದರವಾದ ಕಡಲತೀರಗಳು ಪ್ರಪಂಚದಾದ್ಯಂತದ ಪ್ರವಾಸಿಗರನ್ನು ಸೆಳೆಯುತ್ತವೆ. ಈ ಕಾರಣಕ್ಕೆ ಭಾರೀ ಸಂಖ್ಯೆಯ ಪ್ರವಾಸಿಗರು ಈ ದ್ವೀಪಕ್ಕೆ ಆಗಮಿಸುತ್ತಾರೆ.

    ಮರಳು ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ದಂಡ ವಿಧಿಸುತ್ತಿರುವುದು ಇದೇ ಮೊದಲೆನಲ್ಲ. ಕಳೆದ ವರ್ಷ ಫ್ರೆಂಚ್ ದಂಪತಿ 14 ಬಾಟಲಿಯಲ್ಲಿ ಮರಳನ್ನು ಸಂಗ್ರಹಿಸಿದ್ದರು. ಒಟ್ಟು ತೂಕ ಮಾಡುವಾಗ 40 ಕೆಜಿ ಮರಳು ಬಾಟಲಿಯಲ್ಲಿತ್ತು. ವಿಚಾರಣೆಯ ಸಂದರ್ಭದಲ್ಲಿ ನಮಗೆ ಇಲ್ಲಿ ಮರಳು ಸಂಗ್ರಹಿಸುವುದು ಅಪರಾಧ ಎಂಬ ವಿಚಾರ ಗೊತ್ತಿರಲಿಲ್ಲ ಎಂದು ತಿಳಿಸಿದ್ದರು. ಸಾರ್ಡಿನಿಯನ್ ಕಡಲತೀರಗಳಿಂದ ಮರಳು, ಬೆಣಚುಕಲ್ಲುಗಳನ್ನು ಸಾಗಿಸುವುದು ಕಾನೂನುಬಾಹಿರ ಎಂದು 2017ರಲ್ಲಿ ಘೋಷಿಸಲಾಗಿದೆ.

    ಮರಳನ್ನು ಸಾಗಾಟಕ್ಕೆ ನಿರ್ಬಂಧ ಇಟಲಿ ಮಾತ್ರ ಇಲ್ಲದೇ ಹಲವು ಕಡೆ ಜಾರಿಯಲ್ಲಿದೆ. ಹವಾಯಿಯಲ್ಲಿ ಕಡಲತೀರದಿಂದ ಮರಳನ್ನು ತೆಗೆಯುವುದು ಅಪರಾಧವಾಗಿದೆ. ಮರಳು ತೆಗೆದರೆ 1 ಲಕ್ಷ ಡಾಲರ್‌(73.24 ಲಕ್ಷ ರೂ.) ದಂಡ ವಿಧಿಸಲಾಗುತ್ತದೆ.. 1947ರ ಕರಾವಳಿ ಸಂರಕ್ಷಣಾ ಕಾಯ್ದೆಯ ಅಡಿ ಇಂಗ್ಲೆಂಡಿನಲ್ಲಿ1 ಸಾವಿರ ಪೌಂಡ್‌( ಅಂದಾಜು 97 ಸಾವಿರ ರೂ.) ದಂಡ ಹಾಕಲಾಗುತ್ತದೆ.

  • ಬರೋಬ್ಬರಿ 8 ವರ್ಷಗಳ ಬಳಿಕ ಗಂಡು ಮಗು ಜನನ- ಗ್ರಾಮದ ಜನಸಂಖ್ಯೆ 29ಕ್ಕೆ ಏರಿಕೆ

    ಬರೋಬ್ಬರಿ 8 ವರ್ಷಗಳ ಬಳಿಕ ಗಂಡು ಮಗು ಜನನ- ಗ್ರಾಮದ ಜನಸಂಖ್ಯೆ 29ಕ್ಕೆ ಏರಿಕೆ

    – ಹಬ್ಬದ ವಾತಾವರಣದಲ್ಲಿ ಹಳ್ಳಿಯ ಜನ

    ರೋಮ್: ಅತೀ ಕಡಿಮೆ ಜನಸಂಖ್ಯೆ ಇರುವ ಇಟಲಿಯ ಪುಟ್ಟ ಗ್ರಾಮವೊಂದರ ಮನೆಯಲ್ಲಿ ಗಂಡು ಮಗುವಿನ ಜನನವಾಗಿದೆ. ಈ ಮೂಲಕ ಬರೋಬ್ಬರಿ 8 ವರ್ಷದ ಬಳಿಕ ಮಗು ಹುಟ್ಟಿದ್ದು, ಹೀಗಾಗಿ ಗ್ರಾಮದ ಜನ ಅದ್ಧೂರಿಯಾಗಿ ಶಿಶುವನ್ನು ಸ್ವಾಗತಿಸಿದ್ದಾರೆ.

    ಲೊಂಬಾರ್ಡಿಯ ಮೌಂಟೇನಿಯಸ್ ಸಮುದಾಯದ ಮೊರ್ಟೆರೋನ್ ನಲ್ಲಿ ಗಂಡು ಮಗು ಜನನದ ಬಳಿಕ ಅಲ್ಲಿನ ಜನಸಂಖ್ಯೆ 29ಕ್ಕೆ ಏರಿಕೆಯಾಯಿತು. ಮಗುವಿಗೆ ಡೇನಿಸ್ ಎಂದು ನಾಮಕರಣ ಕೂಡ ಮಾಡಲಾಗಿದೆ.

    ಗಂಡು ಮಗು ಹುಟ್ಟಿದ್ದೇ ತಡ ಇಡೀ ಸಮುದಾಯದಲ್ಲಿ ಹಬ್ಬದ ವಾತಾವರಣ ನಿರ್ಮಾಣವಾಗಿತ್ತು ಎಂದು ಮೊರ್ಟೆರೋನ್ ಮೇಯರ್ ಇನ್ವರ್ನಿಜಿ ತಿಳಿಸಿದ್ದಾರೆ.

    ಡೇನಿಸ್ ತಂದೆ ಮ್ಯಾಟಿಯೊ ಹಾಗೂ ತಾಯಿ ಸಾರಾ ತಮಗೆ ಗಂಡು ಮಗು ಹುಟ್ಟಿರುವ ವಿಚಾರವನ್ನು ಇಟಾಲಿಯನ್ ಸಂಪ್ರದಾಯದಂತೆ ಘೋಷಣೆ ಮಾಡಿದ್ದಾರೆ. ನೀಲಿ ಬಣ್ಣ ಅಂದ್ರೆ ಗಂಡು, ಪಿಂಕ್ ಬಣ್ಣ ಅಂದ್ರೆ ಹುಡುಗಿ ಎಂದು ಸಾಮಾನ್ಯವಾಗಿ ಗ್ರಹಿಸಲಾಗುತ್ತದೆ. ಅಂತೆಯೇ ಡೇನಿಸ್ ತಂದೆ- ತಾಯಿ ಮನೆ ಬಾಗಿಲಿಗೆ ನೀಲಿ ಬಣ್ಣದ ರಿಬ್ಬನ್ ಕಟ್ಟುವ ಮೂಲಕ ಗಂಡು ಮಗುವಾಗಿರುವ ವಿಚಾರ ತಿಳಿಸಿದ್ದಾರೆ.

    2012ರಲ್ಲಿ ಹೆಣ್ಣು ಮಗು ಹುಟ್ಟಿದ ಬಳಿಕ ಇದೇ ಮೊದಲ ಬಾರಿಗೆ ಹಳ್ಳಿಯಲ್ಲಿ ರಿಬ್ಬನ್ ಕಂಡು ಬಂದಿರುವುದಾಗಿದೆ. ಲೆಕ್ಕೊದ ಅಲೆಸ್ಸಾಂಡ್ರೊ ಮಂಜೋನಿ ಆಸ್ಪತ್ರೆಯಲ್ಲಿ ಡೇನಿಸ್ ಜನನವಾಗಿದ್ದು, ಹುಟ್ಟಿದಾಗ ಈತ 2.6 ಕೆ.ಜಿ ಇದ್ದನು.

    ಈ ಬಗ್ಗೆ ಮಾಧ್ಯಮದ ಜೊತೆ ಮಾತನಾಡಿರುವ ಸಾರಾ, ಕೊರೊನಾ ವೈರಸ್ ಸಾಂಕ್ರಾಮಿಕ ರೋಗದ ಸಮಯದಲ್ಲಿಯೇ ಗರ್ಭಿಣಿಯಾಗಿದ್ದು, ನನಗೆ ಭಾರೀ ಸವಾಲಾಗಿತ್ತು. ಮೊರ್ಟೆರೋನ್ ಬಿಟ್ಟು ಲೊಂಬಾರ್ಡಿ ಪ್ರದೇಶದಲ್ಲಿ ಕೋವಿಡ್ 19 ತನ್ನ ಅಟ್ಟಹಾಸ ಮೆರೆದಿತ್ತು. ಹೀಗಾಗಿ ನಾನು ತುಂಬಾ ಆತಂಕಕ್ಕೀಡಾಗಿದ್ದೆ. ಇಂತಹ ಸಮಯದಲ್ಲಿ ಹೊರಗಡೆ ಹೋಗಲು ಸಾಧ್ಯವಗುತ್ತಿರಲಿಲ್ಲ. ಅಲ್ಲದೆ ಪ್ರೀತಿ ಪಾತ್ರರನ್ನು ಭೇಟಿಯಾಗಲು ಕೂಡ ಅಸಾಧ್ಯವಾಗಿತ್ತು ಎಂದು ತಿಳಿಸಿದ್ದಾರೆ.

    ತಮಗೆ ಗಂಡು ಮಗು ಹುಟ್ಟಿದ ಖುಷಿಗಾಗಿ ಆಸ್ಪತ್ರೆಯಿಂದ ತೆರಳಿ ಇಡೀ ಕುಟುಂಬಕ್ಕೆ ಭರ್ಜರಿ ಪಾರ್ಟಿ ನೀಡಲು ತೀರ್ಮಾನಿಸಿದ್ದೇವೆ. ಈ ಪಾರ್ಟಿಗೆ ಎಲ್ಲರನ್ನೂ ಆತ್ಮೀಯತೆಯಿಂದ ಬರಮಾಡಿಕೊಳ್ಳುತ್ತೇವೆ ಎಂದಿದ್ದಾರೆ.

    ಡೆನಿಸ್ ಜನಿಸುವ ಕೆಲ ವಾರಗಳ ಮೊದಲು ಇಟಲಿಯ ಜನನ ಪ್ರಮಾಣ 2019ರಲ್ಲಿ ದಾಖಲೆಯ ಕನಿಷ್ಟ ಮಟ್ಟವನ್ನು ತಲುಪಿದೆ ಎಂದು ಹೇಳಲಾಗಿತ್ತು. 1862ರಲ್ಲಿ ದಾಖಲೆಗಳು ಪ್ರಾರಂಭವಾದ ಬಳಿಕ ಇದೇ ಮೊದಲು ಅತ್ಯಂತ ಕಡಿಮೆ ಜನನ ಪ್ರಮಾಣ ಹೊಂದಿರುವುದಾಗಿದೆ. ಜನಸಂಖ್ಯೆಯ ಆಧಾರದ ಮೇಲೆ ಮೊರ್ಟೆರೋನ್ ಅನ್ನು ಇಟಲಿಯ ಅತ್ಯಂತ ಚಿಕ್ಕ ಪುರಸಭೆ ಎಂದು ವರ್ಗೀಕರಿಸಲಾಗಿದೆ. ಇತ್ತೀಚೆಗೆ ಮೇಯರ್ ತಂದೆ ನಿಧನರಾಗಿದ್ದು, ಆ ಬಳಿಕ ಜನಸಂಖ್ಯೆ 28ಕ್ಕೆ ಕುಸಿದಿತ್ತು.

    ಪ್ರಸ್ತುತ ನಮ್ಮ ಜನಸಂಖ್ಯೆ 29ಕ್ಕೆ ಏರಿಕೆಯಾಗಿದೆ. ನನ್ನ ಪ್ರಕಾರ ಸದ್ಯ ಯಾರೂ ಗರ್ಭಿಣಿಯರು ಇಲ್ಲ. ಆದರೆ ಇದೀಗ ಗಂಡು ಮಗು ಜನಿಸಿರುವುದು ನಮಗೆ ತುಂಬಾ ಖುಷಿ ತಂದಿದೆ ಎಂದು ಇನ್ವರ್ನಿಜಿ ಖುಷಿ ಹಂಚಿಕೊಂಡಿದ್ದಾರೆ.

  • ವಿಶ್ವಾದ್ಯಂತ 40 ಲಕ್ಷ ದಾಟಿದ ಸೋಂಕಿತರ ಸಂಖ್ಯೆ – 2.76 ಲಕ್ಷ ಮಂದಿ ಬಲಿ

    ವಿಶ್ವಾದ್ಯಂತ 40 ಲಕ್ಷ ದಾಟಿದ ಸೋಂಕಿತರ ಸಂಖ್ಯೆ – 2.76 ಲಕ್ಷ ಮಂದಿ ಬಲಿ

    – 13 ಲಕ್ಷಕ್ಕೂ ಅಧಿಕ ಮಂದಿ ಗುಣಮುಖ
    – ಅಮೆರಿಕ ಒಂದರಲ್ಲೇ 78 ಸಾವಿರ ಮಂದಿ ಸಾವು

    ವಾಷಿಂಗ್ಟನ್: ಇಡೀ ವಿಶ್ವವನ್ನೇ ಕಾಡುತ್ತಿರುವ ಕಿಲ್ಲರ್ ಕೊರೊನಾ ವೈರಸ್ ಅಟ್ಟಹಾಸ ದಿನೇ ದಿನೇ ಹೆಚ್ಚಾಗುತ್ತಿದೆ. ವಿಶ್ವವ್ಯಾಪಿ ಸೋಂಕಿತರ ಸಂಖ್ಯೆ 40.29 ಲಕ್ಷಕ್ಕೆ ಏರಿದ್ದು, ಮಹಾಮಾರಿಗೆ ಬಲಿಯಾದವರ ಸಂಖ್ಯೆ 2,76,484ಕ್ಕೆ ತಲುಪಿದೆ.

    ಜಗತ್ತಿನಾದ್ಯಂತ ಇರುವ ಸೋಂಕಿತರ ಪೈಕಿ ಈವರೆಗೆ 13,94,289 ಮಂದಿ ಗುಣಮುಖರಾಗಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ. ಒಟ್ಟು 212 ರಾಷ್ಟ್ರಗಳು ಹಾಗೂ ಪ್ರಾಂತ್ಯದಲ್ಲಿ ಹಬ್ಬಿರುವ ಕೊರೊನಾ ತನ್ನ ರಣಕೇಕೆ ಮುಂದುವರೆಸಿದೆ. ಅದರಲ್ಲೂ ಅಮೆರಿಕದಲ್ಲಿ ಕೊರೊನಾ ಆರ್ಭಟ ಹೆಚ್ಚಾಗಿದ್ದು, ಸೋಂಕಿತರ ಸಂಖ್ಯೆ 13,22,164ಕ್ಕೆ ಏರಿದ್ದು, 78,616 ಮಂದಿಯನ್ನು ಕಿಲ್ಲರ್ ಕೊರೊನಾ ಬಲಿಪಡೆದಿದೆ. ಹಾಗೆಯೇ ಈವರಗೆ 2,23,749 ಮಂದಿ ಸೋಂಕಿನಿಂದ ಗುಣಮುಖರಾಗಿದ್ದಾರೆ.

    ಕೊರೊನಾ ವೈರಸ್ ಅತೀ ಹೆಚ್ಚು ಹರಡಿರುವ ದೇಶಗಳ ಪಟ್ಟಿಯಲ್ಲಿ ಸ್ಪೈನ್ 2ನೇ ಸ್ಥಾನದಲ್ಲಿದ್ದು, ಇಲ್ಲಿ 2,60,117 ಮಂದಿಗೆ ಸೋಂಕು ತಗುಲಿದೆ. ಈವರೆಗೆ 26,299 ಮಂದಿ ಸಾವನ್ನಪ್ಪಿದ್ದು, 1,68,408 ಮಂದಿ ಕೊರೊನಾದಿಂದ ಗುಣಮುಖರಾಗಿದ್ದಾರೆ. ಇಟಲಿಯಲ್ಲಿ ಸೋಂಕಿತರ ಸಂಖ್ಯೆ 2,17,185ಕ್ಕೆ ತಲುಪಿದೆ. ಈವರೆಗೆ 99,023 ಮಂದಿ ಸೋಂಕಿನಿಂದ ಗುಣಮುಖರಾಗಿದ್ದು, 30,201 ಮಂದಿ ಜೀವ ಕಳೆದುಕೊಂಡಿದ್ದಾರೆ. ಬ್ರಿಟನ್‍ನಲ್ಲೂ ಕೊರೊನಾ ಅಟ್ಟಹಾಸ ಮುಂದುವರೆದಿದ್ದು, ಸೋಂಕಿತರ ಸಂಖ್ಯೆ 2,11,364ಕ್ಕೆ ತಲುಪಿದ್ದು, 31,241 ಮಂದಿ ಸೋಂಕಿಗೆ ಬಲಿಯಾಗಿದ್ದಾರೆ.

    ಭಾರತದಲ್ಲಿಯೂ ಕೊರೊನಾ ಹಾವಳಿ ದಿನೇ ದಿನೇ ಹೆಚ್ಚಾಗುಲೇ ಇದ್ದು, 59,765 ಮಂದಿಗೆ ಈವರೆಗೆ ಸೋಂಕು ತಗುಲಿದ್ದು, 1,986 ಮಂದಿ ಮಹಾಮಾರಿಗೆ ಬಲಿಯಾಗಿದ್ದಾರೆ. 17,897 ಮಂದಿ ಸೋಂಕಿತರು ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ. ಹಾಗೆಯೇ ಪಾಕಿಸ್ತಾನದಲ್ಲಿ 27,474 ಮಂದಿ ಸೋಂಕಿಗೆ ತುತ್ತಾಗಿದ್ದು, 7,756 ಮಂದಿ ಸೋಂಕಿನಿಂದ ಗುಣವಾಗಿ, 618 ಮಂದಿ ಸಾವನ್ನಪ್ಪಿದ್ದಾರೆ.

  • ದೇಶದಲ್ಲಿ ಇಂದು ಒಂದೇ ದಿನ 2,411 ಜನರಿಗೆ ಕೊರೊನಾ

    ದೇಶದಲ್ಲಿ ಇಂದು ಒಂದೇ ದಿನ 2,411 ಜನರಿಗೆ ಕೊರೊನಾ

    – ಮಹಾರಾಷ್ಟ್ರ ಸಿಎಂ ಮನೆಯ ಪೇದೆಗಳಿಗೂ ಸೋಂಕು
    – ವಿಶ್ವದಲ್ಲಿ ಕೊರೊನಾಗೆ 2.40 ಲಕ್ಷ ಮಂದಿ ಬಲಿ

    ನವದೆಹಲಿ: ದೇಶದಲ್ಲಿ ಕೊರೊನಾ ಅಟ್ಟಹಾಸ ಮುಂದುವರಿದಿದ್ದು, ಇವತ್ತು ಒಂದೇ ದಿನ 2,411 ಜನರಲ್ಲಿ ಸೋಂಕು ಪತ್ತೆಯಾಗಿದ್ದು, ಒಟ್ಟು 37,776 ಜನರಿಗೆ ಕೊರೊನಾ ವೈರಸ್ ತಗುಲಿದೆ. 1,223ಜನ ಸಾವನ್ನಪ್ಪಿದ್ದಾರೆ.

    ಮಹಾರಾಷ್ಟ್ರದಲ್ಲಿ ಒಂದೇ ದಿನದಲ್ಲಿ 1,008 ಕೇಸ್ ಪತ್ತೆಯಾಗಿದ್ದು, ಬಾಧಿತರ ಸಂಖ್ಯೆ 11 ಸಾವಿರ ದಾಟಿದೆ. ಮುಂಬೈಯೊಂದರಲ್ಲೇ ಸುಮಾರು 8 ಸಾವಿರ ಸೋಂಕಿತರು ಇದ್ದಾರೆ. ಪೂರ್ವ ದೆಹಲಿಯ ಬೆಟಾಲಿಯನ್‍ನಲ್ಲಿ ಕಾರ್ಯನಿರ್ವಹಿಸುತ್ತಿರುವ 68 ಮಂದಿ ಸಿಆರ್‍ಪಿಎಫ್ ಯೋಧರಿಗೆ ಕೊರೊನಾ ದೃಢವಾಗಿದ್ದು, ಈ ಮೂಲಕ ಇದೇ ಬೆಟಾಲಿಯನ್‍ನ 122 ಮಂದಿ ಸಿಆರ್‍ಪಿಎಫ್ ಯೋಧರಿಗೆ ಸೋಂಕು ವ್ಯಾಪಿಸಿದೆ. ಸದ್ಯ 1,100 ಯೋಧರನ್ನು ಕ್ವಾರಂಟೈನ್‍ನಲ್ಲಿ ಇಡಲಾಗಿದೆ.

    ಮಹಾರಾಷ್ಟ್ರ ಸಿಎಂ ಉದ್ಧವ್ ಠಾಕ್ರೆ ಮನೆಯ ಮೂವರು ಪೇದೆಗಳಿಗೆ ಕೊರೊನಾ ಪಾಸಿಟಿವ್ ಬಂದಿದೆ. 130 ಸೆಕ್ಯೂರಿಟಿ ಸಿಬ್ಬಂದಿಯನ್ನು ಕ್ವಾರಂಟೈನ್ ಮಾಡಲಾಗಿದೆ. ನಾಳೆ ಬೆಂಗಳೂರಿನ ವಿಕ್ಟೋರಿಯಾ ಆಸ್ಪತ್ರೆ ಸೇರಿ ಕೊರೊನಾ ಆಸ್ಪತ್ರೆಗಳ ವಾರಿಯರ್ಸ್ ಮೇಲೆ ಭಾರತೀಯ ಸೇನೆ ಹೆಲಿಕಾಪ್ಟರ್ ಮೂಲಕ ಪುಷ್ಪವೃಷ್ಠಿ ಮಾಡಿ ಧನ್ಯವಾದ ಹೇಳಲಿದೆ. ನೌಕಾಪಡೆಯ ಹಡಗುಗಳಲ್ಲಿ ದೀಪವನ್ನು ಬೆಳಗಿಸಲಾಗುತ್ತದೆ.

    ವಿಶ್ವದಲ್ಲಿ ಮಹಾಮಾರಿ ಕೊರೊನಾಗೆ 2.40 ಲಕ್ಷ ಮಂದಿ ಬಲಿಯಾಗಿದ್ದಾರೆ. 34 ಲಕ್ಷಕ್ಕೂ ಅಧಿಕ ಮಂದಿ ಸೋಂಕಿನಿಂದ ಬಳಲುತ್ತಿದ್ದಾರೆ. 11 ಲಕ್ಷದಷ್ಟು ಜನ ಕೊರೊನಾದಿಂದ ಚೇತರಿಸಿಕೊಂಡಿದ್ದಾರೆ. ಅಮೆರಿಕದಲ್ಲಿ 66 ಸಾವಿರ ಮಂದಿ ಸಾವನ್ನಪ್ಪಿದ್ದಾರೆ. 11.34 ಲಕ್ಷ ಮಂದಿ ಸೋಂಕಿತರಿದ್ದಾರೆ. ವಿಶ್ವದಲ್ಲೇ ಅಮೆರಿಕ ಕೊರೊನಾ ಸಾವಿನ ಸಂಖ್ಯೆಯಲ್ಲಿ ಮುಂಚೂಣಿಯಲ್ಲಿದೆ. ಸ್ಪೇನ್‍ನಲ್ಲಿ ಸಾವಿನ ಸಂಖ್ಯೆ 25 ಸಾವಿರ ಗಡಿ ಮುಟ್ಟುತ್ತಿದೆ. 2 ಲಕ್ಷಕ್ಕೂ ಅಧಿಕ ಮಂದಿ ಸೋಂಕಿತರಿದ್ದಾರೆ. ಇಟಲಿ ಕೊರೊನಾ ಸಾವಿನ ಸಂಖ್ಯೆಯಲ್ಲಿ ಸ್ಪೇನ್ ರಾಷ್ಟ್ರವನ್ನೇ ಮೀರಿಸಿದೆ. 28 ಸಾವಿರ ಮಂದಿ ಕೊರೊನಾಗೆ ಬಲಿಯಾಗಿದ್ದಾರೆ. ಇಟಲಿಯಲ್ಲಿ ಕಳೆದ 24 ಗಂಟೆಗಳಲ್ಲಿ 269 ಮಂದಿ ಸಾವನಪ್ಪಿದ್ದಾರೆ.

    ಕೊರೊನಾ ಸೋಂಕಿತರಿಗೆ ತುರ್ತು ಸಂದರ್ಭದಲ್ಲಿ ರೆಮಿಡೆಸಿವರ್ ಲಸಿಕೆ ಪ್ರಯೋಗ ಮಾಡಬಹುದು ಅಂತ ಭಾರತೀಯ ಆಹಾರ ಮತ್ತು ಮಾದಕ ನಿಯಂತ್ರಕ ಸಂಸ್ಥೆ ಹೇಳಿದೆ. ಭಾರತೀಯ ಮತ್ತು ಅಮೆರಿಕ ವೈದ್ಯರ ನೇತೃತ್ವದ ತಂಡ ಲಸಿಕೆ ಬಗ್ಗೆ ಹಲವು ಪ್ರಯೋಗಗಳನ್ನ ನಡೆಸಿದೆ. ಕೊರೊನಾ ಸೋಂಕಿತ ಕೆಲವು ಪ್ರಕರಣಗಳು ವಾಸಿಯಾಗಲು ರೆಮಿಡೆಸಿವರ್ ಸಹಾಯ ಮಾಡಿದೆ ಅಂತಾ ಹೇಳಿದ್ದಾರೆ. ಅಮೆರಿಕದ ಹಲವು ಜಿಲ್ಲೆಗಳಲ್ಲಿ ಈ ಲಸಿಕೆಯನ್ನ ವ್ಯಾಪಕವಾಗಿ ಬಳಸಿರುವ ಉದಾಹರಣೆ ನೀಡಿದೆ.

  • ದೇಶದಲ್ಲಿ 23 ಸಾವಿರ ಗಡಿ ದಾಟಿದ ಕೊರೊನಾ ಸೋಂಕಿತರ ಸಂಖ್ಯೆ

    ದೇಶದಲ್ಲಿ 23 ಸಾವಿರ ಗಡಿ ದಾಟಿದ ಕೊರೊನಾ ಸೋಂಕಿತರ ಸಂಖ್ಯೆ

    – ಅಮೆರಿಕದಲ್ಲಿ 50 ಸಾವಿರಕ್ಕೂ ಅಧಿಕ ಸಾವು

    ನವದೆಹಲಿ: ದೇಶದಲ್ಲಿ ಕೊರೊನಾ ಸಾವಿನ ಸಂಖ್ಯೆ ಕ್ಷಣಕ್ಷಣಕ್ಕೂ ಹೆಚ್ಚುತ್ತಿದ್ದು, 723 ಮಂದಿ ಸೋಂಕಿಗೆ ಬಲಿಯಾಗಿದ್ದಾರೆ. ಸೋಂಕಿತರ ಸಂಖ್ಯೆ 23 ಸಾವಿರ ಗಡಿದಾಟಿದೆ.

    ಕಳೆದೆರಡು ದಿನಗಳಿಂದ ಕೊರೊನಾ ಸೋಂಕಿನ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಲೇ ಇದ್ದು, ಮಹಾಮಾರಿ ಕೊರೊನಾಗೆ ಕೇರಳದಲ್ಲಿ 4 ತಿಂಗಳ ಮಗು ಅಸುನೀಗಿದೆ. ದೇಶದಲ್ಲೇ ಮಹಾರಾಷ್ಟ್ರದಲ್ಲಿ ಸೋಂಕಿತರ ಸಂಖ್ಯೆ ಹೆಚ್ಚಿದೆ. 6,430 ಜನರಿಗೆ ಸೋಂಕು ತಗುಲಿದ್ದು, 283 ಮಂದಿ ಸಾವನಪ್ಪಿದ್ದಾರೆ. ದೆಹಲಿ ಮತ್ತು ಗುಜರಾತ್‍ನಲ್ಲಿ ಸೋಂಕಿತರ ಪ್ರಮಾಣ ಹೆಚ್ಚಾಗುತ್ತಲೇ ಇದ್ದು, 3 ಸಾವಿರ ಗಡಿ ತಲುಪುತ್ತಿದೆ.

    ತಮಿಳುನಾಡಿನಲ್ಲಿ ಕೊರೊನಾ ಬಾದಿತರ ಪ್ರಮಾಣ ಗಣನೀಯವಾಗಿ ಏರುತ್ತಿದೆ. ತಮಿಳುನಾಡು ಸರ್ಕಾರ ಚೆನ್ನೈ, ಮಧುರೈ, ಕೊಯಂಬತ್ತೂರ್‍ನಲ್ಲಿ ಏಪ್ರಿಲ್ 28ರ ವರೆಗೆ ಕಟ್ಟುನಿಟ್ಟಿನ ಲಾಕ್‍ಡೌನ್ ಘೋಷಿಸಿದೆ. ಆಂಧ್ರ ಪ್ರದೇಶದಲ್ಲಿ ಕಳೆದ 24 ಗಂಟೆಗಳಲ್ಲಿ 2 ಹೊಸ ಸಾವು ಪ್ರಕರಣ ಸೇರಿ 29 ಮಂದಿ ಬಲಿಯಾಗಿದ್ದಾರೆ.

    ಯಾವ ರಾಜ್ಯಗಳಲ್ಲಿ ಹೆಚ್ಚು?
    ಮಹಾರಾಷ್ಟ್ರದಲ್ಲಿ 6,430 ಜನರಿಗೆ ಸೋಂಕು ತಗುಲಿದ್ದು, 283 ಜನ ಸಾವನ್ನಪ್ಪಿದ್ದಾರೆ. ಗುಜರಾತ್‍ನಲ್ಲಿ ಸೋಂಕಿತರ ಸಂಖ್ಯೆ 2,624ಕ್ಕೆ ಹೆಚ್ಚಿದರೆ 112 ಜನ ಸಾವನ್ನಪ್ಪಿದ್ದಾರೆ. ದೆಹಲಿಯಲ್ಲಿ 2,376 ಜನರಿಗೆ ಸೋಂಕು ತಗುಲಿದೆ. 50 ಮಂದಿ ಸಾವನ್ನಪ್ಪಿದ್ದಾರೆ. ಮಧ್ಯಪ್ರದೇಶದಲ್ಲಿ 1,852 ಜನರಿಗೆ ಸೋಂಕು ತಗುಲಿದೆ. 83 ಜನ ಅಸು ನೀಗಿದ್ದಾರೆ.

    ವಿಶ್ವ ಮಟ್ಟದಲ್ಲಿ ಸಹ ಕೊರೊನಾ ಸೋಂಕು ವ್ಯಾಪಕವಾಗಿ ಹರಡುತ್ತಿದ್ದು, ಸಾವಿನ ಸಂಖ್ಯೆ 2 ಲಕ್ಷದ ಗಡಿ ತಲುಪುತ್ತಿದೆ. ಸೋಂಕಿತರ ಸಂಖ್ಯೆ 27 ಲಕ್ಷದ ದಾಟಿದೆ. ಅಮೆರಿಕಾದಲ್ಲಿ ಸಾವಿನ, ಸೋಂಕಿತರ ಸಂಖ್ಯೆ ಗಣನೀಯವಾಗಿ ಹೆಚ್ಚುತ್ತಿದೆ. 50,849 ಮಂದಿ ಅಮೆರಿಕದಲ್ಲಿ ಸೋಂಕಿಗೆ ಬಲಿಯಾಗಿದ್ದಾರೆ. 8,92,761 ಮಂದಿ ಸೋಂಕಿನಿಂದ ಬಳಲುತ್ತಿದ್ದಾರೆ. ಸ್ಪೇನ್‍ನಲ್ಲಿ 22,549 ಮಂದಿ ಬಲಿಯಾಗಿದ್ದು, 2,19,764 ಮಂದಿ ಸೋಂಕಿತರಿದ್ದಾರೆ. ಇಟಲಿಯಲ್ಲೂ ಸೋಂಕಿತರ ಪ್ರಮಾಣ ಹೆಚ್ಚುತ್ತಿದ್ದು, 1,89,973 ಮಂದಿ ಸೋಂಕಿನಿಂದ ಬಳಲುತ್ತಿದ್ದಾರೆ. ಬೆಲ್ಜಿಯಂನಲ್ಲಿ ಕಳೆದ 24 ಗಂಟೆಗಳಲ್ಲಿ 189 ಮಂದಿ ಕೊರೊನಾಗೆ ಬಲಿಯಾಗಿದ್ದಾರೆ.

  • ಅಮೆರಿಕ, ಇಂಗ್ಲೆಂಡ್, ಇಟಲಿಗೆ ಹೋಲಿಸಿದ್ರೆ ಭಾರತ ಸೋಂಕಿತರ ಸಂಖ್ಯೆ ಕಡಿಮೆ – ಕೇಂದ್ರ ಸರ್ಕಾರ

    ಅಮೆರಿಕ, ಇಂಗ್ಲೆಂಡ್, ಇಟಲಿಗೆ ಹೋಲಿಸಿದ್ರೆ ಭಾರತ ಸೋಂಕಿತರ ಸಂಖ್ಯೆ ಕಡಿಮೆ – ಕೇಂದ್ರ ಸರ್ಕಾರ

    ನವದೆಹಲಿ: ಅಭಿವೃದ್ಧಿಶೀಲ ದೇಶಗಳಿಗೆ ಹೋಲಿಸಿದರೆ ನಾವು ತೆಗೆದುಕೊಂಡ ಕ್ರಮಗಳಿಂದ ಕೊರೊನಾ ಹರಡುವ ವೇಗ ಕಡಿಮೆಯಾಗಿದೆ ಎಂದು ಎಂದು ಭಾರತ ಸರ್ಕಾರ ತಿಳಿಸಿದೆ.

    ಕಳೆದ 24 ಗಂಟೆಯಲ್ಲಿ ದೇಶದಲ್ಲಿ 1409 ಮಂದಿಗೆ ಸೋಂಕು ಬಂದಿದ್ದು, ಒಟ್ಟು 16,454 ಮಂದಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

    ಅಮೆರಿಕ, ಇಂಗ್ಲೆಂಡ್ ಸೇರಿದಂತೆ ಅಭಿವೃದ್ಧಿಶೀಲ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಗುಣಮುಖರಾದ ರೋಗಿಗಳ ಸಂಖ್ಯೆ ಹೆಚ್ಚಿದೆ. 21,393 ಸೋಂಕಿತರ ಪೈಕಿ 4,257(ಶೇ.20) ಮಂದಿ ಗುಣಮುಖರಾಗಿದ್ದಾರೆ. ಬುಧವಾರ 388 ಮಂದಿ ಗುಣಮುಖರಾಗಿದ್ದಾರೆ ಎಂದು ತಿಳಿಸಿದೆ.

    ಆರೋಗ್ಯ ಸಚಿವಾಲಯ ಜಂಟಿ ಕಾರ್ಯದರ್ಶಿ ಲಾವ್ ಅಗರ್‍ವಾಲ್ ಮಾತನಾಡಿ, 8 ಜಿಲ್ಲೆಗಳಲ್ಲಿ ಕಳೆದ 14 ದಿನಗಳಿಂದ ಯಾವುದೇ ಕೊರೊನಾ ಪ್ರಕರಣಗಳು ಬೆಳಕಿಗೆ ಬಂದಿಲ್ಲ. ಈ ಮೂಲಕ ಕೊರೊನಾ ಪ್ರಕರಣವಿಲ್ಲದ ಜಿಲ್ಲೆಗಳ ಸಂಖ್ಯೆ 78ಕ್ಕೆ ಏರಿಕೆಯಾಗಿದೆ ಎಂದು ತಿಳಿಸಿದರು.

    ಇಟಲಿ, ಇಂಗ್ಲೆಂಡ್, ಸ್ಪೇನ್, ಅಮೆರಿಕದಲ್ಲಿ 5 ಲಕ್ಷಕ್ಕೂ ಹೆಚ್ಚು ಪರೀಕ್ಷೆ ನಡೆದಿದ್ದು, ಈ ದೇಶಗಳಿಗೆ ಹೋಲಿಸಿದರೆ ಭಾರತದಲ್ಲಿ ಕಡಿಮೆ ಮಂದಿಗೆ ಸೋಂಕು ಬಂದಿದೆ. ಈ ವಿಚಾರದಲ್ಲಿ ದಕ್ಷಿಣ ಕೊರಿಯಾ ಭಾರತಕ್ಕಿಂತಲೂ ಉತ್ತಮ ಸ್ಥಿತಿಯಲ್ಲಿದೆ ಎಂದು ಮಾಹಿತಿ ನೀಡಿದರು.

    ಮೇ 3ರ ಲಾಕ್‍ಡೌನ್ ಬಳಿಕ ಕೊರೊನಾ ಸೋಂಕಿತರ ಸಂಖ್ಯೆ ಏರಿಕೆಯಾದರೆ ಏನು ಎಂಬ ಪ್ರಶ್ನೆಗೆ ಐಸಿಎಂಆರ್ ಡಿಜಿ ಬಲರಾಮ್ ಭಾರ್ಗವ್, ಈಗಲೇ ಈ ಪ್ರಶ್ನೆಗೆ ಊಹಿಸಿ ಉತ್ತರ ಹೇಳುವುದು ಕಷ್ಟ. ಆದರೂ ಈಗ ಗ್ರಾಫ್ ನೋಡಿದರೆ ಇಳಿಕೆ ಆಗುತ್ತಿರುವುದು ಕಂಡು ಬರುತ್ತದೆ ಎಂದು ಪ್ರತಿಕ್ರಿಯಿಸಿದರು.