ಪ್ರೇಯಸಿಗಾಗಿ ಮತಾಂತರಗೊಂಡು ಮದ್ವೆಯಾಗಿದ್ದ ಯುವಕ ನೇಣಿಗೆ ಶರಣು!

ಗಾಂಧಿನಗರ: ಪ್ರೀತಿಸಿದ ಮುಸ್ಲಿಂ ಮಹಿಳೆಯನ್ನು ಮದುವೆಯಾಗಲು ಇಸ್ಲಾಂ ಧರ್ಮಕ್ಕೆ ಮತಾಂತರನಾಗಿ ಯುವಕನೊಬ್ಬ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಂಡ ಘಟನೆ ಗುಜರಾತ್‍ನಲ್ಲಿ ನಡೆದಿದೆ.

ರಾಜ್‍ಕೋಟ್ ಮೂಲದ ಪಿಯೂಶ್ ಸೋಲಂಕಿ (22) ಅಲಿಯಾಸ್ ಸಲೀಂ ಆತ್ಮಹತ್ಯೆ ಮಾಡಿಕೊಂಡ ಯುವಕ. ಪಿಯೂಶ್ ಸೋಲಂಕಿ 2017ರಲ್ಲಿ ಸಲೀನಾ ಎಂಬವಳ ಜೊತೆಗೆ ಮದುವೆಯಾಗಿದ್ದ. ಜಾಮ್‍ನಗರ ಜಿಲ್ಲೆಯ ಧ್ರೋಲ್‍ನ ಗಾಯತ್ರಿನಗರದಲ್ಲಿ ಜನವರಿ 14ರಂದು ಸಂಜೆ ಮನೆಯಲ್ಲಿ ಪಿಯೂಶ್ ಸೋಲಂಕಿ ನೇಣು ಹಾಕಿಕೊಂಡಿದ್ದಾನೆ.

ಏನಿದು ಪ್ರಕರಣ?:
ಪಿಯೂಶ್ ಸೋಲಂಕಿ ಮುಸ್ಲಿಂ ಮಹಿಳೆ ಸಲೀನಾಳನ್ನು ಪ್ರೀತಿಸಿದ್ದ. ಹೀಗಾಗಿ ಆಕೆಯನ್ನು ಮದುವೆಯಾಗಲು ಇಸ್ಲಾಂ ಧರ್ಮಕ್ಕೆ ಮತಾಂತರನಾಗಿದ್ದ. ಈ ಜೋಡಿ 2017ರಲ್ಲಿ ಮದುವೆಯಾಗಿ ಸಂಸಾರ ನಡೆಸುತ್ತಿದ್ದರು. ಆದರೆ ಸಲೀನಾ ಮಾಜಿ ಪ್ರೇಮಿ ಇದಿರಿಸ್ ಸಿಪಾಯಿ (22) ಮಧ್ಯ ಪ್ರವೇಶ ಮಾಡಿದ್ದು, ತಾನು ಹಾಗೂ ಸಲೀನಾ ಜೊತೆಗೆ ತೆಗೆದುಕೊಂಡ ಅಶ್ಲೀಲ ಫೋಟೋಗಳನ್ನು ಪಿಯೂಶ್‍ಗೆ ತೋರಿಸಿದ್ದಾರೆ. ಅಷ್ಟೇ ಅಲ್ಲದೆ ಸಲೀನಾಳನ್ನು ಬಿಟ್ಟುಬಿಡುವಂತೆ ಎಚ್ಚರಿಕೆ ನೀಡಿದ್ದಾನೆ.

ಮಾಜಿ ಗೆಳೆಯ ಇದಿರಿಸ್ ಪಿಯೂಶ್ ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ್ದ ಎಂದು ಸಲೀನಾ ಬುಧವಾರ ದೂರು ನೀಡಿದ್ದಾಳೆ ಎಂದು ಧ್ರೋಲ್ ಠಾಣೆಯ ಸಬ್ ಇನ್ಸ್ ಪೆಕ್ಟರ್ ಕೆ.ಎಸ್. ಡಲ್ಸಾನಿಯಾ ತಿಳಿಸಿದ್ದಾರೆ.

ಸಲೀನಾ 3 ವರ್ಷಗಳ ಹಿಂದೆ ಮುಸ್ಲಿಂ ಧರ್ಮದ ಪುರುಷನೊಬ್ಬನ ಜೊತೆಗೆ ಮೊದಲ ಮದುವೆಯಾಗಿದ್ದಳು. ಆಗಲೂ ಇದಿರಿಸ್ ಇದೇ ರೀತಿ ಆಕೆಯ ಜೊತೆಗಿದ್ದ ಖಾಸಗಿ ಫೋಟೋಗಳನ್ನು ತೋರಿಸಿದ್ದ. ಇದರಿಂದಾಗಿ ಮದುವೆಯಾದ 15 ದಿನಕ್ಕೆ ಸಲೀನಾ ವಿಚ್ಛೇದನ ಪಡೆದಿದ್ದಳು ಎಂದು ಕೆ.ಎಸ್.ಡಲ್ಸಾನಿಯಾ ಹೇಳಿದ್ದಾರೆ.

ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv