ಆರತಕ್ಷತೆಯಲ್ಲಿ ನೀಡಿದ್ದ ಗಿಫ್ಟ್ ತೆರೆದಾಗ ಸ್ಫೋಟ- ಮದ್ವೆಯಾದ ಐದೇ ದಿನಕ್ಕೆ ವರ ಸಾವು!

ಭುವನೇಶ್ವರ್: ಮದುವೆಯಲ್ಲಿ ಬಂದ ಉಡುಗೊರೆಯನ್ನು ತೆರೆದಾಗ ಅದು ಸ್ಫೋಟವಾಗಿ ವರ ಹಾಗೂ ಆತನ ಅಜ್ಜಿ ಸಾವನ್ನಪ್ಪಿದ್ದು, ವಧುವಿಗೆ ಗಂಭೀರ ಗಾಯಗಳಾಗಿರುವ ಘಟನೆ ಒಡಿಶಾದ ಬೋಲಾಂಗೀರ್ ಜಿಲ್ಲೆಯಲ್ಲಿ ನಡೆದಿದೆ.

5 ದಿನಗಳ ಹಿಂದೆ ಈ ಜೋಡಿಯ ಮದುವೆಯಾಗಿತ್ತು. ಬುಧವಾರದಂದು ಆರತಕ್ಷತೆಯ ಸಮಯದಲ್ಲಿ ಬಂದ ಉಡುಗೊರೆಯನ್ನು ತೆರೆದಾಗ ಸ್ಫೋಟವಾಗಿದೆ. ಆರತಕ್ಷತೆಯಲ್ಲಿ ಈ ಉಡುಗೊರೆ ಯಾರು ನೀಡಿದ್ದು ಎಂದು ನಾವು ತನಿಖೆ ನಡೆಸುತ್ತಿದ್ದೇವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಉಡುಗೊರೆ ಸ್ಫೋಟವಾಗುತ್ತಿದ್ದಂತೆ ಮನೆಯಲ್ಲಿದ್ದ ವರನ ಅಜ್ಜಿ ಸ್ಥಳದಲ್ಲೇ ಸಾವನ್ನಪ್ಪಿದ್ದು, ತೀವ್ರವಾಗಿ ಗಾಯಗೊಂಡಿದ್ದ ವರ ಚಿಕಿತ್ಸೆ ಫಲಿಸದೇ ರೂರ್ಕೆಲಾ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾರೆ. ಸ್ಫೋಟದಿಂದ ವಧುವಿಗೂ ಗಂಭೀರ ಗಾಯಗಳಾಗಿದ್ದು, ಬುರ್ಲಾದ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಈಗಾಗಲೇ ಸಾಕ್ಷಿಗಳನ್ನ ಸಂಗ್ರಹಿಸಲಾಗಿದ್ದು, ತನಿಖೆ ಶುರು ಮಾಡಿಕೊಂಡಿದ್ದೇವೆ ಎಂದು ಪಟ್ನಾಗಢ ಉಪ-ವಿಭಾಗೀಯ ಪೊಲೀಸ್ ಅಧಿಕಾರಿ ಸೆಸ್ದೇವ ಬರಿಹಾ ತಿಳಿಸಿದ್ದಾರೆ. ವರನ ಅಜ್ಜಿಯನ್ನು ಆಸ್ಪತ್ರೆಗೆ ಕರೆತರುವಾಗಲೇ ಅವರು ಸಾವನ್ನಪ್ಪಿದ್ದರು ಹಾಗೂ ಉಡುಗೊರೆ ಸ್ಫೋಟಗೊಂಡಾಗ ಗಾಯಗೊಂಡಿದ್ದ ವರ ಕೂಡ ರೂರ್ಕೆಲಾದ ಇಸ್ಪಟ್ ಜನರಲ್ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾರೆ ಎಂದು ಬೋಲಾಂಗೀರ್ ನ ಮುಖ್ಯ ಜಿಲ್ಲಾ ವೈದ್ಯಕೀಯ ಅಧಿಕಾರಿ ಎಸ್. ಮಿಶ್ರಾ ತಿಳಿಸಿದ್ದಾರೆ.