ಹುಬ್ಬಳ್ಳಿಯಲ್ಲಿ ಒಂದೂವರೆ ಗಂಟೆ ಅಗಸದಲ್ಲೇ ಸುತ್ತಿದ ವಿಮಾನ

ಹುಬ್ಬಳ್ಳಿ: ಹವಾಮಾನ ವೈಪರಿತ್ಯದಿಂದಾಗಿ ವಿಮಾನವೊಂದು ಸುಮಾರು ಒಂದೂವರೆ ಗಂಟೆ ಕಾಲ ಆಗಸದಲ್ಲೇ ಸುತ್ತು ಹೊಡೆದ ಘಟನೆ ಹುಬ್ಬಳ್ಳಿಯಲ್ಲಿ ನಡೆದಿದೆ.

ಮಂಗಳವಾರ ಸಂಜೆ 6:36ಕ್ಕೆ ಗೋವಾದಿಂದ ಹೊರಟ 6 ಇ 7998 ನಂಬರಿನ ಇಂಡಿಗೋ ವಿಮಾನ ಸಂಜೆ ಹುಬ್ಬಳ್ಳಿಯಲ್ಲಿ 7:45ಕ್ಕೆ ಲ್ಯಾಂಡ್ ಆಗಬೇಕಿತ್ತು. ಆದರೆ ಹವಾಮಾನ ವೈಪರೀತ್ಯದಿಂದ ಪೈಲೆಟ್ ವಿಮಾನವನ್ನ ಲ್ಯಾಂಡ್ ಮಾಡಲಾಗದೇ ಪರಿದಾಡಿದ್ದಾರೆ. ಹೀಗಾಗಿ ವಿಮಾನ ಲ್ಯಾಂಡ್ ಆಗದ ಪರಿಣಾಮ ವಿಮಾನದಲ್ಲಿದ್ದ 60ಕ್ಕೂ ಹೆಚ್ಚು ಪ್ರಯಾಣಿಕರು ಕೆಲಕಾಲ ಕಂಗಾಲಾಗಿದ್ದರು. ಬಳಿಕ ಪೈಲಟ್ ಚಾಕಚಕ್ಯತೆಯಿಂದ ಸುರಕ್ಷಿತವಾಗಿ ವಿಮಾನವನ್ನ ಲ್ಯಾಂಡಿಂಗ್ ಮಾಡಿದ್ದಾರೆ.

ಹವಾಮಾನ ವೈಪರೀತ್ಯದಿಂದಾಗಿ ವಿಮಾನ ಇಳಿಯಲು ATS (ಏರ್ ಪೋರ್ಟ್ ಟೆಕ್ನಿಕಲ್ ಸರ್ವಿಸಸ್) ನಿಂದ ಅನುಮತಿ ಬಾರದ ಹಿನ್ನೆಲೆಯಲ್ಲಿ, ರೇಡರ್ ಸಿಗ್ನಲ್ ಸರಿಯಾಗಿ ಗ್ರಹಿಸದ ಕಾರಣ ವಿಮಾನ ಇಳಿಯಲು ಅನುಮತಿ ನೀಡಿರಲಿಲ್ಲ. ಹೀಗಾಗಿ ವಿಮಾನ ಕೆಲ ಸಮಯ ಹುಬ್ಬಳ್ಳಿ ವಿಮಾನ ನಿಲ್ದಾಣದ ಸುತ್ತ ತಿರುಗಿದೆ. ಬಳಿಕ ಮತ್ತೊಮ್ಮೆ ಇಳಿಯಲು ಬಂದಾಗಲೂ ಸಿಗ್ನಲ್ ಸಿಗದ ಕಾರಣ ಕೊನೆಯ ಕ್ಷಣದಲ್ಲಿ ಹಿಂತಿರುಗಿದ ಪರಿಣಾಮ ವಿಮಾನದ ಲ್ಯಾಂಡಿಂಗ್ ತಡವಾಗಿದೆ ಎಂದು ತಿಳಿದುಬಂದಿದೆ.

ಸಾಮಾನ್ಯವಾಗಿ 55 ನಿಮಿಷ ತೆಗೆದುಕೊಳ್ಳುವ ವಿಮಾನ ಮಂಗಳವಾರ ನಿಗದಿತ ಸಮಯ 6.55ರ ಬದಲು 19 ನಿಮಿಷ ಮೊದಲು 6.36ಕ್ಕೆ ಗೋವಾದ ದಾಬೋಲಿಮ್ ವಿಮಾನ ನಿಲ್ದಾಣದಿಂದ ಟೇಕಾಫ್ ಆಗಿದೆ. ಅದರೆ ಹುಬ್ಬಳ್ಳಿಯಲ್ಲಿ ಲ್ಯಾಂಡ್ ಆದಾಗ ರಾತ್ರಿ 8.03 ನಿಮಿಷವಾಗಿತ್ತು. ಅಂದ್ರೆ ಸುಮಾರು 7.30ಕ್ಕೆ ರೀಚ್ ಆಗಬೇಕಾದ ವಿಮಾನ 8.03ಕ್ಕೆ ಲ್ಯಾಂಡ್ ಆಗಿದೆ. ಅರ್ಥಾತ್ 1 ಗಂಟೆ 27 ನಿಮಿಷ ವಿಮಾನ ಆಗಸದಲ್ಲಿತ್ತು ಎಂಬುದಾಗಿ ತಿಳಿದು ಬಂದಿದೆ.