ಮೇಯರ್, ಆಯುಕ್ತರು ಆದೇಶಿಸಿದ್ರೂ ಪೌರಕಾರ್ಮಿಕರಿಗೆ ಇನ್ನೂ ಸಂಬಳವಾಗಿಲ್ಲ!

ಬೆಂಗಳೂರು: ನಗರದ ಪೌರ ಕಾರ್ಮಿಕರ ಪರಿಸ್ಥಿತಿ ದೇವರು ಕೊಟ್ರೂ ಪೂಜಾರಿ ಕೊಡ್ತಿಲ್ಲ ಎಂಬಂತಾಗಿದೆ. ಎಲ್ಲಾ ಪೌರಕಾರ್ಮಿಕರ ಅಕೌಂಟ್ ಗೂ ಸಂಬಳ ಹಾಕಿ ಅಂತ ಆದೇಶ ಆಗಿ ಎರಡು ದಿನವಾದ್ರೂ ದುಡ್ಡು ಮಾತ್ರ ಇನ್ನೂ ಬಿದ್ದಿಲ್ಲ.

ಈ ಬಗ್ಗೆ ಗುರುವಾರ ಬಿಬಿಎಂಪಿ ಕೌನ್ಸಿಲ್ ಸಭೆಯಲ್ಲಿ ಆಗ್ರಹ, ಆದೇಶವಾಗಿದೆ. ಆದ್ರೆ ಪೌರಕಾರ್ಮಿಕರ ಸಂಬಳ ಮಾತ್ರ ಇನ್ನೂ ಆಗಿಲ್ಲ. ಈ ಮೂಲಕ ಮೇಯರ್ ಆದೇಶ, ಆಯುಕ್ತರ ಆದೇಶಕ್ಕೂ ಬೆಲೆ ಇಲ್ಲವಾಯ್ತಾ ಎನ್ನುವ ಪ್ರಶ್ನೆಯೊಂದು ಅಲ್ಲಿನ ಕಾರ್ಮಿಕರಲ್ಲಿ ಮೂಡಿದೆ.

ಇಂದು ಸಂಜೆ ಒಳಗೆ ಸಂಬಳ ಆಗದಿದ್ರೆ ಮುಷ್ಕರಕ್ಕಿಳಿಯಲು ಗುತ್ತಿಗೆ ಪೌರಕಾರ್ಮಿಕರ ಚಿಂತನೆ ನಡೆಸಿದ್ದಾರೆ. ಹೀಗಾಗಿ ಒಂದು ವೇಳೆ ಸಂಬಳ ಆಗದಿದ್ರೆ ಮತ್ತೊಮ್ಮೆ ಬೆಂಗಳೂರು ಕಸ ರಾಷ್ಟ್ರ, ಅಂತಾರಾಷ್ಟ್ರೀಯ ಸುದ್ದಿಯಾಗೋ ಸಾಧ್ಯತೆ ಇದೆ.

ಜನವರಿಯಿಂದ ಇಲ್ಲಿಯ ತನಕ ಬಿಬಿಎಂಪಿಯು 27 ಕೋಟಿ ರೂಪಾಯಿ ಸಂಬಳ ಬಾಕಿ ಉಳಿಸಿಕೊಂಡಿದೆ. 27 ಕೋಟಿ ರೂಪಾಯಿ ಸಂಬಳ ಬಿಡುಗಡೆ ಆದೇಶವಾದ್ರೂ ಪೌರಕಾರ್ಮಿಕರ ಅಕೌಂಟ್ ಗೆ ಮಾತ್ರ ಅಧಿಕಾರಿಗಳು ಸಂಬಳ ಹಾಕಿಲ್ಲ ಅಂತ ಪೌರ ಕಾರ್ಮಿಕರು ಕಿಡಿಕಾರಿದ್ದಾರೆ.