ವೈಫೈ ಆಫ್ ಮಾಡಿದ್ದಕ್ಕೆ ವೈಫ್ ಮೇಲೆ ಹಲ್ಲೆ ಮಾಡಿದ ಪತಿ!

ಹೈದರಾಬಾದ್: ಪತಿರಾಯ ಮಧ್ಯರಾತ್ರಿ ಕಳೆದರೂ ಮೊಬೈಲಲ್ಲಿ ಇಂಟರ್‍ನೆಟ್ ಜಾಲಾಡುತ್ತಾ ಕಾಲ ಕಳೆಯುತ್ತಾನೆ ಎಂದು ಪತ್ನಿ ವೈಫೈ ಆಫ್ ಮಾಡಿದ್ದಕ್ಕೆ ಪತಿರಾಯ ರಾಕ್ಷಸನಾಗಿದ್ದಾನೆ. ದುಂಡಿಗಲ್ ಎಂಬಲ್ಲಿ ಘಟನೆ ನಡೆದಿದ್ದು, ಸದ್ಯ ಪತ್ನಿ ರೇಷ್ಮಾ ಸುಲ್ತಾನಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ. ಈಕೆಯ ಪತಿ ಒಮರ್ ಪಾಷಾ ವಿರುದ್ಧ ರೇಷ್ಮಾಳ ಅಜ್ಜಿ ಪುಂಜಗುಟ್ಟ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಆಗಿದ್ದೇನು?: ಬುಧವಾರ ರಾತ್ರಿ ಮನೆಯಲ್ಲಿದ್ದ ಒಮರ್ ಪಾಷಾ ಮೊಬೈಲಲ್ಲಿ ಇಂಟರ್ ನೆಟ್ ಜಾಲಾಟ ಶುರು ಮಾಡಿದ್ದಾನೆ. ಆದರೆ ಮಧ್ಯರಾತ್ರಿ ದಾಟಿದರೂ ಪತಿ ಮೊಬೈಲ್ ಆಫ್ ಮಾಡೋದು ಕಾಣಿಸಲಿಲ್ಲ. ಹೀಗಾಗಿ ರೇಷ್ಮಾ ಸುಲ್ತಾನಾ ವೈಫೈ ರೌಟರ್ ಆಫ್ ಮಾಡಿದ್ದಾಳೆ. ಇದರಿಂದ ಆತನ ಮೊಬೈಲ್ ಇಂಟರ್‍ನೆಟ್ ಸಂಪರ್ಕ ಕಡಿತಗೊಂಡಿದೆ. ಇದರಿಂದ ಸಿಟ್ಟಿಗೆದ್ದ ಪಾಷಾ ರೇಷ್ಮಾ ಮೇಲೆ ತೀವ್ರವಾಗಿ ಹಲ್ಲೆ ನಡೆಸಿದ್ದಾನೆ. ಹಲ್ಲೆಯ ತೀವ್ರತೆಗೆ ರೇಷ್ಮಾ ಬಲಕಣ್ಣಿನ ಕೆಳಭಾಗ ಊದಿಕೊಂಡಿದೆ.

ನನ್ನ ಪತಿ ನನ್ನ ಮುಖ, ಎದೆ ಹಾಗೂ ತಲೆಗೆ ಹೊಡೆದಿದ್ದಾನೆ. ಈತನ ಹೊಡೆತ ತಾಳಲಾರದೇ ನಾನು ಮನೆಯಿಂದ ಹೊರಗೆ ಓಡಿ ಹೋದ ಬಳಿಕ ಹೊಡೆಯುವುದನ್ನು ನಿಲ್ಲಿಸಿದ್ದಾನೆ ಎಂದು ರೇಷ್ಮಾ ಸುಲ್ತಾನಾ ಹೇಳಿದ್ದಾಳೆ. ಇವರಿಬ್ಬರಿಗೂ ಮದುವೆಯಾಗಿ 6 ವರ್ಷವಾಗಿದ್ದು, ಮೂವರು ಹೆಣ್ಣು ಮಕ್ಕಳಿದ್ದಾರೆ.

ಘಟನೆ ಬಗ್ಗೆ ಪ್ರತಿಕ್ರಿಯಿಸಿದ ಪಂಜಗುಟ್ಟ ಪೊಲೀಸ್ ಇನ್ಸ್ ಪೆಕ್ಟರ್ ಎಸ್.ರವೀಂದ್ರ, ಸಂಬಂಧಿಕರು ರಾಜಿ ಸಂಧಾನಕ್ಕೆ ಪ್ರಯತ್ನಿಸುತ್ತಿದ್ದಾರೆ. ಒಂದು ವೇಳೆ ರಾಜಿಯಾಗದಿದ್ದರೆ ಈ ಘಟನೆಯನ್ನು ಮಹಿಳಾ ಪೊಲೀಸ್ ಠಾಣೆಗೆ ವರ್ಗಾಯಿಸುತ್ತೇವೆ. ಅಲ್ಲಿ ಕೌನ್ಸೆಲಿಂಗ್ ಮಾಡಲು ಯತ್ನಿಸುತ್ತೇವೆ. ಇದಾದ ಬಳಿಕವೂ ಪ್ರಯೋಜನವಾಗದಿದ್ದರೆ, ಅಗತ್ಯಬಿದ್ದರೆ ನಂತರ ಪ್ರಕರಣ ದಾಖಲಿಸುತ್ತೇವೆ ಎಂದು ಹೇಳಿದ್ದಾರೆ. ಘಟನೆ ರೇಷ್ಮಾಳ ಅತ್ತೆ ಮನೆಯಲ್ಲೇ ನಡೆದಿದ್ದು, ಸಿಟ್ಟಿಗೆದ್ದ ಒಮರ್ ಆಕೆಯನ್ನು ಸೋಮಾಜಿಗುಡದಲ್ಲಿರುವ ತಾಯಿ ಮನೆಗೆ ತಂದು ಬಿಟ್ಟಿದ್ದಾನೆ ಎಂದು ಹೇಳಿದ್ದಾರೆ.