ಬೆಂಗಳೂರು: ಅಪೆಕ್ಸ್, ಡಿಸಿಸಿ ಬ್ಯಾಂಕ್ ಹಾಗೂ ಪ್ಯಾಕ್ಸ್ ಗಳಲ್ಲಿ ಸಾಲ ಪಡೆದು, ಕೊರೊನಾದಿಂದ ಮೃತಪಟ್ಟಿರುವ 10187 ರೈತರ 79.47 ಕೋಟಿ ರೂಪಾಯಿ ಸಾಲಮನ್ನಾ ಮಾಡಲು ಮುಖ್ಯಮಂತ್ರಿಗಳಾದ ಬಿ.ಎಸ್.ಯಡಿಯೂರಪ್ಪ ಅವರು ಚಿಂತನೆ ನಡೆಸಿದ್ದು, ಇನ್ನು ಮೂರ್ನಾಲ್ಕು ದಿನಗಳಲ್ಲಿ ತೀರ್ಮಾನ ತೆಗೆದುಕೊಳ್ಳಲಾಗುವುದು ಎಂದು ಸಹಕಾರ ಸಚಿವರಾದ ಎಸ್.ಟಿ. ಸೋಮಶೇಖರ್ ತಿಳಿಸಿದ್ದಾರೆ.
ಈ ಕುರಿತು ಮಾಧ್ಯಮಗಳೊಂದಿಗೆ ಮಾತನಾಡಿದ ಸೋಮಶೇಖರ್ ಅವರು, ಇನ್ನು ಮೂರರಿಂದ ನಾಲ್ಕು ದಿನದಲ್ಲಿ ಅಪೆಕ್ಸ್ ಬ್ಯಾಂಕ್ ಆಡಳಿತ ಮಂಡಳಿ ಸಭೆ ಸೇರಿ ಸಾಲಮನ್ನಾದ ಬಗ್ಗೆ ತೀರ್ಮಾನವನ್ನು ತೆಗೆದುಕೊಳ್ಳಲಿದ್ದೇವೆ. ಕೋವಿಡ್ ಸಂಕಷ್ಟ ಕಾಲದಲ್ಲಿ ರೈತರ ಸಹಾಯಕ್ಕೆ ಬರಲು ಮುಖ್ಯಮಂತ್ರಿಗಳು ಹಾಗೂ ನಮ್ಮ ಸರ್ಕಾರವು ಸದಾ ಬದ್ಧವಾಗಿದೆ. ಈ ನಿಟ್ಟಿನಲ್ಲಿ ರೈತರಿಗೆ ಇನ್ನು ಮುಂದೂ ಸಹ ಸಾಲ ಸೌಲಭ್ಯಗಳು ಸುಲಭವಾಗಿ ಸಿಗುವಂತೆ ಕ್ರಮವನ್ನು ಕೈಗೊಳ್ಳಲಾಗುತ್ತಿದೆ ಎಂದು ತಿಳಿಸಿದರು. ಇದನ್ನೂ ಓದಿ: ಯಡಿಯೂರಪ್ಪ ಅವ್ರದು ರಾಕ್ಷಸ ಸರ್ಕಾರ: ಸಿದ್ದರಾಮಯ್ಯ
ಕಳೆದ ವರ್ಷ ಸಾಲ ಪಡೆದವರ ಮಾಹಿತಿ
ಕಳೆದ ವರ್ಷ ಅಂದರೆ, 2020-21ನೇ ಸಾಲಿನಲ್ಲಿ 24.50 ಲಕ್ಷ ರೈತರಿಗೆ 15,300 ಕೋಟಿ ರೂಪಾಯಿ ಅಲ್ಪಾವಧಿ, ಮಧ್ಯಮಾವಧಿ ಬೆಳೆ ಸಾಲ ನೀಡುವ ಗುರಿಯನ್ನು ಹೊಂದಲಾಗಿತ್ತು. ಈ ನಿಟ್ಟಿನಲ್ಲಿ ಗುರಿ ಮೀರಿ ಸಾಧನೆ ಮಾಡಿದ್ದು, 25.67 ಲಕ್ಷ ರೈತರಿಗೆ 17,108 ಕೋಟಿ ರೂಪಾಯಿ ಸಾಲ ನೀಡುವ ಮೂಲಕ ಶೇ.114 ಗುರಿ ಸಾಧನೆಯನ್ನು ಮಾಡಲಾಗಿತ್ತು. ಈಗ 25.67 ಲಕ್ಷ ರೈತರಲ್ಲಿ ಕೋವಿಡ್ ನಿಂದ ಮೃತಪಟ್ಟಿರುವ 10,187 ರೈತರ 79.47 ಕೋಟಿ ರೂಪಾಯಿ ಸಾಲಮನ್ನಾ ಮಾಡುವ ಸಂಬಂಧ ಮುಖ್ಯಮಂತ್ರಿಗಳು ಚಿಂತನೆಯನ್ನು ನಡೆಸಿದ್ದಾರೆ ಎಂದು ಮಾಹಿತಿ ನೀಡಿದರು.
ಜಿಲ್ಲೆಯ ಡಿಸಿಸಿ ಬ್ಯಾಂಕ್‍ಗಳಲ್ಲಿ ರೈತರು ಮತ್ತು ಸಾಲ ಮನ್ನಾ ವಿವರ:
1. ಬಾಗಲಕೋಟೆ – 672 ರೈತರ 54,226,261 ರೂಪಾಯಿ ಸಾಲ
2. ಬೆಳಗಾವಿ – 3,334 ರೈತರ 23,84,51,700 ರೂಪಾಯಿ ಸಾಲ
3. ಬಳ್ಳಾರಿ – 357 ರೈತರ 36,598,411 ರೂಪಾಯಿ ಸಾಲ
4. ಬೆಂಗಳೂರು – 381 ರೈತರ 23,672,500 ರೂಪಾಯಿ ಸಾಲ
5. ಬೀದರ್ – 824 ರೈತರ 5,47,68,271 ರೂಪಾಯಿ ಸಾಲ
6. ಚಿಕ್ಕಮಗಳೂರು – 113 ರೈತರ 20,386,020 ರೂಪಾಯಿ ಸಾಲ
7. ಚಿತ್ರದುರ್ಗ – 156 ರೈತರ 16,371,000 ರುಪಾಯಿ ಸಾಲ
8. ದಾವಣಗೆರೆ – 402 ರೈತರ 26,622,071 ರುಪಾಯಿ ಸಾಲ
9. ಹಾಸನ – 454 ರೈತರ 28,642,000 ರುಪಾಯಿ ಸಾಲ
10. ಕಲಬುರಗಿ – 224 ರೈತರ 87,387,76.43 ರೂಪಾಯಿ ಸಾಲ
11. ಕೆನರಾ ಶಿರಸಿ (ಉತ್ತರ ಕನ್ನಡ)- 186 ರೈತರ 17,098,364 ರೂಪಾಯಿ ಸಾಲ
12. ಕೆಸಿಸಿ ಬ್ಯಾಂಕ್ ಧಾರವಾಡ – 376 ರೈತರ 20,710,455 ರೂಪಾಯಿ ಸಾಲ
13. ಕೊಡಗು – 113 ರೈತರ 18,299,040 ರೂಪಾಯಿ ಸಾಲ
14. ಕೋಲಾರ – 147 ರೈತರ 25,409,639 ರೂಪಾಯಿ ಸಾಲ
15. ಮಂಡ್ಯ – 410 ರೈತರ 27,328,268 ರೂಪಾಯಿ ಸಾಲ
16. ಮೈಸೂರು – 281 ರೈತರ 31,399,000 ರೂಪಾಯಿ ಸಾಲ
17. ರಾಯಚೂರು- 237 ರೈತರ 19,203,700 ರೂಪಾಯಿ ಸಾಲ
18. ಶಿವಮೊಗ್ಗ – 307 ರೈತರ 32,701,000 ರೂಪಾಯಿ ಸಾಲ
19. ದಕ್ಷಿಣ ಕನ್ನಡ – 152 ರೈತರ 24,063,450 ರೂಪಾಯಿ ಸಾಲ
20. ತುಮಕೂರು – 307 ರೈತರ 18,722,000 ರೂಪಾಯಿ ಸಾಲ
21. ವಿಜಯಪುರ – 754 ರೈತರ 51,340,000 ರೂಪಾಯಿ ಸಾಲ
ಒಟ್ಟಾರೆಯಾಗಿ 10187 ರೈತರ 794751926.43 ರೂಪಾಯಿ ಸಾಲ ಮನ್ನಾ ಪ್ರಕ್ರಿಯೆ ಪಟ್ಟಿ ಸಿದ್ಧವಾಗಿದೆ.