ಪತ್ನಿ ವಿದೇಶದಲ್ಲಿರೋವಾಗ ಮರು ಮದ್ವೆಗೆ ಯತ್ನ- ಅಳಿಯನ ವಿವಾಹ ತಪ್ಪಿಸಿದ ಅತ್ತೆ

ಮಂಗಳೂರು: ವಿದೇಶದಲ್ಲಿರುವ ಪತ್ನಿಗೆ ಕೈಕೊಟ್ಟು ಮರು ಮದುವೆಯಾಗಲು ಯತ್ನಿಸಿದ ಅಳಿಯನ ವಿವಾಹವನ್ನು ಅತ್ತೆ ನಿಲ್ಲಿಸಿದ ಘಟನೆಯೊಂದು ಬೆಳಕಿಗೆ ಬಂದಿದೆ. ಮಂಗಳೂರಿನ ತೊಕ್ಕೊಟ್ಟಿನಲ್ಲಿ ಇಂದು ನಡೆಯಬೇಕಿದ್ದ ಮದುವೆಯನ್ನು ವರನ ಅತ್ತೆ ನಿಲ್ಲಿಸಿದ್ದಾರೆ.

ವೆಲೇರಿಯನ್ ಡಿಸೋಜ ಎಂಬಾತ ಮುಸ್ಲಿಂ ಧರ್ಮಕ್ಕೆ ಮತಾಂತರಗೊಂಡು ಮರು ಮದುವೆಯಾಗಲು ಸಿದ್ಧತೆ ಮಾಡಿಕೊಂಡಿದ್ದನು. ಮುಸ್ಲಿಂ ಯುವತಿಯನ್ನು ಎರಡನೇ ಮದುವೆಯಾಗಲು ತಯಾರಾಗಿದ್ದನು. ಇಂದು ಮದುವೆ ಎಂದು ಗೊತ್ತಾದ ತಕ್ಷಣ ಪತ್ನಿಯ ತಾಯಿ ಬುಧವಾರ ರಾತ್ರಿಯೇ ಮಹಿಳಾ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ. ಈ ಮೂಲಕ ರಾತ್ರೋ ರಾತ್ರಿ ಪೊಲೀಸರು ಮತ್ತು ಮಹಿಳಾ ಸಂಘಟನೆಯವರು ಮದುವೆ ನಿಲ್ಲಿಸಿದ್ದಾರೆ.

ಪತ್ನಿ ವಿಲ್ಮಾ ಡಿಸೋಜಾಗೆ ನಾಲ್ವರು ಮಕ್ಕಳಿದ್ದು, ದುಬೈನಲ್ಲಿ ಕೆಲಸದಲ್ಲಿದ್ದಾರೆ. ಆದರೆ ವೆಲೇರಿಯನ್ ತನ್ನ ಪತ್ನಿಗೆ ಗೊತ್ತಾಗದಂತೆ ಮತಾಂತರ ಮತ್ತು ಮದುವೆಗೆ ಸಿದ್ಧತೆ ಮಾಡಿಕೊಂಡಿದ್ದಾನೆ.

ವೆಲೇರಿಯನ್, ಮೊಹಮ್ಮದ್ ಶರೀಫ್ ಅಂತ ಹೆಸರು ಬದಲಾಯಿಸಿಕೊಂಡು ಮದುವೆಗೆ ತಯಾರಿ ಮಾಡಿಕೊಂಡಿದ್ದನು. ಈ ವಿಚಾರ ತಿಳೀದ ವಿಲ್ಮಾ, ಮದುವೆ ನಿಲ್ಲಿಸುವಂತೆ ದುಬೈನಿಂದ ತನ್ನ ತಾಯಿ ಮತ್ತು ಮಕ್ಕಳಿಗೆ ಹೇಳಿದ್ದಾರೆ. ಕೂಡಲೇ ವಿಲ್ಮಾ ತಾಯಿ ಜೆಸ್ಸಿಯಿಂದ ಮಹಿಳಾ ಠಾಣೆಗೆ ದೂರು ನೀಡಿದ್ದಾರೆ. ದೂರು ಹಿನ್ನೆಲೆಯಲ್ಲಿ ಮದುವೆ ಮಾಡಿಕೊಳ್ಳದಂತೆ ಪೊಲೀಸರು ಮುಚ್ಚಳಿಕೆ ಬರೆಸಿಕೊಂಡಿದ್ದಾರೆ.