ಬಿಗ್ ಮನೆಯಲ್ಲಿ ತನ್ನ ವೈಯಕ್ತಿಕ ಜೀವನದ ರಹಸ್ಯ ಬಿಚ್ಚಿಟ್ಟ ರ‍್ಯಾಪಿಡ್ ರಶ್ಮಿ

ಬೆಂಗಳೂರು: ಬಿಗ್ ಬಾಸ್ ಸೀಸನ್-6ರಲ್ಲಿ ರ‍್ಯಾಪಿಡ್ ರಶ್ಮಿ ತಮ್ಮ ವೈಯಕ್ತಿಕ ಜೀವನದ ರಹಸ್ಯವನ್ನು ಬಿಚ್ಚಿಟ್ಟಿದ್ದಾರೆ.

ಬಿಗ್ ಬಾಸ್ ಮನೆಯ ಸ್ಪರ್ಧಿಗಳಿಗೆ ‘ನನ್ನ ಕಥೆ’ ಎಂಬ ಚಟುವಟಿಕೆಯನ್ನು ನೀಡಿತ್ತು. ಈ ಚಟುವಟಿಕೆಯಲ್ಲಿ ಸ್ಪರ್ಧಿಗಳು ತಮ್ಮ ಜೀವನದಲ್ಲಿ ನಡೆದ ಕಥೆಗಳನ್ನು ಹೇಳಬೇಕಿತ್ತು. ಈ ವೇಳೆ ರಶ್ಮಿ ತಮ್ಮ ಜೀವನದ ಕಹಿ ನೆನಪನ್ನು ಮನೆಯ ಎಲ್ಲರ ಸಮ್ಮುಖದಲ್ಲಿ ಬಿಚ್ಚಿಟ್ಟಿದ್ದಾರೆ.

ನನಗೆ 2007ರಲ್ಲಿ ಮದುವೆ ಆಗಿತ್ತು. ಆ ಮದುವೆ ಕೇವಲ ಎರಡುವರೆ ವರ್ಷಗಳ ಕಾಲವಿತ್ತು. ಕೆಲವು ಕಾರಣಾಂತರದಿಂದ ಆ ಮದುವೆ ಮುರಿದು ಬಿತ್ತು. ನಾನೇ ಆ ಮದುವೆಯಿಂದ ಹೊರಬಂದು ಡಿವೋರ್ಸ್ ಪಡೆಯಲು ನಿರ್ಧರಿಸಿದೆ. ನನ್ನ ತಾಯಿಗೂ ಡಿವೋರ್ಸ್ ಆಗಿದೆ. ಅವರ ರೀತಿ ನನ್ನ ಜೀವನ ಕೂಡ ಆಗಿದೆ ಎಂದು ಅವರು ಸಾಕಷ್ಟು ನೋವಿನಲ್ಲಿದ್ದರು. ಅಲ್ಲದೇ ನೀನು ಡಿವೋರ್ಸ್ ಪಡೆದರೆ ನನ್ನ ಪಾಲಿಗೆ ಸತ್ತು ಹೋಗಿದ್ದೇಯಾ ಎಂದು ತಿಳಿದುಕೋ ಎಂದು ನನ್ನ ತಾಯಿ ನನಗೆ ಹೇಳಿದರು.

ನಾನು ಡಿವೋರ್ಸ್ ಗೆ ಅರ್ಜಿ ಸಲ್ಲಿಸಿದ್ದಾಗ ನನ್ನ ತಾಯಿ ನನ್ನ ಬಳಿ ಮಾತನಾಡುತ್ತಿರಲಿಲ್ಲ. ಈ ವೇಳೆ ನನ್ನ ತಾಯಿಯ ಗೆಳತಿಯೊಬ್ಬರು ಬಂದು ನಾವಿಬ್ಬರು ಮಾತನಾಡುವ ಹಾಗೆ ಮಾಡಿದ್ದರು. ನಾನು ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದಾಗ ಆಗ ತಾನೇ ನಾನು ಆರ್.ಜೆ ಆಗಿದೆ. ಈ ವಿಷಯ ಎಲ್ಲರಿಗೂ ಗೊತ್ತಾದರೆ ಏನಾಗುತ್ತೋ ಎಂಬ ಭಯ ನನಗೆ ಕಾಡುತ್ತಿತ್ತು ಎಂದು ರಶ್ಮಿ ಹೇಳಿದ್ದಾರೆ.

ವಿಚ್ಛೇದನ ಪಡೆದ ಬಳಿಕ ನನ್ನ ಜೀವನದಲ್ಲಿ ನಾನು ಡೇವಿಸ್ ರನ್ನು ಭೇಟಿ ಮಾಡಿದೆ. ನನ್ನ ಮೊದಲ ಮದುವೆ ಮುರಿದುಬಿದ್ದ ಕಾರಣ ನಾನು ತುಂಬಾ ಬೇಸರದಲ್ಲಿದ್ದೆ. ಈ ವೇಳೆ ಡೇವಿಸ್ ನನಗೆ ಆತ್ಮವಿಶ್ವಾಸ ತುಂಬಿದ್ದರು. ಅಲ್ಲದೇ 2010 ರಿಂದ 2013 ವರೆಗೂ ನಾನು ಹಾಗೂ ಡೇವಿಸ್ ಪ್ರೀತಿಸುತ್ತಿದ್ದೇವು. ಬಳಿಕ ಇಬ್ಬರು ಮದುವೆಯಾಗಲು ನಿರ್ಧರಿಸಿದ್ದೇವು. ಡೇವಿಸ್‍ಗೆ ಇದು ಮೊದಲ ಮದುವೆಯಾಗಿದ್ದು, ಅವರ ಕುಟುಂಬದವರು ನನ್ನನ್ನು ಒಪ್ಪಲಿಲ್ಲ. ಅವರು ಈ ಮದುವೆಯನ್ನು ವಿರೋಧಿಸಿದ್ದರು.

ನಮ್ಮ ಮದುವೆಗೆ ಡೇವಿಸ್ ಅವರ ಕುಟುಂಬದವರು ವಿರೋಧಿಸಿದರು. ಡೇವಿಸ್ ಈ ಬಗ್ಗೆ ತಲೆ ಕೆಡಿಸಿಕೊಳ್ಳದೇ ನನ್ನನ್ನು ಮದುವೆಯಾದರು. ಕಳೆದ 6 ವರ್ಷಗಳ ಹಿಂದೆ ನಾನು ಡೇವಿಸ್ ಜೊತೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟೆ. ಈ ಆರು ವರ್ಷಗಳಲ್ಲಿ ನನ್ನ ಜೀವನ ಚೆನ್ನಾಗಿದೆ ಹಾಗೂ ಡೇವಿಸ್ ನನ್ನನ್ನು ತುಂಬಾ ಚೆನ್ನಾಗಿ ಅರ್ಥ ಮಾಡಿಕೊಳ್ಳುತ್ತಾರೆ. ನಾನು ಸುಮಾರು 12 ವರ್ಷಗಳಿಂದ ಆರ್.ಜೆ ಆಗಿದ್ದೇನೆ. ಇದುವರೆಗೂ ಈ ವಿಷಯ ಯಾರಿಗೂ ಗೊತ್ತಿಲ್ಲ ಎಂದು ರ‍್ಯಾಪಿಡ್ ರಶ್ಮಿ ತಮ್ಮ ಹಳೆಯ ನೆನಪನ್ನು ಮೊದಲ ಬಾರಿಗೆ ಸಾರ್ವಜನಿಕವಾಗಿ ಹೇಳಿದರು.