ಅತ್ಯಾಚಾರಿ ಆರೋಪಿಯನ್ನ ಬೆಲ್ಟ್ ನಿಂದ ಹೊಡೆದ ಸಬ್ ಇನ್ಸ್ ಪೆಕ್ಟರ್- ವಿಡಿಯೋ ವೈರಲ್

ಲಕ್ನೋ: ಅತ್ಯಾಚಾರಿ ಆರೋಪಿಗೆ ಸಬ್ ಇನ್ಸ್ ಪೆಕ್ಟರ್ ಒಬ್ಬರು ಮನಸೋ ಇಚ್ಚೆ ಥಳಿಸಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಈ ಘಟನೆ ಉತ್ತರ ಪ್ರದೇಶದ ಮಾವ್ ನಗರದ ಠಾಣೆಯಲ್ಲಿ ನಡೆದಿದ್ದು, ಇದೀಗ ಅತ್ಯಾಚಾರಿ ಆರೋಪಿಯನ್ನು ಬೆಲ್ಟ್ ನಿಂದ ಹೊಡೆದ ಪೊಲೀಸ್ ಅಧಿಕಾರಿ ವಿರುದ್ಧ ಸಾರ್ವಜನಿಕರು ಆಕ್ರೋಶ ಹೊರಹಾಕಿದ್ದಾರೆ.

ರಾಜನ್ ಮೌರ್ಯ ಎಂಬವರೇ ಆರೋಪಿಯನ್ನು ಥಳಿಸಿದ ಪೊಲೀಸ್ ಅಧಿಕಾರಿ. ರಾಜನ್ ಠಾಣೆಯ ಮುಂಭಾಗದಲ್ಲಿಯೇ ಆರೋಪಿಗೆ ಥಳಿಸಿತ್ತಿರುವಾಗ ಕೆಲವರು ಏನಿದು ಅಂತಾ ಪ್ರಶ್ನೆ ಮಾಡಿದ್ದಾರೆ. ಈ ವೇಳೆ ಬೇಕಾದ್ರೆ ವಿಡಿಯೋ ಮಾಡಿಕೊಳ್ಳಿ ನಾನು ಯಾರಿಗೂ ಹೆದರುವುದಿಲ್ಲ ಅಂತಾ ರಾಜನ್ ಮೌರ್ಯ ಹೇಳಿದ್ದಾರೆ ಅಂತಾ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ವಿಡಿಯೋದಲ್ಲಿ ಏನಿದೆ?: ಮಾವ್ ನಗರದ ಠಾಣೆಯ ಮುಂಭಾಗದಲ್ಲಿ ಅತ್ಯಾಚಾರ ಆರೋಪಿಯನ್ನು ನಿಲ್ಲಿಸಿ ಹಲ್ಲೆ ಮಾಡಲಾಗಿದೆ. ಆರೋಪಿಯ ಕೈ ಗಳನ್ನು ಇಬ್ಬರು ಹಿಡಿದಿದ್ದು, ಹಿಂದಿನಿಂದ ರಾಜನ್ ಮೌರ್ಯ ಬೆಲ್ಟ್ ನಿಂದ ಥಳಿಸಿದ್ದಾರೆ. ಆರೋಪಿ ನೋವಿನಿಂದ ಚೀರಾಡಿದ್ರೂ ಪೊಲೀಸ್ ಅಧಿಕಾರಿ ಥಳಿಸಿದ್ದಾರೆ.

ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ, ಘಟನೆ ಬಗ್ಗೆ ವಿವರಣೆ ಕೇಳಿ ರಾಜನ್ ಮೌರ್ಯ ನೋಟಿಸ್ ಜಾರಿ ಮಾಡಲಾಗಿದೆ. ವಿಡಿಯೋದಲ್ಲಿ ರಾಜನ್ ಆರೋಪಿಗೆ ಥಳಿಸಿದ್ದು ಗಮನಕ್ಕೆ ಬಂದಿದ್ದು, ಈ ಬಗ್ಗೆ ತನಿಖೆ ನಡೆಸಿ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಎಸ್‍ಪಿ ಶಿವಾಜಿ ಶುಕ್ಲಾ ಮಾಧ್ಯಮಗಳಿಗೆ ಸ್ಪಷ್ಟನೆ ನೀಡಿದ್ದಾರೆ.

Sub-Inspector beats up #rape accused with belt, video goes viral

Read @ANI Story | https://t.co/mgu7rnGcWX pic.twitter.com/12zTgu5hNR

— ANI Digital (@ani_digital) April 7, 2018