ಮಳೆಗೆ ಸೋರುತ್ತಿದೆ ವಿಮ್ಸ್ ಆಸ್ಪತ್ರೆಯ ಆಪರೇಷನ್ ಕೊಠಡಿ

ಬಳ್ಳಾರಿ: ಬಳ್ಳಾರಿಯ ವಿಮ್ಸ್ ಆಸ್ಪತ್ರೆಯ ದುಸ್ಥಿತಿ ಮುಂದುವರಿದಿದೆ. ಶಿಥಿಲಾವಸ್ಥೆಯಲ್ಲಿರುವ ಶಸ್ತ್ರಚಿಕಿತ್ಸಾ ಕೊಠಡಿಗಳು ಮಳೆನೀರಿಗೆ ಸೋರುತ್ತಿವೆ.

ಸೆಪ್ಟಂಬರ್ 12ರಂದು ವಿಮ್ಸ್ ಶಸ್ತ್ರಚಿಕಿತ್ಸೆಯ ನೆಲಮಹಡಿ ಸೀಲಿಂಗ್ ಸೋರಿಕೆಯಾಗಿ ಕುಸಿದುಬಿದ್ದಿತ್ತು. ಇದೀಗ ಆಸ್ಪತ್ರೆಯ ಎರಡನೇ ಮಹಡಿಯಲ್ಲಿರುವ ಯುರಾಲಜಿ ಶಸ್ತ್ರಚಕಿತ್ಸೆ ಕೊಠಡಿಯ ಛಾವಣಿ ಮಳೆ ನೀರಿನಿಂದ ಸೋರುತ್ತಿದ್ದು, ನೀರಿನಿಂದ ಆವೃತವಾಗಿದೆ. ಕೊಠಡಿಯಲ್ಲಿದ್ದ ಉಪಕರಣಗಳು ಹಾಗೂ ಇನ್ನಿತರ ವಸ್ತುಗಳ ಮೇಲೆ ಮಳೆ ನೀರು ಬಿದ್ದಿದ್ದು, ಓಟಿ ಕೊಠಡಿ ಸ್ವಚ್ಛವಾಗಿಡಲು ಸಿಬ್ಬಂದಿ ಹರಸಾಹಸ ಪಡುತ್ತಿದ್ದಾರೆ.

ದುಸ್ಥಿತಿಯಲ್ಲಿರುವ ಓಟಿ ಕೊಠಡಿಗಳಲ್ಲಿ ಕೆಲಸ ಮಾಡುವುದು ಕಷ್ಟವಾಗುತ್ತದೆ ಎಂದು ವಿಮ್ಸ್ ಪಿಜಿ ವಿದ್ಯಾರ್ಥಿಗಳು ವಿಮ್ಸ್ ನಿರ್ದೇಶಕರಿಗೆ ಪತ್ರ ಬರೆದಿದ್ದಾರೆ. ಕಳೆದೆರಡು ದಿನಗಳ ಮಳೆಗೆ ವಿಮ್ಸ್ ಆಸ್ಪತ್ರೆಯ ಹಳೆಯ ಕಟ್ಟಡ ಇನ್ನಷ್ಟು ದುಸ್ಥಿತಿಯತ್ತ ತಲುಪಿದೆ.