ನವದೆಹಲಿ: ವ್ಯಕ್ತಿಯೊಬ್ಬ ತನ್ನ ಮಗನ ಮುಂದೆಯೇ ಪತ್ನಿಯನ್ನ ಸುಮಾರು 25 ಬಾರಿ ಇರಿದು ಬರ್ಬರವಾಗಿ ಹತ್ಯೆ ಮಾಡಿರುವ ಘಟನೆ ದೆಹಲಿಯಲ್ಲಿ ನಡೆದಿದೆ.
36 ವರ್ಷದ ರೇಖಾ ಪತಿಯಿಂದಲೇ ಕೊಲೆಯಾದ ಮಹಿಳೆ. ಇಲ್ಲಿನ ದಿಲ್ಶಂದ್ ಗಾರ್ಡನ್‍ನಲ್ಲಿ ಬುಧವಾರದಂದು ಈ ಘಟನೆ ನಡೆದಿದ್ದು, ಕೊಲೆ ಮಾಡಿದ ನಂತರ ಪರಾರಿಯಾಗಿದ್ದ 43 ವರ್ಷದ ಆರೋಪಿ ವಿನೋದ್(ಬಿನೋದ್ ಬಿಶ್ತ್)ನನ್ನು ಪೊಲೀಸರು ಬಂಧಿಸಿದ್ದಾರೆ.
ರೇಖಾ ಅನೈತಿಕ ಸಂಬಂಧ ಹೊಂದಿದ್ದಾರೆಂದು ಪತಿ ವಿನೋದ್ ಅನುಮಾನಿಸಿದ್ದ. ಇದೇ ವಿಚಾರಕ್ಕೆ ಬುಧವಾರದಂದು ರೇಖಾ ಹಾಗೂ ವಿನೋದ್ ನಡುವೆ ಜಗಳವಾಗಿತ್ತು. ನಂತರ ಜಗಳ ತಾರಕಕ್ಕೇರಿದ್ದು, ವಿನೋದ್ ಸೀದಾ ಅಡುಗೆಮನೆಗೆ ಹೋಗಿ ಚಾಕು ತಂದು 25 ಬಾರಿ ರೇಖಾಗೆ ಇರಿದಿದ್ದಾನೆ. ಈ ವೇಳೆ ಅಮ್ಮನನ್ನು ರಕ್ಷಿಸಲು ಬಂದ 15 ವರ್ಷದ ಮಗ ವಿನೀತ್‍ನನ್ನು ವಿನೋದ್ ತಳ್ಳಿದ್ದಾನೆ. ಮತ್ತೆ ವಿನೀತ್ ಎದ್ದು ಬಂದು ಅಪ್ಪನಿಂದ ಚಾಕು ಕಸಿದುಕೊಳ್ಳಲು ಯತ್ನಿಸಿದಾಗ ವಿನೋದ್ ಮಗನಿಗೂ ಇರಿದಿದ್ದಾನೆ. ಈ ವೇಳೆ ವಿನೀತ್‍ಗೆ ಗಂಭೀರವಾದ ಗಾಯವಾಗಿದೆ. ನಂತರ ವಿನೀತ್ ಅದೇ ಕಾಲೋನಿಯಲ್ಲಿ ವಾಸವಿದ್ದ ರೇಖಾ ಅವರ ಸಹೋದರನಿಗೆ ವಿಷಯ ತಿಳಿಸಿದ್ದಾನೆ. ರೇಖಾ ಸಹೋದರ ಪಲೀಸರಿಗೆ ವಿಷಯ ಮುಟ್ಟಿಸಿದ್ದಾರೆ.
ರೇಖಾ ಅವರ ಸಹೋದರ ಹಾಗೂ ಪೊಲೀಸರು ಸ್ಥಳಕ್ಕೆ ಬರುವಷ್ಟರಲ್ಲಿ ವಿನೋದ್ ಅಲ್ಲಿಂದ ಪರಾರಿಯಾಗಿದ್ದ. ರೇಖಾ ಹಾಗೂ ವಿನೀತ್‍ನನ್ನು ತಕ್ಷಣ ಆಸ್ಪತ್ರೆಗೆ ಕೊಂಡೊಯ್ಯಲಾಗಿದೆ. ಆದ್ರೆ ರೇಖಾ ಅದಾಗಲೇ ಸಾವನ್ನಪ್ಪಿರುವುದಾಗಿ ವೈದ್ಯರು ತಿಳಿಸಿದ್ದು, ವಿನೀತ್‍ಗೆ ಚಿಕಿತ್ಸೆ ನೀಡಿದ್ದಾರೆ.
ರೇಖಾ ಅವರಿಗೆ ಅನೈತಿಕ ಸಂಬಂಧವಿದೆ ಎಂದು ಅನುಮಾನಿಸಿ ಕಳೆದ ಒಂದೂವರೆ ತಿಂಗಳಿನಿಂದ ವಿನೋದ್ ಹೆಂಡತಿ ಜೊತೆ ಜಗಳವಾಡ್ತಿದ್ದ ಎಂದು ತನಿಖೆಯಿಂದ ಗೊತ್ತಾಗಿದೆ. ಟೆಂಟ್ ಹೌಸ್‍ನಲ್ಲಿ ಮ್ಯಾನೇಜರ್ ಆಗಿ ಕೆಲಸ ಮಾಡ್ತಿದ್ದ ವಿನೋದ್ ಪ್ರತಿದಿನ ತನ್ನ ಹೆಂಡತಿಯ ಮೊಬೈಲ್ ಚೆಕ್ ಮಾಡ್ತಿದ್ದ ಹಾಗೂ ಮನೆಯಿಂದ ಹೊರಗೆ ಹೋಗದಂತೆ ಹೆಂಡತಿಗೆ ತಾಕೀತು ಮಾಡಿದ್ದ ಎಂದು ವರದಿಯಾಗಿದೆ.
ರೇಖಾ ಹಾಗೂ ವಿನೋದ್ ಮದುವೆಯಾಗಿ 16 ವರ್ಷಗಳಾಗಿದ್ದು ಇಬ್ಬರು ಮಕ್ಕಳಿದ್ದಾರೆ. ವಿನೀತ್ ಈ ಘಟನೆಯನ್ನು ಕಣ್ಣಾರೆ ನೋಡಿ ಸದ್ಯ ಶಾಕ್‍ನಲ್ಲಿದ್ದಾನೆ. ಮತ್ತೊಬ್ಬ ಮಗ ಅಜ್ಜಿಯ ಮನೆಯಲ್ಲಿದ್ದಾನೆ.
ಆರೋಪಿ ವಿನೋದ್ ಬುಧವಾರದಂದು ಮನೆಗೆ ಹಿಂದಿರುಗಿದಾಗ ಆತನನ್ನು ಬಂಧಿಸಲಾಗಿದೆ ಎಂದು ಡಿಸಿಪಿ ನೂಪುರ್ ಪ್ರಸಾದ್ ತಿಳಿಸಿದ್ದಾರೆ. ಮಗ ವಿನೀತ್ ತನ್ನ ತಂದೆಯೇ ತಾಯಿಯನ್ನು ಕೊಂದ ಬಗ್ಗೆ ಹೇಳಿಕೆ ನೀಡಿದ್ದು, ಪೊಲೀಸರು ಈ ಬಗ್ಗೆ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
Leave a Reply