ಚಾಟ್ಸ್ ತಿನ್ನೋಕೆ ಆಗ್ತಿಲ್ಲ, ಮನೆಯಲ್ಲೇ ಮಾಡಿ ಗರಿಗರಿ ಅವಲಕ್ಕಿ

ಕೊರೊನಾ ವೈರಸ್‍ನಿಂದ ಇಡೀ ದೇಶವೇ 21 ದಿನ ಲಾಕ್ ಆಗಿದೆ. ಹೊರಗಡೆ ಹೋಗಿ ಸುತ್ತಾಡಿಕೊಂಡು ಟೈಂ ಪಾಸ್ ಮಾಡೋಣ ಎಂದರೆ ಅದು ಸಾಧ್ಯವಿಲ್ಲ. ಸಂಜೆಯಾದರೆ ಚಾಟ್ಸ್ ಇಲ್ಲ, ಟೀ ಟೈಂನಲ್ಲಿ ತಿನ್ನಲು ಚುರುಮುರಿ, ಚೌಚೌನೂ ಸಿಗುತ್ತಿಲ್ಲ. ಇದೆಲ್ಲರ ನಡುವೆ ಹೇಗಪ್ಪ ಮನೆಯಲ್ಲಿ ಟೈಂ ಪಾಸ್ ಮಾಡೋದು ಅಂತ ಬೇಸರದಲ್ಲಿದ್ದೀರಾ?. ಹೀಗಾಗಿ ನಾವು ನಿಮಗೆ ಚುರುಮುರಿ ಮಾಡುವುದನ್ನು ಹೇಳಿಕೊಡುತ್ತೇವೆ. ದಿನಸಿ ಅಂಗಡಿಯನ್ನು ಸರ್ಕಾರ ಬಂದ್ ಮಾಡಿಲ್ಲ. ಹೀಗಾಗಿ ನಿಮ್ಮ ಮನೆಯಿಂದ ಯಾರಾದರೂ ಒಬ್ಬರೂ ಮಾಸ್ಕ್ ಧರಿಸಿಕೊಂಡು ದಿನಸಿ ಅಂಗಡಿಗೆ ಹೋಗಿ, ಸಾಮಾಜಿಕ ಅಂತರ ಕಾಯ್ದುಕೊಂಡು ಅವಲಕ್ಕಿ, ಕಡಲೆಹಿಟ್ಟು, ಕಡಲೆಬೇಳೆ, ಹೆಸರು ಬೇಳೆ, ಬಟಾಣಿ, ಕಡ್ಲೆಬೀಜ, ಕಡ್ಲೆಕಾಳನ್ನು ತೆಗೆದುಕೊಂಡು ಬನ್ನಿ. ನಿಮಗಾಗಿ ಗರಿಗರಿ ಅವಲಕ್ಕಿ ಮಾಡುವ ವಿಧಾನ ಇಲ್ಲಿದೆ…

ಬೇಕಾಗುವ ಸಾಮಾಗ್ರಿಗಳು
1. ಗಟ್ಟಿ ಅವಲಕ್ಕಿ – ಕಾಲು ಕೆ.ಜಿ
2. ಎಣ್ಣೆ – ಕರಿಯಲು

ಒಗ್ಗರಣೆಗೆ
1. ಎಣ್ಣೆ – 2-3 ಚಮಚ
2. ಸಾಸಿವೆ – ಸ್ವಲ್ಪ
3. ಕೆಂಪು ಮೆಣಸಿನಕಾಯಿ – 6-7
4. ಕಡ್ಲೆಕಾಯಿ ಬೀಜ – 50 ಗ್ರಾಂ
5. ಹುರಿಗಡಲೆ – 50 ಗ್ರಾಂ
6. ಉಪ್ಪು – ರುಚಿಗೆ ತಕ್ಕಷ್ಟು
7. ಇಂಗು – ಚಿಟಿಕೆ
8. ಬೆಳ್ಳುಳ್ಳಿ -2-3 ಎಸಳು
9. ಕರಿಬೇವು – ಸ್ವಲ್ಪ

ಮಾಡುವ ವಿಧಾನ
* ಒಂದು ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಕಾಯಲು ಬಿಡಿ.
* ಈಗ ಕ್ಲೀನ್ ಮಾಡಿದ ಅವಲಕ್ಕಿಯನ್ನು ಹಾಕಿ ಫ್ರೈ ಮಾಡಿಕೊಳ್ಳಿ.
* ಸಣ್ಣ ಸಣ್ಣ ತೂತಿರುವ ಜಾಲರಿ ಬಳಸಿದರೆ ಅವಲಕ್ಕಿ ಫ್ರೈಗೆ ಉತ್ತಮ.
* ಹೆಚ್ಚು ಹೊತ್ತು ಬಿಡಬೇಡಿ. ಕೇವಲ ಸೆಕೆಂಡ್‍ಗಳಲ್ಲಿ ಅವಲಕ್ಕಿ ಫ್ರೈ ಆಗುತ್ತದೆ. ಹೀಗೆ ಎಲ್ಲಾ ಅವಲಕ್ಕಿಯನ್ನು ಫ್ರೈ ಮಾಡಿಕೊಳ್ಳಿ.
* ಈಗ ಒಗ್ಗರಣೆಗೆ ರೆಡಿ ಮಾಡಿಕೊಳ್ಳಿ.
* ಒಂದು ಬಾಣಲೆಗೆ ಎಣ್ಣೆ ಹಾಕಿ ಕಾಯಲು ಬಿಡಿ
* ಈಗ ಸಾಸಿವೆ, ಕರಿಬೇವು, ಕೆಂಪು ಮೆಣಸಿನಕಾಯಿ, ಜಜ್ಜಿದ ಬೆಳ್ಳುಳ್ಳಿ ಹಾಕಿ.
* ನಂತರ ಕಡ್ಲೆಕಾಯಿ ಬೀಜ, ಹುರಿಗಡಲೆ ಹಾಕಿ ಫ್ರೈ ಮಾಡಿ ಸ್ಟೌ ಆರಿಸಿ.
* ಒಗ್ಗರಣೆಗೆ ಫ್ರೈ ಮಾಡಿಕೊಂಡ ಅವಲಕ್ಕಿಯನ್ನು ಸೇರಿಸಿ ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿದರೆ ಫಟಾಫಟ್ ಅಂತ ಗರಿಗರಿ ಅವಲಕ್ಕಿ ಸವಿಯಲು ರೆಡಿ.

ಈ ಲಾಕ್‍ಡೌನ್ ದಿನದಲ್ಲಿ ಸ್ವಲ್ಪ ಜಾಸ್ತಿನೇ ಮಾಡಿಕೊಂಡು ಟೈಂ ಪಾಸ್ ಮಾಡಿ. ಇದನ್ನು ಒಂದು ವಾರಗಳ ಕಾಲ ಇಟ್ಟುಕೊಂಡು ತಿನ್ನಬಹುದು.