ಚೆನ್ನೈ: ಮಹಿಳೆಯೊಬ್ಬರ ಕಿವಿಯೊಳಗೆ ಸೇರಿಕೊಂಡಿದ್ದ ಜಿರಲೆಯನ್ನು ಹೊರತೆಗೆದ ಘಟನೆ ಇತ್ತೀಚೆಗೆ ಚೀನಾದಲ್ಲಿ ನಡೆದಿತ್ತು. ಆದ್ರೆ ಮಹಿಳೆಯ ಮೂಗಿನ ಮೂಲಕ ಜಿರಲೆ ಒಳಹೋಗಿ ತಲೆಯಲ್ಲಿ ಸೇರಿಕೊಂಡಿತ್ತು ಎಂದರೆ ನೀವು ನಂಬಲೇ ಬೇಕು.
ಇಂತಹದ್ದೊಂದು ಘಟನೆ ನಡೆದಿದ್ದು ಬೇರೆಲ್ಲೂ ಅಲ್ಲ, ತಮಿಳುನಾಡಿನಲ್ಲಿ. ಇಲ್ಲಿನ ನಿವಾಸಿ 42 ವರ್ಷದ ಸೆಲ್ವಿ ಅಂದು ಕೆಲಸ ಮುಗಿಸಿ ಸುಸ್ತಾಗಿ ಮನೆಗೆ ಬಂದು ಮಲಗಿದ್ರು. ಮಧ್ಯರಾತ್ರಿ ವೇಳೆಗೆ ಸೆಲ್ವಿ ಅವರ ಮೂಗಿನಿಂದ ಯಾವುದೋ ಕೀಟ ಒಳಹೋದಂತೆ ಅನುಭವವಾಗಿದ್ದು, ಕೂಡಲೇ ಆಕೆಯ ಅಳಿಯನೊಂದಿಗೆ ಹತ್ತಿರದ ಆಸ್ಪತ್ರೆಗೆ ಓಡಿದ್ರು.
ಮನೆಗೆಲಸ ಮಾಡೋ ಸೆಲ್ವಿ ಇಂಜಂಬಕ್ಕಂ ನಿವಾಸಿಯಾಗಿದ್ದು, ಘಟನೆಯ ಬಗ್ಗೆ ನೆನೆಸಿಕೊಳ್ಳುತ್ತಾ, ಮೂಗಿನಲ್ಲಿ ಏನೋ ಓಡಾಡ್ತಿದೆ ಅಂತ ಗೊತ್ತಾದಾಗ ನಿದ್ದೆಗಣ್ಣಿನಲ್ಲೇ ಮೂಗನ್ನು ಒರೆಸಿಕೊಳ್ಳುತ್ತಿದೆ. ಆದ್ರೆ ಅಷ್ಟರಲ್ಲಾಗಲೇ ಅದು ಒಳಹೋಗಿತ್ತು ಎಂದಿದ್ದಾರೆ. ಸೆಲ್ವಿ ಕ್ಲೀನಿಕ್‍ಗೆ ಹೋದಾಗ ವೈದ್ಯರು ಟಾರ್ಚ್ ಹಾಕಿ ನೋಡಿದ್ರು, ಇತರೆ ಕೆಲ ವೈದ್ಯರಿಗೆ ಕರೆ ಮಾಡಿ ವಿಚಾರಿಸಿದ್ರು. ಅದ್ರೆ ನಾನು ಏನೂ ಮಾಡಲಾರೆ ಎಂದು ಬೇರೊಂದು ಆಸ್ಪತ್ರೆಗೆ ಕಳಿಸಿದ್ರು. ಅಲ್ಲಿನ ವೈದ್ಯರು ಮೂಗಿನಲ್ಲಿ ಚರ್ಮ ಬೆಳೆಯುತ್ತಿದೆ ಎಂದು ಹೇಳಿದ್ದರು. ಆದರೆ ಸೆಲ್ವಿಗೆ ಮೂಗಿನಲ್ಲಿ ಕೀಟ ಹರಿದಾಡಿದಾಗಲೆಲ್ಲಾ ಉರಿಯಾಗಿ ಇಡೀ ರಾತ್ರಿ ನೋವು ಅನುಭವಿಸಿದ್ರು.
ಮರುದಿನ ಬೆಳಿಗ್ಗೆ ಸರ್ಕಾರಿ ಸ್ಟ್ಯಾನ್ಲೀ ಮಡಿಕಲ್ ಕಾಲೇಜು ಆಸ್ಪತ್ರೆ ತಲುಪಿದ ಸೆಲ್ವಿಗೆ ವೈದ್ಯರು ನೇಝಲ್(ಮೂಗಿನ)ಎಂಡೋಸ್ಕೋಪಿ ಮಾಡಿದ್ರು. ಆಗ ಮಹಿಳೆ ಅಂದುಕೊಂಡಂತೆ ಜಿರಲೆ ಒಳಹೋಗಿರುವುದು ದೃಢವಾಯ್ತು.
ಬುರುಡೆಯ ತಳದಲ್ಲಿ, ಸೆಲ್ವಿ ಅವರ ಎರಡು ಕಣ್ಣುಗಳ ಮಧ್ಯಭಾಗದಲ್ಲಿ ಜಿರಲೆ ಸೇರಿಕೊಂಡಿತ್ತು. ಅಲ್ಲದೆ ಅದು ಇನ್ನೂ ಜೀವಂತವಾಗಿತ್ತು. ಕೂಡಲೇ ಏನಾದ್ರೂ ಮಾಡದಿದ್ರೆ ಜಿರಲೆ ಒಳಗಡೆಯೇ ಸತ್ತುಹೋಗಿ ಇನ್ಫೆಕ್ಷನ್ ಆಗಿ ಮೆದುಳಿಗೂ ಹರಡುವ ಸಾಧ್ಯತೆಯಿತ್ತು ಎಂದು ವೈದ್ಯರು ಹೇಳಿದ್ದಾರೆ.
ಸದ್ಯ ವೈದ್ಯರು ಯಾವುದೇ ಶಸ್ತ್ರಚಿಕಿತ್ಸೆ ಮಾಡದೆ ಸೆಲ್ವಿ ಅವರ ತಲೆ ಹೊಕ್ಕಿದ್ದ ಜಿರಲೆಯನ್ನ ಹೊರತೆಗೆದಿದ್ದಾರೆ.
ನನ್ನ 30 ವರ್ಷಗಳ ವೃತ್ತಿಜೀವನದಲ್ಲಿ ಇಂತಹ ಪ್ರಕರಣ ನೋಡಿದ್ದು ಇದೇ ಮೊದಲು ಅಂತ ಆಸ್ಪತ್ರೆಯ ಕಿವಿ ಮೂಗು ಗಂಟಲು(ಇಎನ್‍ಟಿ) ವಿಭಾಗದ ಮುಖ್ಯಸ್ಥರಾದ ಡಾ. ಎಮ್‍ಎನ್ ಶಂಕರ್ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.
Leave a Reply