ಹೊಸ ವಾಹನಗಳ ನೋಂದಣಿ ಶುಲ್ಕ ಹೆಚ್ಚಿಸಲು ಕೇಂದ್ರ ಚಿಂತನೆ

ನವದೆಹಲಿ: ಬೈಕ್, ಕಾರು ಬಳಕೆದಾರರು ಮತ್ತು ಹೊಸ ವಾಹನ ಖರೀದಿ ಮಾಡುವವರಿಗೆ ಶಾಕಿಂಗ್ ನ್ಯೂಸ್ ಲಭಿಸಿದ್ದು, ಹೊಸ ವಾಹನಗಳ ನೋಂದಣಿ ಶುಲ್ಕವನ್ನ ಗಣನೀಯವಾಗಿ ಹೆಚ್ಚಿಸಲು ಪ್ರಧಾನಿ ಮೋದಿ ಸರ್ಕಾರ ಯೋಚಿಸುತ್ತಿದೆ.

ಪೆಟ್ರೋಲ್, ಡೀಸೆಲ್ ಬಳಕೆಗೆ ಕಡಿವಾಣ ಹಾಕಿ ಎಲೆಕ್ಟ್ರಿಕ್ ಚಾಲಿತ ವಾಹನಗಳ ಬಳಕೆಗೆ ಉತ್ತೇಜನ ನೀಡುವ ಸಲುವಾಗಿ ಕೇಂದ್ರ ಸರ್ಕಾರ ಈ ತಂತ್ರ ರೂಪಿಸಿದೆ ಎನ್ನಲಾಗುತ್ತಿದೆ. ಎಲೆಕ್ಟ್ರಿಕ್ ವಾಹನಗಳಿಗೆ ಪ್ರಸ್ತಾವಿತ ನೋಂದಣಿ ಶುಲ್ಕ ಹೆಚ್ಚಳದಿಂದ ವಿನಾಯಿತಿ ನೀಡಲಾಗಿದೆ. ಹೊಸ ವಾಹನಗಳ ಪ್ರಸ್ತಾವಿತ ನೋಂದಣಿ ಶುಲ್ಕ ಈ ರೀತಿ ಇದೆ.

ಹೊಸ ಕಾರುಗಳ ನೋಂದಣಿ ಶುಲ್ಕ ವನ್ನು 600 ರೂ. ನಿಂದ 5 ಸಾವಿರ ರೂ.ಗೆ ಹೆಚ್ಚಳ ಮಾಡುವ ನಿರೀಕ್ಷೆ ಇದೆ. ಹಳೆ ಕಾರುಗಳ ನೋಂದಣಿ ಮರು ಪರಿಷ್ಕರಣೆಗೆ 600 ರೂ. ನಿಂದ 10 ಸಾವಿರ ರೂ.ಗೆ ಹೆಚ್ಚಳ. ಹೊಸ ದ್ವಿಚಕ್ರ ವಾಹನಗಳ ನೋಂದಣಿ ಶುಲ್ಕ 60 ರೂ. ನಿಂದ 1 ಸಾವಿರ ರೂ.ಗೆ ಏರಿಕೆ ಹಾಗೂ ದ್ವಿಚಕ್ರ ವಾಹನಗಳ ನೋಂದಣಿ ಮರು ಪರಿಷ್ಕರಣೆ 50 ರೂ. ನಿಂದ 2 ಸಾವಿರ ರೂ.ಗೆ ಏರಿಕೆ ಆಗುವ ಸಾಧ್ಯತೆ ಇದೆ.

ಹೊಸ ಕ್ಯಾಬ್‍ಗಳ ನೋಂದಣಿ ಶುಲ್ಕ 1 ಸಾವಿರ ರೂ. ನಿಂದ 10 ಸಾವಿರ ರೂ. ಮತ್ತು ಹಳೆ ಕ್ಯಾಬ್‍ಗಳ ನೋಂದಣಿ ಮರು ಪರಿಷ್ಕರಣೆಗೆ 1 ಸಾವಿರ ರೂ. ನಿಂದ 20 ಸಾವಿರ ರೂ.ಗೆ ಏರಿಕೆ ಮಾಡುವ ಸಾಧ್ಯತೆ ಇದೆ. ವಿದೇಶದಿಂದ ಆಮದು ಮಾಡಿಕೊಳ್ಳುವ ದ್ವಿಚಕ್ರ ವಾಹನಗಳ ನೋಂದಣಿ ಶುಲ್ಕ ಮೊತ್ತ 2,500 ರೂ.ನಿಂದ 20 ಸಾವಿರ ರೂ.ಗೆ ಹೆಚ್ಚಳ ಆಗಲಿದೆ. ಆಮದು ಮಾಡಿಕೊಳ್ಳುವ ಇತರೆ ವಾಹನಗಳ ನೋಂದಣಿ ಶುಲ್ಕ 5 ಸಾವಿರ ರೂ. ನಿಂದ 40 ಸಾವಿರ ರೂ.ಗೆ ಏರಿಕೆ ಆಗುವ ನಿರೀಕ್ಷೆ ಇದೆ.