ಚೆಕಪ್ ವೇಳೆ ವೈದ್ಯನಿಂದ 14 ವರ್ಷದ ಬಾಲಕಿಗೆ ಲೈಂಗಿಕ ಕಿರುಕುಳ

– ಚೆಕಪ್ ನೆಪದಲ್ಲಿ ಟೀ ಶರ್ಟ್ ಕಡೆ ಕೈ ಜಾರಿಸಿದ ವೈದ್ಯ

ಮುಂಬೈ: ಚೆಕಪ್‍ಗೆ ತೆರಳಿದಾಗ ವೈದ್ಯನೇ 14 ವರ್ಷದ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿರುವ ಅಮಾನವೀಯ ಘಟನೆ ಮುಂಬೈನಲ್ಲಿ ನಡೆದಿದೆ.

ಮುಂಬೈನ ಮಲಾದ್ ಈಸ್ಟ್ ನ ಕುರಾರ್ ಗ್ರಾಮದಲ್ಲಿ ಘಟನೆ ನಡೆದಿದ್ದು, ಕಾಮುಕ ವೈದ್ಯನನ್ನು ಖಲೀದ್ ಬೇಗ್ ಎಂದು ಗುರುತಿಸಲಾಗಿದೆ. ವೈದ್ಯಕೀಯ ಪರೀಕ್ಷೆಗಾಗಿ ತನ್ನ ಕ್ಲಿನಿಕ್‍ಗೆ ಬಂದಿದ್ದ ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿದ್ದಾನೆ.

ಕ್ಲಿನಿಕ್‍ನಲ್ಲಿ ಬಾಲಕಿಯನ್ನು ಪರೀಕ್ಷೆ ನಡೆಸುತ್ತಿದ್ದಾಗ ತಾಯಿ ಫೋನ್‍ನಲ್ಲಿ ಮಾತನಾಡಲು ಹೊರಗೆ ಹೋಗಿದ್ದಾರೆ. ಈ ವೇಳೆ ವೈದ್ಯ ಬಾಲಕಿಯ ಬಳಿ ಅಸಭ್ಯವಾಗಿ ವರ್ತಿಸಿದ್ದು, ಕಾಮದ ದೃಷ್ಟಿಯಿಂದ ಮುಟ್ಟಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಬಾಲಕಿಗೆ ಹೊಟ್ಟೆ ನೋವು ಹಾಗೂ ವಿಪರೀತ ವಾಂತಿಯಾದ ಕಾರಣ ಚಿಕಿತ್ಸೆಗಾಗಿ ತಾಯಿ ಕ್ಲಿನಿಕ್‍ಗೆ ಕರೆದೊಯ್ದಿದ್ದರು. ವೈದ್ಯರು ಪರೀಕ್ಷೆ ನಡೆಸುತ್ತಿದ್ದಾಗ ತ್ರಿವೇಣಿ ನಗರದ ನಿವಾಸಿಯಾಗಿರುವ ಬಾಲಕಿಯ ತಾಯಿಗೆ ಕರೆ ಬಂದಿದ್ದರಿಂದ ಮಾತನಾಡಲು ಹೊರಗೆ ಹೋಗಿದ್ದಾರೆ. ಈ ವೇಳೆ ವೈದ್ಯ ಅಸಭ್ಯವಾಗಿ ವರ್ತಿಸಿದ್ದಾನೆ.

ಘಟನೆ ನಂತರ ಈ ಕುರಿತು ಬಾಲಕಿ ತನ್ನ ತಾಯಿಗೆ ವಿವರಿಸಿದ್ದಾಳೆ. ಪರೀಕ್ಷೆ ಮಾಡುವ ನೆಪದಲ್ಲಿ ವೈದ್ಯ ಬಾಲಕಿಯ ಟಿ ಶರ್ಟ್ ಬಳಿ ಕೈ ಜಾರಿಸಿದ್ದಾನೆ. ವೈದ್ಯನ ವರ್ತನೆಯಿಂದ ಬಾಲಕಿ ಹೆದರಿದ್ದಾಳೆ. ಕ್ಲಿನಿಕ್‍ನಿಂದ ಹೊರಗೆ ಬರುತ್ತಿದ್ದಂತೆ ವೈದ್ಯನ ನಡವಳಿಕೆ ಕುರಿತು ತನ್ನ ತಾಯಿಗೆ ವಿವರಿಸಿದ್ದಾಳೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಮಗಳು ಈ ಕುರಿತು ವಿವರಿಸುತ್ತಿದ್ದಂತೆಯೇ ತಾಯಿ ಕುರಾರ್ ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದ್ದಾರೆ. ಪೊಲೀಸರು ಪೊಕ್ಸೊ ಕಾಯ್ದೆ ಹಾಗೂ ಲೈಂಗಿಕ ಕಿರುಕುಳಕ್ಕೆ ಸಂಬಂಧಿಸಿದ ಕಾಯ್ದೆಯಡಿ ಪ್ರಕರಣ ದಾಖಲಿಸಿ, ವೈದ್ಯನನ್ನು ಬಂಧಿಸಿದ್ದಾರೆ. ನಂತರ ವೈದ್ಯನನ್ನು ಸ್ಥಳೀಯ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಕೋರ್ಟ್ ಪೊಲೀಸ್ ಕಸ್ಟಡಿಗೆ ವಹಿಸಿದೆ. ಘಟನೆ ಕುರಿತು ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.