ಕಪ್ ಕೇಕ್ ತಗೆದುಕೊಂಡನೆಂದು 3 ವರ್ಷದ ತಮ್ಮನನ್ನೇ ಕೊಂದ ಸಹೋದರಿಯರು!

ನ್ಯೂಯಾರ್ಕ್: ಕಪ್ ಕೇಕ್ ಕದ್ದನೆಂದು ಸಹೋದರಿಯರೇ 3 ವರ್ಷದ ತಮ್ಮನನ್ನೇ ಹೊಡೆದು ಕೊಲೆ ಮಾಡಿರುವ ಘಟನೆ ಅಮೆರಿಕದ ಅಟ್ಲಾಂಟಾದಲ್ಲಿ ನಡೆದಿದೆ.

ಕೇಜುವಾನ್ ಮೇಸನ್(3) ಕೊಲೆಯಾದ ಬಾಲಕ. ಕೇಜುವಾನ್ ತನ್ನ ಸಹೋದರಿಯರಾದ ಲ್ಯಾಶಿರ್ಲಿ ಮೋರಿಸ್(27) ಮತ್ತು ಗ್ಲೆಂಡ್ರಿಯಾ ಮೋರಿಸ್(25) ಜೊತೆ ಮನೆಯಲ್ಲಿದ್ದನು. ಆಗ ಅಡುಗೆ ಮನೆಗೆ ಹೋಗಿ ಕಪ್ ಕೇಕ್ ತೆಗೆದುಕೊಂಡಿದ್ದಾನೆ ಎಂದು ಪೊಲೀಸರು ಅಲ್ಲಿನ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಕಪ್ ಕೇಕ್ ತೆಗೆದುಕೊಂಡನೆಂದು ಲ್ಯಾಶಿರ್ಲಿ ಬೇಸ್ ಬಾಲ್ ಬ್ಯಾಟ್‍ನಿಂದ ಕೇಜುವಾನ್‍ಗೆ ಹೊಡೆದಿದ್ದಾಳೆ. ಆಗ ಗ್ಲೆಂಡ್ರಿಯಾ ಕೂಡ ತನ್ನ ಕೈಯಿಂದ ಹೊಡೆದಿದ್ದಾಳೆ. ಜೋರಾಗಿ ತಲೆಗೆ ಹೊಡೆದ ಕಾರಣ ಬಾಲಕ ಸಾವನ್ನಪ್ಪಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.

ಬಾಲಕ ಕಪ್ ಕೇಕ್ ತುಂದು ಉಸಿರುಗಟ್ಟಿ ಸತ್ತ ಎಂದು ಸಹೋದರಿಯರು ಮೊದಲಿಗೆ ನಾಟಕವಾಡಿದ್ದರು. ಆದ್ರೆ ತಾಯಿಗೆ ಈ ಬಗ್ಗೆ ಅನುಮಾನ ಬಂದು ತನಿಖೆ ನಡೆಸಿದ ನಂತರ ಸಹೋದರಿಯರ ಕೃತ್ಯ ಬಯಲಾಗಿದೆ.

ಇಬ್ಬರು ಸಹೋದರಿಯರ ಮೇಲೂ ಕೊಲೆ ಹಾಗೂ ಮಾರಣಾಂತಿಕವಾಗಿ ಹಲ್ಲೆ ಆರೋಪದ ಮೇಲೆ ಪ್ರಕರಣ ದಾಖಲಾಗಿದೆ. ಇವರ ಆರೋಪ ಸಾಬೀತಾದರೆ ಪೆರೋಲ್ ಇಲ್ಲದೇ ತಮ್ಮ ಜೀವನ ಪರ್ಯಂತ ಜೈಲಿನಲ್ಲಿ ಕಳೆಯಬೇಕಾಗುತ್ತದೆ ಎಂದು ವರದಿಯಾಗಿದೆ.