ಗೆಳತಿಯನ್ನು ಮೆಚ್ಚಿಸಲು ಸ್ಟಂಟ್ ಮಾಡಲು ಹೋಗಿ ಯುವಕ ನೇಣಿಗೆ ಶರಣು

– ವಾಟ್ಸಪ್ ವಿಡಿಯೋ ಕಾಲ್‍ನಲ್ಲಿ ದೃಶ್ಯ ಸೆರೆ

ಭೋಪಾಲ್: ಗೆಳತಿಯನ್ನು ಮೆಚ್ಚಿಸುವುದಕ್ಕಾಗಿ ಸ್ಟಂಟ್ ಮಾಡಲು ಹೋಗಿದ್ದ ಯುವಕನೊಬ್ಬ ಆಕಸ್ಮಿಕವಾಗಿ ನೇಣು ಹಾಕಿಕೊಂಡ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.

ದಾಟಿಯಾ ಜಿಲ್ಲೆಯ ಹಿತೇಶ್ ಕುಶ್ವಾಹ (21) ಆಕಸ್ಮಿಕವಾಗಿ ನೇಣು ಹಾಕಿಕೊಂಡ ಯುವಕ. ಮೃತ ಹಿತೇಶ್ ಪುರಸಭೆಯ ಕೌನ್ಸಿಲರ್ ಮಾನ್ಸಿಂಗ್ ಕುಶ್ವಾಹ ಅವರ ಸೋದರಳಿಯನಾಗಿದ್ದು ಈ ಘಟನೆಯು ಸೋಮವಾರ ನಡೆದಿದೆ.

ಆಗಿದ್ದೇನು?:
ಹಿತೇಶ್ ತನ್ನ ಗೆಳತಿಯನ್ನು ಮೆಚ್ಚಿಸಲು ನೇಣು ಹಾಕಿಕೊಳ್ಳುವುದು ಹೇಗೆ ಎಂದು ವಾಟ್ಸಪ್ ಮೂಲಕ ಸೋಮವಾರ ಹೇಳುತ್ತಿದ್ದ. ಒಂದಿಷ್ಟು ಬಟ್ಟೆಗಳನ್ನು ಕಟ್ಟಿದ್ದಾನೆ. ಬಳಿಕ ಬಟ್ಟೆಯನ್ನು ಮೇಲೆ ಕಟ್ಟಿ ಬಕೆಟ್ ಮೇಲೆ ನಿಂತು ಕೊರಳಿಗೆ ನೇಣು ಹಾಕಿಕೊಂಡಿದ್ದಾನೆ. ಈ ವೇಳೆ ಬಕೆಟ್ ಜಾರಿದ್ದು, ಹಿತೇಶ್ ಕೊರಳಿಗೆ ಹಾಕಿಕೊಂಡಿದ್ದ ಗಂಟು ಬಿಗಿದುಕೊಂಡಿದೆ. ಇದರಿಂದಾಗಿ ಒದ್ದಾಡಿ ಒದ್ದಾಡಿ ಪ್ರಾಣ ಬಿಟ್ಟಿದ್ದಾನೆ.

ಹಿತೇಶ್ ಬೆಳಗ್ಗೆ ರೂಮ್‍ನಿಂದ ಹೊರಗೆ ಬಾರದಿದ್ದಾಗ, ಕುಟುಂಬಸ್ಥರು ಬಾಗಿಲು ಬಡಿದಿದ್ದಾರೆ. ಹಿತೇಶ್ ಯಾವುದೇ ಪ್ರತಿಕ್ರಿಯೆ ನೀಡದಿದ್ದಾಗ ಕಿಟಕಿಯ ಬಾಗಿಲು ತೆರೆ ನೋಡಿದ್ದಾರೆ. ಆಗ ಹಿತೇಶ್‍ನ ಮೃತದೇಹವನ್ನು ಕಾಣಿಸಿದ್ದು, ಗಾಬರಿಗೊಂಡ ಕುಟುಂಬಸ್ಥರು ಪೊಲೀಸರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ.

ಘಟನಾ ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಪರಿಶೀಲನೆ ನಡೆಸಿದಾಗ ಮೊಬೈಲ್ ಸಿಕ್ಕಿದ್ದು, ಅದನ್ನು ವಶಕ್ಕೆ ಪಡೆದಿದ್ದಾರೆ. ಮೊಬೈಲ್‍ನಲ್ಲಿ ಹಿತೇಶ್ ನೇಣು ಹಾಕಿಕೊಳ್ಳುವ ದೃಶ್ಯ ಸೆರೆಯಾಗಿದೆ.