ತಾಯಿಯ ಅಕ್ರಮ ಸಂಬಂಧಕ್ಕೆ 14ರ ಮಗಳು ಬಲಿ

ಕೋಲಾರ: ತಾಯಿಯ ಅಕ್ರಮ ಸಂಬಂಧಕ್ಕೆ ಮಗಳು ಬಲಿಯಾಗಿರುವ ಅಮಾನವೀಯ ಘಟನೆ ಕೋಲಾರದಲ್ಲಿ ನಡೆದಿದೆ.

ಮುಳಬಾಗಿಲು ತಾಲೂಕಿನ ಭೀಮಾಪುರ ಗ್ರಾಮದ ಸಿರಿಷಾ (14) ಕೊಲೆಯಾದ ಬಾಲಕಿ. ತಾಯಿ ತನ್ನ ಪ್ರಿಯಕರನ ಜೊತೆ ಸೇರಿ 14 ವರ್ಷದ ಮಗಳನ್ನ ಕೊಂದಿದ್ದಾಳೆ. ಸದ್ಯಕ್ಕೆ ಆರೋಪಿ ತಾಯಿ ಕೋಲಾರ ಪೊಲೀಸರ ಅತಿಥಿಯಾಗಿದ್ದಾಳೆ.

ಇದೇ ತಿಂಗಳ 24 ರಂದು ಕೋಲಾರ ಜಿಲ್ಲೆಯ ಮಾಲೂರು ತಾಲೂಕಿನ ತೊರ್ನಹಳ್ಳಿ ಬಳಿ ಅಪರಿಚಿತ ಶವ ಪತ್ತೆಯಾಗಿತ್ತು. ಬಳಿಕ ಮಾಲೂರು ಪೊಲೀಸರು ಈ ಬಗ್ಗೆ ದೂರು ದಾಖಲಿಸಿಕೊಂಡು ತನಿಖೆಯನ್ನು ಮಾಡಿ ಈ ಪ್ರಕರಣವನ್ನ ಭೇದಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಸದ್ಯಕ್ಕೆ ಮೃತಳ ಗುರುತು ಪತ್ತೆ ಮಾಡಿ ಕೊಲೆ ಆರೋಪಿಗಳನ್ನ ಬಂಧಿಸಿದ್ದಾರೆ.

ಮೃತ ಸಿರಿಷಾ ತಾಯಿ ಮಾರಕ್ಕ ಹಾಗೂ ಆಕೆಯೊಂದಿಗೆ ಅಕ್ರಮ ಸಂಬಂಧ ಹೊಂದಿರುವ ರಮೇಶ್ ಇಬ್ಬರು ಸೇರಿ ಸಿರಿಷಾಳನ್ನು ಕೊಲೆ ಮಾಡಿದ್ದಾರೆ. ಮೂರು ತಿಂಗಳ ಹಿಂದೆಯಷ್ಟೆ ಸಿರಿಷಾಳ ಮೇಲೆ ಅತ್ಯಾಚಾರ ನಡೆದಿದ್ದು, ಪೋಕ್ಸೋ ಪ್ರಕರಣ ದಾಖಲಾಗಿತ್ತು. ತಾಯಿಯೊಂದಿಗೆ ಅಕ್ರಮ ಸಂಬಂಧ ಹೊಂದಿದ್ದ ರಮೇಶ್ ಮಗಳಿಗೂ ಲೈಂಗಿಕ ಕಿರುಕುಳ ಕೊಟ್ಟಿದ್ದ ಎಂದು ತಿಳಿದು ಬಂದಿತ್ತು.

ತನಿಖೆ ಕೈಗೊಂಡಿದ್ದ ಮುಳಬಾಗಲು ಪೊಲೀಸರಿಗೆ ತಾವಿಬ್ಬರು ಸಿಕ್ಕಿ ಹಾಕಿಕೊಳ್ಳುವ ಭಯದಲ್ಲಿ ಇದೇ ತಿಂಗಳ 24 ರ ಭಾನುವಾರ ತೊರ್ನಹಳ್ಳಿ ಗ್ರಾಮದ ಬಳಿ ಕೊಲೆ ಮಾಡಿ ಗುರುತು ಪತ್ತೆಯಾಗದಂತೆ ಪೆಟ್ರೋಲ್ ಸುರಿದು ಸುಟ್ಟು ಬಿಸಾಡಲಾಗಿತ್ತು. ಪೊಲೀಸರು ತನಿಖೆ ಕೈಗೊಂಡಿದ್ದು, ತಾಯಿ ಹಾಗೂ ಅಕ್ರಮ ಸಂಬಂಧ ಹೊಂದಿದ್ದ ರಮೇಶ್ ನನ್ನ ಬಂಧಿಸಿದ್ದಾರೆ. 12 ವರ್ಷಗಳ ಹಿಂದೆ ಸಿರಿಷಾಳ ತಂದೆ ಸಾವನ್ನಪ್ಪಿದ್ದರು.